Taa,

ero yimaw tak iito xatken̂e tooto komo Xesus yakro.

On wara tî ketken̂e n̂examro yîwya.

Karireia pono komo pen tî waihkekn̂e Piratus okwe.

Kaan ya tîmsom me tokuthîrî komo yakn̂ipetaw rma n̂examro pen waihkekn̂e okwe,

ketken̂e tî yîwya.

2 On wara tî n̂eyukyakn̂e hara Xesus,

Ai ha okwe.

On wara wîîkes awya so,

ahce warai me n̂examro pen mîhtînoyatu,

Piratus nwaihkatho kom ha?

Kicicme ro mak xatken̂e ham n̂examro pen tpoyino komo yopo.

Ero ke n̂etwaiketken̂e okwe,

mîîketu na?

3 Pîra ro mak.

Kicicme awehtoponhîrî komo poxunkara rma awexitaw so amyamro pen meero mîwaiyaxe okwe n̂examro pen wara xa marha,

kekn̂e ti yîwya so.

4 On wara marha tî kekn̂e yîwya so,

Mînto Siroe po xa hara tooto pen waihyatken̂e 18 pen okwe.

Mîîmo n̂emacakekn̂e kawno pen,

yiipo so n̂emacakekn̂e okwe.

Ero ke waihyatken̂e.

Ahce warai me mîhtînoyatu n̂examro pen yehtopo hara?

Kicicme xatken̂e ham n̂examro pen anarî komo yopo,

ahnoro Xerusaren pono komo yopo.

Ero ke xa n̂etwaiketken̂e okwe,

mîîketu marha na n̂examro pen poko,

kekn̂e tî Xesus.

5 Pîra ro mak ha.

Kicicme awehtoponhîrî komo poxunkara rma awexitaw so amyamro pen meero mîwaiyaxe n̂examro pen wara xa marha okwe,

kekn̂e tî Xesus yîwya so.

Ero wa tî kekn̂e.

6 Taa,

ero yinhîrî tak anarî pokono wara tî n̂ekatîmyakn̂e hara Xesus yîwya so.

On wara tî kekn̂e,

Pahxa xakn̂e tînatkem.

Uupa yati xakn̂e yînatîrî.

Uupa chew tak n̂iir̂akn̂e piiku yepu hara.

Pahkî exiche tînatîrî yenso cekn̂e.

Emapona cekn̂e piiku yeperîrî yenso.

Okwe,

epetara rma xakn̂e okwe.

7 Ero ke tanton ya tak kekn̂e tînatîrî yenîn̂e ya,

Epetara ro mak nai on ham okwe.

Osorwaw tak nasî cimn̂ipu omohtopo on yeperîrî yenso.

Okwe,

exihra ro mak nasî eperîrî okwe.

Ero ke amakî kr̂a.

Tohnaw mak nasî tan.

Anarî mak n̂ekenkesî naatî kica,

kekn̂e tanton ya.

8 On wara tko n̂eyukyakn̂e hara noro yanton,

Apa,

cewn̂e cimn̂ipu xa hara ka n̂etkukmape.

Roowo ka wucukmaresî yîmîtwono.

Poxuretopo marha wiir̂asî yîmîtkoso.

9 Ero yinhîrî tak eperwataw,

n̂expe.

Epetara rma exitaw,

taa,

mamesî tak,

kekn̂e yîwya,

kekn̂e tî Xesus.

Ero wa tî kekn̂e centan̂e komo ya.

10 Taa,

anarî kaamo po Xutew yesenmetopo yaw takî tî xakn̂e Xesus.

Kepokaretopo po tî iito xakn̂e.

Panatanmekno tî n̂iir̂akn̂e.

11 Iito marha tî xakn̂e wooxam Kaan mîn yaw.

Anarî me thakwa tî xakn̂e noro okwe.

Tkatuhkem me thakwa tî xakn̂e.

Yîhkantan me thakwa tî xakn̂e okwe.

Worokyam yanme ero wa xakn̂e.

Pahkî tî xakn̂e ero wa,

18 cimn̂ipu tî.

12 Noro yenîche takî tî nan̂ikyakn̂e Xesus,

Oona ka amoko,

kekn̂e tî yîwya.

Mokuche on wara tî kekn̂e yîwya,

Aaci,

Kir̂wan̂he tak mas hara,

Awîrîmara tak nasî worokyam awîrîman̂enhîrî,

kekn̂e tî yîwya.

13 Ero wa kache tak noro napeyakn̂e Xesus.

Ero ke ero yimaw rma tî patawnonwakn̂e hara okre.

Ero ke,

Kir̂wan̂he ro mak Kaan nai ham okre,

kekn̂e takî tî.

Ero wa tî xakn̂e wooxam.

14 Xutew komo yenmekn̂e tko tî nîrwonakn̂e kica,

kepokaretopo po akir̂wamano rirî ke Xesus ya.

Ero ke on wara tî kekn̂e noro esenmexapu komo ya,

6 kaamo mak nai ketapickacho komo.

Ero warai po so mak amohcoko etakir̂wamaposo ha.

Kepokaretopo po reha mokuhra ro mak ehcoko etakir̂wamaposo,

kekn̂e tî yîwya so.

15 On wara tko tî kekn̂e Kporin komo yîmtaka,

Kir̂wan wa cesenposom mak amoro kica.

Ahce wa tko awoh komo miir̂atu amyamro?

Kepokaretopo po rma mexe awoh komo mîmhokexe wokpaxi aatome tak awya so.

Ero wa kepokaretopo po rma paaka mîmhokexe,

buhu marha.

16 Soroso moso takir̂wamapore n̂eexi kepokaretopo po.

Abraaw yepamtho moso wooxam.

Satanas nîwîrîmatho me thakwa xakn̂e pahkî,

18 cimn̂ipu okwe.

Ero ke on po rma takir̂wamapore n̂eexi,

kekn̂e tî Xesus Xutew komo yenmekn̂e ya.

17 Ero ke nîtîtmamyatken̂e mak Xesus xatî pîn komo,

eyuhtopo yîhtînopîra xatken̂e.

Anarî komo reha tî nahwowatken̂e Xesus poko mer̂pono pîn komo.

Miyan komo yakir̂waman̂e rma Moso okre,

ketken̂e tî.

Ero wa tî ketken̂e Xesus poko.

18 Ero yinhîrî tak on wara takî tî kekn̂e hara Xesus iitono komo ya,

Ahce wa xa nai kayaritomo me Kaan maywen me awehtopo komo awya so?

Ahce warai kyam wekatîmya ero pokono?

kekn̂e tî.

19 Mostata yatho wara mak nasî.

Pahxa mostata yatho n̂iir̂akn̂e tmararîyem tmararîn pona tînatîrî.

Ero yinhîrî tak natîkwakn̂e.

Kaw xa tak por̂mamyakn̂e weewe me porin me tak ha.

Ero yipu peremru pona tak torowo komo n̂etahsîyatken̂e.

Iina marha tak tîmîn n̂iir̂atken̂e.

Ero wa xa marha nasî kayaritomo me Kaan yehtopo,

kekn̂e tî Xesus.

20 Ero yinhîrî anarî pokono warai tî n̂ekatîmyakn̂e xa hara Xesus.

On wara tî kekn̂e,

Ahce wa nai hara kayaritomo me Kaan yehtopo?

Ahce warai kyam wekatîmya ero pokono hara?

kekn̂e xa hara tî yîwya so.

21 Puruma wahrututpamnotopo wara nas hara.

Ero yipu n̂esmekn̂e wooxam puruma cheka,

22 ritru cheka.

Ero yinhîrî tak wahrututpamyakn̂e puruma ahnoro.

Ero wa xa marha nasî Kaan maywen me awehtopo komo,

kekn̂e tî Xesus iitono komo ya.

22 Taa,

ero yinhîrî tak esama yaw takî tî cekn̂e Xesus,

Xerusaren yesamarî yaw.

Ewto imo pore so tî cekn̂e,

wahrai mko pore marha.

Ewto po so cexitaw panatanmekn̂o n̂iir̂akn̂e.

23 On wara takî tî kekn̂e anarî ewto pono Xesus ya.

Apa,

atararo natu Kaan nakir̂wamarî komo?

Asakî mak katî nat okwe?

kekn̂e tî yîwya.

24 On wara tî n̂eyukyakn̂e Xesus,

On wara wîîkes awya,

metata yaro cewomsom wara natu Noro nakir̂wamarî komo.

Amtaci xa mîn metata.

Mer̂pora men naxe cewom xatî komo,

n̂ehn̂etu makî tko okwe anarî komo.

Ero ke,

amtaci yaro oyewom xe ro mak wasî,

kacoko yaaro xa.

25 Amn̂e tak mîîmo yosom nawomyasî,

nahruyasî tak tîmîn metatan.

Ahruche mîîmo mkai mak tak maxe okwe.

Ero poko tak knei knei knei mîîkexe metata poko.

Apa,

amna yaka n̂he thakwa ahrunkakî,

mîîkexe ha re mîîmo yosom ya.

On wara tko Noro aweyukyaxe so.

Oyakrono pîn me kîhtînoyaxe so okwe,

Ahtononhîrî na amyamro,

kesî tak Noro amtaka so,

kekn̂e tî Xesus.

26 On wara tak mîîkexe yîwya ero yimaw,

Apa,

awakro rma amna n̂eseresmekn̂e,

wok marha amna n̂eer̂akn̂e awakro.

Amna yewton po marha panatanmekno miir̂akn̂e,

mîîkexe yîwya.

27 Amtaka so tko Noro n̂eyukyas xa hara,

Pîra ro makî,

ahtononhîrî na amyamro.

Etocoko ohyai.

Kicicitho pokono mak amyamro,

kesî men okwe awya so.

28 Ero yimaw tak Kaan maywen komo meen̂axe iito yîhyaw.

Abraaw meen̂axe,

Isake marha,

Xako marha.

Weronomano rin̂enho komo marha meen̂axe ahnoro.

Ero warai komo meen̂axe Kaan maywen komo iito.

Amyamro reha maxe cen̂epesom me okwe.

Ero ke mîwracexe ro mak okwe,

mîyokrececenwaxe marha okwe.

29 Mehxa mehxa warai komo tak mokyaxe amn̂e Kaan maywen komo yîhyaw ceseresmachome so.

Resce n̂ixan komo mokyaxe,

oesce n̂ixan komo marha,

nohce n̂ixan komo mokyaxe,

suu n̂ixan komo marha.

Ero warai komo mokyaxe amn̂e Kaan maywen komo.

30 On wara tak naxe ero wa mohxapu komo,

esemtaka tak naxe anarî komo yakro.

Poturme tak naxe anarî komo mapitawno me ehxapunhîrî komo.

Mapitawno me tak naxe anarî kom hara poturme ehxapunhîrî kom hara.

Ero wa tak naxe amn̂e,

kekn̂e tî.

Ero wa tî kekn̂e Xesus iitono komo ya.

31 Taa,

ero yimaw tak Parisew komo takî tî mokyatken̂e Xesus yaka.

On wara tî ketken̂e yîwya,

Ai,

miya men etok ha anarî rowon pona.

Awaihka xe tî nai Eroces okwe,

ketken̂e tî.

32 On wara tî kekn̂e Xesus yîwya so,

Rokohci warai mak mîk kica Eroces.

On wara xa matko katatko yîwya,

On wara tî nîîke Xesus awya,

Worokyam cokorî ka wen̂epesî,

akir̂wamano marha ka wiir̂asî.

Oroto wiir̂asî,

pahxaxa marha wiir̂asî,

mîk ha mehxan po tak n̂ex ha.

Wîtîhkesî tak ero po,

kesî Xesus,

kacoko yîwya.

33 Ero ke oyemyawno poko ka was oroto,

pahxaxa marha,

mîk ha mehxan po marha.

Amn̂e tak kwaihyasî Xerusaren po.

Weronomano rin̂e pen komo waihtopo mera thakwa nas anarî ewto mko.

Xerusaren mak nasî noro yipu komo waihtopo me,

kekn̂e tî.

Ero wa tî kekn̂e Xesus yîwya so.

34 Ero yinhîrî tak on wara kekn̂e Xesus,

Ai Xerusaren pono komo,

Xerusaren pono komo okwe.

Aweronoman̂enhîrî pen komo waihkan̂enho mak amyamro okwe.

Ahyaka so on̂en̂epetho komo metapetken̂e okwe toh ke.

Akurunpe xe so cma re wîxakn̂e emapona.

Kapikara yon nan̂ikyasî tîmxîkrî taporî mamaka yukurunpetome,

ero wa xa marha akurunpe xe wîxakn̂e Ow hara.

Ohyaka tko amoku xera ro mak mîxatken̂e okwe.

35 Ero ke pohra tak men nasî awewtonthîrî komo amn̂e.

Enko xe amn̂e.

Ow tak menîhkayaxe okwe.

Amn̂e mak Ow meen̂axe hara.

Kir̂wan Mîkro okre Kporin komo yanme tmohsom,

kan̂e me awexitaw so mak tak Ow meen̂axe hara,

kekn̂e tî,

Ero wa tî kekn̂e Xesus Xerusaren pono komo ya.