Taa,

on wara wîîkes awya so,

Teopiru amoro.

Xesus yehtoponho tan ow mewresî an̂enîrî.

Pahxa rma re ka ow mewrekn̂e Xesus yehtoponho,

yîmtapotarî marha.

Ero yipu yihcitopo makî ka mîn mewrekn̂e.

Ero ke mewresî xa hara tan an̂enîrî hara.

2 On wara Xesus xakn̂e,

tînantomarî komo men̂ekekn̂e.

N̂examro takî tî nantomekn̂e mîn hak poko.

Kir̂wanî ro Yekatî yanme tî nantomekn̂e.

Antomatîkache kah yaka takî tî cekn̂e hara.

3 N̂examro ya marha tî Xesus n̂esenpekn̂e tpakache.

Yaaro ham,

pakai haram,

kachome tî n̂esenpekn̂e yîwya so emapona.

40 kaamo tî n̂esenpekn̂e yîwya so,

Xesus pîn Mîkro,

kacho mera ro mak takî tî xakn̂e.

Kaan maywen me kehtopo komo poko marha tî n̂examro panatanmekyakn̂e.

4 Amn̂e n̂he tak anarî kaamo po tînantomarî komo yakro tî xakn̂e Xesus.

On wara tî kekn̂e yîwya so,

Tan ka ehcoko Xerusaren po ha ka.

Anana tohra ehcoko.

Apapa nîmrî mohtopo wekatîmyakn̂e awya so.

Ero ke Noro ka momohcoko tan.

5 Tuuna kwaka makî reha ka awemicinoyatken̂e so Xuaw pen.

Amn̂e tak Kir̂wanî ro Yekatî yaka awir̂axe so hara Kaan awemicinotopo komo wara rma hara.

Pahnoke tak nasî ero wa awitopo komo,

kekn̂e marha tî yîwya so.

Ero wa tî Xesus kekn̂e yîwya so.

6 Anarimaw xa hara iito re tî xatken̂e hara.

Ero yimaw tak Xesus yakro tî n̂esencetken̂e yînantomarî komo.

On wara tî ketken̂e,

Apa,

ahcemaw xa Ixaw Yana komo kayaritomonî ro tak miir̂a anarî yana maywen mera tak amna yehtome?

Oroto na miir̂a?

ketken̂e tî yîwya.

7 On wara tî n̂eyukyakn̂e Xesus,

On wara kahra nai Apapa awya so,

Ero yimaw xa ahce wa na ciino wiir̂asî,

ero yimaw xa anarme n̂enmaya,

kahra nai.

Yînîhtînorî ro mak mîn ero yipu,

kekn̂e tî Xesus yîwya so.

8 Karitî me rma tko awir̂axe so Kaan amn̂e Kir̂wanî ro Yekatî mokuche apona so.

Ero wa awexitaw so tak oyekatîmn̂e me tak maxe miyan komo ya rma.

Tantono komo ya ka mekatîmyaxe Xerusaren pono komo ya ha ka.

Amn̂e Xuteia pono komo ya tak mekatîmyaxe hara.

Samaria pono komo ya marha tak mekatîmyaxe.

Miya rma tak mîîcexe oyekatîmso roowo mapitaka roro,

kekn̂e tî Xesus yîwya so.

Ero wara tî kekn̂e yîwya so.

9 Taa,

ero wa kache takî tî Xesus n̂etanîmyakn̂e,

sai sai sai,

Kaapu smun cheka tî cekn̂e wero ro so.

Sîpî,

n̂esenponkekn̂e takî tî okwe.

Ero wara tî Xesus n̂etanîmyakn̂e.

10 Iito rma tî xatken̂e yînantomarî komo.

Kahsî rma tî n̂een̂atken̂e Xesus torî yenîn̂enho.

Tîtîk,

tooto warai takî tî n̂esenpetken̂e hara yîwya so asakî.

Tumutwem ke tponoyem tî mîkyam xatken̂e.

11 komo mîtkoso tî n̂ecececetken̂e.

11 N̂examro yakro takî tî nîmtapowatken̂e esenpoxapu komo.

Ai,

Karireia pono komo,

tan matu?

ketken̂e yîwya so.

Ahce kacho kahsî meen̂atu?

Xesus ponaro mat ham ahyai so etanîmxapu ponaro.

Noro rma tko mokyas hara amn̂e.

Kah yaka etanîmrî mencow ero wa xa marha mokyas hara,

ketken̂e tî esenpoxapu komo yîwya so.

12 Taa,

ero yipu yentache tak Xerusaren pona takî tî n̂etîrametken̂e hara 11 komo Oripera Yîpîn poi.

Sabatu po kîwtotopo ro wicakî moxenon mak mîn xakn̂e Oripera Yîpîn.

13 Mîîmo yaka cewomche so tak eporino yaka takî tî kainatken̂e.

Iito takî tî xatken̂e.

Taixa tî xatken̂e iito,

Petru,

Ciaku,

Xuaw,

Antre,

Piripe,

Tome,

Bahtoromew,

Mateus,

Ciaku,

Awpew mumuru mîk noro.

Simaw tak,

Xeroce tî mîk noro yosot hara.

Xutas tak,

Ciaku mumuru mîk noro.

N̂examro tî xatken̂e eporino yaw mîîmo yamtakpon yaw.

14 Iito marha tî xatken̂e wooxam kom hara.

Maria marha tî xakn̂e iito akro so,

Xesus yonînho ha.

Xesus yaknonho komo marha tî xatken̂e iito.

Kaan yakro tî nîmtapowatken̂e roro iito yiixe cehtopo komo poko.

Iito re tî nîhtînoyatken̂e Kaan yakro tîmtapotacho komo.

15 Anarî komo marha tî xatken̂e iito.

Yaake tî xatken̂e,

120 tî mîkyam xatken̂e Kaan yakro tîmtapotaxmu komo.

Ero yimaw Petru takî tî nawomyakn̂e piiri Xesusu npanatanmekîtho komo chew.

Esenmexapu komo yakro takî tî nîmtapowakn̂e.

16 On wara tî kekn̂e yîwya so,

Oyakno komo,

pahxa Kir̂wanî ro Yekatî nîmtapowakn̂e Tapi penî mtari.

Xutas pen poko tî kekn̂e,

Xesus yahsîn̂e komo yaan̂enho pen poko ha.

Ero ke ero wa kachonho yaw roro thakwa tî xakn̂e Xutas pen.

17 Kakrononhîrî komo rma mîk xakn̂e Xutas pen.

Kristu yehtopo yekatîmn̂enho marha mîk xakn̂e kakro so ka cexitaw,

18 Taa,

mararî tak nahsîyakn̂e noro puranta pona.

Kicicme cehtoponhîrî yepetho pona rma nahsîyakn̂e kica.

Ero yinhîrî tînahsîthîrî pona takî tî cekn̂e.

Iito takî tî n̂epîrkekn̂e kai ro mak okwe.

N̂ewetîkrokekn̂e ro mak okwe.

Wexkiririnthîrî takî tî n̂etamxiririkekn̂e.

19 Ero wa thakwa tî xakn̂e Xutas pen.

Ero yinhîrî noro pen yehtoponho tak n̂encetken̂e Xerusaren pono komo ahnoro.

Ero ke noro mararîntho tî nosohcetken̂e Akewtama me,

tîmtapotarî komo yaro ha.

Kamxuku Totoponho,

kacho rma tî moro Akewtama,

kacho.

20 Noro pen poko rma kesî Waano Karitan,

On wara kesî,

Pohnî me ro mak n̂expe noro pen mîntho.

Ero yaka mokuhra ro mak n̂ehcowpe anarî kom hara.

Anarî xa encoko Kaan poko ekatîmn̂e noro pen yekenho yakan hara,

kesî marha.

Ero wa kesî Waano Karitan Xutas pen poko.

21 Ero ke ero wa ciisom tak tmen̂ekapore nasî oroto.

Mehxa ro kakrono ro komo mak tmen̂ekapore nasî.

Kakro so n̂etar̂akn̂e Xesus ero wicakî pahkî kakro so etarixapu tmen̂ekapore nasî.

22 Pahxa Xesus n̂esemicinopekn̂e Xuaw pen ya.

Kokon̂oro tak toi kah yaka hara.

Ero wicakî pahkînon kakro so etarixapu tmen̂ekapore nasî Kristu pakachonho yekatîmn̂e me ehtome hara,

kekn̂e tî.

Ero wa tî kekn̂e Petru esenmexapu komo ya.

23 Ero ke asakî tî ka nîhtînoyatken̂e.

Xose tî nîhtînoyatken̂e.

Basabasî rma tî mîk xakn̂e Xose yosot hara.

Xustu marha mîk xakn̂e noro yosotî xa hara.

Macias marha tî nîhtînoyatken̂e.

Ero wicaki tî n̂etahcatken̂e.

24 Ero yinhîrî Kaan yakro takî tî nîmtapowatken̂e.

Apa,

ketken̂e tî,

amna ropotarî yenîn̂e Amoro,

etpoino pîn ropotarî yenîn̂e ha.

Ero ke onoke warai xa mîhtînoya Amoro amna yakrono me ciisom ha?

Xustu katî,

Macias katî?

Anîhtînoputhîrî xa yîhtînomexpoko amna ya.

25 Ero wara cma re mîhtînomexpesî amtapotarî yekatîmn̂e me cehsom hara,

Xesus nantomarî me cehsom ha.

Xutas pen yekenho yakanî cma re mîhtînomexpesî amna ya.

Ekatîmn̂e mera tak xakn̂e noro pen cekenî ro pona tîtotome okwe.

Ero ke anarî cma re mîmen̂ekesî,

ketken̂e marha tî.

Ero wa tî ketken̂e iitono komo Kaan ya.

26 Ero wa kache takî tî men̂ekacho nar̂metken̂e.

Ar̂mache Macias ponan me takî tî n̂epîrkekn̂e.

Ero ke noro takî tî xakn̂e 11 komo yakrono me hara,

Xesus nantomatho komo yakro.

Ero wa tî xakn̂e.