Tînpanatanmekrî Komo Poko Xesus Nîmtapowasî Kaan Yakro
17
Taa,
ero wa kache tak kahsî n̂een̂akn̂e Xesus.
On wara kekn̂e,
Apa,
on wara cma re wîîkes awya,
Kir̂wanî ro me Amumuru yenpotopo me tak nasî oroto.
Ero ke ero warai me tak enpoko kir̂wanî ro me awenpotome Amumuru hara.
2 Amumuru n̂ewetîrî me miir̂akn̂e tooto komo ahnoro.
Ero warai me Noro miir̂akn̂e waipînî ro me ciino ritohme.
Tooto komo mîmyakn̂e yîwya ero ke anmîthîrî komo n̂iir̂asî waipînî ro me.
Jesus ora por seus seguidores (João 17:1-26)
3 On wara kexe n̂examro apoko waipînî ro me cehtome so,
Noro mak Mîkî Kaan,
yaarono xa ha,
kexe.
Ero warai me ahtînoyaxe so.
On wara marha kexe,
Kaan n̂en̂epetho xa Mîk Xesus Kristu,
kexe hara.
Ero wa kacho rma nasî waipînî ro me ciin̂e komo me.
4 Kir̂wanî ro me awehtopo wenpekn̂e roro Apapa,
tan oyexitaw roowo po.
Wiitîka marha tak,
ero wa ciino cirko iito awexitaw,
kachonho awya.
5 Ero ke kir̂wanî ro me tak Ow enpoko Apa kir̂wanî ro me awesenpetaw rma.
Pahxa wîxakn̂e ahyaw roowo exihnaw ha kapu,
ero yimaw kir̂wanî ro me wîxakn̂e.
Ero warai me tak Ow enpoko oroto hara,
kekn̂e.
6 On wara marha kekn̂e tînpanatanmekrî komo poko,
Owya anmîthîrî komo moxam Apa,
roowo pono komo poyinonho komo rma.
N̂examro panatanmekyakn̂e awosotî poko.
Anmen̂ekathîrî komo rma mîkyam Apa,
owya tak mîmyakn̂e.
Amtapotarî tak n̂ewehcatken̂e roro okre.
7 On wara marha naxe n̂examro Apa,
anmîthîrî me mak nîhtînoyaxe ahce wa na oyehtopo ahnoro.
8 On wara oyexirî ke mak ero warai me ohtînoyaxe Apa,
amtapotarî yekatîmrî ke mak owya.
Owya mîîkekn̂e,
ero wa kacho rma wekatîmyakn̂e yîwya so hara.
Ero yipu rma tak n̂ewehcatken̂e Apa,
amtapotarî rma.
Kaan yai mohxapu Moso ham,
Kaan n̂en̂epetho ham,
ketken̂e marha opoko.
9 Ero ke n̂examro poko makî reha kîmtapowasî awakro Apa.
Roowo pono ro komo poko yîmtapotara wasî.
Owya mîmyakn̂e,
n̂examro poko mak tan kîmtapowasî amxîkrî me exirî ke so.
10 Oyakrono komo mîkyam Apa,
ahnoro.
Ero ke amxîkrî komo me marha naxe.
Owya tko mîmyakn̂e xa hara.
Ero ke kir̂wanî ro me oyenpon̂e me naxe,
kekn̂e Xesus Tîîm ya.
11 On wara tak kekn̂e hara,
Kmokyasî tak Apa,
ahyaka,
tan exihra tak wasî roowo po.
N̂examro tko tanî rma ka naxe,
roowo po rma.
Kir̂wanî ro xa Amoro Apa.
Ero ke awya tan wîîkesî,
Owya anmîthîrî komo yukurunpeko roro awosotî ponaro exirî ke so.
Ero wa n̂examro cirko cewn̂an me tak ehtome so.
Cewn̂an me tasî,
ero wa xa marha n̂examro cirko hara Apa,
cewn̂an me hara.
12 Roowo po rma ka oyexitaw yîhyaw so Owî rma wukurunpekn̂e awosotî ponaro roro rma ehtome so.
Ehcamnopîn me wiir̂akn̂e ahnoro anmîthîrî komo owya.
Anarînhîrî mak n̂ehcamnoyasî,
cehcamnosom ro thakwa.
Noro mak n̂ehcamnoyas okwe.
Ero wa thakwa nasî noro Kaan Karitan yaw roro rma.
13 Taa,
ahyaka tak kmokyas Apa.
Roowo po rma ka oyexitaw n̂examro panatanmekyasî tahwore xa ehtome so.
Tahwore roro exi xe so wasî oponaro cexirî ke so.
14 Amtapotarî wekatîmyakn̂e yîwya so Apa.
Yiixera so naxe roowo pono ro komo tîyanan mera exirî ke so.
Owara xa marha naxe n̂examro,
roowo pono ro komo yanan mera.
15 N̂examro arko roowo poi,
kahra tan was awya Apa.
On wara xa wîîkes awya,
Kicicitho ro nas okwe iito roowo po.
Ero ke yukurunpeko,
wîîkesî mak tan awya.
16 Roowo pono ro komo yanan mera thakwa naxe n̂examro.
Owara xa marha naxe roowo pono ro komo yanan mera.
17 Ero ke aponarono me mak cirko,
anarî ro ponarono pîn me mak.
Yaarono ke ero wa cirko Apa,
amtapotarî ke rma.
18 Roowo pono ro komo cheka Ow men̂epekn̂e Apa.
Ero wa xa marha moxam wen̂epes hara roowo pono ro komo cheka hara.
19 Ero ke aponarono me mak exi xe so wasî.
Ero wa ehtome so Owî wasî aponarono me mak Apa.
Ero ke ero wa n̂examro cirko yaarono ke,
amtapotarî ke.
20 N̂examro poko mak tan yîmtapotara was Apa,
awakro.
Anarî komo marha n̂een̂axe opona amn̂e n̂examro mtapotarî yanme.
Noro yipu komo poko meero tan kîmtapowasî.
21 Cewn̂an me xa n̂examro cirko amn̂e Apa.
Cewn̂an me tasî Owî,
Amoro,
ero wara.
Ero ke ero wa xa marha n̂examro cirko hara kakrono ro me,
cewn̂an me xa tak ha.
Ero wa cirko,
Kaan n̂en̂epetho Mîk ham Xesus,
kachome so tak roowo pono komo opoko.
22 Kir̂wanî ro me Ow miir̂akn̂e,
ero wa xa marha kir̂wanî ro me n̂examro wiir̂akn̂e hara cewn̂an me tak ehtome so,
kîw tasî ero wa xa marha.
23 N̂examro yakrono ro me was Owî,
ero wa xa marha oyakrono ro me mas hara.
Ero wa tasî cewn̂an me ehtome so n̂examro kakro rma.
Ero wa exitaw so,
Kaan n̂en̂epetho Mîk ham Xesus,
kexe tak roowo pono komo opoko.
Xesus xe nasî Kaan,
ero wa xa marha Noro nai mî,
kexe marha tak.
24 Ohyaw exi xe so tak wasî anmîthîrî komo owya.
Iito exi xe so tak wasî ohyaw kir̂wanî ro me oyehtopo yentome yîwya so.
Ooxe mîxakn̂e pahxa roowo yakîhtonaw ha kapu.
Kir̂wanî ro me marha Ow menpekn̂e ero yimaw.
Ero wa oyehtopo yenpo xe marha wasî oyakrono ro komo ya hara.
25 Kir̂wanî ro Amoro Apa.
Roowo pono ro komo reha camkî mak naxe apoko.
Kîîm komo Mîkî Kaan,
kir̂wanî ro,
kahra naxe okwe.
Owî reha ero warai me kîhtînoyasî.
Onpanatanmekîtho komo marha on wara kexe opoko hara,
Kaan n̂en̂epetho Mîk ham Xesus,
kexe opoko.
26 Awosotî poko n̂examro panatanmekyakn̂e Apa.
Miya roro rma panatanmekyasî amn̂e.
Ero wa panatanmekyasî ooxe ehtome so,
ooxe masî ero wa xa marha.
Takrono ro me ohtînotome so roro marha ero wa n̂examro panatanmekyasî,
kekn̂e.
Ero wa kekn̂e Xesus Tîîm ya.