Taa,

ero yinhîrî tak tînpanatanmekrî komo mak takî tî panatanmekyakn̂e Xesus.

On wara tî kekn̂e,

Pahxa tî xakn̂e tupurantayem.

Noro yemyawno yenîn̂e marha xakn̂e.

Kicicme tko tî n̂encekn̂e cemyawno yenîn̂e yehtopo.

Awemyawnonhîrî makî tî noro nukuhre okwe,

kacho tî n̂encekn̂e tupurantayem.

2 Ero ke cemyawno yenîn̂e tak nan̂ikyakn̂e.

On wara kekn̂e yîwya,

Kicicme wences okwe awehtopo.

Ero ke oyemyawno tak yukuknomakî ahnoro.

Yukuknomache awya yukuknomacho tak mewreko karita yaka on̂enîrî.

Ero yinhîrî tak etoko.

Oyemyawno yenîn̂e me exihra tak esko,

kekn̂e tupurantayem cemyawno yenîn̂e ya.

3 Ero ke on wara tî n̂esehtînoyakn̂e emyawno yenîn̂e,

Ahce poko tak wai okwe?

Oyen̂epesî tak okwe oyapickan̂enho.

Roowo katî wahce onahrî yepetho?

Pîra thakwa was okwe.

Cehsamaxmu me makî katî wai mîk hak poko?

Pîra marha was okwe,

kîhyapamyasî kopi.

4 On wara kyam wasî,

anarî komo natu noro maywen,

Amn̂e kepemesî,

kan̂e komo yîwya.

Noro yipu komo tak wakresî,

owakrechome n̂examro hara amn̂e.

Oyantoman̂e yemyawno yenîn̂e mera oyexiche tak oyetarî tak n̂enpexe n̂examro tîmîn komo yawno rma,

kekn̂e tîhnaw.

5 Ero ke tupurantayem maywen komo tak nan̂ikyakn̂e,

Amn̂e kepemesî,

kan̂enhîrî komo ahnoro.

Anarî mokuche on wara kekn̂e yîwya,

Atî wicakî apapa yewmyawnonho mepethîkai amoro?

kekn̂e yîwya.

6 Nnn,

katî wepethîkai ow.

3.000 ritru wepethîkai okwe,

kekn̂e noro.

Taa,

kekn̂e emyawno yenîn̂e,

oona ka eremakî.

Akaritan yaka tak mewreko 1.500 ritru wicakî mak ero yipu yepethîkacho tak nai ha,

kacho.

Ero ke ero wa kacho mewrekn̂e katî yepethîkan̂enho.

7 Ero yinhîrî anarî mokyakn̂e hara tupurantayem yemyawnonho yepethîkan̂enho hara.

Amoro hara,

kekn̂e emyawno yenîn̂e yîwya,

atî wicakî mepethîkai amoro?

kekn̂e yîwya.

Puruma yatho wepethîkai owî reha 3.000 ritru wicak okwe,

kekn̂e.

Taa,

akaritan yaka tak mewreko 2.400 ritru wicakî mak ero yipu yepethîkacho tak nai ha,

kacho,

kekn̂e yîwya hara.

Ero wa so kekn̂e tupurantayem yemyawno yenîn̂e ahce na yepethîkan̂enho komo ya.

8 Ero yinhîrî tak ero wa mewrepotoponhîrî takî tî n̂encekn̂e tupurantayem.

Ero ke on wara kekn̂e cemyawno yenîn̂e ya,

Ai ha,

kekn̂e,

takîhso rma mai ham,

kekn̂e tî yîwya cemîknon̂enhîrî ya rma,

kekn̂e tî Xesus.

Ero warai tî n̂ekatîmyakn̂e yîwya so.

Taa,

on wara takî tî kekn̂e xa hara Xesus yîwya so,

takîhso n̂he naxe roowo pono ro komo orotono komo poko.

Weeyu pono ro komo yopo n̂he naxe takîhso noro yipu komo poko.

9 Ero ke wakreno ciicoko apurantan komo ke aaxatî komo me tak ehtome so.

Akiciciren̂e komo me nasî puranta okwe.

Ero ke ero yipu rma tîmcoko mîk hak ya aaxatî me tak ehtome so.

Ero yinhîrî tak apurantan komo yenatîche tak awetarî komo n̂enpexe anwakrethîrî komo awya so.

Eroromero tak yîhyaw so maxe tîmîye,

tînahke marha,

kekn̂e tî Xesus tînpanatanmekrî komo ya.

10 On wara marha wîîkes awya so,

kekn̂e xa hara Xesus yîwya so,

emîknono cirihra ro mak awexitaw so asak man poko,

emîknono cirihra marha maxe mer̂pono pîn poko hara.

Emîknono ciir̂ataw reha awya so asak man poko,

emîknono marha miir̂axe mer̂pono pîn poko hara.

11 Kicicitho me ahsîxapunhîrî mîn anarimaw puranta.

Ero yipu poko rma cesemîknosom me awexitaw so onoke ma re nîmya awya so yaarono xa tak awemyawno,

cepethîkem xa tak.

Tîmîhra ro mak naxe okwe.

12 Cesemîknosom me awexitaw so anarî komo yemyawno poko onoke xa ma re nîmya awya so awemyawno ro komo tak.

Pîra okwe,

tîmîhra ro mak naxe okwe.

13 Asakî awantoman̂e komo exitaw mehn̂exe ro mak okwe ewetîtopo poko.

Anarî xe mak maxe,

anarînhîrî xera men maxe okwe.

Anarî ponaro xa maxe.

Anarînhîrî mîwîrîyakexe okwe.

Ero wa thakwa maxe asakî awantoman̂e komo exitaw.

Ero ke on wara men maxe,

puranta ponarono me xa awehtîketaw so,

Kaan ponarono me exihra thakwa maxe okwe,

kekn̂e tî Xesus.

Ero wa tî kekn̂e tînpanatanmekrî komo ya.

14 Taa,

ero yimaw iito marha tî xatken̂e Parisew kom hara.

N̂examro marha tî n̂encetken̂e Xesusu mtapotarî tpanatanmecho kom ha.

Poxumra ro makî tko tî n̂encetken̂e.

N̂etaporetken̂e makî tî kica Xesus poko puranta xatî me cexirî ke so.

15 On wara tko Xesus n̂eyukyakn̂e yîmtaka so,

Kir̂wanî ro mak amna okre,

kan̂e mak amyamro tooto komo n̂entarî me mak okwe.

Aropotarî komo rma tko n̂een̂asî Kaan.

Tooto warahra nasî Noro.

On wara kexe tooto komo reha,

puranta mak tahsîpore nas okre,

kexe.

Pîra ro mak,

kesî reha Kaan.

Kicicme maxe kica ero ponaro mak awexitaw so,

kesî Noro reha.

16 Pahxa ka Moises pen nmewretho mak xakn̂e panatanmekno ritopo me.

Ero yinhîrî tak weronomano rin̂e pen komo mtapotarî marha ka xakn̂e panatanmekno ritopo me.

Xuaw reha tak n̂ihciyakn̂e Kaan maywen me awehtopo komo poko panatanmekno ritopo me hara.

Ero ke Kaan maywen me cexi xe tak naxe tooto komo ahnoro.

17 On wara tko wîîkes awya so,

n̂ehcamnoyasî rma roowo pen amn̂e kaapu pen marha,

apehceme me n̂ehcamnoyasî.

Pîra reha nasî Moises pen nmewretho.

Ehcamnopîn me ro mak nasî ero reha,

cewn̂e mewru rma ciki ehcamnopîra nasî.

18 On wara marha wîîkes awya so,

Apici komo yai awetowyataw so anarî yahsîtome hara,

apici pîn pokono ro wara rma maxe okwe.

Ciin̂onhîrî yai etowxapu ahsîra marha ehcoko apici komo me.

Noro yipu yahsîyataw rma awya so kicicme men maxe apici komo yai rono me rma kica,

kekn̂e tî.

Ero wa tî kekn̂e Xesus Parisew komo ya.

19 Taa,

ero yinhîrî tak tî on warai n̂ekatîmyakn̂e hara Xesus.

On wara tî kekn̂e.

Pahxa xakn̂e tupurantayem.

Kir̂wan xa xakn̂e noro ponon okre,

tîswayem.

Riin̂u kahxapu marha tî xakn̂e,

kir̂wanî ro riin̂u.

Cepethîkem marha xakn̂e yînahrî enmar̂atîxera.

20 Taa,

noro mîtwo xakn̂e yupurantamnî hara okwe.

Rasaru mîk xakn̂e noro yosotî.

Ereh ken̂arî xa mîk xakn̂e oko.

Noro n̂ekyatken̂e iitono komo tupurantayem mîn potaka.

Iina tak noro n̂eremanmekyatken̂e.

21 Xapari mokyakn̂e noro yerekrî yemeso.

Nîromanakn̂e thakwa okwe.

Tupurantayem nahrî pupuntho yapu xe mak xakn̂e emarakaxaputho.

22 Ero yinhîrî tak yupurantamnînhîrî pen waihyakn̂e.

Waipuche noro naar̂atken̂e ancu komo Abraaw mîtkoso.

Ero yinhîrî tupurantayemînhîrî pen makîrha tak waihyakn̂e hara.

Noro yokoputho tak nahruyatken̂e iyananînhîrî komo roowo cheka.

Ero wa xatken̂e.

23 Taa,

wehto imo ywaw tak xakn̂e oco tupurantayemînhîrî pen.

Iito cexitaw tak n̂esewyar̂akn̂e.

Mooxe tak n̂een̂akn̂e Abraaw.

Rasaru marha n̂een̂akn̂e Abraaw mîtwo rma.

24 Ero ke Abraaw ya tak kekn̂e kar̂pe,

Apa Abraaw,

opînîn yaw n̂he thakwa esko,

Rasaru cma re men̂epes ohyaka.

Tamorî ka nukpepe tuuna kwaka on̂uru wotmerecho.

N̂erewasî ro mak oco on wehto,

kekn̂e tupurantayemînhîrî.

25 Okopuci,

kekn̂e Abraaw yîwya,

pahxa awehtoponhîrî komo yîhtînoko hara.

Waipîra ka awexitaw mesewakomekn̂e.

Cerewîmtopo poko makî reha xakn̂e moso Rasaru.

Oroto tak cerepore nasî moso.

Amoro tak merewas hara emtaka.

26 On wara marha nas okwe,

arenarî imo nasî okwe kyotaw so iitono ro kwahkoton̂e komo.

Watohra ro thakwa mak naxe tantono komo ahyaka totohme so.

Amyamro marha watohra thakwa maxe xiya hara amna yaka amohtome so hara,

kekn̂e Abraaw yîwya.

27 Ai okwe,

kekn̂e tupurantayemînhîrî.

Ero ke on wara xa tko wîîkes awya Apa,

Rasaru cma re men̂epesî apapa pen yanan komo yaka.

28 Iito naxe 5 oyakno komo okwe.

N̂examro weronoman̂e me cma re noro men̂epesî mokuhra ro mak ehtome so oona kerewîmtopo cheka oco,

kekn̂e tupurantayemînhîrî Abraaw ya.

29 On wara n̂eyukyakn̂e Abraaw yîmtaka,

Moises pen nmewretho rma tko nasî yîhyaw so,

weronomano rin̂e pen komo nmewretho marha.

Ero wa nasî yîn̂enîrî komo,

weronomacho kom ha.

Ero rma ka n̂encowpe,

kekn̂e.

30 Pîra okwe Apa,

kekn̂e tupurantayemînhîrî pen,

waixapunhîrî xa cetaw yîhyaka so cehtoponhîrî komo tak poxunkexe,

kekn̂e yîwya.

31 Pîra rma naxe okwe,

kekn̂e tak Abraaw yîwya,

Moises pen nmewretho ponarora cexitaw so,

weronomano rin̂e pen komo mtapotarî ponarora marha cexitaw so waixapunhîrî mtapotarî ponarora marha naxe.

Ero wa men naxe okwe,

kekn̂e Abraaw tupurantayemînhîrî pen ya,

kekn̂e tî Xesus.

Ero warai tî n̂ekatîmyakn̂e.