Taa,

ero yinhîrî tak Xesus takî tî cekn̂e Parisew komo yenîn̂e mîn yaka eseresmaxi.

Kepokaretopo po tî cekn̂e.

Taa,

iito marha xatken̂e Parisew yakrono komo yaake.

N̂examro takî tî Xesus n̂entîketken̂e.

2 Iito marha tî xakn̂e anarî hara.

Tîkrîkrîn̂em tî mîk xakn̂e okwe.

Xesus yeepataw tî xakn̂e.

3 Ero ke on wara takî tî kekn̂e Xesus Moises nmewretho pokono komo ya,

Parisew komo ya marha,

Ahce wa tko nîîke kpanatanmetopo kepokaretopo poko?

Okoh komo takir̂wamapore rma kepokaretopo po yiixe awexitaw so,

nîîke katî?

kekn̂e tî yîwya so.

4 Tîî ketken̂e makî tî.

Eikura ro makî tî xatken̂e.

Ero yinhîrî amorî poko takî tî tîkrîkrîn̂em nahsîyakn̂e Xesus.

Nakir̂wamekn̂e takî tî okre.

Yîkrîkrîmra takî tî xakn̂e.

Ero yinhîrî takî tî n̂en̂epekn̂e hara.

5 Ero yinhîrî tak on wara tî kekn̂e Xesus iitono komo ya,

Ahce wa matu amyamro ewtarî yaka awoh komo yepîrketaw buhu pen,

paaka pen anarimaw?

Kepokaporetopo po rma epîrketaw ahce wa matu?

Anmîra katî matu yohno?

kekn̂e tî yîwya so.

6 Nîtîtmamyatken̂e makî tî.

Camkî thakwa makî tî xatken̂e Xesus yeyuhtopo poko.

Ero wa tî xatken̂e.

7 Ero yinhîrî tak ceseresmayem komo takî tî n̂een̂akn̂e Xesus.

Parisew nan̂ikîtho komo tî.

Mîîmo yaka cewomuche so tapon komo takî tî men̂eketken̂e.

Kir̂wan makî tî men̂eketken̂e tapon komo,

yaana komo yapon.

Ero wa tapon komo men̂ekarî tî n̂een̂akn̂e Xesus.

Ero ke takî tî anarî pokono warai n̂ekatîmyakn̂e yîwya so n̂examro panatanmetopo.

8 On wara tî kekn̂e yîwya so,

On wara na matu anarimaw so erewusmano na n̂iir̂a apoyino,

tumumuru pitatopo yimawno me tî n̂eseresme.

Awan̂ikya na aweseresmachome.

Ero ke iina awcetaw so eseresmaxi ahce warai pona meremetu awapon komo pona?

Kyopono yapon pona xa eremara ro mak cexpore nasî.

Mokya ha men anarî hara an̂ihxapu xa marha.

Ayopono me cehsomu n̂he na mîk.

9 Noro yipu mokuche awan̂ikn̂enhîrî komo men mokya ahyaka.

On wara nîîke awya,

Moso yapon tîmko awaponthîrî,

nîîke awya.

Ero ke tîhyapamso tak mîîcesî miya eremaxi yîxawyakan komo yapon pona tak okwe.

10 On wara xa ehcoko ha ke eseresmaxi awan̂ikyataw so,

iitono komo xawyakan yapon pona ka eremacoko.

Ero yinhîrî tak na mokya awan̂ikpon̂enhîrî komo ahyaka.

Awya tak nîîke on wara,

Oyakno,

xiya n̂he amok ha kyopono yapon pona n̂he eremaxi,

nîîke awya.

Ero ke tîyopono komo wara tak awen̂atu aweseresmayem komo.

11 Ero wa xa marha nasî Kaan hara apoko so,

kyopono xa ow ha,

kan̂e me awexitaw so,

kîxawyakan me tak awenpexe so okwe.

Kîxawyakan me awesenpetaw so reha kyopono me so xa matko tak awenpexe so Kaan,

kekn̂e tî.

Ero wa tî kekn̂e Xesus ceseresmayem komo ya.

12 Ero yinhîrî takî tî on wara kekn̂e Xesus tan̂ikn̂enhîrî ya,

On wara wîîkes awya oyakno,

erewsî na miir̂a xa hara amn̂e.

Ero yimaw ahce warai komo man̂ikya eseresmaxi?

On wara wîîkes awya,

aaxatî komo an̂ikîra esko,

awakno komo marha,

ayanan komo marha,

tupurantayem komo marha.

Ero warai komo an̂ikîra ro mak esko.

Noro yipu komo yan̂ikyataw rma awya n̂examro makîrha tak na awan̂ikya hara amn̂e aweseresmachome marha takro so.

Tan̂ihtoponhîrî komo yepetho me rma na awan̂ikya.

13 On wara xa esko,

erewusmano ciir̂ataw awya yupurantamnî komo xa an̂ihko eseresmaxi.

Apohnî komo marha,

yîhrepun komo marha,

ewuhnî komo marha.

Ero warai komo xa an̂ihko.

14 Noro yipu komo wakretaw awya,

awakren̂e me marha nasî Kaan hara.

Esepanpîra ro thakwa mak naxe noro yipu komo anan̂ikîthîrî komo.

Ero ke Kaan xa tak ero yipu yepetho nîmyas awya amn̂e takîhsom komo pakacho po,

kekn̂e tî.

Ero wa tî kekn̂e Xesus tan̂ikn̂enhîrî ya.

15 Taa,

Xesusu mtapotarî yentache on wara takî tî kekn̂e iitono,

Xesus yeseresmayemu rma,

Tawake xa tai ham okre amn̂e Kaan yewton po keseresmetaw tak,

kekn̂e tî.

16 On wara tko tî n̂eyukyakn̂e Xesus,

Pahxa tupurantayem xakn̂e.

Erewsî n̂iir̂akn̂e noro,

mer̂pora ro mak.

Amohcoko amn̂e eseresmaxi,

kekn̂e tak tpoyino komo ya.

Mer̂pono pîn komo ya ero wa kekn̂e.

17 Amn̂e tak erewsî ciitîkache tanton n̂en̂epekn̂e an̂ikno riso.

Pahxa weronomaxapu komo tak nan̂ikpekn̂e yîwya.

Amohcoko takî.

N̂etake tak ha tî erewsî,

kaxi tî cekn̂e.

18 Pîra ha tî okwe.

Ahce na pona makî tî n̂etkurunpetken̂e okwe.

Omararîn thakwa wahsî.

Ero ke enso kîwcesî,

kekn̂e anarî tan̂ikn̂e ya.

Mokuhra tî nai ha,

kasko men awen̂epen̂enhîrî ya.

19 On wara kekn̂e anarî hara,

5 waponko paaka taknoye re cehsom.

Ero ke enso kîwcesî.

Mokuhra tî nai ha,

kasko men awen̂epen̂enhîrî ya,

kekn̂e noro hara okwe.

20 Opici n̂e ro wahsî ow.

Ero ke mokuhra wasî,

kekn̂e tî anarî xa hara okwe.

Ero wa so tî ketken̂e ahnoro mak okwe.

21 Ero ke cen̂epen̂enhîrî yaka tak cekn̂e hara an̂ikno rin̂enho.

Mokuhra so tî nat okwe,

kekn̂e tî yîwya.

Ero ke nîrwonakn̂e takî tî erewsî mîtîn.

On wara tî kekn̂e tanton ya,

Yohno etok hara esama yaw so.

Ewto pore so marha etoko,

cewyarono komo yari so marha etoko.

En̂exa tak ekno cirko.

Yupurantamnî komo ehta,

amohnî komo marha,

ewuhnî komo marha,

yîhrepun komo marha.

Ero warai komo ehta,

kekn̂e erewsî mîtîn tanton ya.

22 Ero ke noro yipu komo tak n̂ekyakn̂e.

Ekîche on wara tak kekn̂e ekn̂enhîrî cen̂epen̂e ya,

Apa,

wek ha re amtapotachonhîrî yaw roro.

Eken ken̂e rma tko nai amîn,

kekn̂e yîwya.

23 Taa,

etoko xa hara esama yaw.

Peen chere marha etoko.

Iito so tooto yeen̂ataw awya ek ha ohyaka.

Anmenkera so rma ek ha.

Yaake eeko tawronohkatîkaxi cehso ro omîn.

24 On wara wîîkes awya,

on̂etakatho poko eseresmara ro mak men naxe yihcirî me an̂ihxapu komo reha,

kekn̂e erewsî mîtîn,

kekn̂e tî Xesus.

Ero wa tî kekn̂e ceseresmayem komo ya.

25 Ero yinhîrî tak Xesus takî tî cekn̂e hara esama yaw.

Tooto pen marha tî cetken̂e Noro yakro mer̂pono pîn komo xa hara.

Esama yaw rma takî tî Xesus n̂etaknamekn̂e takro tmohsom komo wece.

On wara tî kekn̂e yîwya so,

26 Oyakrono me amoku xe na matu.

Ero wa amoku xe awexitaw so on warai komo tîpînînkapore nasî,

aamo komo,

anocwan komo,

apici komo,

amxîkrî komo,

awakno komo,

awepeka komo.

Ero yipu komo yîpînînkara awexitaw so onpanatanmekrî mera maxe okwe.

27 On wara marha cexpore nasî,

anarîrî ro komo tahsîpore nasî tpanaxkem.

Owenari roro tmohsom me marha cexpore nasî.

Ero wa exihra awexitaw so onpanatanmekrî mera ro mak maxe okwe.

28 Ahce wa xa matu mîîmo ciri xe awexitaw so kawno ha?

On wara xa maxe,

meremexe cokorî ha ka ciitopo yepetho yukuknomachome.

Ecenarî xa nai ham opurantan mîîmo ciitopo yepemacho,

kachome ika wukuknomesî,

mîîkexe.

29 Apurantan komo ka yukuknomara awexitaw so n̂enahca na okwe.

Mapata mak na miir̂at okwe.

Mîîmo xa ciitîkara rma na mat okwe apurantan komo yenatîrî ke.

Ero ke mapatatho yenîche tak apoyino komo ya amn̂e n̂ewrexe tak apoko so.

30 On wara kexe,

Tîmînî cma re moso n̂iire ha re.

Ciitîkara rma tko n̂ehxe ham okwe,

kexe mak tak apoko so okwe.

31 Taa,

ahce wa natu kayaritomo kom hara awya so?

Anarî komo yakro etar̂maxi tîto xe cexitaw kayaritomo n̂eremesî cokorî kapu.

Tmaywen komo yakro ka n̂esencesî.

20.000 mîkyam kopi kwaparî maywen komo.

10.000 makî reha kîwyam okwe.

Kar̂pe ma re tatu?

kacho poko ka n̂esencexe.

32 Pîra men taxe okwe,

n̂examro yar̂mara men taxe okwe,

ketaw reha tko mooxe rma exitaw so waapa komo tmaywen tak n̂en̂epesî yîhyaka so yîrwoxinkaxi.

Ahce tî nîmya amna kayaritomon awya so etar̂mara ro mak awehtome so amna yakro,

kan̂e n̂en̂epesî tmaywen komo.

Ero wa natu.

33 Ero ke ero wa xa marha ehcoko amyamro hara,

onpanatanmekrî me awexi xe awexitaw so awemyawno komo takî yîpînînkacoko.

Ayanan komo marha yîpînînkacoko.

Ero yipu ahnoro yîpînînkara awexitaw so onpanatanmekrî mera ro mak maxe okwe,

kekn̂e tî Xesus.

34 On wara marha tî kekn̂e yîwya so,

tpoxwe nasî yîmîtî okre.

Epoxunkache tko ahce wa thakwa re tîtpoxuret hara kotî komo?

35 Kicicme mak nasî kica epoxunkaxapu.

Roowo pona ar̂mara tasî.

Yukpurukpuruntho pona ar̂mara marha tasî.

Miya kr̂a mak tar̂mesî mooxe.

Ero wa wîîkes awya so.

Omtapotarî men entacoko entan̂e me awexitaw so,

kekn̂e tî.

Ero wa tî kekn̂e Xesus takro tmohsom komo ya mer̂pono pîn komo ya.