Ero yinhîrî tak Xer̂ko pore takî tî cekn̂e hara Xesus.

Iito tko tî enmapîra rma xakn̂e.

Ewto pore makî tî cekn̂e.

2 Taa,

iito tî xakn̂e Xesus yenî xatî.

Sakew tî mîk xakn̂e noro yosotî.

Kayaritomo purantan yahsîn̂e komo yenîn̂e tî mîk xakn̂e.

Tupurantayem xa tî mîk xakn̂e.

3 Noro tî cekn̂e Xesus yenso cma ha tî re.

Okwe,

Xesus yenîhra rma thakwa tî xakn̂e tooto pen chew exirî ke.

Mer̂pora ro makî tî xatken̂e Xesus yakro tîtosom komo.

Kawno pîn ciki tî mîk xakn̂e Sakew.

4 Ero ke Xesus yesamaka takî tî cekn̂e kar̂pe.

Iito esama yakumyaw tî xakn̂e sikomoru yepu.

Ero pore takî tî kainakn̂e Sakew Xesus yentome tak.

Iituxa rma tî xakn̂e Xesus yesamarî.

5 Amn̂e tak Xesus mokyakn̂e weewe makatari.

Iito cexitaw kahsî takî tî n̂een̂akn̂e.

Ai,

okopuci Sakew,

kekn̂e tî yîwya.

Xiya ahtoko yohno.

Amîn yaka kîwînîkyasî oroto,

kekn̂e tî Xesus.

6 Ero ke yohno takî tî nîhcekn̂e Sakew.

Xesus takî tî naar̂akn̂e tîmîn yaka.

Tawake tî xakn̂e Xesus mokrî ke tîhyaka.

7 Kica,

ketken̂e tko tî Xesus yakro tîtosom komo.

Kicicitho yaka mak cesî kica,

ketken̂e tî Xesus poko.

8 Yîmîn yaw exitaw on wara takî tî xakn̂e Sakew,

piiri nawomyakn̂e.

Xesus ya tî kekn̂e on wara,

Apa,

on wara tak was ow,

oyemyawno raconho tak wîmyasî yupurantamnî komo ya.

Kayaritomo mtapotacho yopo rma tko wahsîyakn̂e yupurantan anarimaw so,

tohnaw mak wahsîyakn̂e kica.

Ero ke tohnaw ahsîxapunhîrî tak wîramanîyas hara,

on̂emîknoputho komo ya wîmyas hara.

Ero yopo n̂he tko wîmyasî.

1 onahsîtho yemtaka 4 tak wîramanîyas hara,

kekn̂e tî Sakew Xesus ya.

9 Ai ha,

kekn̂e takî tî Xesus yîwya,

Taa,

kir̂wan̂he nai ero wa awehtopo.

Oroto xa awakir̂wama ham Kaan.

Abraaw pen yepamtho me rma awexirî ke awakir̂wama.

10 On warai komo wece mohxapu mak Mîk ha Tooto me Ewruxapu,

tacixapu komo yeposo mohxapu Mîk ha.

Ero yipu komo yahsîso mohxapu marha Mîkî,

kekn̂e tî.

Ero wa tî kekn̂e Xesus.

11 Taa,

Xesusu mtapotarî tî n̂encetken̂e yînpanatanmekrî komo.

Ero yinhîrî anarî pokono warai tî n̂ekatîmyakn̂e xa hara Noro.

Xerusaren pahnoke tî xakn̂e ero yimaw.

On wara marha tî ketken̂e yînpanatanmekrî komo tîhnaw so,

Oroto xa tak kayaritomo me Kaan n̂esenpesî,

ketken̂e tî.

Ero ke anarî pokono warai tî n̂ekatîmyakn̂e Xesus yîwya so.

12 On wara tî kekn̂e,

Pahxa tooto komo chew xakn̂e kayaritomo me ciisom.

Ero yimaw tak on wara kekn̂e noro tpoyino komo ya,

Kayaritomo yaka xa tak kîwcesî.

Akayaritomon komo me tak oriyasî noro.

Ero yinhîrî kmokyas hara oona,

kekn̂e yîwya so.

13 Tîtorî me tak tmaywen komo nan̂ikyakn̂e 10 ha.

N̂examro yemyaka tak nîmyakn̂e puranta.

Cepethîkem nîmyakn̂e yîwya so mina mko.

Cewn̂e mina so tî nîmyakn̂e yîwya so etîme re.

On wara tî kekn̂e yîwya so,

Taa,

on ha puranta,

awemyaka so mak wîmyasî.

Ero ke oyarînaw on poko awarawantacoko epamnotome tak.

Amn̂e omokuche hara epamnoxapu tak wahsîyasî,

kekn̂e yîwya so.

Ero wa kekn̂e tmawyen komo ya.

14 Noro xera ro makî tko tî xatken̂e maywen komo.

Ero ke noro toche tak anarî komo n̂en̂epetken̂e hara iina xa marha iyopono yaka hara.

On wara kan̂e me tî n̂examro n̂en̂epetken̂e,

Noro xera ro mak nas amna.

Ero ke amna kayaritomon me cirihra ro mak esko,

kan̂e komo tî n̂en̂epetken̂e.

Ero wa tî xatken̂e noro maywen komo.

15 Kayaritomo me esko,

kekn̂e rma tko kayaritomo xa yîwya.

Ero ke n̂etîramekn̂e hara kayaritomo me ciixapu tak ha.

Cewton po cexitaw hara tmaywen komo tak nan̂ikyakn̂e hara.

Puranta nîmyakn̂e yîwya so,

n̂examro nan̂ikyakn̂e hara.

On wara kekn̂e yîwya so,

Taa,

atî wicakî mahsîye puranta onîmîtho poko awarawantarî ke so ha?

kekn̂e yîwya so.

16 Ero ke anarî n̂ihciyakn̂e,

Apa,

kekn̂e noro,

apurantan poko kwarawanwakn̂e ha re.

Wepamnoyakn̂e ha re mer̂pora cehso ro.

1-înhîrî tak n̂epamye 10 me tak ha.

17 Kir̂wan̂he nasî owya okre opurantantho yepamnorî awya,

kekn̂e kayaritomo yîwya.

Omaywen mexan xa amoro ham.

Asak man poko ow mewehcakn̂e.

Ero ke 10 ewto mko yenîn̂e me tak esko ha,

kekn̂e yîwya.

18 Ero yinhîrî ponanînhîrî tak mokyakn̂e hara kayaritomo yaka.

Apa,

kekn̂e noro hara,

apurantan poko marha kwarawanwakn̂e ha re.

Wepamnoyakn̂e marha.

1-înhîrî tak n̂epamye 5 me tak ha,

kekn̂e yîwya.

19 Taa,

kekn̂e kayaritomo yîwya,

tawake was apoko.

Ero ke 5 ewto yenîn̂e me tak esko amoro hara,

kekn̂e noro ya hara.

20 Ero yinhîrî ponanînhîrî tak mokyakn̂e hara kayaritomo yaka.

Apa,

kekn̂e noro kayaritomo ya,

on ha apurantanthîrî hara 1 mina mak ha.

On poko warawantara wîxakn̂e owî reha.

Womcekn̂e mak poono ke.

Cemyapore mak wakriyakn̂e.

21 Keraswakn̂e mak kopi apona yukurumîkno me awexirî ke.

Tîn̂irimikîthîrî pîn yanîmn̂e rma mîk kopi,

wîîkekn̂e apoko.

Tînatîrî yeperîrî pîn potun̂e marha mîk,

wîîkekn̂e marha apoko.

Ero warai mîk noro kopi,

wîîkekn̂e apoko,

kekn̂e kayaritomo ya.

Ero ke wakriyakn̂e mak apurantanthîrî,

kekn̂e.

22 Okwe,

kekn̂e tak kayaritomo yîwya,

Omaywen mexan pîn mak amoro,

kicicitho mak amoro kica.

Amtapotachonhîrî poko rma ken̂ekesî.

Yukurumîkno mîk noro kopi,

mîîkekn̂e opoko.

Tîn̂irimikîthîrî pîn yanîmn̂e rma mîk.

Tînatîrî pîn yeperîrî potun̂e marha mîk,

mîîkekn̂e marha opoko.

23 Ero ke ahce kacho opurantan tîmîhra mîxakn̂e puranta yosom komo yemyaka?

Ero poko cehtoponhîrî komo yepetho nîmcerî hara awya puranta.

Mepamnorî tak onmîtho awya mer̂pora n̂he tak ahsîtome owya,

kekn̂e kayaritomo tmaywen ya.

24 Taa,

iito xatken̂e anarî kom hara noro maywen kom hara.

Ero ke yîwya so kekn̂e kayaritomo on wara,

Puranta ahsîcoko onmîtho yîwya.

Anarî ya tîmko 10 me epamnon̂enhîrî ya ha,

kekn̂e yîwya so.

25 Mer̂pora nasî yîhyaw,

10 rma,

ketken̂e n̂examro kayaritomo ya,

26 Ero yinhîrî on wara kekn̂e hara kayaritomo yîwya so,

Taa,

on wara wîîkes awya so ero yipu poko,

ahce na exitaw ahyaw so miya xe xa tak n̂etîmyas hara awya so.

Ahce na exihra exitaw ahyaw so ero yakwenho rma ciki n̂etowtîkesî ahyai so okwe,

kekn̂e.

27 On wara marha kekn̂e kayaritomo tmaywen komo ya,

Taa,

ahto nat hara ooxatî pîn komo?

Noro cirihra ro mak esko amna kayaritomon me,

kan̂enho komo ahto natu?

Ehcoko xiya.

Owero ro tak waihkacoko kr̂a,

kekn̂e kayaritomo.

Ero wa kekn̂e kayaritomo tmaywen komo ya,

kekn̂e tî Xesus.

Ero yipu tî n̂ekatîmyakn̂e Xesus tînpanatanmekrî komo ya.

28 Taa,

ero wara ekatîmîche tak Xerusaren yesamarî yaw takî tî cekn̂e xa hara Xesus.

Poturme tî cekn̂e Noro.

29 Amn̂e tak Becpaxe pahnoke takî tî xatken̂e,

Betania pahnoke marha tî.

Ero wa xakn̂e ewto iito asakî.

Oripera Yîpîn yamrinawno mîn xakn̂e ewto.

Taa,

iito exitaw so tînpanatanmekrî takî tî n̂en̂epekn̂e Xesus asakî.

30 On wara tî kekn̂e yîwya so,

Mîn pona etocoko ewto pona.

Iina awepatakache so rma tak buhu xîkrî tak meen̂axe iito cimiso.

Yîmkaw tooto totopo pînî ro makî ka mîk meen̂axe.

Noro yîmhokacoko ehtome tak ohyaka.

31 Iitono komo na ketu awya,

Ahce kacho buhu xîkrî mîmhoket hara?

ketu na.

Ero wa ketaw,

Yiixe tî nai Kporin komo,

kacoko mak yîwya so,

kekn̂e tî Xesus yîwya so.

32 Ero ke cetken̂e takî tî Xesus nantomatho komo ewto pona.

Iito takî tî buhu xîkrî n̂een̂atken̂e Xesusu mtapotachonho yaw roro rma.

33 Noro yîmhoketaw yîwya so osom komo tî ketken̂e,

Ahce kacho mîmhoketu buhu xîkrî?

ketken̂e tî.

34 Yiixe tî nai Kporin komo,

ketken̂e tî yîwya so.

35 Ero yinhîrî buhu xîkrî takî tî naar̂atken̂e Xesus yaka.

Noro takî tî nîmkayamcetken̂e tpononthîrî komo ke rma.

Yîmkayamtoche tak yîmkasî takî tî Xesus nakriyatken̂e.

36 Ero ke yîmkaw takî tî cekn̂e Xesus esama yaw.

Noro cetaw esama meero marha tî namuhcetken̂e akro tîtosom komo tpononthîrî komo ke rma.

37 Taa,

Xerusaren pahnoke exitaw so Oripera Yîpîn takî tî n̂enîhcetken̂e.

Iito exitaw so Xesus npanatamekîtho komo takî tî nahwowatken̂e Kaan poko.

Kar̂pe ro mak ketken̂e.

Mer̂pono pîn komo tî mîkyam xatken̂e.

Cirihnî ciitoponhîrî yenîrî ke tî nahwowatken̂e Noro poko.

38 On wara tî ketken̂e,

Kir̂wanî ro xa Moso mokyasî kîkayaritomon kom ha.

Kporin komo yanme rma mokyasî.

Tahwore tak ehcoko kah yawno komo Moso mokrî ke oona.

Kir̂wan̂he xa Kaan nai ham okre,

kacoko marha kah yawno komo,

meyeno mkaino yawno kom ha,

ketken̂e tî.

Ero wa tî ketken̂e Xesusu npanatanmekîtho komo mer̂pono pîn komo.

39 Taa,

iito marha tî xatken̂e Parisew komo tahwotaxmu komo chew.

Centaporera tko tî n̂encetken̂e ahwotacho komo Xesus poko.

Ero ke on wara tî ketken̂e Xesus ya,

Apa,

anpanatanmekîthîrî komo yîtîtmamnoko kica,

ketken̂e tî yîwya.

40 Pîra ro mak,

kekn̂e tî Xesus yîwya so.

On wara xa matko wîîkes awya so,

tîtken̂e exitaw moxam,

toopu rma tak nahwowasî emtaka so hara,

kekn̂e tî.

Ero wa tî kekn̂e Xesus.

41 Taa,

ero yimaw tak Xerusaren potaw takî tî xakn̂e Xesus.

En̂exa takî tî ewto imo n̂een̂akn̂e.

Yiipono komo pînîn yaw xa tî n̂ehtîkekn̂e.

Nîwracekn̂e thakwa mak yîpînîn yaw so.

42 On wara kekn̂e,

Ai Xerusaren pono komo,

pahxa rma yîhtînopîra mîxatken̂e okwe ahwokan me awitopo komo.

Oroto xa tîhtînopore xa nasî ero wa awitopo komo.

Amn̂e tak ahwokan me awehtopo komo yenîhra thakwa maxe okwe.

43 On wara tak men maxe amn̂e,

awaparî komo tak mokyaxe okwe.

Amamcexe so okwe.

Awahkocexe so marha tohra ro mak tak awehtome so ewto poi.

Roowo n̂enmekyaxe awacan mîtkoso awahkototopo komo me.

44 Amn̂e tak amînthîrî komo nakn̂iyaxe ro mak tmemehse cehso ro ekenhîrî okwe.

Amxîkîthîrî komo marha nar̂mexe okwe.

Awacanthîrî komo marha moruhrakexe ro mak okwe.

Etîmkaw so exihra ro mak tak nasî toopu etîmkawnonhîrî.

Ero wa awar̂mexe so amn̂e okwe Kaan ya awakronomacho komo ponarora awexirî ke so mak okwe,

kekn̂e tî Xesus.

Ero wa tî kekn̂e.

45 Ero yinhîrî tak Kaan mîn yaka takî tî cekn̂e Xesus.

Ero yaka cewomche tak iitono komo tî n̂en̂epekn̂e Kaan mîn yai.

Twarawantaxmu komo tî mîkyam n̂en̂epekn̂e.

46 On wara tî kekn̂e Xesus yîwya so.

On wara kesî Kaan Karitan,

Kaan yakro amtapotacho komo me mak nas omîn,

kesî.

Cen̂epan̂em komo mîn me makî tko miir̂axe amyamro kica,

kekn̂e tî Xesus yîwya so.

47 Taa,

ero yinhîrî tak enmar̂atîxera takî tî Xesus cekn̂e xa hara Kaan mîn yaka.

Ero yaka mohxapu komo takî tî panatanmekyakn̂e roro.

On wara tko tî xatken̂e tîmsom pokono yenîn̂e komo,

Xutew panatanmetopo mewren̂e komo,

Xutew poritomon komo marha,

Xesus waihkacho poko tî n̂esencetken̂e okwe.

48 Nukurunanîyatken̂e makî tko ka Xesus xatî komo pona.

Tpoxwe xa tî n̂encetken̂e Xesus mtapotarî tooto komo ahnoro.

Ero ke nukurunanîyatken̂e n̂examro pona.

Ero wa tî xatken̂e.