Taa,

ero yinhîrî takî piiri so tî nawomyatken̂e esenmexapu komo ahnoro.

Xesus takî tî naar̂atken̂e Piratus yaka.

2 N̂examro takî tî Xesus n̂en̂ekapetken̂e Piratus ya.

On wara tî ketken̂e yîwya,

Amna poyino komo panatanmekn̂e Moso kica.

Anato ro mak panatanmekno n̂iir̂asî kica,

Sesa purantan tîmîhra ehcoko,

kesî Moso kica.

Ow xa kayaritomo.

Kristu xa Ow ha,

kesî marha kica,

ketken̂e tî Xesus poko.

3 Ai ha,

kekn̂e takî tî Piratus yîwya so.

Ero ke Xesus ya tî kekn̂e,

Xutew komo kayaritomon xa ma Amoro?

kekn̂e tî yîwya.

Nhnk,

Noro rma Ow ha,

kekn̂e tî Xesus yîwya.

4 Ero wa kache tîmsom pokono yenîn̂e komo ya takî tî kekn̂e hara Piratus,

esenmexapu komo ya marha tî kekn̂e.

Kicicme moso yehtopo yenîhra ro mak wasî,

kekn̂e tî yîwya so.

5 Pîra ha men,

ketken̂e xa hara tî esenmexapu komo.

Amna poyino komo yerepokan̂e ro mak Mîkro kica,

ketken̂e tî yîwya.

Xuteia roowon pono komo panatanmekyasî ahnoro.

Karireia rowon pono komo panatanmekyasî,

oona rono komo meero,

ketken̂e tî Piratus ya.

Ero wa tî ketken̂e.

6 Taa,

Karireia,

kacho yentache Piratus ya on wara takî tî kekn̂e esenmexapu komo ya,

Ahtono xa Moso ha ke?

Karireia pono ma Moso ha?

kekn̂e tî yîwya so.

7 Nhnk,

Karireia pono Mîkro ha,

ketken̂e takî tî Piratus ya.

Ai ha,

kekn̂e takî tî Piratus.

Eroces maywen ham Moso,

kekn̂e tî.

Ero ke Eroces yaka takî tî Xesus narpekn̂e.

Xerusaren po tî xakn̂e noro ero yimaw.

8 Xesus yenîche tawake xa tî xakn̂e Eroces.

Pahxa rma tî Xesus yenî xe xakn̂e.

Noro yekaci tî n̂encekn̂e roro,

ero ke tî enî xe xakn̂e.

Cirihnî enî xe tî xakn̂e yin̂irithîrî.

9 Ero ke iito exitaw tak,

Ahce wa mai ero poko,

kekn̂e tî yîwya Mîn hak poko tî.

Eikura ro makî tî xakn̂e Xesus.

Tîî kekn̂e makî tî.

10 Iito marha tî xatken̂e tîmsom pokono yenîn̂e komo,

Xutew panatanmetopo mewren̂e komo marha.

Piiri so takî tî nawomyatken̂e.

Kicicitho ro mak mîk Xesus,

ketken̂e.

Cerewre ro makî tî n̂etahcatken̂e tî kicicme Xesus yehtoponho tî re yîwya.

Ero wa tî xatken̂e.

11 Ero yinhîrî takî tî Xesus pen nîwîrîyakekn̂e Eroces,

noro sowtatun komo marha.

N̂etaporetken̂e marha tî Noro poko.

Kir̂wan tî namrupetken̂e poono yîwya.

Ero wa ciriche Xesus takî tî narpetken̂e Piratus yaka xa hara.

Ero wa tî xakn̂e Eroces.

12 Ero kaamo po rma n̂etîrwoxinketken̂e takî tî Eroces komo,

Piratus yakro.

Pahxa n̂he ka etîxera tî xatken̂e.

Ero yîmaw takî tî xatken̂e tawake hara etpoko.

13 On wara takî tî xakn̂e Piratus Xesus yeen̂ataw hara,

tîmsom pokono yenîn̂e komo takî tî nan̂ikpekn̂e xa hara.

Enîn̂e komo marha tî nan̂ikpekn̂e,

tooto komo marha tî.

14 On wara tî kekn̂e Piratus yîwya so,

Moso mehcow ohyaka on̂en̂ekarî.

Anato panatanmekno rin̂e Moso kica,

mîîkacow owya.

Ero ke aweroro so rma tak wen̂eka.

Kicicme exihra rma nai owya ero wara cehsomu rma.

15 Ero wa xa marha tî Eroces nîhtînopu hara.

Yîhyaka cma re warpo.

Yaw xa marha n̂en̂epew hara ohyaka.

Ero ke twaihkaxmu mera ro mak nai ham.

16 Ero ke wîhyokpesî mak ahsîpînkachome tak owya,

kekn̂e tî.

Ero wa tî kekn̂e Piratus esenmexapu komo ya.

17 On wara roro tî xakn̂e Piratus,

Xutew komo yahwotacho yimaw roro n̂examro poyino pen tî nahrunkekn̂e cewn̂e mak ahruxapunhîrî.

Ero ke Xesus yahsîpînka xe tî xakn̂e Piratus.

18 Anarî me tko tî ketken̂e esenmexapu komo.

Piratusu mtaka tî n̂eyuhtîketken̂e kar̂pe.

Pîra,

Noro kr̂a amowoko.

Barabasî xe xa nas amna.

Ero ke noro xa ahrunkak ha ke,

ketken̂e tî yîwya.

19 On warai tî mîk xakn̂e Barabas,

iitono komo panatanmekn̂enho mîk xakn̂e kayaritomo yar̂macho poko.

Waihkano rin̂enho marha mîk xakn̂e.

Ero ke kahrutopo yaka takî tî noro pen nahruyatken̂e.

Noro yipu rma tî n̂etahcatken̂e Piratus nahrunkarî.

20 On wara tko tî xakn̂e Piratus,

Xesus yahsîpînka xe rma tî xakn̂e.

Ero ke esenmexapu komo ya tî kekn̂e xa hara Noro yahsîpînkacho poko.

21 Pîra,

ketîketken̂e makî tî.

Amowoko kr̂a.

Amowoko xa ha men,

ketken̂e tî yîwya.

22 Tîmtapotachonhîrî wara xa marha tî kekn̂e xa hara Piratus yîwya so.

3 me takî tî xakn̂e yîmtapotachonhîrî Xesus yahsîpînkacho poko.

Ahce wa exirî ke wamowe ha ke?

Twaihkaxmu me Moso yîhtînopîra ro mak was ow okwe.

Ero ke wîhyokpesî mak ahsîpînkachome tak ha,

kekn̂e tî Piratus yîwya so.

23 Pîra ha men,

ketîketken̂e takî tî esenmexapu komo.

Tîmsom pokono yenîn̂e komo yakro rma tî ketken̂e.

Amowoko mak ha.

Amowoko mak ha,

ketken̂e tî.

Cerewre xa tî ketken̂e,

n̂emtaraketken̂e mak.

Ero ke n̂examro takî tî n̂ewehcakn̂e Piratus.

24 Taa,

amowocoko rma.

Yîmtapotarî yaw roro rma ciicoko,

kekn̂e tî tmaywen komo ya.

25 Barabasî takî reha nahrunkekn̂e n̂examro yanme.

Panatanmekno rin̂enho mîk xakn̂e kayaritomo yar̂macho poko.

Waihkano rin̂enho marha mîk.

Ero yanme ahruxapu mîk xakn̂e,

Noro yipu tî mîk nahrunkekn̂e hara yiixe exirî ke so mak.

Xesus reha tî namowopekn̂e esenmexapu komo yanme marha.

Ero wa tî xakn̂e Piratus.

26 Ero ke Xesus pen takî tî naar̂atken̂e sowtatu komo amowoso.

Tîcetaw so rma mohxapu tî nahsîyatken̂e.

Simaw tî mîk xakn̂e Siren̂e pono.

Woskara poi mohxapu tî mîk xakn̂e.

Noro motaka takî tî nakriyatken̂e tpanaxkem.

On ek ha amoro.

Xesus mapitaw ro rma amok ha,

ketken̂e tî sowtatu komo yîwya.

27 Tooto komo marha tî cetken̂e Xesus wenari mer̂pono pîn.

Wooxam komo marha tî cetken̂e akro so.

Xesus pînîn yaw tî nîwracetken̂e n̂examro,

wooxam kom ha.

28 Ero ke wooxam wece takî tî n̂esewkor̂mekn̂e Xesus.

Ai,

Xerusaren yemsîrî komo amyamro,

on wara wîîkes awya so,

kekn̂e tî yîwya so,

Opînîn yaw yîwratara ehcoko.

Apînîn yaw so rma xa matko awratacoko,

amxîkîthîrî komo pînîn yaw marha.

29 On wara tak men kexe tantono komo amn̂e,

Tawake xa naxe yîmxîtanî ro komo reha okre,

tarke exihnî ro komo,

moomo ke rikomo wokpan̂e pînî ro komo marha.

Noro yipu komo reha tawake xa naxe,

kexe men amn̂e,

kekn̂e tî.

30 On wara marha kexe ero yimaw,

îîpî ya rma kexe,

Emacakî kr̂a amna yerewnutome ha,

kexe.

Matîwîn komo ya marha kexe,

Amna kr̂a ahruko ha,

kexe.

Ero wa so men kexe amn̂e.

31 Weewe wara mak naxe tooto komo oroto taakem wara.

Ero wa cexitaw so rma on wara oriyaxe okwe.

Amn̂e tak yîpîrîtho wara mak tak naxe hara okwe.

Ero yimaw tak miya xe xa tak emetanmekno n̂iir̂axe okwe,

kekn̂e tî.

Ero wa tî kekn̂e Xesus wooxam komo ya.

32 Taa,

anarî pen komo marha tî naar̂atken̂e sowtatu komo,

tamowosom komo xa marha.

Kicicitho komo tî mîkyam naar̂atken̂e.

33 Ero ke cetken̂e,

cetken̂e,

cetken̂e.

Iito tî xakn̂e matîwîn,

Tooto Pîtho,

kacho ha.

Ero pona takî tî cetken̂e.

Iito cexitaw so tak Xesus takî tî namowetken̂e.

Kicicitho komo marha tî namowetken̂e Xesus panaka rma.

Kaari n̂ixa tî anarî namowetken̂e.

Poowa n̂ixa tî anarî namowetken̂e hara.

34 Ero yinhîrî tak Xesus nîmtapowakn̂e Kaan yakro.

Apa,

kekn̂e tî,

kicicme moxam yehtopo cma re mîhcamnoyasî.

Camkî thakwa naxe owaikacho poko,

kekn̂e tî Xesus.

Ero yinhîrî tak Xesus ponontho takî tî nahsîyatken̂e sowtatu komo tponon me so hara .

Tînahsîrî komo men̂ekacho tî ka nar̂metken̂e,

On yahsîn̂e ow ham,

kachome tîwya so.

Ero wa tî nahsîyatken̂e Xesus ponontho.

35 Iito rma tî n̂ecececetken̂e tooto,

amowoxapu komo yenso mohxapu komo.

Xutew panatanmekn̂e komo marha tî n̂een̂atken̂e akro so.

N̂examro tî n̂etaporetken̂e kica Xesus poko.

On wara tî ketken̂e,

Kristu tî re Moso,

Kaan yanme mohxapu tî re.

Anarî komo cma tî re waipîn me n̂iir̂akn̂e,

Ero ke ero wa xa marha tak n̂ecirpe Noro rma hara,

ketken̂e tî kica Xesus poko.

36 Sowtatu komo marha tî n̂etaporetken̂e Xesus poko.

On ha awokru,

ketken̂e marha yîwya.

Kawawano makî tî nîmyatken̂e yîwya.

37 Xutew kayaritomon Ow ha,

mîîkekn̂e hara re ta,

ero ke etwaikapora rma esko,

ketken̂e tî Xesus ya.

38 Karita poko takî tî on wara kacho mewretken̂e,

Xutew kayaritomon Moso ha,

kacho tî Kreku komo mtapotarî yaro tî mewretken̂e.

Homanu komo mtapotarî yaro marha tî mewretken̂e,

Xutew komo mtapotarî yaro marha tî.

Ero yipu mewreche Xesus yepoi takî tî wetken̂e weewe poko.

Ero wa tî xatken̂e.

39 Ero yinhîrî tak ero wa xa marha tî kekn̂e Noro yakro woxapu komo,

kicicitho kom ha.

Anarî makî tî kekn̂e,

Kristu Ow ha mîîkekn̂e re ha ta.

Ero ke etwaikapora esko,

amna marha waipîra cirko,

kekn̂e tî Xesus ya.

40 Anarî me tko tî kekn̂e akrononhîrî hara.

Ero wa kahra esko kica,

kekn̂e tî yîwya.

Kaan poko twerîhra ma mai ke.

Tamowoso xa marha mas amoro hara.

Ero ke ahce kacho ero wa mîmtapowa hara?

41 Yaaro rma kamowocow so.

Kicicme kehtoponhîrî yanme rma tan kamowocow so.

Moso reha kicicme exihra ro mak xakn̂e,

kekn̂e tî takrono ya.

42 Ero yinhîrî Xesus ya takî tî kekn̂e hara noro rma.

Apa,

oponaro cma re mas amn̂e kayaritomo me tak awexitaw,

kekn̂e tî yîwya.

43 Taa,

kekn̂e tî Xesus yîwya.

Yaaro tan wîîkes awya,

Paraisu po tak mas amn̂e oroto oyakro,

kekn̂e tî yîwya.

Ero wa tî kekn̂e.

44 Taa,

kamarakataw tak nawarpanwakn̂e roowo ahnoro.

Pahkî n̂he tî ka xakn̂e awarpape,

3 oora pona roro.

Amn̂e 3 to mak tak katpape xakn̂e hara.

45 Taa,

awarpape exitaw rma ka Kaan mîn yawno takî tî n̂etahxaikekn̂e poono pen,

Kaan yamtakpon yahruru pen.

Kai ro tî n̂etahxaikekn̂e roowo pona roro tîracoi cehso ro.

46 Ero yinhîrî Xesus takî tî nîmtapowakn̂e Kaan yakro,

kar̂pe xa tî kekn̂e on wara,

Apa,

yarî tak wen̂epesî oyekatî awemyaka ha,

kekn̂e tî.

Ero wa kache tak cekatîthîrî takî tî n̂en̂epekn̂e.

47 Ero yipu yenîrî ke on wara tî kekn̂e iitono,

sowtatu yantoman̂e,

Kaan yanmen Mîk n̂ex ham kir̂wanî rma,

kekn̂e marha tî Xesus poko.

Ero wa tî kekn̂e sowtatu yantoman̂e Xesus poko.

48 Taa,

Xesus yamoworî tî n̂een̂atken̂e mer̂pono pîn komo,

enso mohxapu komo.

Akrono komo yamoworî marha tî n̂een̂atken̂e.

Kaamo yawarpantarî marha tî n̂een̂atken̂e.

Ero ke n̂eserepoketken̂e ro makî tî.

N̂esewankatapetken̂e marha tî ceserepokarî ke so.

Ero yinhîrî tî cetken̂e hara tîmîn komo yaka.

49 Iito marha tî xatken̂e Xesus ponarono komo.

Wooxam komo marha tî xatken̂e iito,

Karireia pono komo.

Mooxe tî n̂ecececetken̂e n̂examro amoworî komo yentome.

Ero wa tî xatken̂e.

50-51 Taa,

ero yimaw iito tî xakn̂e anarî hara.

Xose tî mîk xakn̂e noro yosotî.

Xutew komo panatanmekn̂e me cehsom tî mîk xakn̂e.

Kir̂wan tî mîk xakn̂e takîhsom,

kayaritomo me Kaan yesenpotopo ponarono.

Xesus yen̂eketaw Xutew yenîn̂e komo ya takrono komo wara xa marha kahra tî xakn̂e.

Twaihkapore kr̂a nai ham Xesus,

ketaw yîwya so,

Ero wa ham,

kahra ro makî tî xakn̂e noro reha.

Ar̂mateia pono tî mîk xakn̂e,

Xutew komo yewton pono.

Noro yipu tî mîk xakn̂e Xose.

52 Taa,

Piratus yaka takî tî cekn̂e noro.

Xesus yokoputho cma re waar̂asî,

kekn̂e tî yîwya.

53 Ero ke Xesus yokoputho takî tî n̂enîhcekn̂e.

Enîhtoche poono ke tî karamiyakn̂e riin̂u ke.

Womtotîkache tak naar̂akn̂e tî okopu yahrutopo yaka.

Toopu yexenaka ahtoxapu mîn xakn̂e ahrutopo.

Anarî komo yokoputho tî ka exihra xakn̂e ero yaw.

Ero warai yaka tî Xose n̂iir̂akn̂e Xesus yokoputho.

54 Xutew komo yetakir̂wamacho po tî ero wa n̂iir̂akn̂e.

Paskwa yimaw epokaretopo komo ponan tî mîn xakn̂e kaamo.

55 Okoputhîrî yaar̂ataw wooxam komo takî tî cetken̂e aan̂e komo wenari.

Xesus yakro mohxapunhîrî komo tî mîkyam xatken̂e,

Karireia pono komo.

Okopu yewtarî tî n̂een̂atken̂e,

ciitoponhîrî marha tî n̂een̂atken̂e.

56 Ero yenîche takî tîmîn yaka so tî cetken̂e hara.

Tîmîn yaw cexitaw okoputhîrî kotopetopo tî n̂iir̂atken̂e.

Katî marha tî n̂iir̂atken̂e kapetopo hara.

Kotoporem mîn xakn̂e katî.

Ero yinhîrî takî tî kepokaretopo me n̂enmayakn̂e.

Ero ke takî tî n̂epokaretken̂e,

Ero po men epokarecoko,

kachonho yaw roro rma.

Ero wa tî xatken̂e wooxam komo.