Taa,

ero yinhîrî tak tînpanatanmekrî komo tî panatanmekyakn̂e xa hara Xesus.

On wara tî kekn̂e yîwya so,

On wara naxe anarî komo,

kicicme naxe tooto komo poyero.

Ero wa thakwa naxe anarî kom okwe.

Cemetanmesom me xa thakwa naxe okwe yikiciciren̂enhîrî komo.

2 Wara n̂he re nasî noro yipu pen tuuna imo kwaka cetar̂metaw toh ke cexewnawnoi,

knahrî yapikmotopo ke ha.

Miya xe xa tko cemetanmesom me nasî cewn̂e mak moso yipu rikomo kiciciretaw,

kekn̂e tî Xesus yîwya so.

3 On wara marha kekn̂e yîwya so,

Awemetanmekîche awakno ya noro en̂ekakî.

Kicicme weexi kica,

ketaw tak awya kicicme ehtoponhîrî tak yîhcamnoko.

4 Emapona na awemetanmekya,

7 ro na awemetanmekya ero kaamo po rma.

7 ro xa marha tko na mokya ahyaka ero kaamo po rma.

Kicicme weexi kica,

kaxi mokya.

Ero wa exitaw,

Taa,

wîhcamnoyasî tak ha ero wa oritoponho awya,

kasko roro yîwya,

kekn̂e Xesus.

Ero wa kekn̂e tînpanatanmekrî komo ya.

5 Ero yinhîrî tak Kporin komo nantomarî komo makîrha takî tî ketken̂e yîwya on wara,

Apa,

Kaan pona enîn̂e rma ciki re amna.

Miya xe xa tko Noro pona enîn̂e me xa tak amna cirko,

ketken̂e tî yîwya.

6 Ai ha,

kekn̂e tî Kporin komo yîwya so.

Taa,

on wara wîîkes awya so,

mostata yatho wicakî ciki mak exitaw Kaan pona entopo awya so,

Emohkakî tak ha,

mîîkexe on amorera yepu ya.

Miya tak ecita tuuna imo kwaka,

mîîkexe.

Ero wa ketaw tak awya so,

awewecaxe so rma amorera yepu,

amtapotarî komo yanme rma cesi tuuna imo kwaka eciso,

kekn̂e tî Xesus yîwya so.

7 On wara marha wîîkes awya so,

kekn̂e yîwya so,

Ahce wa mantometu awanton komo?

Anarimaw na men̂epetu mararî pomoso.

Anarimaw oper̂a nahmacho poko mantomet hara.

Ero yipu poko ehxapunhîrî tak mokya hara mîîmo yaka hara.

Noro mokuche ahce wa tak mîîketu yîwya?

Eseresmaxi amoko oroto rma,

mîîketu katî yîwya mîîmo yaka mokuche rma?

8 Pîra,

on wara xa matko mîîkexe yîwya,

Oyotî ka tîyoko.

Awetapickacho marha amruko oyotî yetakachome tak awya,

owokru yetakachome marha.

Ow ka keseresmesî,

owokru marha ka weer̂asî.

Ero yinhîrî tak meseresmesî amoro hara,

mîîkexe yîwya.

9 Ero yinhîrî tak ahce wa mîîketu awanton komo ya anahrî komo yetakache,

Ow cma mîwakrew okre,

mîîketu katî yîwya?

Pîra ro mak,

ero wa kahra ro mak maxe awanton komo ya.

10 Ero wa xa marha ehcoko amyamro hara.

Ahnoro rma mencexe awantomacho komo Kaan ya.

Ero ke ero yipu yewetîtîkache tak awya so,

on wara mak kacoko yîwya,

Apa,

awakren̂e pînî rma amna.

Amtapotachonhîrî makî reha amna n̂ewetî,

kacoko mak yîwya,

kekn̂e tî Xesus.

Ero wa tî kekn̂e tînpanatanmekrî komo ya.

11 Taa,

ero yinhîrî tak Xerusaren yesamarî yaw rma tî cekn̂e Xesus.

Ero yaw tîcetaw Samaria pore tî cekn̂e,

Karireia pore marha.

12 Iituxari cetaw iito xakn̂e ewto.

Ero pona takî tî cekn̂e Xesus.

Ewto wacan potaw rma ka exitaw repra ken̂arî komo takî tî mokyatken̂e Xesus yaka,

10 tî.

Mooxe n̂he tî n̂ecececetken̂e.

13 En̂exa takî tî Xesus yakro nîmtapowatken̂e,

kar̂pe tî ketken̂e.

Apa,

Xesus Amoro,

amna porin.

Amna pînîn yaw n̂he thakwa esko,

ketken̂e tî yîwya.

14 Ero ke on wara tî kekn̂e Xesus yîwya so,

Taa,

esenpotatko tîmsom pokono komo ya,

kekn̂e.

Ero ke tî cetken̂e tîmsom pokono komo yaka Xesusu mtapotarî yanme.

Cetaw so rma n̂etowyakn̂e takî tî repratho.

Kir̂wan̂he takî tî xakn̂e hara yupun kom okre.

15 Ero ke on wara takî tî xakn̂e anarî cewn̂e mak akir̂wamaxapu,

kir̂wan̂he tupun yenîche yaw xa marha takî tî cekn̂e hara Xesus yaka hara.

Kir̂wan̂he oriw Kaan ham okre,

kekn̂e tî.

Kar̂pe tî kekn̂e ero wa.

16 Xesus yamrinaka takî tî nutupenwakn̂e cewnapo.

Kir̂wan̂he mai ham okre Apa.

Amoro cma ow makir̂wama,

kekn̂e tî yîwya.

Samaritanu tî mîk xakn̂e ero wa kan̂e.

17 On wara tî kekn̂e Xesus noro ya,

10 cma re mehcow amyamro akir̂wamaxapu komo.

Ahto nat hara 9-nhîrî kom hara?

18 Mokuhra ma n̂ehcow anarî komo,

Kir̂wan̂he Kaan nai ham okre,

kaxi?

Moso mak moko okwe,

Xutew pînî rma,

kekn̂e tî Xesus.

19 Taa,

etok hara,

kekn̂e tî repra kenarînhîrî ya.

Kaan pona enîrî ke awya metakir̂wama,

kekn̂e tî.

Ero wa tî kekn̂e Xesus yîwya.

20 Taa,

ero yinhîrî tak Parisew komo tî n̂esencetken̂e hara Xesus yakro.

Ahcemaw xa kayaritomo me xa n̂esenpe Kaan ha?

ketken̂e tî yîwya.

On wara tî Xesus n̂eyukyakn̂e,

Tmaywen komo rma re nahsîyasî Kaan esenpon me mak ha tko.

21 Ero ke Moso ha Kaan kîkayaritomon,

kahra naxe tooto komo Kaan poko.

Mîkro ha Kaan kîkayaritomon,

kahra marha naxe Noro poko.

Achew so rma wa nasî Kaan akayaritomon komo me,

kekn̂e tî Xesus.

Ero wa tî kekn̂e.

22 Ero yinhîrî takî tî on wara kekn̂e Xesus tînpanatanmekrî komo ya hara,

Amn̂e tak exihra nasî Tooto me Ewruxapu tan.

Cewn̂e kaamo mak Noro yenî xe wasî,

mîîkexe ha re.

Noro yenîra rma tko maxe okwe.

23 Enîn̂e wara rma re nîmtapowaxe anarî komo amn̂e.

Mînto nai Kristu,

kexe.

Tan nasî Kristu,

kexe marha anarimaw.

Tohnaw ro mak ero wa kexe.

Ero wa so ketaw awya so ewetîra ro mak ehcoko.

Enso tohra ro mak ehcoko yîmtapotarî komo yanme.

24 Noro meen̂axe rma amn̂e Tooto me Ewruxapu mohtopo me tak exitaw.

Pepe kacho wara rma nasî,

kaapu mamaw cesenposom wara.

Mooxe ro mak n̂esenpesî.

Mehxa kesî anarimaw,

xiya roro hara.

Ero wa xa marha n̂esenpesî Tooto me Ewruxapu Noro mohtopo me exitaw amn̂e.

25 On wara cokorî ka nasî Noro,

cemetanmesom me thakwa nasî.

Nanwekyaxe marha ka Xutew komo.

Ero wa ka nasî Tooto me Ewruxapu.

26 On wara naxe roowo pono komo amn̂e Tooto me Ewruxapu mokyataw hara,

Noe poyinonho pen komo wara xa marha naxe.

27 On wara xatken̂e n̂examro pen,

n̂eseresmetken̂e,

wok marha n̂eer̂atken̂e,

cipici komo nahsîyatken̂e,

ciin̂o komo marha nahsîyatken̂e wooxam kom hara.

Ero yipu poko rma xatken̂e Noe pen yesenkacho pona roro kanawa imo yaka.

Ero wa exitaw so rma tuuna mokyakn̂e,

yukmano ritopo okwe.

Ero yimaw tak n̂enor̂atken̂e Noe poyinonho pen komo ahnoro okwe.

28 Ero wa xa marha xatken̂e Roo poyinonho pen kom hara.

N̂examro marha n̂eseresmetken̂e,

wok marha ka n̂eer̂atken̂e,

warawanwatken̂e marha ka,

tînatîrî komo marha ka n̂iir̂atken̂e,

tîmîn komo marha ka n̂iir̂atken̂e.

Ero yipu poko ka xatken̂e.

29 Amn̂e tak Sotoma poi cekn̂e Roo.

Ero kaamo po rma tak wehto sararanakn̂e oco kah yai.

Enxopre ke ceske sararanakn̂e oco.

Ero ke iitono komo pen tak n̂ecahtîketken̂e okwe.

30 Ero poko xa marha naxe roowo pono komo amn̂e Tooto me Ewruxapu mokyataw hara.

31 Ero yimaw tak mîîmo meretwo exitaw so mîîmo yaka ewomra men n̂ehcowpe cemyawno komo wece.

Mararî po exitaw so tîmîn komo yaka tohra marha n̂ehcowpe.

32 Roo cinho pen yehtoponho ponaro men ehcoko.

33 Yiixe awehtopo komo pînîn yaw mak awexitaw so mahsîpînkexe rma thakwa okwe.

Mîwaiyaxe marha okwe.

Yiixe awehtoponhîrî komo pînînketaw reha awya so ahyaw so rma nas amn̂e yiixe awehtopo komo.

Waipîn me marha maxe.

34 On wara marha naxe roowo pono komo amn̂e omohtopo po,

kosope nîwînîkyaxe asakî kîrkomo.

Esenaw ro nîwînîkyaxe.

Anarînhîrî tak n̂ehcamnoyas okwe.

Iito rma nasî akrononhîrî.

35 Asakî wooxam komo naxe hara puruma yakihrî poko.

Ero yimaw tak,

poku,

anarînhîrî pen tak n̂ehcamnoyas okwe.

Iito rma nas akrononhîrî.

36 Ero yimaw marha 2 kîrkomo naxe mararî po hara.

Poku,

anarînhîrî pen tak n̂ehcamnoyas okwe.

Iito rma nasî akrononhîrî,

kekn̂e tî Xesus yîwya so.

37 On wara tî ketken̂e yînpanatanmekrî komo Xesus ya,

Ahtono komo wa ero wa nat amn̂e Apa?

ketken̂e tî yîwya.

On wara tî Xesus n̂eyukyakn̂e,

Waihxaputho exitaw iina men n̂esenmekyasî kwacinama komo,

kekn̂e tî.

Ero wa tî kekn̂e Xesus tînpanatanmekrî komo ya.