Taa,

ero yinhîrî tak anarî komo takî tî mokyatken̂e Xesus yaka.

Kayaritomo purantan yahsîn̂e komo,

kicicitho komo meero,

ero warai komo tî mokyatken̂e.

Xesusu mtapotarî yentaxi tî mokyatken̂e.

2 Noro yipu komo takî tî n̂een̂atken̂e Parisew komo,

Xutew panatanmetopo mewren̂e komo marha.

Ero ke takî tî Xesus nîwîrîyaketken̂e.

On wara tî ketken̂e Noro poko,

Kicicitho komo xatî Moso kica.

N̂eseresmesî kica akro so,

ketken̂e tî Noro poko.

3 Ero ke anarî pokono wara takî tî n̂ekatîmyakn̂e Xesus yîwya so.

On wara tî kekn̂e,

4 Ahce wa kyam awoh komo miir̂atu amyamro oper̂a yosom komo?

10 exitaw awoh komo,

noronhîrî yehcamnopuche tak anarînhîrî pen cewn̂e mak,

ahce wa tak mat ha?

99 komo ka mînomyaxe iito rma pohnîntaw.

Ehcamnoxapu yeposo tak mîîcexe censo ro tak ha.

5 Enîche tak amotaw so tak mekyaxe hara mîîmo yaka hara.

Tawake tak maxe enîrî ke awya so.

6 Amîn yaka amokuche so hara amîtwono komo tak man̂ikyaxe,

yiixe awehtopo komo marha.

Oyakro ahwotatamcoko,

mîîkexe tak yîwya so.

Oyokutho wenwo hara okre oper̂a pen,

tacixapunhîrî pen,

mîîkexe.

7 Ero wa xa marha nahwowaxe kah yawno komo cewn̂e mak exitaw kicicme cehtoponhîrî poxunkan̂e.

Nahwowaxe rma re takîhsom komo poko reha,

ero warahra nhe hatko,

yînpoxunkarî exihtorî ke hara.

8 Taa,

anarî pokono warai xa hara wekatîmyas awya so,

kekn̂e takî tî Xesus yîwya so.

Ahce wa natu wooxam kom hara exepeyun komo yehcamnopuche cewn̂e mak,

10 yaknonho?

Weeyu tak potuhcexe.

Mîîmo marha naiwexe.

Ero wa n̂epor̂atu miya so ro mak cexepeyunthîrî komo censo ro tak.

9 Enîche tak tîmîtwono komo nan̂ikyaxe,

yiixe cehtopo kom ha.

Oyakro ahwotatamcoko,

kexe tak yîwya so.

Oyexepeyuntho wenwo hara okre ehcamnoxapunhîrî,

kexe yîwya so.

10 Ero ke on wara wîîkesî xa hara awya so,

nahwowaxe xa Kaan yancun komo.

Ero wa naxe cewn̂e mak exitaw kicicme cehtoponhîrî poxunkan̂e,

kekn̂e tî.

Ero wa tî kekn̂e Xesus tîhyaka mohxapu komo ya.

11 Ero yinhîrî on wara tî kekn̂e hara Xesus yîwya so.

Pahxa tooto xakn̂e.

Asakî xakn̂e yumumuru.

12 On wara xakn̂e mahtîkîthîrî,

tîîm yakro nîmtapowakn̂e,

Apa,

kekn̂e,

awaipuche amn̂e awemyawnonhîrî raconho tak wahsîyasî.

Oroto rma tko onahsîrî yahsî xe wasî awaipîrarî rma ha ka.

Ero yipu cma re mîmyas owya oroto,

kekn̂e tîîm ya.

Ero ke cemyawnonhîrî nîraconkekn̂e yîîm.

Yîraconhîrî tak nîmyakn̂e mahtîkîthîrî ya,

yîraconhîrî nîmyakn̂e poturu ya hara.

13 Asakî ro enmapuche tak cemyawno n̂enkayakn̂e mahtîkîthîrî kumixi yaka.

Enkapuche tak mooxe cekn̂e anarî komo rowon pona.

Iito cexitaw wara ro makî tî kekn̂e okwe.

Wooxam poko xakn̂e,

kawaxiyem poko marha.

Tupurantanthîrî nukuhrekn̂e ro mak okwe.

Ero wa xakn̂e noro okwe,

kar̂pamxan.

14 Taa,

yupurantanthîrî yirihtîkache tak on wara tak xakn̂e iitono komo mararîn,

atîhtara tak xakn̂e okwe.

Rooma poko thakwa xatken̂e iitono komo ahnoro.

Noro pen meero nîromanakn̂e.

15 Iito xakn̂e kuuxi ke tokyem.

Noro yaka tak cekn̂e.

On wara kekn̂e yîwya,

Ahyaw cma oyetapicka xe wasî onahrî yepetho,

kekn̂e.

Ero ke noro tak nantomekn̂e tok nahmacho poko.

Woskara po xakn̂e kuuxi,

iyoku.

Ero ke iina cekn̂e yînahmaxi.

16 Maara warai ke nînahmekn̂e kuuxi.

Rooma poko ro mak tî xakn̂e kar̂pamxan.

Kuuxi naputho yapu xe ro mak tî xakn̂e rooma ke thakwa.

On ha anahrî,

kahra ro makî tî xatken̂e iitono komo yîwya.

17 Amn̂e tak on wara takî tî noro n̂esehtînoyakn̂e,

Apapa yaw naxe yaake epethîrî pona cetpickaxmu komo.

Turke cma naxe n̂examro oroto.

N̂etîmcesî rma iyuru komo.

Ow penî reha kwaihyasî ro mak okwe rooma yaka.

18 Ero ke apapa yaka tak kîwces hara.

On wara wîîkesî yîwya,

Apa,

kicicme ro mak wîxakn̂e kica apoko,

kah yawno poko marha,

wîîkesî.

19 Ero ke,

Omumuru moso,

kacho mera tak na wai awya.

Awanton me kyam mak tak ow cirko,

wîîkesî tak apapa ya,

kekn̂e tî kar̂pamxan.

20 Ero ke tîîm yaka tak cekn̂e hara.

Mooxe rma ka exitaw tumumuru n̂een̂akn̂e yîîm.

Yîpînîn yaw xa xakn̂e.

Kar̂pe tak cekn̂e yîhyaka.

Nîpîmîmiyakn̂e tak,

n̂ewcokekn̂e marha.

Ero wa tî xakn̂e yîîm tumumuru poko.

21 On wara kekn̂e kar̂pamxan tîîm ya,

Apa,

kicicme ro mak wîxakn̂e kica apoko,

kah yawno poko marha.

Ero ke,

Omumuru moso,

kacho mera tak na wai awya,

kekn̂e yîwya.

22 On wara tko kekn̂e yîîm tanton komo ya,

Poono ehta yohno kir̂wan xa.

Moso ya tak amrupoko.

Oyamoyeknarî marha yumunko amorî pona.

Yîhtarî marha ehta.

23 Paaka xîkrî marha ehta yupurukrexapu.

Paraxkacoko,

yupucoko marha.

Ceseresmacerî tak moso poko kahwotachome so,

kekn̂e yîîm.

24 Waixapu wa mak xakn̂e moso okwe omumuru.

Pakaxapu wa tak nas hara okre.

Ehcamnoxapu wa marha xakn̂e okwe.

Ceen̂axe tak hara okre.

Ero ke nahwowatken̂e noro yawno komo yumumuru mokrî ke hara.

25 Taa,

ahwowataw so mararî po ka xakn̂e anarî hara yumumuru,

poritomo ha.

Ero yimaw tak mîîmo wece mokyakn̂e hara.

Mîîmo pahnokache waano tak n̂encekn̂e,

manîmtopo komo marha n̂encekn̂e.

26 Ero ke tîîm yanton nan̂ikyakn̂e.

On wara tak kekn̂e yîwya,

Ai,

ahce poko matu iito mîîmo yaw?

kekn̂e yîwya.

27 Awakno takî tî moko hara,

kekn̂e yîîm yanton.

Ero ke paaka xîkrî yupurukrexapu paraxkapo aamo amna ya tawake cexirî ke awakno mokrî ke hara.

On wara nîîka,

kir̂wan̂he tak moko hara omumuru kar̂pe rma.

Ero ke tahwotacerî,

nîîka aamo,

kekn̂e yîîm yanton yîwya.

28 Ero yipu yentache nîrwonakn̂e tak poritomo.

Mîîmo yaka tohra rma xakn̂e okwe.

Ero ke yîîm n̂epatakekn̂e tumumuru yakro yîmtapotaxi.

Ahce kacho mokuhra mai?

Amoko rma ha ahwotaxi amna yakro,

kekn̂e yîwya.

29 On wara tko noro n̂eyukyakn̂e tîîmî mtaka,

Yaake cimn̂ipu ketapickai awemyawno poko.

Oyantometaw awya awanwekîra ro mak wehxe mehxa ro.

Noro yipu rma kootu xîkîtho tîmîhra mîxakn̂e owya oyahwotachome oyakrono komo yakro.

30 Oroto tak moko noro amumuthîrî kica.

Apurantanthîrî yukuhren̂enho mîkro kica mîk hak wooxam komo poko,

kîîrî pohkan̂e ro komo poko kica.

Noro yipu mokuche rma paaka xîkîtho mîparaxkapo awahwotachome,

kekn̂e poturu tîîm ya.

31 Okopuci,

kekn̂e hara yîîm yîwya,

ohyaw roro masî amoro reha.

Awemyawno me rma nasî oyemyawno ahnoro.

32 Tahwotapore rma tko nas ha awakno poko,

tawake cexpore nasî mokrî ke hara.

Waixapu wa mak xakn̂e okwe.

Pakaxapu wa tak nas hara okre.

Ehcamnoxapu wara marha xakn̂e.

Oroto ceen̂as hara.

Ero ke tahwotapore nasî noro mokrî ke,

kekn̂e yîîm poritomo ya,

kekn̂e tî Xesus.

Ero wa tî kekn̂e Xesus tîhyaka mohxapu komo ya.