Ero yinhîrî takî tînpanatanmekrî komo takî tî panatanmekyakn̂e xa hara Xesus.

Anarî pokono warai tî n̂ekatîmyakn̂e yîwya so.

On wara kehtopo poko kpanatanmetopo mîn n̂ekatîmyakn̂e.

Miya roro tîmtapotapore nasî Kaan yakro pokahra ro mak,

kacho pokono tî mîn n̂ekatîmyakn̂e yîwya so.

2 On wara tî kekn̂e,

Pahxa en̂ekano rin̂e ro xakn̂e anarî ewto po.

Noro rma tko tî xakn̂e kicicme okwe.

Kaan ponarora ro makî tî xakn̂e.

Tooto ponarora marha tî xakn̂e.

Ero wa xakn̂e noro okwe.

3 Ero po marha xakn̂e wooxam hara iin̂o waixapu okwe.

Noro tak cekn̂e en̂ekano rin̂e yaka.

On wara tî kekn̂e yîwya,

Oyemetanmekyasî opoyino okwe.

Ero ke cma re noro men̂ekesî,

kekn̂e wooxam yîwya.

4 Apohana,

en̂eka xera wasî,

kekn̂e makî ka yîwya en̂ekano rin̂e.

Yaake kaamo rma tko noro panapickekn̂e wooxam ero poko.

Pahkî exiche tak n̂esehtînoyakn̂e hara.

On wara kekn̂e,

Kaan ponarora ro mak wasî,

tooto ponarora marha.

5 Oyewrucpesî mak ha tko kica moso wooxam.

Emapona roro kesî kica owya.

Ero ke emetanmekn̂e wen̂eke ham opanapickara tak ehtome,

kekn̂e en̂ekano rin̂e.

6 Ero wa xakn̂e en̂ekano rin̂e kicicitho ha.

Ero ke yîmtapotarî ponaro ehcoko.

7 Ero ke ahce wa nai Kaan hara awya so?

Kir̂wan̂he nasî Noro reha.

Ero ke takrono me tînahsîthîrî komo rma n̂epanîyasî.

N̂esemetanmekyaxe n̂examro okwe.

Ero ke emapona roro nîmtapowaxe Noro yakro.

Amna akronomak Apa,

kexe.

Katpanaw so kexe,

kosope so marha.

Pahkî tko nasî Kaan anarimaw eyukn̂e pîn wara.

8 Ponan̂e rma n̂examro n̂epanîyasî.

Wara rma ahce wa na natu roowo pono komo amn̂e Tooto me Ewruxapu mokyataw hara oona?

Ero yimaw yaake ma re nat awya so Kaan pona enîn̂e komo tan roowo po?

kekn̂e tî Xesus.

Ero wa tî kekn̂e tînpanatanmekrî komo ya.

9 Taa,

ero yinhîrî takî tî anarî pokono warai xa hara tî n̂ekatîmyakn̂e Xesus.

Anarî komo panatanmetopo tî n̂ekatîmyakn̂e,

Owî xa kir̂wan,

kexe anarî komo.

Tpoyino komo nîwîrîyakexe okwe ero wa kan̂e komo.

Ero warai komo panatanmetopo tî n̂ekatîmyakn̂e.

10 On wara tî kekn̂e Xesus yîwya so,

Pahxa tantono komo cetken̂e Kaan mîn yaka.

Asakî xatken̂e,

Parisew mîk xakn̂e anarî,

kayaritomo purantan yahsîn̂e mîk xakn̂e anarî hara.

Kaan mîn yaka tî cetken̂e n̂examro Kaan yakro yîmtapotaxi.

11 Iito exitaw so Parisew ka nîmtapowakn̂e.

Piiri n̂ecececekn̂e.

Nîmtapowakn̂e rma ha re takro rma kyam mak okwe.

On wara kekn̂e,

Apa Kaan,

kir̂wanî ro me ow miir̂a ham okre anarî komo warahra.

Anarî komo reha naxe kemyarkan̂e me kica.

Anarî komo xa hara naxe akpîn me.

Anarî komo xa hara naxe cipici komo yairono me hara kica.

Noro yipu komo warai pînî ro mak owî reha.

Kicicitho moso kayaritomo purantan yahsîn̂e,

noro warai pîn mak owî reha.

12 Tominkuntaxera eseresmara oyehtopo poko wasî.

Asakî ro ero wara wasî tominkuntaxera.

Ahnoro oyemyawnonho wîraconkesî marha cisimu tîmtome awya,

kekn̂e Parisew.

Ero wa kekn̂e noro reha.

13 On wara reha tî xakn̂e kayaritomo purantan yahsîn̂e hara,

Esenmexapu komo mkai mak n̂ecececekn̂e.

Tuupe mak xakn̂e kahsî enîhra.

N̂esewankatapekn̂e marha ceserepokarî ke tpoko rma.

Apa Kaan,

kekn̂e,

kicicitho ro mak ow.

Wara rma opînîn yaw cma re masî,

kekn̂e.

Ero wa mak kekn̂e kayaritomo purantan yahsîn̂e reha.

14 Ero ke on wara wîîkes awya so,

asakno roro rma tak cetken̂e tîmîn komo yaka hara.

Kayaritomo purantan yahsîn̂e reha tak xakn̂e Kaan nakir̂wamatho me.

Akir̂waman me reha xakn̂e Parisew okwe.

Ero wa xa marha awir̂axe so Kaan,

Owî xa kir̂wan,

ketaw awya so akpîn me men awenpexe so amn̂e.

Akpîn mak ow ha okwe,

ketaw reha awya so takîhsom me rma awenpexe so hara amn̂e Kaan,

kekn̂e tî Xesus.

Ero wa tî panatanmekno n̂iir̂akn̂e.

15 Taa,

ero yinhîrî tak rikomo komo takî tî n̂ekyatken̂e iitono komo Xesus yaka wahrai komo.

Moso omxîkrî.

Yîhtîpîrî cma re mahsîyasî,

ketken̂e tî ekn̂e komo Xesus ya.

On wara tko tî ketken̂e yînpanatanmekrî komo ekrî komo yeen̂ataw,

Rikomo komo ekîhra ehcoko kica Xesus yaka,

ketken̂e tî.

16 Xesusu tko rikomo komo nan̂ikyakn̂e rma.

On wara tî kekn̂e tînpanatanmekrî komo ya,

Mohcowpe rma rikomo komo ohyaka.

Porohkara ro mak ehcoko.

Rikomo warai me cehsom komo mak reha naxe Kaan maywen me.

17 Yaaro tan wîîkes awya so,

Kaan maywen me awexi xe awexitaw so rikomo warai me mak ehcoko.

Ero wa exihra awexitaw so Noro maywen mera ro mak maxe okwe,

kekn̂e tî Xesus.

Ero wa tî kekn̂e tînpanatanmekrî komo ya.

18 Taa,

ero yinhîrî takî iito takî tî xakn̂e antomano rin̂e hara.

Noro takî tî n̂esencekn̂e Xesus yakro waipîn me kehtopo komo poko.

On wara tî kekn̂e yîwya,

Apa,

amna panatanmekn̂e ro Amoro ham kir̂wanî ro.

Ero ke on wara wîîkes awya,

ahce wa xa wai awya waipînî ro me tak oyehtome?

kekn̂e tî Xesus ya.

19 On wara tî n̂eyukyakn̂e Xesus,

Ahce kacho kir̂wanî ro me Ow metahca?

Cewn̂e mak nasî kir̂wanî ro,

Kaan mak ha.

Anarî exihra ro mak nasî kir̂wanî ro.

20 On warai mencesî apanatanmetopo komo,

Apici komo yai ro exihra ro mak ehcoko,

aan̂o komo yai ro exihra marha ehcoko wooxam kom hara,

waihkano cirihra ehcoko,

en̂epamra ehcoko,

cemarontara ro mak ehcoko apoyino komo poko,

aamo komo ponaro ehcoko,

anocwan komo ponaro marha,

kacho ha.

Ero wara kacho mko mencesî rma.

21 Wencesî rma ero wa kacho mko,

kekn̂e tî antomano rin̂e Xesus ya.

Wewehcasî rma mehxa ro omrenai ro,

kekn̂e tî.

22 Ero yipu yentache tak on wara tî kekn̂e hara Xesus yîwya,

Nai rma cewn̂e mak ewetîn ka awya.

On wara tak esko,

wîîkes awya,

awemyawnonhîrî tîmtîkata epethîrî pona.

Ero yepetho tîmko hara emyarîn komo ya.

Ero wara esko mer̂pora tak ehtome awemyawno kah yaw,

cepethîkem xa tak okre,

Ero wa awemyawnonhîrî tîmîche tak owenari rorono me tak amok ha,

kekn̂e tî Xesus yîwya.

23 Okwe,

kekn̂e tî antomano rin̂e ero yipu yentache.

Mer̂pora ro makî tî xakn̂e noro yemyawno.

Ero ke tî nahwokekn̂e.

24 Ahwora ro mak exirî takî tî n̂een̂akn̂e Xesus.

Ero ke on wara tî kekn̂e tînpanatanmekrî komo ya,

N̂ehn̂exe ro mak tupurantayem komo Kaan maywen me cehtopo komo poko okwe.

25 Ahce wa nai kameru tîto xe cexitaw kuusa yewtarî yaro?

Tohra thakwa nas okwe,

n̂ehn̂esî mak ha.

Soroso xa tak cemyawnoyem komo n̂ehn̂exe Kaan maywen me cehtopo komo poko.

26 Okyo,

ketken̂e tak n̂examro ero yipu yentache.

Onoke thakwa re n̂etakir̂wame Kaan maywen me cehtome,

ketken̂e tî Xesus ya.

27 On wara tko tî kekn̂e Xesus yîwya so,

Ero wa ecirîn me thakwa naxe tooto komo ya reha.

Kaanî reha,

ahce wa so na ciino n̂iir̂asî ehn̂an me ro mak,

kekn̂e tî Xesus tînpanatanmekrî komo ya.

28 Ero yinhîrî on wara tî Petru kekn̂e Xesus ya,

Amna reha enko Apa.

Cemyawnonhîrî amna nîpînînkekn̂e ahnoro awenari roro tmohtome tak,

kekn̂e tî Petru.

29 On wara tî Xesus n̂eyukyakn̂e,

On wara wîîkes awya so,

Amînthîrî komo mîpînînketken̂e Kaan maywen me xa tak awehtome so.

Apici komo marha mîpînînketken̂e,

awakno komo marha,

aamo komo marha,

anocwan komo marha,

amxîkrî komo marha.

Ero yipu komo mîpînînketken̂e Kaan maywen me xa tak awehtome so.

30 On wara maxe amyamro ahnoro ero yipu yîpînînkan̂e komo,

ero yipu xa marha mahsîyaxe hara.

Awemyawno komo mahsîyaxe,

ayanan komo marha mahsîyaxe.

Mer̂pora xa tak mahsîyaxe anpînînkathîrî komo yopo ro mak okre.

Tanî rma roowo po awexitaw so ka mahsîyaxe.

Waipînî ro me marha maxe amn̂e,

yaxan me tak ahnoro nakîhcesî Kaan amn̂e,

ero yimaw ha,

kekn̂e tî Xesus Petru ya.

Ero wa tî kekn̂e.

31 Taa,

ero yinhîrî tak 12 komo takî tî naar̂akn̂e Xesus anana n̂he cewyaro ehtome so.

On wara takî tî kekn̂e yîwya so,

Xerusaren pona tak men tîhcexe amn̂e.

Iitono komo tak Tooto me Ewruxapu n̂emetanmekyaxe.

Weronomano rin̂e pen komo nmewretho yaw roro rma wa n̂emetanmekyaxe,

ahnoro yînmewrethîrî yaw roro.

32 Xenciu komo ya tak Noro pen nahsîpexe okwe.

Poko tak n̂examro n̂etaporexe okwe,

poko marha kicicme ro mak nîmtapowaxe.

N̂etakwaxe marha Noro pore kica.

33 Nîhyokyaxe marha oco,

waihkexe marha tak okwe.

Osorwaw ro enmapuche tko pakes hara.

Ero wara Tooto me Ewruxapu pen n̂iir̂axe amn̂e,

kekn̂e tî Xesus yîwya so.

34 Camkî tko tî n̂encetken̂e ahnoro ero yipu.

Ahce warai poko kyam na nîîke,

ketken̂e makî tî.

Ero yipu poko nîîke ham,

kahra ro mak tî xatken̂e yîmtapotarî poko.

Ero wa tî xatken̂e 12 komo.

Ero wa tî xatken̂e.

35 Taa,

ero yinhîrî tak Xer̂ko yesamarî yaw takî tî cetken̂e Xesus komo.

Ewto pahnoke exitaw so tak iito tî xakn̂e ewuhnî esama yakumyaw ceremaxi.

Esama yaw tîtosom komo poko tî n̂ehsamekn̂e.

Opurantanî n̂he thakwa tîmcoko okwe,

kekn̂e tî emapona roro.

36 Xesus yakro tî cetken̂e mer̂pono pîn tooto komo.

Ero ke takî tî torî komo n̂encekn̂e ewuhnî.

Onoke xa mîkyam cetu?

kekn̂e tî iitono komo ya.

37 Xesus xa Mîk ces ha,

Nasare pono,

ketken̂e tî yîwya.

38 Ero ke Xesus ya tak tî kekn̂e ewuhnî.

Eei,

Xesus,

Tapi pen yepamtho Amoro.

Opînîn yaw n̂he thakwa esko,

kekn̂e tî.

Ero wa tî kekn̂e Xesus ya.

Kar̂pe tî kekn̂e.

39 Ewuhnî tko tî n̂eiyatken̂e poturme tîtosom komo.

Tîtken̂e esko kica,

ketken̂e tî okwe yîwya.

Ewetîra so rma tko tî xakn̂e.

Miya xe xa matko tî ketîkekn̂e.

Tapi pen yepamtho Amoro.

Opînîn yaw n̂he thakwa esko,

ketîkekn̂e tî.

40 Ero ke Xesus takî tî n̂ecececekn̂e.

Ewuhnî tî nan̂ikpekn̂e.

Noro mokuche tak on wara tî kekn̂e Xesus yîwya,

41 Ai okopuci,

ahce wa awiri xe mai owya?

kekn̂e tî yîwya.

Apa,

kekn̂e tî Xesus ya,

oyewtanîre xe mak was awya,

kekn̂e tî.

42 Taa,

ero wa ham,

kekn̂e tî Xesus yîwya.

Cewke tak esko.

Opona enîrî ke mak awya cewke tak masî,

kekn̂e tî.

43 Ero ke ero yimaw rma takî tî n̂eewakn̂e ewuhnînhîrî.

Ero wa cexiche tak Xesus yakro takî tî cekn̂e ero yimaw rma.

Kir̂wan̂he oriw Kaan ham okre,

kekn̂e tî noro emapona.

Ero wa xa marha tî ketken̂e ahnoro ewuhnînhîrî yenîn̂e komo.

Kaan xa Mîk noro n̂ewtanîrew ham okre,

ketken̂e tî.

Ero wa tî ketken̂e.