Taa,

ero yimaw tak Xutew komo yahwotacho pahnoke takî tî xakn̂e.

Wahrututpamnî Tohtopo mîn xakn̂e ahwotacho komo.

Paskwa kacho rma tî mîn xakn̂e.

2 Ero yimaw tak Xesus waihkacho poko takî tî n̂esencetken̂e tîmsom pokono yenîn̂e komo,

Xutew panatanmetopo mewren̂e komo marha.

Yakentaw ahsî xera tî xatken̂e.

N̂eraswatken̂e tî tooto komo pona.

3 Ero yimaw rma takî tî Xutas ropotaka n̂ewomyakn̂e Satanas.

Iskar̂otes kacho rma tî mîk xakn̂e Xutas.

12 komo rma mîk xakn̂e.

4 Ero ke tîmsom pokono yenîn̂e komo yaka takî tî cekn̂e noro,

Iito marha tî xatken̂e Kaan mîn kurunpen̂e komo.

N̂examro yakro takî tî n̂esencekn̂e Xutas Xesus yekantopo poko.

Owî rma na wekanîya,

ketken̂e tî yîwya so.

5 Taa,

ero wa ham okre,

ketken̂e tî yîwya.

Tawake tî n̂encetken̂e Xutasî mtapotarî.

Puranta amna nîmyas awya Noro yekantopo yepetho,

ketken̂e tî yîwya tîmsom pokono yenîn̂e komo.

6 Taa,

wekanîya ham ahsîtome awya so,

kekn̂e tî Xutas yîwya so.

Ero ke Xesus yekantopo ponaro takî tî xakn̂e.

Tootonaw mak ekanpu xe tî xakn̂e.

Ero wa tî xakn̂e Xutas okwe.

7 Taa,

ero yinhîrî tak Wahrututpamnî Tohtopo me n̂enmayakn̂e.

Ero po marha oper̂a paraxketken̂e paskwa po tonosom.

8 Ero ke tînpanatanmekrî komo takî tî n̂en̂epekn̂e Xesus asakî.

Petru,

Xuaw,

ero wa tî n̂en̂epekn̂e.

On wara tî kekn̂e yîwya so,

Kootî etakatatko keseresmachome paskwa yimawno me,

kekn̂e tî yîwya so.

9 Ahna amna n̂etake,

ketken̂e tî yîwya.

10 On wara tî kekn̂e Xesus,

On warai tak meen̂axe amn̂e,

ewto pona awepatakache so.

Iito tak awepor̂axe so weer̂a ke tmotawnoyem,

kîîrî ha.

Noro tak cesî mîîmo yaka.

Noro wenari rma ewomcoko amyamro hara.

11 Iito awexitaw so on wara kacoko mîîmo yosom ya,

Ai,

on wara tî nîîke kpanatanmekn̂e awya,

Paskwa yimawno me cma re keseresmesî tan amîn yaw oroto.

Onpanatanmekrî komo yakro keseresmesî.

Ero ke pawana yetarî cma re menpesî yîwya so iina amna yeseresmachome,

nîîke tî awya,

kacoko yîwya.

12 Ero ke eporino tak n̂enpes awya so amtakpo.

Porin n̂enpesî,

aapo ken̂arî ha.

Iina tak etakacoko paskwa yimawno kot kom ha,

kekn̂e tî Xesus yîwya so.

13 Ero ke cetken̂e takî tî Petru komo ewto pona.

Iito takî tî n̂een̂atken̂e Xesusu mtapotachonho yaw rorono rma.

Ero ke iina tî totî komo n̂etaketken̂e paskwa yimaw tonosom.

Ero wa tî xatken̂e.

14 Amn̂e eseresmatopo komo me exitaw takî tî Xesus n̂eremekn̂e ceseresmachome.

N̂eseresmekn̂e takî tî tînantomarî komo yakro,

12 komo yakro ha.

15 Ceseresmetaw tak on wara tî kekn̂e Xesus yîwya so,

Cerewre ro mak on yimawno tono xe wîxakn̂e,

paskwa yimawno ha.

Owaipînaw rma tono xe wîxakn̂e.

16 On wara was amn̂e,

paskwa yimawno tonohra xa hara wasî tan oyexitaw roowo po.

Amn̂e tak kayaritomo me Kaan yesenpetaw ciitîkaxi tak nasî akir̂wamano ritopo.

Ero yimaw mak tak won̂esî xa hara,

kekn̂e tî Xesus yîwya so.

17 Ero wa kache tak uupa yukun takî tî nanîmyakn̂e Xesus.

Kaan yakro ka nîmtapowakn̂e.

Kir̂wan tan okre anmîthîrî Apa amna wokru,

kekn̂e tî yîwya.

Ero wa kache tînpanatanmekrî komo ya tî kekn̂e hara.

Ehe,

on ha awokru komo.

On eecoko amyamro ahnoro.

18 On wara was amn̂e,

uupa yukun yerîhra xa hara wasî.

Kayaritomo me xa tak Kaan yesenpoche amn̂e ero yimaw mak weer̂asî xa hara,

kekn̂e tî Xesus.

19 Ero yinhîrî cuure takî tî nanîmyakn̂e hara Xesus.

Kaan yakro tî nîmtapowakn̂e ero poko hara.

Ero wa kache poikekn̂e takî tî.

Tînpanatanmekrî komo yuru takî tî n̂ekamyakn̂e.

On ha opuntho awanme so tîmxapu.

Oponaro men ehcoko on tokyataw awya so,

kekn̂e tî yîwya so.

20 Eseresmatîkache so tak wooku takî tî nanîmyakn̂e xa hara Xesus.

On wara tî kekn̂e yîwya so,

Okamxukutho tan ha,

Awakir̂wamexe so tak Kaan amn̂e,

kacho ha.

Awanme so tak ces amn̂e okwe.

21 Taa,

tanî rma nas oyekanîn̂e okwe.

N̂eseresmesî tan oyakro.

Oyekanîyas amn̂e oyahsîpotome tak ooxatî pîn komo ya okwe.

22 Tooto me Ewruxapu cesî waihso.

Apapa ya kachonho yaw roro rma waihyasî.

Noro yekanîn̂enho rma tko n̂etwîrîmesî ro mak okwe,

kekn̂e tî Xesus.

23 Ero yipu yentache tak n̂eserepoketken̂e takî tî Xesusu npanatanmekrî komo.

Onoke xa mîk Noro yekanîn̂e okwe?

ketken̂e tî n̂examro re mak.

Ero wa tî ketken̂e.

24 Taa,

ero yinhîrî tak Xesusu npanatanmekrî komo takî tî n̂eseseyukyatken̂e Ow xa was amn̂e ayopono komo me,

kekn̂e tî anarî.

Pîra,

ow xa wasî ayopono komo me,

kekn̂e tî anarî hara.

Ero wa so tî ketken̂e kica.

25 Ero ke Xesus takî tî nîmtapowakn̂e hara akro so.

On wara tî kekn̂e,

Ai okopuci komo,

On wara naxe Xenciu kayaritomon komo,

tmaywen komo nantomexe ro mak.

Ayopono komo xa ow ha,

kexe tmaywen komo ya.

On wara marha kexe n̂examro maywen komo yîwya so hara,

Amna wakren̂e xa amoro,

kexe tantoman̂e komo ya.

26 N̂examro warahra ehcoko amyamro reha.

Awakrono komo yopono me awexitaw so n̂examro mahtîkîtho wara xa ehcoko.

Awakrono komo yantoman̂e me awexitaw so n̂examro yanton me marha ehcoko.

27 Ahce wa xa matu amyamro ceseresmaxmu nahrî yetaketaw awya so?

Onoke warai xa nai anarî komo yopono me?

Ceseresmaxmu komo xa naxe anarî komo yopono me.

Yîxawyakan me reha maxe etakan̂e me mak awexirî ke so.

Ero warai ow ha,

anahrî yetakan̂e warai mak ow ha.

28-29 Kayaritomo me rma maxe amyamro reha.

Kayaritomo me oriyakn̂e Apapa,

ero wa xa marha kayaritomo me kiir̂axe so hara oyakrono me awexirî ke so.

Oyesemetanmekyataw onomra rma mîxatken̂e.

Ero ke tak kayaritomo me kiir̂axe so amn̂e.

30 Ero ke kayaritomo me xa tak oyesenpoche amn̂e oyakro tak meseresmexe.

Kayaritomo yapon po so marha maxe ceremaxi Ixaw Yana komo yenîn̂e me.

Ixaw Yana tribun komo yenîn̂e me maxe,

12 tribu komo yenîn̂e me ha,

kekn̂e tî Xesus.

Ero wa tî kekn̂e tînpanatanmekrî komo ya.

31 Taa,

ero yinhîrî tak Petru yakro takî tî nîmtapowakn̂e hara Kporin komo.

On wara tî kekn̂e yîwya,

Ai,

Simaw,

Simaw,

awahsî xe tî nai Satanas okwe.

Puruma yatho tîmyapesî yupupunthîrî yar̂machome ero wa xa marha amyapo xe tî nai Satanas.

32 Apoko tko kîmtapotai Kaan yakro okopuci enîhkan̂e pîn me ro mak awehtome.

Amn̂e tak opona enîn̂e me xa tak awexiche awakno komo yahworen̂e me tak esko opoko,

kekn̂e tî Xesus Petru ya.

33 On wara tko tî kekn̂e Petru yîwya,

Anomra ro mak was Apa.

Kahrutopo yaka awar̂ataw porisia komo ya ketahrupes ow marha awakro.

Awaiketaw yîwya so ow marha ketwaikapesî yîwya so awakro rma,

kekn̂e tî Petru yîwya.

34 On wara tko tî kekn̂e Xesus yîmtaka,

On wara wîîkes awya Petru,

on wara mas amn̂e on kaamo po rma.

Noro yakrono pîn mak ow ha,

mîîkesî opoko okwe.

Osorwaw ro ero wa mîîkes amn̂e kohtîmra ka exitaw kapikara,

kekn̂e tî.

Ero wa tî kekn̂e Xesus Petru ya.

35 Taa,

ero yinhîrî takî 12 komo yakro takî tî n̂esencekn̂e Xesus.

On wara tî kekn̂e yîwya so,

Pahxa ken̂epetken̂e so opoko ekatîmn̂e komo me.

On wara wîîkekn̂e awya so ero yimaw,

Apurantan komo arîhra ehcoko,

akumixin komo marha,

ahtarî komo marha,

ero yipu arîhra ehcoko,

wîîkekn̂e awya so.

Ero wa awcetaw so kir̂wan̂he na mîîcetken̂e ha re?

Mesemetanmekyatken̂e katî?

kekn̂e tî yîwya so.

Pîra,

kir̂wan̂he amna cekn̂e esemetanmekîra,

ketken̂e tî yîwya.

36 Taa,

ero warahra tak wîîkes awya so oroto,

kekn̂e tî Xesus yîwya so.

Apurantan yen exitaw aacoko oroto.

Akumixin komo marha aacoko.

Akaciparan komo exihra exitaw aponon komo tak tîmcoko puranta pona.

Ero yepetho pona tak aponcoko akaciparan komo,

wîîkesî tak awya so.

37 On wara kesî Kaan Karitan,

Noro pen nahsîyatken̂e porisia komo kayaritomo mtapotarî yanwekn̂e komo yakro rma,

kesî.

Opoko rma wa ero wa kesî Kaan Karitan.

Yaake nasî Kaan nmewrepotho opokono ha.

Ero ke ero yaw roro rma oritîkexe amn̂e,

kekn̂e tî Xesus yîwya so.

38 Apa,

ketken̂e tî 12 komo Xesus ya,

on ha kacipara asakî,

ketken̂e tî.

Taa,

n̂ex ha,

ero wicak mak ham,

kekn̂e tî.

Ero wa tî kekn̂e Xesus.

39 Taa,

ero yinhîrî takî tî mîîmo yai cekn̂e Xesus.

Oripera Yîpîn pona tî cekn̂e tîtotopo ro yaw roro.

Noro wenari marha tî cetken̂e yînpanatanmekrî komo.

40 Iito cexitaw tak on wara tî kekn̂e Xesus yîwya so,

Kaan yakro men amtapotacoko kicicitho yewetîra ro mak awehtome so,

kekn̂e tî yîwya so.

41 Ero yinhîrî yîhyai so takî tî cekn̂e Xesus moro na mak.

Tohkarara tar̂mesî ero wicakî moxenon makî tî cekn̂e.

Iito takî tî n̂eremekn̂e tosokmuru po.

Kaan yakro takî tî nîmtapowakn̂e.

42 On wara tî kekn̂e,

Apa,

owokru wara on wîhtînoysî owaitopo,

cîmîkno wara xa.

Ero ke erpora cma re mas owya Apa okwe.

Weer̂asî rma tko yiixe awexitaw.

Oyanmero mak oyexi xera wasî,

kekn̂e tî Xesus Tîîm ya.

43 Ero yimaw takî tî ancu mokyakn̂e kah yai Xesus yaka karihtoso.

44 Ero yimaw n̂eserepoketîkekn̂e takî tî Xesus.

Ero ke cerewre ro makî tî nîmtapowakn̂e Kaan yakro.

Peramukwakn̂e marha tî.

Peramkuthîrî cetaw roowo pona kamxuku ke ceske tî xakn̂e okwe.

45 Taa,

Kaan yakro tîmtapotache takî tî nawomyakn̂e hara Xesus.

Tînpanatanmekrî komo yaka takî tî cekn̂e hara.

Tîwînso makî tî n̂examro n̂een̂akn̂e okwe.

Ahwora cexirî komo ke makî tî nîwînîkyatken̂e.

46 Ahce wa awexirî ke so mîwînîkyat ha?

kekn̂e takî tî Xesus yîwya so.

Tîhkaw n̂he ehcoko.

Kaan yakro tak amtapotacoko kicicitho yewetîra ro mak awehtome so,

kekn̂e tî yîwya so.

Ero wa tî kekn̂e.

47 Taa,

ero wa ketaw rma Xesus ya ahsîn̂e komo takî tî mokyatken̂e yîhyaka mer̂pono pîn.

Poturme tî mokyakn̂e Xutas.

12 komo rma mîk xakn̂e Xutas.

Xesus yaka takî tî noro cekn̂e ewcokaxi.

48 Ero ke on wara takî tî kekn̂e Xesus yîwya,

Ai Xutas,

kewcokacho ke ma Tooto me Ewruxapu mekanîya ha?

kekn̂e tî yîwya.

49 Xesus yahsîn̂e komo tî n̂een̂atken̂e yînpanatanmekrai komo.

Ero ke on wara tî ketken̂e yîwya,

Amano katî amna n̂iir̂a Apa kacipara ke?

ketken̂e tî yîwya.

50 Cur̂ai kekn̂e rma tî anarî.

Kaan yaka cewomsom yanton pen panakekn̂e oko.

Kaari n̂ixan makî tî nîhkocekn̂e panathîrî.

51 Pîra,

kekn̂e tko tî Xesus yîhkoton̂enhîrî ya,

oyahsîcowpe rma,

kekn̂e tî.

Ero wa kache,

teme kekn̂e takî tî Xesus noro panarî mîtîtho pona.

Yohno rma tî kir̂wan̂he xakn̂e hara panarî.

Ero wa tî panahcekn̂e hara.

52 On warai komo tî mîkyam mokyatken̂e Xesus yaka,

tîmsom pokono yenîn̂e komo,

Kaan mîn kurunpen̂e komo,

Xutew poritomon komo,

ero warai komo tî mîkyam mokyatken̂e.

N̂examro ya tî kekn̂e Xesus on wara,

Ahce kacho on wara mîmohcow cen̂epan̂em yahsîn̂e wara?

Kacipara imo ke cemyarke so mîmohcow kopi,

watma ke cemyarke so marha kopi.

53 Enmar̂atîxera wîxakn̂e Kaan mîn yaw iito awexitaw so.

Oyahsîra mîxatken̂e ero yimaw.

Oroto rma tko nasî kar̂pe awehtopo komo,

kar̂pe xa awarpan yehtopo marha.

Yohno makî tko maxe kar̂pe,

kekn̂e tî Xesus yîwya so.

Ero wa tî kekn̂e.

54 Taa,

ero yinhîrî tak Xesus pen takî tî nahsîyatken̂e,

chow.

Miya takî tî naar̂atken̂e Kaan yaka cewomsom mîn yaka.

Wenari so rma tî re cekn̂e Petru mooxe n̂he makî ha tko tî.

55 Taa,

Kaan yaka cewomsom roron po tî xatken̂e tooto yaake.

Wehto tî n̂iriyatken̂e n̂examro iito.

Iito re takî tî n̂eremetken̂e.

Ero ke n̂examro yakro marha tî n̂eremekn̂e Petru hara.

56 Petru tî weipekn̂e wehto.

Iito marha tî xakn̂e emasî.

Noro takî tî n̂een̂akn̂e Petru wece.

N̂entîkekn̂e tî.

On wara takî tî kekn̂e Petru poko,

Xesus yakrononho marha mîkro ham,

kekn̂e tî.

57 Pîra okopuci,

kekn̂e takî tî Petru,

on̂entorî ro mak mîkro,

kekn̂e tî kica.

58 Amn̂e n̂he tak anarî takî tî Petru n̂een̂akn̂e xa hara.

Xesus yakrononho rma mexe amoro,

kekn̂e tî yîwya.

Pîra ro mak oyakno,

kekn̂e xa hara tî Petru.

Noro yakrononho pînî ro mak ow ha,

kekn̂e xa hara tî kica.

59 Cewn̂e ora yenatîche takî tî anarî nîmtapowakn̂e xa hara Petru poko.

Xesus yakrononho rma mexe moso.

Karireia pono moso ha,

kekn̂e tî Petru poko.

60 Pîra ro mak,

kekn̂e xa hara tî Petru.

Ahce wai poko na mîîke,

yîhtînopîra ro mak wasî,

kekn̂e tî Petru xa hara kica.

Ero wa ketaw rma,

kookara,

kekn̂e takî tî kapikara.

61 Ero yimaw Xesus takî tî n̂esewkor̂mekn̂e.

Petru wece takî tî n̂een̂akn̂e.

Ero ke Kporin komo mtapotachonho takî tî nîhtînoyakn̂e.

Kuu,

Noro mtapotachonho yaw roro rma wex ham okwe.

Kohtîmra ka exitaw kapikara,

Noro yakrono pînî ro mak ow ha,

mîîkesî osorwaw ro,

nîîka Xesus owya,

kekn̂e tî Petru.

62 Ero ke roro poi takî tî cekn̂e.

Nîwracekn̂e takî tî.

Nîwracetîkekn̂e ro mak okwe.

Ero wa tî xakn̂e Petru.

63 Taa,

ero yinhîrî tak Xesus poko takî tî n̂etaporetken̂e ahsîn̂e komo.

N̂etapetken̂e marha tî amoyi ke oko.

64 N̂eewoponcetken̂e marha tî poono ke.

Eewopontoche n̂ewkatapetken̂e takî.

Ai,

ketken̂e tî yîwya,

Kaan yanme kyam ka ekatîmko awewkatapan̂e yosotî.

Onoke xa mîk awewkatapa.

Ekatîmko ika amna ya,

ketken̂e tî yîwya kica.

65 Miya rma tî nîmtapowatken̂e Xesus poko.

Kicicitho me ro makî tî Noro poko nîmtapowatken̂e kica.

Ero wa tî xatken̂e kica.

66 Enmapuche tak Xutew poritomon komo takî tî n̂esenmekyatken̂e mîîmo yaka.

Tîmsom pokono yenîn̂e komo marha tî n̂esenmekyatken̂e iina,

Xutew panatanmetopo mewren̂e komo marha tî.

Xesus marha takî tî naar̂atken̂e iina en̂ekachome.

67 Ero ke on wara takî tî ketken̂e Xesus ya,

Onoke xa Amoro ha ke?

Esekatîmko ka amna ya,

Kristu ow ha,

kasko ika.

Noro pîn katî amoro?

ketken̂e tî yîwya.

On wara tko tî Xesus n̂eyukyakn̂e,

Kristu xa Ow ha,

ketaw owya awya so oyewetîra ro mak maxe.

68 Onoke katî Ow awya so,

ketaw marha owya oyeikura ro mak maxe.

Oyahsîpînkara marha mat okwe.

69 On wara tko wîîkes awya so,

Tooto me Ewruxapu tak nasî ceremaxi amn̂e Kaan panaw,

kaari n̂ixa.

Yukurumîkno panaw xa nasî.

Ero wa nasî Noro amn̂e,

kekn̂e tî Xesus yîwya so.

70 Ai ha,

ketken̂e takî tî en̂ekan̂e komo.

Kaan Mumuru xa ma Amoro ha?

ketken̂e tî yîwya.

Yaaro ero wa mîîkexe opoko,

kekn̂e tî Xesus yîwya so.

71 Kopi,

ketken̂e takî tî esenmexapu komo.

Ahce kacho anarî komo mtapotarî yenta xe tat hara moso yehtopo poko?

N̂eexi tak ha.

Kîwyamu rma centacow kicicme ro mak yîmtapotarî,

ketken̂e tî.

Ero wa tî ketken̂e Xesus poko.