Taa,

ero yinhîrî tak anarî kaamo po panatanmekno tî n̂iir̂akn̂e xa hara Xesus Kaan mîn yaw.

Kaan ya kakir̂wamacho komo marha tî n̂ekatîmyakn̂e iitono komo ya.

Ero wa ketaw Xesus yaka takî tî cetken̂e tîmsom pokono yenîn̂e komo,

Xutew panatanmetopo mewren̂e komo yakro.

Xutew poritomon komo marha tî cetken̂e.

2 On wara tî ketken̂e n̂examro Xesus ya,

onoke yanme xa twarawantaxmu komo men̂epei Kaan mîn yai?

Panatanmekno marha miir̂asî.

Onoke yanme xa ero yipu poko mai ha ke?

ketken̂e tî yîwya.

3 Nnn,

kekn̂e takî tî Xesus yîwya so.

Awya so xa matko wîîkesî.

Ow cokorî ka eyuhcoko.

4 Onoke yanme xa emicinono n̂iir̂akn̂e Xuaw pen awya so?

Kah yawno yanme katî?

Tooto yanme mak katî emicinono n̂iir̂akn̂e awya so?

kekn̂e tî Xesus yîwya so.

5 Ero ke n̂examro takî tî n̂esencetken̂e ero poko.

Ahce wa ceyukyat ha?

ketken̂e tî.

Kah yawno yanme xa emicinono n̂iir̂akn̂e Xuaw pen,

ketaw kîwya so,

Ahce kacho noro yewetîra mîxatken̂e hara?

kesî men kopi kîwya so,

ketken̂e tî.

6 Tooto yanme mak emicinono n̂iir̂akn̂e,

ketaw reha kîwya so Noro yentan̂enho komo men ketapetu so oko toh ke.

Kweronoman̂e ro xa mîk ham Xuaw pen,

kan̂e men mîkyam tooto komo,

ketken̂e tî.

Ero wa tî n̂esencetken̂e Xesusu mtapotarî yeyuhtopo poko.

7 Ero ke on wara tî ketken̂e Xesus ya,

Apohana,

onoke yanme xa na emicinono n̂iir̂akn̂e Xuaw pen.

Yîhtînopîra nas amna,

ketken̂e tî yîwya.

8 Ai ha,

kekn̂e tî Xesus.

Ero ke ero wa xa marha was Ow hara.

On poko oyantoman̂enho yekatîmra marha was Ow hara awya so,

kekn̂e tî Xesus yîwya so.

Ero wa tî kekn̂e.

9 Taa,

ero yinhîrî tak anarî pokono warai tî n̂ekatîmyakn̂e Xesus.

On wara tî kekn̂e yîwya so,

Pahxa mararî yosom xakn̂e.

Uupa tî n̂iir̂akn̂e tînatîrî.

Ciriche tak tînatîrî yenîn̂e komo nantomekn̂e ero poko,

atkarî poko,

eperîrî yenmekrî poko marha.

Ero yinhîrî mooxe tak cekn̂e naatî yosom anarî komo rowon pona.

Pahkî tî xakn̂e iito.

10 Amn̂e tak epetacho yimaw tanton tak n̂en̂epekn̂e tînatîrî yenîn̂e komo yaka.

Eperîrî wece cma re n̂en̂epekn̂e.

Anarî me tko tî xatken̂e yînatîrî yenîn̂e komo.

Naatî yeperîrî tîmîhra ro makî tî xatken̂e yîwya.

Naatî yosom yanton pen tî nîhyokyatken̂e oco.

Emyarîra ro makî tî n̂en̂epetken̂e hara kica.

11 Amn̂e tak anarî n̂en̂epekn̂e hara tanton.

Noro pen marha nîhyokyatken̂e oco.

Kicicme ro mak n̂iir̂atken̂e.

Emyarîra marha noro pen n̂en̂epetken̂e hara kica.

12 Amn̂e tak anarî n̂en̂epekn̂e xa hara naatî yosom tanton xa hara.

Noro pen makîrha n̂etapetken̂e oko.

Nar̂metken̂e naatî wacanî mkai okwe.

13 Ero yinhîrî tak naatî yosom n̂esehtînoyakn̂e.

Ahce wa xa wai okwe?

kekn̂e.

On wara xa tko na wai,

Omumuru xa wen̂epesî onatîrî yenîn̂e komo yaka.

Yîpînîmîkno ciki Mîk wen̂epesî.

Noro n̂he tak na n̂eenatu cewetîsom me,

kekn̂e cma re.

Ero ke takî tî tumumuru rma tak n̂en̂epekn̂e yîhyaka so.

14 Noro tko n̂een̂atken̂e naatî yenîn̂e komo mooxe rma ka exitaw.

Ero ke on wara ketken̂e,

Mîkro yumumuru xa tak mokyas ha.

Tîîm natîtho yahsîn̂e amn̂e mîkro tîîmînhîrî waipuche.

Ero ke cetapacerî kr̂a knatîrî me so ontho yahsîtome tak on kîwya so yînatîthîrî,

ketken̂e.

Ero wa tî n̂esencetken̂e naatî yosom mumuru poko.

15 Ero ke noro mokuche tak nahsîyatken̂e.

Miya tak naar̂atken̂e marari poi.

Iito tak n̂etapetken̂e okwe twaihso ro.

Ero wa naatî yosom mumuru n̂iir̂atken̂e okwe.

Ero ke ahce wa tak nai mararî yosom n̂examro poko amn̂e awya so?

16 On wara nasî,

mokyas ha men naatî yenîn̂e komo waparî me.

N̂examro pen tak waihkesî.

Anarî komo tak n̂een̂as hara tînatîrî yenîn̂e kom hara,

kekn̂e tî Xesus yîwya so.

Ero wa kacho yentache,

Ai ha okwe,

ketken̂e takî tî entan̂e komo.

17 Ero yinhîrî tak iitono komo wece takî tî n̂een̂akn̂e Xesus.

On wara tî kekn̂e yîwya so,

On wara kesî Kaan Karitan,

Toopu xakn̂e mîîmo me ciisomu cma re.

Kicicme tko tî xakn̂e mîîmo ciin̂e komo ya mîîmo me cirihnî me.

Ero yipu rma tko mîîmo peyecepu me tak nas hara okre,

kesî Kaan Karitan.

Ahce warai pokono wa mencetu ero wa kacho ha?

18 On wara wîîkes hara awya so,

ero pona awepîrketaw so metaxikwexe oko.

Aapo so epîrketaw reha awapikmexe so ro mak okwe yupupunthîrî me mak tak maxe okwe,

kekn̂e tî.

Ero wa tî kekn̂e Xesus Kaan mîn yawno komo ya.

19 Taa,

ero wa kacho yentache tak Xesus yahsî xe takî tî xatken̂e tîmsom pokono yenîn̂e komo,

Xutew panatanmetopo mewren̂e komo marha.

Ero yimaw rma ahsî xe tî xatken̂e.

Tponan me so tî n̂encetken̂e Xesusu mtapotarî,

naatî yenîn̂e komo pokono ha.

Ero ke tî ahsî xe xatken̂e.

Nukurunanîyatken̂e rma tko yiixatî komo pona.

20 Ero ke tî n̂een̂atken̂e mak.

Ahce wa Noro cewkukmetu kr̂a kicicime yîmtapotachome tak,

ketken̂e.

Ero ke yîmtapotarî yentan̂e komo n̂en̂epetken̂e yîhyaka.

N̂examro tî nîmtapowatken̂e Xesus yakro kir̂wan wara.

Anarme tî enta xe xatken̂e Xesus mtapotarî yekatîmtome kopenato ya tak.

Ero wa tî xatken̂e n̂examro kica.

21 Ero ke on wara takî tî ketken̂e Xesus ya,

Apa,

yaarono yekatîmn̂e xa Amoro,

yaaro xa Kaan yehtopo mekatîmyasî amna ya tooto komo pona yukurunanpîra.

Yaaro xa amna mîpanatanmekya ham Kaan yehtopo poko,

ketken̂e tî re yîwya.

22 Ero ke on wara kes amna awya,

ketken̂e tî,

ahce wa amna nai awya?

Puranta amna nîmya Sesa ya?

Tîmîhra katî amna nai yîwya?

ketken̂e tî Xesus ya.

23-24 Tukukmacho me rma tko tî Xesus nîhtînoyakn̂e yîmtapotarî komo.

Ero ke on wara makî tî n̂eyukyakn̂e,

Ahce kacho w mewkukmetu okwe?

Ek ha ke exepeyu.

Taa,

onoke kuknon tan on exepeyu pokono awya so?

Onoke yosotî marha tan on poko mewrexapu awya so?

kekn̂e tî Xesus yîwya so.

Sesa kuknon tan ham.

Noro yosotî marha tan,

ketken̂e tî yîwya.

25 Taa,

kekn̂e tî Xesus yîwya so,

Sesa n̂irpotho mîn.

Ero ke noro ya rma tîmcoko ero yipu.

Ero wa xa marha ehcoko Kaan poko hara.

Noro n̂iritho marha tîmcoko yîwya hara,

kekn̂e tî Xesus yîwya so.

26 Ero yipu yentache n̂eserepoketken̂e takî tî yiixatî pîn komo.

Kicicme yîmtapotara rma xakn̂e Xesus tooto komo n̂entarî me.

Ero ke nîtîtmamyatken̂e makî tî.

Ero wa tî xatken̂e.

27 Taa,

ero yinhîrî tak Satusew komo makîrha takî tî mokyatken̂e hara Xesus yaka.

On wara kan̂e mîkyam Satusew komo,

Kwaipuche so pakahra ro mak taxe hara okwe,

kan̂e tî mîkyam.

N̂examro makîrha takî tî n̂esencetken̂e Xesus yakro.

28 On wara tî ketken̂e yîwya,

Ai Apa,

On wara cma re kes amna awya,

pahxa tî Moises pen mewrekn̂e amna panatanmetopo,

on wara kacho,

Anarimaw na apoyinonhîrî pen komo waihya yîmxîkîra rma.

Ero wa waipuche yihcinhîrî tak nahsîpe aknonhîrî hara.

Yihcinhîrî nîmxîkrepe noro taknonhîrî pen xîkrî me rma,

kacho mewrekn̂e amna panatanmetopo.

29 Taa,

pahxa xakn̂e amna poyino komo.

7 xatken̂e etakno re komo rma.

Ero yimaw tak potuthîrî n̂ipiwakn̂e.

Amn̂e tak noro pen waihyakn̂e okwe yîmxîkîra rma.

30 Ero ke yihcinhîrî tak nahsîyakn̂e ponanînhîrî hara.

Amn̂e tak noro pen makîrha waihyakn̂e hara yîmxîkîra rma okwe.

31 Ero yinhîrî noro ponanînho yihcinhîrî nahsîyakn̂e xa hara.

Ero wa nahsîyatken̂e 7 komo cenatkaxi ro.

Yîmxîtara rma tî waihyatken̂e ahnoro rma okwe.

32 Mah yaka so tak wooxam pen waihyakn̂e hara yihcinhîrî pen komo okwe.

33 Taa,

waixapunhîrî komo pakache hara amn̂e onoke warai pici me kyam nai wooxam awya?

Ahnoro rma noro nahsîyatken̂e cipici me so,

7 rma okyo,

ketken̂e tî Xesus ya.

Ero wa tî ketken̂e yîwya.

34 On wara tî n̂eyukyakn̂e Xesus,

Tanî ka roowo po rma awexitaw so mipiwaxe.

Wooxam komo marha n̂in̂onwaxe tan mak ha kapu.

35 Ero warahra tko maxe amn̂e awaipuche so tak.

Tîmxîkrî me ahtînoyataw so Kaan ya awenpakexe so tak amn̂e awaipuche so.

Taa,

iito awexitaw so tak Kaan yaw anarî me tak maxe,

yipitan me tak ha.

Wooxam komo marha naxe in̂ontan me hara.

36 Waipîn me marha tak maxe ero yimaw ancu komo wara rma.

Kaan xîkrî me xa tak maxe ero yimaw awenpakarî ke so yîwya.

37 On wara marha wîîkes awya so,

waixapunhîrî komo pakacho poko rma on wara kesî Moises penî nmewretho,

Peen poko wehto n̂etahsîyakn̂e,

on wara kekn̂e Kporin komo ero yimaw,

Ponaro Abraaw yehtopo Ow ha,

ponaro Isake yehtopo marha,

ponaro Xako yehtopo marha,

kekn̂e,

kesî.

Ero wa kesî Moises pen nmewretho.

38 Ero ke on wara kacho me rma wa nasî noro nmewretho,

ponaro waixa pen komo yehtopo pîn Mîk Kaan.

Ponaro waipîn komo yehtopo mak Mîk ha,

kacho me nasî.

Ahnoro tooto komo naxe waipîn me Kaan ya,

kekn̂e tî.

Ero wa tî kekn̂e Xesus Satusew komo ya.

39 Ero wa kacho yentache on wara tî ketken̂e Xutew panatanmetopo mewren̂e komo,

anarî komo mak,

Apa,

takîhso xa n̂examro meiku okre,

ketken̂e tî Xesus ya.

40 Ero yinhîrî tî Xesus yakro takî tî esentara xatken̂e.

Nukurunanîyatken̂e makî.

Ero wa tî xatken̂e.

41 Taa,

ero yinhîrî tak on wara tî Xesus kekn̂e yîwya so hara,

Tapi pen yepamtho Mîk Kristu,

kexe tooto komo.

Ahce warai me exirî ke ero wa ketu Noro poko awya so?

42 Tporin me rma tko Kristu n̂etahcakn̂e Noro pen.

Kaan Karitan yaw rma nasî ero wa kacho yînmewrethîrî,

Waano kacho yaw.

On wara kacho mewrekn̂e,

On wara kekn̂e Kporin komo Oporin ya,

Oona ka eremakî opanaka kaari n̂ixa.

43 Tan makî ka esko.

Aaxatî pîn komo ka war̂metîkaxi.

Anapikrî me ka n̂examro wiir̂asî,

kacho mewrekn̂e.

44 Ero wa kekn̂e Tapi pen Kristu poko.

Tporin me n̂etahcakn̂e.

Taa,

ahce wa exirî ke,

Oporin,

kekn̂e cepamthîrî ya rma?

kekn̂e tî Xesus yîwya so.

Ero wa tî kekn̂e.

45 Taa,

ero yinhîrî tak on wara tî kekn̂e Xesus tînpanatanmekrî komo ya,

ahnoro esenmexapu komo n̂entarî me rma tî kekn̂e.

46 Xutew panatanmetopo mewren̂e komo warahra men ehcoko amyamro.

On wara naxe n̂examro kica,

kawno yamru xe naxe tponon komo kyopono me cesenpotome so mak.

Tan mai kpanatanmekn̂e,

kacho marha tpoxwe xa n̂encexe kwarawantacho yaw cexitaw so.

Xutew komo yesenmetopo yaw cexitaw so enîn̂e komo yapon pona cerema xe so mak naxe.

Ceseresmetaw so merpono pîn yakro marha ero yipu pona cerema xe so naxe kica.

47 Iin̂o waixapu komo nîmînkexe okwe.

Yîmînthîrî komo yermomn̂e wara ro mak naxe.

Kaan yakro rma tko re nîmtapowaxe.

Pahkî nîmtapowaxe kir̂wan wara cesenpotome so mak kica.

Ero ke,

Kicicme xa maxe kica,

kacho me naxe Kaan ya anarî komo yopo okwe,

kekn̂e tî Xesus.

Ero wa tî kekn̂e tînpanatanmekrî komo ya.