Taa,

ero yinhîrî takî tî Xesus yahrutoponho yaka cekn̂e Maria Matarena.

Yihcirî kaamo po tî cekn̂e enmaporo.

Iito cexitaw tak anato takî tî n̂een̂akn̂e toopu,

ewtarî yahrutho.

2 Ero ke takî tî kar̂pe cekn̂e Simaw Petru yaka,

anarî yaka marha,

Xesus npanatanmekîtho yaka.

Yiixe xa Xesus yehtoponho mîk xakn̂e anarî.

Yîwya so tak n̂ekatîmyakn̂e.

On wara kekn̂e,

Kporin komo yokoputho naacow ham okwe.

Ahna na naacow ha,

kekn̂e.

Ero wa kekn̂e Maria.

3 Ero ke Xesus yahrutoponho yenso tak cekn̂e Petru.

Anarî marha cekn̂e noro yakro,

Xesusu npanatanmekîtho xa marha.

4 Kar̂pe cetken̂e asakno roro rma.

Petru penî tko nîyoponkekn̂e akrono.

Poturme tak n̂epatakekn̂e ahrutoponhîrî yaka.

5 Ero ke noro tak katuhwakn̂e entome ahrutoponhîrî yaka.

Iito rma n̂een̂akn̂e poono,

Xesus karamitoponho.

Ewomra mak xakn̂e.

6 Ero yinhîrî tak Simaw Petru mokyakn̂e hara mapitaw.

Ewtarî yaka rma tak n̂ewomyakn̂e.

Noro marha n̂een̂akn̂e Xesus karamitoponho.

7 Yîhtîwomthîrî marha takî n̂een̂akn̂e.

Karamitoponhîrî yakrora tî xakn̂e mooxe n̂he.

Ero wa tî n̂een̂akn̂e noro.

8 Ero yinhîrî tak anarî n̂ewomyakn̂e hara Xesus npanatanmekîtho,

poturme mohxapunhîrî hara.

Ero wa xa marha n̂een̂akn̂e noro hara.

Yaaro ham,

Xesus paka ham okre,

kekn̂e tak noro tîhnaw.

9 Camkî thakwa ka n̂examro n̂encetken̂e Kaan Karitan,

Waihxapu komo chewnonho rma pakes amn̂e,

kacho.

10 Taa,

ero yinhîrî tak Xesus npanatanmekîtho komo n̂etîrametken̂e hara tîmîn komo yaka hara.

Ero wa xatken̂e.

11 Iito rma tî xakn̂e Maria ahrutoponhîrî mîtwo rma.

Nîwracekn̂e thakwa makî tî okwe.

Tîwracetaw rma takî tî katuhwakn̂e tak noro hara ewtarî yaka entome.

12 Ancu takî tî n̂een̂akn̂e iito asak ha.

Ceremaxi tî xatken̂e Xesus yokoputho yekenho to.

Anarî tî xakn̂e yîhtîpîrî yekenho to.

Anarî tî xakn̂e hara yîhtarî yekenho to hara.

13 On wara tî kekn̂e ancu Maria ya,

Aaci,

ahce poyero mîwrace?

kekn̂e tî.

Oporin pen yokoputho naacow ham okwe,

kekn̂e takî tî Maria yîwya.

Ahna na n̂iicow okwe,

kekn̂e tî.

14 Ero wa kache takî tî n̂etaknamekn̂e Maria.

Xesus takî tî n̂een̂akn̂e cececetoso iito.

Noro Mîk ham,

kahra rma tko tî xakn̂e.

15 On wara takî tî kekn̂e Xesus yîwya,

Okopuci,

ahce poyero mîwrace?

Onoke mepor̂a?

kekn̂e tî.

Naatî yatkan̂e me makî tî nîhtînoyakn̂e Maria.

Ero ke on wara tî kekn̂e yîwya,

N̂oon̂o,

tantonînho na maarî amoro?

Ahna maarî?

Ekatîmko ka owya aatome tak owya hara,

kekn̂e tî Maria yîwya.

16 Maria,

kekn̂e takî tî Xesus yîwya.

Ero ke Xesus wece tak n̂een̂akn̂e.

Haboni,

kekn̂e takî tî yîwya.

Ero wa Xutew komo n̂etahcaxe tpanatanmekn̂e komo,

Ero ke tî ero wa kekn̂e yîwya.

17 On wara tak tî kekn̂e Xesus yîwya,

Ow ahsîra esko ha.

Apapa yaka ka tohra wasî,

kekn̂e tî.

Oyakno komo ya xa ekatîmta.

On wara tî Xesus nîîke,

kata yîwya so.

Apapa yaka tak kîwcesî,

Aamo komo rma Mîk,

Oyîm marha.

Ponaro oyehtopo ro Mîkî,

ponaro awehtopo ro komo xa marha.

Noro yaka tak kîwces hara,

nîîke tî Xesus,

kata yîwya so,

kekn̂e tî.

Ero wa tî kekn̂e Xesus Maria Matarena ya.

18 Ero ke yînpanatanmekîthîrî komo ya ekatîmso tak cekn̂e noro.

On wara tak kekn̂e yîwya so,

Kporin komo wenwo ha.

On wara nîîka owya,

kekn̂e.

Yîmtapotarî tak n̂ekatîmyakn̂e yîwya so.

Ero wa xakn̂e Maria Matarena.

19 Taa,

ero po rma tak n̂esenmekyatken̂e Xesus npanatanmekîtho komo kokmamrî me tak.

Yihcirî tî mîn xakn̂e kaamo,

Ero ke n̂esenmekyatken̂e ero yimaw.

Xutew komo pona cerahtîmrî ke so metata mko n̂ewketken̂e.

Yîhyaka so rma tko Xesus n̂ewomyakn̂e.

Yîchew so tak n̂ecececekn̂e.

Eserepokara ehcoko,

kekn̂e tak yîwya so.

20 Ero wa kache tak tamorî n̂enpekn̂e yîwya so,

tîyahtarî marha n̂enpekn̂e.

Kporin komo Mîkro ham,

ketken̂e tak yînpanatanmekrî komo.

Tawake xa tak xatken̂e okre Noro yenîrî ke.

21 Ero yinhîrî on wara kekn̂e xa hara yîwya so,

Eserepokara ehcoko,

kekn̂e.

Apapa oyen̂epekn̂e oona,

ero wa xa marha Ow ken̂epexe so hara tooto komo cheka,

kekn̂e.

22 Ero wa kache tak puu kekn̂e n̂examro pore.

Kir̂wanî ro Yekatî tak ahsîcoko aropotaka so,

kekn̂e yîwya so.

23 On wara tak na mîîketu amn̂e tooto komo,

Cehcamnoso tak nasî kicicme awehtoponhîrî komo,

mîîketu.

Ero wa ketaw awya so.

Kaan marha tak nîhcamnoyasî kicicme ehtoponhîrî komo.

Anarî komo ya tak na mîîketu on wara hara,

Ehcamnopîra rma nasî kicicme awehtoponhîrî okwe,

mîîketu.

Ero wa ketaw awya so hara,

Kaanî marha yîhcamnopîra nas hara kicicme ehtoponhîrî komo,

kekn̂e.

24 Ero wa Xesus mokyataw tînpanatanmekrî komo yaka,

exihra xakn̂e Tome,

12 komo poyino rma.

Asakno kacho tî Mîk xakn̂e Tome.

25 Ero ke tak n̂ekatîmyatken̂e amn̂e yîwya,

Kporin komo amna n̂een̂e okre,

ketken̂e.

On wara tko kekn̂e noro yîwya so,

Potupoture yotho yenîhra oyexitaw amorî poko,

kanwekyaxe so mak,

iyahtaparaxkachonhîrî yaka oyamorî yumunkura oyexitaw marha,

kanwekyaxe so ha,

kekn̂e okwe.

Ero wa kekn̂e Tome yîwya so.

26 Taa,

8 kaamo yexiche tak iina xa marha yînpanatanmekrî komo n̂esenmekyatken̂e xa hara,

Tome yakro tak.

Metata n̂ewketken̂e xa hara.

Iito exitaw so Xesus mokyakn̂e xa hara yîhyaka so.

N̂ecececekn̂e xa hara yîchew so.

Eserepokara ro mak ehcoko,

kekn̂e xa hara yîwya so ero yimaw.

27 Ero wa kache tak Tome ya n̂enpekn̂e tamorî.

Oyakno,

kekn̂e yîwya,

ek ha awamorî ha,

apeko xe potupoture yotho ha.

Oyahtaparaxkachonho yaka marha yumunko hara awamorî,

kekn̂e yîwya.

Cetanwesom me exihra tak esko ha.

Yaaro xa ham,

kasko xa matko,

kekn̂e Xesus yîwya.

28 On wara tak kekn̂e Tome yîwya,

Oporinî rma Amoro ponaro oyehtopo xa ha,

kekn̂e.

29 Taa,

kekn̂e Xesus yîwya,

Owî rma re mewetî oyenîrî ke mak awya.

Anarî komo xa oyewecaxe oyenîra rma.

Ero wa cehsom komo poko tawake xa wasî,

kekn̂e yîwya.

Ero wa kekn̂e Xesus Tome ya.

30 Taa,

miya rma nasî cirihnî ciitopo Xesus ya.

Tînpanatanmekrî komo wero ro rma n̂iir̂akn̂e.

Ero yipu komo mewretîkara thakwa wasî on karita yaka.

31 Poi ciki mak tan mewrei,

Kristu xa Mîk ham Xesus,

Kaan Mumuru xa ham,

kan̂e me awehtome so.

Ero wa kan̂e me awexitaw so waipîn me ro mak tak maxe okre.

Ero wa maxe Xesus yosotî ponaro awexirî ke so.

Ero wa wîîkesî.