Taa,

on wara takî tî xakn̂e Xesus,

Kaan mîn yaw cexitaw Kaan purantan yenkarî tî n̂een̂akn̂e tupurantayem komo ya.

2 Amn̂e takî tî wooxam n̂een̂akn̂e hara Xesus.

Iin̂o waixapu thakwa tî mîk xakn̂e okwe,

yupurantamnî okwe.

Noro marha tî n̂enkayakn̂e puranta hara Kaan purantan yen yaka.

2 cik makî tî n̂enkayakn̂e exepeyu wahrai mko.

3 Ero ke on wara tî kekn̂e Xesus tînpanatanmekrî komo ya,

Mîkro encoko wooxam.

Iin̂o waixapu mîkro okwe,

yupurantamnî thakwa.

Ero ke yaaro tan wîîkes awya so,

anarî komo n̂enkaputho yopo ro mak n̂enkapu mîkro.

4 Mer̂pora ro mak nasî anarî komo purantan.

Ero poi cik mak n̂enkacow Kaan purantan me.

Noro reha n̂enkatîka tupurantanthîrî.

Asak manînhîrî rma n̂enkatîka.

Tînahrî yepethonho re mîn n̂enkapu noro reha,

tponon yepethonho cik anarimaw,

kekn̂e tî.

Ero wa tî kekn̂e Xesus.

5 Taa,

ero yinhîrî tak anarî komo takî tî n̂eserepoketken̂e Kaan mîn poko.

On wara tî ketken̂e,

Kir̂wan xa mîn toopu okre Kaan mîn me ciixapu.

Kir̂wan marha mîn tohkarara Kaan mîn yenporitopo.

Tooto komo nîmîtho marha nasî cenpore okre,

enporitopo me tîmxapu,

ketken̂e tî.

6 On wara tko tî kekn̂e Xesus yîwya so,

Amn̂e tak waapa mokyasî.

Moso pen tak n̂ixketîkexe mîîmo pen okwe.

Etîmkaw re exihra ro mak tak nasî ero yimaw toopu,

mîîmo me ciixapunhîrî.

Nar̂metîkexe ro mak okwe,

kekn̂e tî Xesus yîwya so.

7 Ai ha Apa okwe,

ketken̂e tî yîwya.

Ahcemaw xa n̂exixke onînhîrî?

ketken̂e tî yînpanatanmekrî komo yîwya.

Ahce xa Kaan n̂enpe amn̂e amna ya Kaan mîn yixkacho pahnoke tak nas okwe,

kachome tak amna ya?

ketken̂e tî.

8 Ero ke on wara tî kekn̂e Xesus,

Taa,

on wara nas amn̂e,

cemarontaxmu komo tak mokyaxe yaake.

Kristu xa ow ha,

kexe men awya so kica.

Oroto xa Kristu mokyasî,

kexe anarî kom hara.

Ero wa kan̂e komo yewetîra ro mak men ehcoko.

Akro so tohra ro mak ehcoko.

9 On warai marha mencexe tapota amn̂e,

mîn hak pono komo yetwotopo mencexe,

wara ro mak kan̂e komo yekaci marha mencexe.

Ero yipu yencetaw awya so erasîra rma ehcoko.

Ero wa thakwa ka naxe mîn hak pono komo cokorî.

Ero manhîrî yimawno pînî rma tko ka mîn ero yipu mencexe.

10 Ero wara rma men ka naxe mîk hak rowon pono komo,

waapa me cexe okwe.

Ero wa marha cexe kayaritomo komo anarî pen yar̂maxi kayaritomo pen hara.

Ero wa naxe emapona roro okwe.

11 On wara marha nasî anarî komo rowon pen,

n̂esewsîyasî kar̂pe ro mak.

Rooma poko marha naxe anarî komo.

Eper̂a yaw so marha n̂ehtîkexe anarî kom hara okwe.

Eraspetono mko marha meen̂axe kah yaw.

Kar̂pe xa Kaan yehtopo yenpotopo me n̂esenpesî ero yipu.

Ero yipu meen̂axe amn̂e aweserepokacho komo.

12 On wara tko ka maxe cokorî,

awahsîyaxe so aaxatî pîn komo,

awemetanmekyaxe so marha okwe.

Cesenmetopo komo yaka marha awar̂axe so awen̂ekachome so iito.

Awahruyaxe so marha okwe.

Kayaritomo komo yaka marha awar̂axe so awen̂ekapotome so yîwya so hara.

Yîxawyakan komo yaka so marha awar̂axe so.

Ero wa men awir̂axe so oyosotî ponarono me awexirî ke so mak ha.

13 Kir̂wan̂he rma tko nasî kayaritomo komo yaka awatopo komo.

Kaanî mtapotarî tak mekatîmyaxe okre awen̂ekan̂e komo ya rma.

14 Ero ke on wara kacoko,

Ero wa oyar̂ataw amn̂e eserepokara ro mak wasî eyuhtopo komo poko,

kacoko.

Ahce wa ma re ooxatî pîn komo weyukya ha?

kahra wasî,

kacoko ha.

15 Amtaka so rma tko eyukno ritopo komo wiirasî Ow ha.

Takîhso eyukn̂e me kiir̂axe so.

Emtayar̂man me ro mak awen̂ekan̂e komo meyukyaxe.

16 Anarimaw so aamo komo rma awen̂ekapexe so kayaritomo komo ya.

Anocwan komo marha ero wara awir̂axe so,

awakno komo marha,

ayanan komo marha,

awakrononhîrî komo marha.

Noro yipu komo yanme rma awaikexe so kayaritomo komo anarimaw so okwe.

17 Aaxatîmnokexe so ro mak tak okwe tooto komo ahnoro.

Ero wa naxe apoko so oyosotî ponarono me awexirî ke so mak.

18 Kukurunpexe so rma tko Ow.

Ahpoci komo meero ehcamnopîra nasî cewn̂antho rma ciki.

19 Ooxatîmnokara ro mak awexitaw so miya roro tahwore rma kiir̂axe so,

kekn̂e tî.

Ero wa tî kekn̂e Xesus.

20 On wara marha wîîkes awya so,

kekn̂e xa hara tî Xesus tînpanatanmekrî komo ya,

ero yinhîrî tak waapa mokyasî Xerusaren pono komo yar̂maxi.

Ewto wamcexe wahkotono ritohme okwe.

Wamton̂e komo yeen̂ataw awya so on wara tak kacoko,

Waihyaxe tak okwe Xerusaren pononho pen komo.

Ewtotho me tak nasî ewto okwe,

kacoko ero yimaw ero poko.

21 Ero yimaw Xuteia po awexitaw so emahcicoko men îh pona.

Xerusaren po rma awexitaw so emahcicoko marha.

Mararî po awexitaw so ewto pona tohra ro mak ehcoko.

Emahcicoko ro mak.

22 Kaan ponarono pen komo yepantopo me tak nasî ero yimaw.

Kaan Karitan yaw roro rma ciino ritopo me nasî,

ahnoro mewrexapu yaw roro n̂ecitîkesî.

23 Ero yimaw cewru komo tak naar̂axe ro mak wooxam komo tarkem komo,

cenarkem komo marha.

N̂esemetanmekyaxe ro mak tak ero yimaw tantono komo.

Kaanî rwonîmtopo me tak nas oko Ixaw Yana komo poko.

24 Kacipara imo ke paraxkaxapu me waihyaxe anarî pen kom okwe.

Anarî pen komo reha naar̂axe tapomiso so.

Anarî yana komo cheka naar̂axe mîk hak yana cheka.

Ero yimaw Xerusaren pono pen komo tak n̂emetanmekyaxe ro mak okwe Xenciu komo.

Pahkî n̂he ka n̂emetanmekyaxe kayaritomo me Xenciu komo yehtoponho cenatîso ro,

kekn̂e tî Xesus yîwya so.

Ero wa tî kekn̂e.

25 On wara marha wîîkes awya so,

kekn̂e hara tî Xesus tînpanatanmekrî komo ya,

ero yinhîrî tak anarme tak nasî kaamo,

xir̂ko marha.

Omohtopo kuknonî rma mîn anarme ehtopo.

Nahwokexe marha mîk hak rowon pono komo,

Ahce wa tatu kopi?

kan̂e me naxe.

On wara marha nasî tuuna imo ero yimaw,

n̂ewtunasî ro mak esewcokocokomacho.

26 N̂eraswaxe ro mak anarî komo ero yimaw.

Anarî komo coro nîtîtmamyasî okwe erahtîmtopo komo yanme.

Ahce wa tak na cehtîketu kopi?

kexe.

Ecetî ken̂arî pîn wara tak nasî kaapu kopi ero yimaw.

27 Taa,

ero wa exitaw tak Tooto me Ewruxapu mokrî n̂een̂axe roowo pono komo.

Kaapu smun ke tponoye mokyasî.

Karitî me xa mokyasî,

tîroromutwe xa marha oco.

28 Ero yipu mko ka meen̂axe aweserepokacho komo.

Ero yipu yeen̂ataw awya so ahkantacoko tak,

kahsî tak encoko.

Kown̂e komo mohtopo pahnoke tak nai ham okre,

kacoko ero yimaw,

kekn̂e tî Xesus.

Ero wa tî kekn̂e.

29-30 Taa,

ero yinhîrî anarî pokono wara takî tî nîmtapowakn̂e xa hara Xesus tînpanatanmekrî komo yakro.

On wara tî kekn̂e yîwya so,

Ahce wa nai piiku yepu,

weewe komo ahnoro ahce wa nai?

Yarkwetkuru yetahketaw on wara mîîkexe,

Nnn,

pahnoke tak nai ham katpan,

mîîkexe.

31 Ero ke ero wa xa marha ehcoko kayaritomo me Kaan yesenpotopo ponaro takî.

Emetanmekno ritopo poko kweronomacow so,

ero yipu yeen̂ataaw awya so on wara men kacoko,

Pahnoke xa tak nai ham kayaritomo me Kaan yesenpotopo,

kacoko tak.

32 Yaaro tan wîîkes awya so,

awepamthîrî komo exitaw rma ero yipu meen̂axe,

wekatmo awya so ero yipu komo ahnoro.

33 Kaapu penî rma n̂ehcamnoyas amn̂e.

Roowo pen meero marha n̂ehcamnoyasî.

Pîra ro makî reha nasî omtapotarî ha.

Ehcamnopîn me ro mak nasî.

34 Ero ke on wara wîîkes awya so,

omohtopo ponaro men ehcoko.

Anarimaw kawaxiyem na meer̂atu kica.

Mîwenatu marha na kica.

Awemyawno komo ponaro mak na mehtîketu anarimaw.

Ero wa awexitaw so awekatkexe so tak men okwe awaparî komo,

aweper̂an komo marha,

aweraspetopo komo ahnoro.

35 Ero wa emetanmekno ritopo me n̂enmayasî xiika warai me rma.

Ero po tak xiika yaka emcixapu wara maxe.

Ero wara rma naxe ahnoro roowo poko hakno kom okwe.

36 Ero ke Tooto me Ewruxapu mohtopo ponaro xa men ehcoko miya roro.

Kaan yakro marha amtapotacoko roro.

On wara kacoko,

Apa kah yawno,

owî cma re mukurunpesî esemetanmekîra oyehtome an̂ekatîmthîrî yaw roro.

Tooto me Ewruxapu yeepatai cececetosom me xa matko ow cirko,

kacoko Kaan ya emapona roro,

kekn̂e tî.

Ero wa tî kekn̂e Xesus tînpanatanmekrî komo ya.

37 Ero wara roro tî xakn̂e Xesus,

katpanaw ka panatanmekno tî n̂iir̂akn̂e Kaan mîn yaw enmar̂atîxera.

Kosope so tî cekn̂e ewto poi.

Oripera Yîpîn po tî n̂enmayakn̂e roro.

38 Pahxaxaro so tî cekn̂e Kaan mîn yaka hara.

Pahxaxaro rma tî mokyatken̂e tooto komo ahnoro iina yîmtapotarî yentaxi.

Ero wa tî mokyatken̂e Xesus yaka.