Taa,

ero wa exiche tak Xesus pen takî tî nîkyokpetken̂e Piratus sowtatu komo ya.

2 Ero yimaw on wara tî xatken̂e sowtatu komo,

cekyekyem kahyatken̂e arokorî me.

Ero yipu takî tî n̂iir̂atken̂e yîhtîpîrî pona oko.

Tîswayem ke pononmetken̂e marha tî kawno ke.

3 On wara marha tî ketken̂e yîwya,

Ai Apa,

Xutew kayaritomon tî Amoro okyo,

ketken̂e tî.

N̂epatakatapetken̂e marha tî oko.

Ero wa tî Xesus pen n̂iir̂atken̂e okwe.

4 Ero yinhîrî tak n̂epatakekn̂e hara Piratus Xutew komo yaka hara.

On wara kekn̂e yîwya so Xesus poko,

Xiya Moso wekyas ahyaka so,

Kicicitho me yîhtînopîra ro makî nai ham Piratus,

kachome tak awya so opoko,

kekn̂e.

5 Ero yinhîrî tak Xesus n̂epatakekn̂e cekyekyem ke tarokoi rma.

Kayaritomo ponon warai yaw marha xakn̂e kawno yaw.

Tîswayem mîn xakn̂e ponon.

Moso ha kicicme ehxapu awya so ha,

kekn̂e Piratus yîwya so.

6 Noro yenîche tak on wara ketken̂e Kaan yaka cewomsom komo,

Xutew yantoman̂e komo marha,

Amowocoko kr̂a ha,

amowocoko kr̂a ha,

ketken̂e.

Kar̂pe ro mak ketken̂e.

On wara Piratus kekn̂e hara,

Amyamro xa matko amowocoko ke.

Kicicitho me yîhtînopîra ro mak was owî,

kekn̂e.

7 Pîra,

pîra ha,

ketîketken̂e Xutew komo.

Twaihkapore kr̂a tî nai noro yiputho amna panatanmetopo wero ha tî.

Kaan Mumuru Ow ha,

kekn̂e kica.

Ero ke twaihkapore kr̂a nas ha,

ketken̂e.

8 Taa,

ero wa kacho yentache takî tî n̂eraswakn̂e xa takî tî Piratus.

9 Ero ke tak en̂ekano ritopo ro yaka Xesus pen naar̂akn̂e xa hara.

On wara takî tî kekn̂e yîwya,

Ahtononhîrî ma Amoro ha ke,

kekn̂e tî Tîî,

kekn̂e makî tî Xesus,

eikura ro makî tî xakn̂e.

10 Ahce kacho ow eikura mai hara?

kekn̂e tî Piratus yîwya.

Kayaritomo pîn me ma ow meen̂a ha ke?

Kayaritomo rma ow ha,

Amowocoko ha,

kan̂e.

Amowora rma ehcoko,

kan̂e marha ow anarimaw hara.

Ero wa ciino rin̂e ow.

Ero ke ahce poyero ow eikura mai hara ke?

kekn̂e tî.

11 On wara takî tî Xesus n̂eyukyakn̂e,

Awanme ro mak ero wa orihra mas ha ke.

Kah yawno yanme mak ero wa Ow miir̂asî.

Ero ke ahyaka oyekpon̂enho xa kicicme nasî ayopo,

kekn̂e tî Xesus yîwya.

12 Ero wa kacho yentache tak Xesus yahsîpînka xe xakn̂e Piratus.

Pîra ha men,

ketken̂e xa hara Xutew komo.

Kar̂pe ro mak ketken̂e.

Sesa xatî pîn me men mas okwe Noro yahsîpînketaw awya.

Kayaritomo Ow ha,

kan̂e Mîkro kica.

Sesa xatî pîn me naxe okwe ero wa kan̂e komo,

ketîketken̂e kica yîwya.

13 Ero wa kache tak Xesus naar̂akn̂e xa hara Piratus anana n̂he hara.

Simentu warai xakn̂e kayaritomo roron me ciixapu.

Capahno,

kacho tî mîn xakn̂e iitono komo ya.

Kabata,

kacho tî mîn xakn̂e hara Ixaw Yana mtapotarî yaro hara.

Iina tak Xesus naar̂akn̂e.

Ero po xakn̂e en̂ekano rin̂e yaponî ro.

Ero ke ero pona n̂eremekn̂e Piratus.

14 Ero yimaw Paskwa pahnoke xakn̂e.

On po cetakir̂wamapore nasî,

kacho me tî n̂enmayakn̂e.

Ero po rma Xesus naar̂akn̂e Piratus.

Kamarakataw tak on wara kekn̂e Xutew komo ya,

Moso ha,

akayaritomon kom ha,

kekn̂e.

15 On wara tko n̂examro n̂eyukyatken̂e,

Arko kr̂a ha,

amowocoko kr̂a ha,

ketken̂e.

Okyo,

kekn̂e hara Piratus yîwya so,

akayaritomon komo ma wamowope ke awya so?

kekn̂e.

Amna kayaritomon pînî ro mak Mîkro ha kica.

Sesa mak mîk amna kayaritomon ha,

ketken̂e hara Xutew komo.

16 Ero wa kacho yentache takî nîtîtmamyakn̂e Piratus.

N̂ewehcakn̂e tak ha.

Ero ke takî sowtatu komo ya tak narpekn̂e amowotome so.

Ero wa xakn̂e Piratus.

17 Ero ke tak Xesus naar̂atken̂e sowtatu komo amowoso tak ha.

Miya naar̂atken̂e îh pona,

Tooto Pîtho,

kacho pona.

Korkota,

kacho rma tî mîn xakn̂e Ixaw Yana mtapotarî yaro.

Iina tak Xesus naar̂atken̂e îh pona.

Noro rma tamowotopo naar̂akn̂e weewe ha.

18 Iina epatakache so tak Xesus namowetken̂e oko tpanaxkem pona.

Anarî komo marha namowetken̂e Xesus yakro,

2 xa hara,

mehxa xehxa,

ero wa.

Ero wa xakn̂e Xesus yîrakataw so.

19 Ero yimaw Xesus yehtoponho yetacitopo mewrekn̂e Piratus on wara kacho,

Xutew komo kayaritomon Moso Xesus,

Nasare pononho,

kacho.

Osorwaw ro tî mewrekn̂e ero wa kacho rma.

Ixaw Yana mtapotarî yaro mewrekn̂e,

Kreku komo mtapotarî yaro marha,

Homa pono komo mtapotarî yaro marha,

ero wa so mewrekn̂e.

Ero yipu tak wopekn̂e Piratus tpanaxkem poko.

20 Ero ke ero wa kacho n̂een̂atken̂e Xutew komo esama yaw tîtosom komo.

Ewto mîtwo exirî ke mer̂pora xatken̂e enîn̂e komo.

21 Ero yinhîrî takî tî Piratus yakro nîmtapowatken̂e Xutew komo,

tîmsom pokono yenîn̂e kom ha.

On wara tî ketken̂e yîwya,

Ai Apa,

ero wa kacho mewrera esko ha ke kica,

Xutew komo kayaritomon Moso,

kacho mewrera,

ketken̂e.

On wara kacho xa mewreko ha ke,

Xutew komo kayaritomon Ow ha,

kan̂enho Moso,

kacho mak mewreko,

ketken̂e tî yîwya.

22 Pîra,

N̂expe rma wa ha,

kekn̂e takî tî Piratus.

Ero wa kacho thakwa wîmewrew,

kekn̂e.

Ero wa tî kekn̂e.

23 Taa,

ero yinhîrî takî tî Xesus pen yamowoche Noro pen ponontho nahsîyatken̂e sowtatu komo,

amowon̂enhîrî komo.

4 xatken̂e amowon̂enhîrî komo.

Ero ke cewn̂e so nahsîyatken̂e pononthîrî,

tpoko hak so.

Ero wa Xesus ponontho nahsîyatken̂e.

Ero yinhîrî yîmkarinonhîrî ahsî xe xatken̂e hara.

Kir̂wan mîn xakn̂e Xesus ponontho yîmkarinonhîrî ha.

Tkahso mak xakn̂e yîpîmtai rono me,

yîpîmîsîton me mak xakn̂e okre.

Ero wa xakn̂e yîmkarinonhîrî ha.

24 Ero ke on wara ketken̂e sowtatu komo,

on ahxaikara cehcerî.

Men̂ekacho mak tar̂macerî,

Onoke na nahsîya,

kachome tak kîwya so,

ketken̂e.

Ero ke ero wa Xesus ponontho nahsîyatken̂e.

Kaan karitan yaw roro rma ero wa nahsîyatken̂e.

On wara kesî,

Oponontho n̂ekamyatken̂e tîwyan me so.

Men̂ekacho nar̂metken̂e,

Onoke xa nahsîya yîmkarinonhîrî hara,

kachome tîwya so,

kesî Kaan Karitan.

Ero wa kacho yaw roro rma Xesus ponontho nahsîyatken̂e.

25 Taa,

iito xakn̂e Xesus yon tpanaxkem mîtwo.

Iito marha xakn̂e yînocwan yakno hara.

Maria marha xakn̂e iito anarî hara,

Kropas pic ha.

Iito marha xakn̂e Maria Matarena.

26 Taa,

iito marha xakn̂e Xesus npanatanmekîtho,

yiixe ehtoponhîrî ha.

Maria mîtwo n̂ecececekn̂e,

Xesus yon mîtwo.

Noro yenîche tak on wara Xesus kekn̂e tîson ya,

Mîkro tak hara amrerî hara yeme,

kekn̂e yîwya.

27 Ero wa xa marha tînpanatanmekîthîrî ya tak kekn̂e hara,

Mîkro tak ha anocwan hara,

kekn̂e yîwya.

Ero wa kekn̂e Xesus.

Ero ke Xesus yon tak naar̂akn̂e noro tîmîn yaka.

Ero wa yîson naar̂akn̂e Xesus npanatanmekîtho.

Iitono ro me tak xakn̂e yîmîn yaw.

Ero wa xakn̂e.

28 Taa,

ero yinhîrî on wara takî tî kekn̂e Xesus tîropotaw,

Ciitîkaxi tak nas ha,

Ero wa ciino cirko,

kacho,

kekn̂e.

Ero ke iitono komo ya kekn̂e hara,

Owokru xe wasî,

kekn̂e.

Kaan Karitan yaw roro rma ero wa kekn̂e.

29 Ero yimaw iito tî xakn̂e kawawano tahrem yaw,

wok ha.

Ero kwaka tî mawrî warai nukpetken̂e.

Iisopu yeceputho pona takî tî n̂iir̂atken̂e yukpaxapu.

Ero yipu tak nanîmyatken̂e Xesus mtaka.

30 Emeche tak on wara kekn̂e Xesus,

N̂eexi tak ha,

wiitîka tak ha,

kekn̂e.

Ero wa kache tak nutupenwakn̂e.

Cekatîthîrî tak n̂en̂epekn̂e.

Ero wa xakn̂e Xesus.

31 Paskwa pahnoke exirî ke tî Xutew komo n̂etakir̂wametken̂e ero yimaw.

Paskwa yimaw epokaretopo komo yenmarî rma tî mîn xakn̂e kaamo.

Ero ke Piratus yakro tî n̂esencetken̂e okoh komo yenîhtorî poko.

On wara tî ketken̂e yîwya,

Apa,

yohno rma cma re awanton komo men̂epesî petîyaxikwon̂e komo,

oroto rma okoputhîrî komo yaatome yîwya so,

ketken̂e tî.

32 Ero ke tak sowtatu komo cetken̂e petîyaxikwoso.

Xehxan ka petîyaxikwetken̂e,

ero yinhîrî mehxan petîyaxikwetken̂e hara.

33 Ero yinhîrî tak Xesus yaka cetken̂e hara.

Twaihso rma tko xakn̂e Noro pen,

Ero ke,

Pîra ham,

ketken̂e.

Pahxa rma waipo ham,

ketken̂e noro poko.

Ero ke Noro petîyaxikwora rma xatken̂e.

34 Rah ke tak nîyahtaparaxkekn̂e sowtatu,

iitono ha.

Ero yinhîrî tak kamxukwakn̂e oko rah yewtatho yaro.

Tuuna yakro ceske kamxukwakn̂e.

35 Enîn̂enhîrî xa tan ero wa ehtoponhîrî n̂ekatîmyasî.

Yaarono xa n̂ekatîmyas ha awya so.

Yaaro kan̂e mak ow ha,

kesî ekatîmn̂e,

Yaarono xa mîn ham kn̂entathîrî komo,

kachome awya so.

36 Ero wa xatken̂e sowtatu komo,

Xesus petîyaxikwora xatken̂e.

Kaan Karitan yaw roro rma wa ero wa xatken̂e,

Etaxikwora ro mak nas amn̂e Noro,

kachonho yaw roro ha.

37 On wara marha kes hara Kaan Karitan,

Tînparaxkathîrî komo wece tak n̂een̂axe amn̂e,

kesî.

Ero wa kachonho yaw roro marha xakn̂e Xesus.

Ero wa Xesus waihyakn̂e.

38 Taa,

ero yinhîrî takî tî Piratus yaka cekn̂e Xose,

Ar̂mateia pono.

Xesus npanatanmekîtho tî mîk xakn̂e Xose esekatîmnî me makî tko tî.

Xutew komo pona cerahtîmrî ke tî ero wa xakn̂e.

Noro rma tî on wara kekn̂e Piratus ya,

Apa,

Xesus yokoputho cma re waar̂asî ahruso,

kekn̂e tî.

Taa,

arko ha,

kekn̂e tî Piratus yîwya.

Ero ke takî tî Xesus yokoputho naar̂akn̂e ahruso.

39 Nikonemu marha tî cekn̂e Xose yakro,

pahxa Xesus yaka mokyakn̂e kosope,

noro rma.

Xesus yokoputho kapetopo tî naar̂akn̂e noro kotoporem ha tî okre.

Esmaxapu tî mîn xakn̂e,

miiha,

aroe yakro ceske ha tî.

Ero yipu tî naar̂akn̂e mer̂pora n̂he ha tî,

34 kiru tî.

40 On wara Xutew komo n̂iir̂axe okoputho,

poono ke karamiyaxe kir̂wan ke.

Tkotoporem ke cenawnoi marha karamiyaxe.

Ero wa n̂iir̂axe ahrutome tak.

Ero ke ero wara rma tî Xesus yokoputho n̂iir̂atken̂e Xose komo.

41 Taa,

Xesus yamowotoponho yecento rma xakn̂e naatî yewtî.

Ero po rma xakn̂e okoputho yahrutopo,

toopu yexenaka ahtoxapu.

Anarî komo yokoputho tî ka exihra xakn̂e ero yaw.

42 Ero ke iina tî n̂ermonoyatken̂e Xesus yokoputho meyehra exirî ke.

Xutew komo yetakir̂wamacho tî mîn xakn̂e kaamo.

Ero ke mooxe arî xera tî xatken̂e.