Taa,

onî rma ka wekatîmyas hara,

Xesus yehtoponho hara.

On wara tak xakn̂e,

tînpanatanmekîthîrî komo ya tak n̂esenpekn̂e xa hara Ciberiates n̂ikithon yecihtaw exitaw so.

2 On wicakî mak xatken̂e iito,

Simaw Petru,

Tome,

Asakno kacho ha,

Natanaew marha Kana pono,

Karireia rowon pono ha.

Sebetew mumuru komo marha xatken̂e iito,

anarî komo marha tak asak hara,

Xesus npanatanmekîtho komo rma hara.

Ero wicakî mak xatken̂e iito.

3 Ero yimaw on wara kekn̂e Simaw Petru takrono komo ya,

Mîîye kyam war̂matan,

kekn̂e.

Taa,

awakro amna mokyasî,

ketken̂e n̂examro yîwya.

Ero ke kanawa yaw tak cetken̂e mîîye yar̂maxi.

Emapona nar̂metken̂e,

cenmakaxi ro ha.

Emcira ro mak xakn̂e okwe.

4 Taa,

enmapuche tak iito Xesus n̂een̂atken̂e hara.

Tuuna yecihtaw cececetoso xakn̂e.

Onoke na Mîkro kopi,

ketken̂e mak Noro poko.

5 Ero yimaw tak on wara kekn̂e Xesus,

Okopuci komo,

totke n̂he re mat ha?

kekn̂e.

Pîra okwe,

ketken̂e yîwya.

6 Kaari n̂ixa ar̂macoko ha ke mîîye.

Ero yimaw tak n̂emciya ha,

kekn̂e yîwya so.

Ero ke kaari n̂ixa tak nar̂metken̂e mîîye.

Thoi,

ootî pen tak xakn̂e mîîye yaw mer̂pora ro mak okyo.

Nawsînakn̂e tak mîîye pen,

kanawa yaka enkarî yarohra.

7 Ero yipu yenîche tak on wara kekn̂e Petru ya anarî,

yiixe xa Xesus yehtopo ha,

Kporin komo xa Mîkro ham,

kekn̂e.

Ero wa kacho yentache tak Simaw Petru tak tîmkarino namruyakn̂e hara,

mohkaxapunhîrî ha.

Pom kopow,

tuuna kwaka tak nahronakn̂e ero yaw rma.

Ero wa xakn̂e Petru.

8 Kanawa yaw rma cetken̂e anarî komo ecihtaka,

Petru yakrononho kom ha.

Wahrai mîn xakn̂e kanawa.

Meyehra rma re xakn̂e echîrî,

90 metru mak ha re.

Ero ke n̂ihxikyatken̂e mak mîîye ootî ke tarkemu rma.

9 Tawomche so tak wehto n̂een̂atken̂e iito,

yîroron mak ha.

Ero yepoi xakn̂e ootî yupuxapu.

Cuure marha xakn̂e,

etahru ha.

10 Ero yimaw on wara tak Xesus kekn̂e yîwya so,

Kootî ehcoko an̂emcinothîrî poi,

kekn̂e.

11 Ero ke tak Simaw Petru cekn̂e ehso.

Mîîye tak n̂ihxikyakn̂e îh pona.

Nawsînakn̂e xa mîîye mer̂pora exirî ke ootî.

153 xakn̂e,

porin komo okyo.

Etawotora rma tko xakn̂e mîîye tawsîn̂emu rma.

Ero wa xakn̂e.

12 Ero yinhîrî tak on wara kekn̂e Xesus tînpanatanmekrî komo ya,

Amohcoko ha eseresmaxi,

kekn̂e.

Ero ke yîhyaka tak cetken̂e eseresmaxi.

Onoke ma Amoro ke,

ka xera ro mak xatken̂e yîwya.

Kporin komo rma Mîkro ham,

ketken̂e mak tîhnaw so.

13 Ero yinhîrî tak cuure nîmyakn̂e Xesus iyuru komo.

Iyotî komo marha nîmyakn̂e.

Ero wa n̂examro n̂erewusmekn̂e.

14 Ero wa Xesus n̂esenpekn̂e tînpanatanmekrî komo ya.

Waixa pen komo chewnonho tpakache hara ero wa n̂esenpekn̂e.

Osorwaw tak xakn̂e Xesus yesenpotoponho ero yimaw.

Ero wa xakn̂e.

15 Eseresmache so tak on wara kekn̂e Xesus Simaw Petru ya,

Simaw Xonas mumuru,

on wara wîîkes awya,

Ooxe xa wa mai ha moxam yopo ha?

kekn̂e.

Nhnk Apa,

kekn̂e tak Petru Xesus ya.

Aaxatî xa ow ha,

kekn̂e.

Taa,

kekn̂e Xesus yîwya,

oyoh komo men yînahmakî amn̂e oper̂a xîkrî,

kekn̂e.

16 Ero yinhîrî tak kekn̂e xa hara yîwya,

Simaw,

Xonas mumuru,

ooxe xa mai ha?

kekn̂e xa hara.

Nhnk Apa,

kekn̂e xa hara noro Xesus ya,

aaxatî xa ow ha,

kekn̂e.

Taa,

kekn̂e xa hara Xesus yîwya,

Oyoh komo men yînahmakî amn̂e oper̂a,

kekn̂e.

17 Ero yinhîrî kekn̂e xa hara yîwya,

ero wa xa marha kekn̂e hara,

Simaw Xonas mumuru,

on wara wîîkes awya,

Ooxe mai ha?

kekn̂e.

Ero yimaw tak nahwokekn̂e Petru osorwaw ro karî ke yîwya.

Ooxe mai ha,

karî ke.

Ero ke on wara kekn̂e Petru Xesus ya,

Apa,

Kîhtînon̂e ro xa Amoro ha.

Ero ke aaxe oyehtopo rma wa mîhtînoyas ha,

kekn̂e yîwya.

Taa,

kekn̂e xa hara Xesus yîwya,

Oyoh komo tak men yînahmakî amn̂e oper̂a,

kekn̂e.

18-19 Ero yinhîrî on wara kekn̂e hara Xesus Petru ya,

Kar̂pamxan me ka awexitaw mepononcekn̂e awanme ro mak.

Awanme ro marha metar̂akn̂e ahna so kyam ha na.

Ero warahra tak mas amn̂e aporitomontache.

Ero yimaw tak metapoyankesî awatome anarî komo.

Noro yipu komo tak apononcexe.

Awanmenkera marha tak awar̂axe ero yimaw,

kekn̂e Xesus yîwya.

Ero wa mîwaiyasî amn̂e kir̂wanî ro me Kaan yehtopo yenpotome,

kacho rma mîn xakn̂e Xesusu mtapotarî.

Ero wa kache tak on wara kekn̂e hara yîwya,

Owenari roro amok ha,

kekn̂e.

20-21 Ero yinhîrî tak Xesus yakro tak cetken̂e hara yînpantanmekrî komo.

Petru cekn̂e Xesus panaw rma.

Anarî tak mokyakn̂e wenari so,

Xesus npanatanmekîtho hara,

yiixe xa ehtoponhîrî ha.

Pahxa kosope eseresmetaw so Xesus yawxari n̂eremekn̂e,

noro mokyakn̂e wenari so.

Apa,

ahtono xa awekanîya ha?

kan̂enho noro.

Ero yimaw tak Petru n̂etaknamekn̂e,

tîmkai tak n̂een̂akn̂e.

Yiixe xa Xesus yehtopo n̂een̂akn̂e.

Noro yenîche on wara kekn̂e Petru Xesus ya,

Moso hara Apa,

ahce wa nai moso hara amn̂e?

kekn̂e noro poko.

22 On wara tak kekn̂e Xesus yîwya.

Anarimaw pahkî noro waipîra ciri xe na wai miya roro ha na omohtopo pona roro rma.

Ero wa ciri xe oyexitaw wiir̂asî rma wa oyanme ro ha.

Owenari roro mak amok ha amoro,

kekn̂e yîwya.

Ero wa kekn̂e Xesus Petru ya.

23 Ero wa kacho takî tî anarî me n̂etakîcekn̂e.

On wara kacho wara tî n̂encetken̂e miyan komo rma Xesus ponarono komo,

Waipîra ro makî tî nai noro Xesus npanatanmekîtho,

kacho wara tî.

Ero wa kahra rma tko xakn̂e Xesus.

Waipîn me noro ciri xe oyexitaw oyanmero rma ero wa wiir̂asî miya roro omohtopo pona roro,

kekn̂e mak.

Ero wa kacho tî n̂encetken̂e anato makî.

24 Taa,

ero wa xakn̂e Xesus,

kesî Noro npanatanmekîtho rma.

Noro rma mîk on mewren̂enho,

yînpanatanmekîthîrî ha.

Yaarono xa tan ham,

tîtkexe ero poko.

25 Iituxa mak mewresî,

kesî noro.

Miya rma tko nasî Xesus yehtoponho,

mewretîkara rma wasî.

Tatke mewretîketaw rma na mer̂pora ro mak nasî karita,

roowo penî rma n̂ekenkes owya,

kesî.

Ero wa mak wîîkesî.

Amen.