16
Taa,
on wara marha kekn̂e Xesus tînpanatanmekrî komo ya,
Ahwokan me awexi xe so was amn̂e aaxera so exitaw roowo pono ro komo.
Ero ke kweronomacow so ero wa ehtopo komo poko.
2 On wara men naxe amn̂e okwe apoko so,
aporokexe so tohra awehtome so cesenmetopo komo yaka.
Noro penî kr̂a twaihkapore nasî Kaan yanme ha,
kexe marha apoko so okwe.
3 Ero wa awir̂axe so amn̂e Apapa ponarora ro mak cexirî ke so,
oponarora cexirî ke so marha okwe.
4 Ero wa awemetanmekyataw so tak amn̂e,
omtapotachonho ponaro xa ehcoko.
Xesus mtapotachonho yaw roro rma ero wa kiir̂at ham,
kacoko tak ha.
Pahxa ka ero yipu yekatîmra ka wîxakn̂e awya so ahyaw so rma ka oyexiri ke.
5 Kîwcesî takî tko oyen̂epen̂enho yaka hara.
Ahna wa mîîce,
kahra rma maxe owya.
Mais ensinamentos sobre o Espírito Santo (João 16:5-33)
6 Mahwokacow thakwa ham owtotopo yentarî ke awya so.
7 Ahwokara rma cexpore nasî.
Yaaro tan wîîkes awya so,
kir̂wan̂he awehtome so rma kîwcesî.
Tohra oyexitaw mokuhra nasî ahyaka so Awakronoman̂e kom ha.
Owtoche tko Noro wen̂epesî ahyaka so.
8 Tmokuche tak Noro nîmtapowasî tooto komo yakro kicicme ehtopo komo poko.
Kir̂wan me ehtopo komo poko marha,
en̂ekacho komo poko marha.
Ero yipu poko nîmtapowasî Awakronoman̂e komo tooto komo yakro,
Yaaro ham,
kachome tak yîmtapotarî poko.
9 Kicicme maxe kica,
kesî yîwya so,
opona enîhra exirî ke so mak.
10 Kir̂wan me xa matko cexpore nasî,
kesî marha yîwya so Apapa yaka owtorî ke,
oyenîra tak awexirî ke so.
11 On wara marha kesî,
Kaan men awen̂ekexe so amn̂e on yanme mak,
roowo pono ro komo kayaritomon tak nasî wehto imo ywaka tar̂maxmu me,
kesî.
Ero wa kesî Awakronoman̂e komo amn̂e tooto komo ya,
kekn̂e Xesus.
12 On wara marha kekn̂e,
Taa,
miya rma ka nasî on̂ekatîmrî awya so.
Oroto ekatîmtîketaw awya so ayopono me nasî.
13 Amn̂e takî tko Kaan Yekatî mokyasî.
Yaarono xa Mîk Kaan Yekatî.
Yaarono xa marha n̂entamexpesî awya so Kaanî mtapotarî.
Ahnoro tak n̂entamexpetîkesî.
Tanme ro mak yîmtapotara nasî,
tîn̂entathîrî mak n̂ekatîmyas awya so.
On wara tak ciino n̂iir̂asî Kaan amn̂e,
kesî marha.
14 Opoko marha apanatanmekyaxe so.
Noro xa ham kir̂wan,
kapore nasî Xesus poko,
kesî.
Kir̂wanî ro me oyehtopo marha n̂ekatîmtîkesî awya so.
15 Miya rma nasî kir̂wan̂he Apapa yehtopo.
Ohyaw xa marha nasî ero wa Noro yehtopo hara,
ahnoro.
Ero wa exirî ke wîîka,
Kir̂wanî ro me oyehtopo tak n̂ekatîmtîkesî Kaan Yekatî awya so,
wîîka,
kekn̂e.
Tawake Maxe Hara Ahwokaxapunhîrî Rma, Kesî Xesus
16 On wara marha kekn̂e Xesus ero yimaw rma,
Yohno Ow menîhkayaxe.
Yohno xa marha Ow meen̂axe hara.
Apapa yaka owtorî ke ero wa maxe,
kekn̂e.
17 Ero yipu yentache anarî komo tak n̂eserepoketken̂e yînpanatanmekrî komo rma.
Ero ke n̂esencetken̂e ero poko.
Ahce wai ya twa nîîke hara kopi?
Yohno Ow menîhkayaxe,
yohno xa marha Ow meen̂axe hara,
Apapa yaka owtorî ke ero wa maxe,
kesî kopi.
18 Ahce wai ya kyam nîîke kopi,
Yohno mak Ow meen̂axe,
nîîke?
Camkî mak kesî kopi,
ketken̂e.
19 Ahce wai ya kyam mîîka kopi,
ka xe nat ham owya,
kekn̂e rma tko Xesus.
Ero ke on wara kekn̂e yîwya so,
Ahce wa matu?
Mesencetu omtapotachonho poko ha?
Yohno Ow menîhkayaxe,
yohno xa marha Ow meen̂axe hara,
wîîka.
Ero wa kacho awewkukmetu so ha?
kekn̂e.
20 Yaaro tan wîîkes awya so,
mîwracexe rma kapu,
okwe okwe,
mîîkexe ka awahwokarî ke so.
Roowo pono ro komo reha tawake naxe ero yimaw.
Amyamro reha mahwokexe rma ha kapu,
mahwowaxe hara tko amn̂e okre.
21 Ero wa nasî wooxam yîmxîkrî yewruyataw.
N̂erewasî ka oko ewrutopo me exirî ke thakwa.
Amn̂e tak yîmxîkrî yewruche cerewîmtoponhîrî tak nîhcamnoyas hara tawake exirî ke tîmxîkrî poko.
Omxîkrî ciki n̂ewru okre tooto xa hara okre,
kesî mak tak ha.
22 Ero wa xa marha maxe amyamro hara,
ahwora ka maxe owtorî ke.
Keen̂axe so hara tko amn̂e.
Ero yimaw tak mahwowaxe xa tak okre.
Awahwokan̂e pîn me ro mak tak naxe tooto komo ero yimaw.
23 On wara marha maxe ero yimaw,
ahce xe so na awexitaw so,
owya kahra tak maxe.
Kîîm komo ya tak mîîkexe.
Xesus yakrono me oyexirî ke tan wîîkes awya,
mîîkexe.
Yaaro tan wîîkes awya so,
ero wa ketaw awya so yiixe awehtopo komo tak Noro nîmyas awya so.
24 Ero wa yiixe awehtopo komo poko yîmtapotara ka maxe,
Xesus yakrono me oyexirî ke tan wîîkes awya,
kahra ka maxe.
Ero ke ero wa tak kacoko yiixe awehtopo komo poko.
Ahsîche tak awya so tawake xa tak maxe okre,
kekn̂e.
25 On wara tak kekn̂e hara,
Taa,
ero wa ka kpanatanmekyaxe so Apapa poko.
Kir̂wantawno me xa ekatîmra ka weexi,
anarî pokono wara makî ka wîîka.
Amn̂e tak anarî pokono wa kahra tak wasî awya so,
kir̂wantawno me xa tak wekatîmyasî.
26 Ero yimaw tak Kîîm komo yakro mîmtapowaxe yiixe awehtopo komo poko.
Xesus yakrono me oyexirî ke mak tan wîîkesî,
mîîkexe yîwya.
Ow tak yîmtapotara wasî Noro yakro awanme so.
On wara tî nîîke noro,
kahra wasî yîwya.
27 Aaxatî komo rma Mîk Apapa.
Ooxe awexirî ke so aaxatî me nasî Noro,
Kîîm komo yai mohxapu Mîk ham,
karî ke marha awya so.
28 Ero warai rma Ow ha.
Apapa yai kmokye oona roowo pona.
Kîwces hara amn̂e yîhyaka,
roowo poi hara,
kekn̂e.
29 Ero wa kacho yentache tak on wara ketken̂e yînpanatanmekrî komo yîwya,
Taa,
kir̂wantawno me xa mekatîmyasî.
Anarî pokono wa ekatîmra tak masî.
30 Ero ke tak,
Miyan komo yîhtînon̂e rma Moso ham okre,
kesî tak amna apoko.
Ahce wa nai on,
ahce wa nai ero hara,
kahra rma amna exitaw mekatîmyasî rma okre.
Ero ke amna kesî,
Kaan yai mohxapu Moso ham,
kesî tak amna apoko,
ketken̂e.
31 Ai ha,
kekn̂e tak Xesus yîwya so hara,
Orotono wa xa opona meen̂at ha?
32 On wara men maxe amn̂e,
oroto n̂he rma tko maxe.
Metakpayaxe tak,
amîn komo yaka tak mîîcexe.
Ow tak mînomtîkexe okwe.
Cewn̂e tko exihra rma wasî ero yimaw.
Apapa rma nasî oyakro.
33 Ahwokara awehtome so tan ero yipu wekatmo awya so.
Oponarono me awexirî ke so ero wa maxe.
Tanî rma ka awexitaw so roowo po mesemetanmekyaxe rma okwe.
Wara rma tahwore ehcoko.
Roowo pono ro komo rma war̂mai,
iyopono me oyexirî ke,
kekn̂e.
Ero wa kekn̂e Xesus tînpanatanmekrî komo ya.