Taa,

ero wa tîmtapotache Kaan yakro aporî tak wacekn̂e Xesus tînpanatanmekrî komo yakro.

Setîron mîn aporî yosotî.

Iito xakn̂e naatî,

oripa yepu yaake.

Ero ke iina cetken̂e.

2 Iina Xesus cekn̂e roro tînpanatanmekrî komo yakro tîmtapotachome.

Iina totopo me rma nîhtînoyakn̂e Xutas,

Xesus yekanîn̂e ha.

3 Ero ke tak iina xa marha cekn̂e noro hara.

Sowtatu komo naar̂akn̂e tîmsom pokono yenîn̂e komo yanme tmohsom,

Parisew komo yanme tmohsom marha.

Ero warai komo mokyatken̂e Xutas yakro.

Tweike so mokyatken̂e.

Anarî komo tpoturem n̂ekyatken̂e cemyaw so.

Anarî komo ramha n̂ekyatken̂e cemyaw so hara.

Tukurui so marha mokyatken̂e.

Ero wa so mokyatken̂e sowtatu komo.

4 N̂examro mokuche tak yîhyaka so rma cekn̂e Xesus.

Amn̂e oyahsîyaxe ooxatî pîn komo oyemetanmetome,

owaihkachome meero,

kekn̂e rma.

Ero ke yîhyaka so rma cekn̂e.

Onoke mepor̂at ha?

kekn̂e tak yîwya so.

5 On wara tak n̂eyukyatken̂e,

Xesus amna n̂epor̂asî,

Nasare pononho ha,

ketken̂e.

Noro Ow ha,

kekn̂e Xesus yîwya so.

Iito rma xakn̂e Xutas,

Xesus yekanîn̂e ha.

Sowtatu komo yakro rma n̂ecececekn̂e.

6 On wara tî xatken̂e sowtatu komo,

Noro Ow ha,

ketaw Xesus yîwya so,

n̂examro pen tak n̂epîrketken̂e tîmkai so.

7 Ero yinhîrî tak Xesus kekn̂e xa hara yîwya so,

Onoke mepor̂at ha?

kekn̂e.

Xesus amna n̂epor̂asî,

Nasare pononho ha,

ketken̂e xa hara yîwya.

8 Noro Ow ha,

wîîka awya so,

kekn̂e Xesus yîwya so.

Ero ke oyarî xe awexitaw so,

moxam tocowpe hara oyakrono komo,

kekn̂e Xesus.

9 Ero wa kekn̂e Xesus tîmtapotachonhîrî yaw roro ehtome so yînpanatanmekrî komo.

Ehcamnopîra ro mak naxe n̂examro,

owya anmîthîrî komo ha,

kachonho yaw roro ehtome so ero wa kekn̂e.

10 Ero yimaw tak Simaw Petru mohkekn̂e tîkaciparan,

sumai cur̂ai,

tîmsom yenîn̂e yanton panatho nîhkocekn̂e oko.

Mawku tî mîk xakn̂e panahkotoxapu yosotî.

11 On wara tko kekn̂e Xesus Petru ya,

Akaciparan enkak hara een yaka.

Owokpesî tak Apapa,

ero ke weer̂asî rma yînmîthîrî,

kekn̂e yîwya.

Ero wa kekn̂e Xesus Petru ya.

12 Ero wa kache tak Xesus pen nahsîyatken̂e sowtatu komo tantoman̂e komo yakro rma,

Xutew yantoman̂e komo yakro marha.

Napomiyatken̂e marha tak.

13 Ero yinhîrî tak Xesus pen naar̂atken̂e.

Anas yaka ka naar̂atken̂e cokorî.

Kaipas woxin tî mîk xakn̂e Anas.

Kaan yaka cewomsom me ka xakn̂e Kaipas ero cimn̂ipu po.

14 On wara kan̂enho tî mîk xakn̂e Kaipas Xutew komo ya,

Cewn̂e mak twaihkapore nasî kir̂wan̂he kpoyino komo ciitopo,

kan̂enho tî mîk xakn̂e Kaipas ha.

15 Taa,

noro yaka Xesus yaar̂ataw tak,

Simaw Petru cekn̂e wenari rma ha re.

Anarî marha cekn̂e hara Xesus wenari yînpanatanmekîthîrî hara.

Kaan yaka cewomsom n̂enîtho rma mîk xakn̂e,

ero ke noro roron pona rma cekn̂e noro reha.

16 Petru reha waaca mkai mak n̂ecececekn̂e,

metata mîtwo mak.

Iito xakn̂e metata yenîn̂e wooxam.

Ero ke yîhyaka tak cekn̂e Petru yakrono,

Kaan mîn yaka cewomsom n̂enîtho ha.

On wara kekn̂e noro Petru poko,

Moso marha cma re waarasî kayaritomo roron pona,

kekn̂e Petru poko.

Ero ke tak noro naar̂akn̂e iina hara.

17 On wara kekn̂e wooxam Petru ya,

Noro npanatanmekîtho pîn ha na amoro?

kekn̂e.

Pîra,

Noro npanatanmekîtho pîn ow ha,

kekn̂e tî Petru yîmtaka.

18 Iito marha tî xatken̂e Kaan yaka cewomsom yanton komo.

Wehto pona tî n̂eson̂atken̂e Xutew yantoman̂e komo yakro.

Cwotu yimawno me exiri ke tî komsînatken̂e.

Ero ke tî wa wehto n̂iriyatken̂e cesontome so.

Iina marha Petru cekn̂e wehtorî komo pona esonso hara.

Ero wa xakn̂e Petru.

19 Ero yimaw tak Xesusu mtapotarî n̂encekn̂e Kaan yaka cewomsom.

On wara kekn̂e Xesus ya,

Onoke warai komo mîkyam ha ke anpanatanmekrî kom ha?

kekn̂e yîwya.

Ahce warai poko panatanmekno miir̂a?

kekn̂e marha yîwya.

20 On wara Xesus n̂eyukyakn̂e,

Miyan komo n̂entarî me rma panatanmekno wiir̂akn̂e kir̂wantawno me mak.

Awesenmetopo komo yaw so wîîkekn̂e roro.

Kaan mîn yaw roro marha wîîkekn̂e.

Iina cexe Xutew komo emapona.

Ero ke omtapotarî n̂encetken̂e iito.

En̂epa me panatanmekno cirihra ro mak wîxakn̂e.

21 Ero ke ahce kacho ero wara mîîke owya?

Oyentan̂enho komo ya xa kasko.

Ahce wa kekn̂e Noro awya so,

kacoko yîwya so,

kekn̂e Xesus yîwya.

22 Iito n̂ecececekn̂e Xutew komo yantoman̂e.

Ero ke ero wa kacho yentache tak Xesus nîmtakatapekn̂e oko.

Ahce kacho Kaan yaka cewomsom ya ero wa mîîke hara kopi?

kekn̂e.

23 On wara kekn̂e Xesus yîwya,

Ahce wai poko mîîke?

Ekatîmko ika kicicme omtapotatho?

Ekatîmko ika.

Kir̂wan̂he exitaw omtapotarî ahce poyero Ow mîmtakatape hara?

kekn̂e.

24 Ero yinhîrî tak Xesus narpekn̂e Anas Kaan yaka cewomsom yaka hara,

Kaipas yaka ha.

Tapomiso rma tî narpekn̂e.

25 Ero yimaw iito rma xakn̂e Simaw Petru wehto mîtwo.

Kaipas yanton komo yakro n̂eson̂akn̂e.

N̂examro tak on wara ketken̂e yîwya,

Noro npanatanmekîtho na amoro hara,

ketken̂e yîwya.

Pîra ro mak,

yînpanatanmekîthîrî pîn ow ha,

kekn̂e Petru yîwya so okwe.

26 Noro yakrononho mexe amoro ha ta,

kekn̂e tak anarî xa hara,

Kaan yaka cewomsom yanton,

Petru npanakatho yanan ha.

Kenwo rma Noro yakro mînto awexitaw so naatî chew,

kekn̂e.

27 Pîra ro mak,

kekn̂e xa hara Petru,

nanwekyakn̂e xa hara okwe.

Ero wa kache rma tak kapikara kokwakn̂e.

Ero wa xakn̂e Petru.

28 Taa,

ero yinhîrî takî tî Xesus naar̂atken̂e xa hara Xutew komo.

Enmarî yakro ro rma tî naar̂atken̂e Kaipas mîn yai en̂ekano ritopo ro yaka hara.

Ewomra tko tî xatken̂e n̂examro,

aan̂enhîrî komo.

Yîmkai makî tî n̂ecececetken̂e.

On wara tî ketken̂e,

En̂ekano ritopo yaka kewomche so kicicme men taxe.

Paskwa yimawno me thakwa eseresmara taxe okwe iina kewomuche so,

ketken̂e.

Ero ke ewomra tî xatken̂e.

Ero wa tî xatken̂e.

29 Ero ke yîhyaka so makî tî n̂epatakekn̂e Piratus.

On wara tî kekn̂e yîwya so,

Ahce wa ehtopo poyero Moso mehcow ha ohyaka?

Etacicoko ka kicicme ehtopo,

kekn̂e tî yîwya so.

30 On wara makî tî n̂eyukyatken̂e,

Kicicitho xa Mîkro kica.

Ero ke wa amna n̂ek ahyaka ha.

Kicicitho me exihra exitaw ketaw ha re ekîhra re nas amna ahyaka,

ketken̂e tî n̂examro Piratus ya.

31 Ai ha,

kekn̂e takî tî yîwya so.

Amyamro rma aacoko ha.

Ahce wa mak nîîke apanatanmetopo komo?

Ahce wa tî cirpore nai moso yipu?

Ero wara rma ciicoko amyamro rma,

kekn̂e yîwya so.

Waihkara thakwa nas amna,

ketken̂e tko Xutew komo.

Kicicitho waihkara ehcoko,

mîîkexe thakwa okwe amyamro kayaritomo komo,

ketken̂e Piratus ya.

32 Ero wa Xesus waihkacho poko nîmtapowatken̂e.

Tpanaxkem pona oyamowexe amn̂e,

kekn̂e Xesus pahxa n̂he.

Ero ke ero wa kachonho yaw roro rma kayaritomo komo ya mak waihkapo xe xatken̂e.

Ero wa xatken̂e Xutew komo.

33 Ero yinhîrî kayaritomo mîn yaka takî tî n̂ewomyakn̂e hara Piratus.

Xesus takî tî nan̂ikpekn̂e iina hara.

On wara tî kekn̂e yîwya,

Xutew komo kayaritomon ma Amoro?

kekn̂e tî yîwya.

34 On wara tî Xesus n̂eyukyakn̂e,

Onoke yanme xa ero wa mîîke owya?

Anarî komo katî kayaritomo me oyehtopo n̂ekatîmyatken̂e awya ha?

Awanme ro mak katî ero wa mîîke?

kekn̂e tî.

35 Kica,

kekn̂e tî Piratus yîwya,

Xutew poyino ma re ow awya?

Apoyino komo rma awehcow ohyaka tîmsom pokono yenîn̂e komo yakro rma,

Ahce wa mîxakn̂e ha ke?

Esekatîmko ka on̂entarî,

kekn̂e tî yîwya.

36 On wara tî n̂eyukyakn̂e Xesus,

Kayaritomo rma Ow ha roowo pono komo warai pîn hatko.

Roowo pono komo wara oyexitaw ketaw ha re n̂etar̂mexe ha re omaywen komo oyahsîra ehtome Xutew komo.

Roowo pono komo yanmera ro mak wasî kayaritomo me,

kekn̂e tî Xesus yîwya.

37 Ai ha,

kekn̂e tî Piratus.

Ero ke ahce warai amoro,

kayaritomo ma amoro ha?

kekn̂e tî.

Yaaro rma wa kayaritomo me Ow metahcasî,

kekn̂e tî Xesus yîwya.

Yaarono yekatîmn̂e me kewruyakn̂e.

Ero warai me oyehtome oona kmokyakn̂e roowo pona.

Anarî komo oyentara rma naxe okwe.

Yaarono yenta xatî komo mak oyencexe,

kekn̂e tî.

38 Ai ha,

kekn̂e tî Piratus yîwya,

Ahce warai kyam mîn yaarono kîmtapotarî awya?

kekn̂e.

Ero wa kache takî tî n̂epatakekn̂e xa hara Xutew komo yaka.

On wara tak kekn̂e n̂examro ya,

Kicicitho pîn me mak Moso ween̂asî,

kekn̂e.

39 Ero ke wahsîpînke mak ha na.

On wara wasî awanme so,

on yimaw roro wahrunkesî ahruxapunhîrî,

cewn̂e mak.

Ero wara roro wasî awanme so paskwa yimaw.

Ero ke ahce wa katî wai awya so,

Moso rma na wahsîpînke awanme so,

Xutew komo kayaritomon ha?

kekn̂e tî.

40 Pîra ro mak kica,

ketken̂e tî n̂examro yîwya.

N̂emtaraketken̂e ro mak.

Noro pîn,

Barabasî xa ahrunkak ha ke,

ketken̂e.

Cen̂epan̂em tî mîk xakn̂e Barabas kica,

Noro yipu poko ketken̂e ero wara.