Naatî Yatî Warai Ow Ha, Kesî Xesus
15
On wara tak kekn̂e hara Xesus,
Naatî Ow ha tatkem ha.
Kir̂wan mak Ow nat ha,
anarî ro pîn ha.
Apapa nasî naatî yatîkronkan̂e me hara.
2 On wara nasî operemru.
Epetantho me na nai anarimaw,
ero ke nîhkocesî tak Noro.
Anarî na nai cepetaxmu rma ha re,
wahra makî tko n̂eperwasî,
yaake exirî ke atîkron.
Ero ke tak natîkronkesî cepetaxmu me xa tak ehtome peremru okre.
A videira e os ramos (João 15:1-17)
3 Atîkronkaxapu wara rma maxe amyamro.
Omtapotarî mentacow,
ero rma nasî awatîkronkacho komo me.
4 Ero ke ohyawno me roro ehcoko.
Ahyawno me roro marha Ow yîhtînocoko hara.
Epetara thakwa nasî naatî peremtho ecepu pokohra exitaw.
Ero wa xa marha maxe amyamro hara,
epetan me thakwa maxe ohyawno me roro exihra awexitaw so hara.
5 Naatî Ow ha,
operemru tak amyamro.
Ero ke ohyawno me roro ehcoko.
Ahyawno me roro marha Ow yîhtînocoko hara.
Ero wa awexitaw so meperwaxe xa tak okre.
Ahce na poko awexitaw so mehn̂exe mak okwe ohyawno mera awexitaw so.
6 Epetan me exitaw naatî peremru nîhkocexe mak okwe osom komo.
Ero yipu tak naawaiyasî.
Ero yinhîrî tak awaixapu n̂enmekyaxe akn̂itome.
Ero wa xa marha maxe amyamro hara epetara awexitaw so.
7 Ohyawno me roro ehcoko,
omtapotarî marha ahyawno me roro ciicoko.
Ero wa awexitaw so yiixe awehtopo komo poko tak mîmtapowaxe Apapa yakro.
On wara cma re ow miir̂asî Apa,
mîîkexe.
Ero ke tak ero wara rma awiraxe so.
8 Cepetaxmu me xa awexitaw so,
Xesusu npanatanmekîtho xa mîkyam ham,
kexe tak apoyino komo apoko so.
Kir̂wanî ro Mîk ham Kaan,
kexe marha Apapa poko,
Ero wa naxe apoyero so,
kekn̂e Xesus.
Aaxe So Wasî, Ero Wa Xa Marha Etîxe Ehcoko Amyamro, Kacho
9 On wara marha kekn̂e Xesus,
Ooxe xa nas Apapa.
Ero wa xa marha was Ow hara aaxe so.
Ero ke,
Ooxe xa nasî Xesus okre,
kacoko roro.
10 Omtapotarî ewetîcoko,
Ero wa men ehcoko,
kacho.
Ero yewehcataw roro awya so aaxatî me Ow mîhtînoyaxe roro okre.
Ero wa xa marha was Ow hara.
Apapa mtapotarî wewehcasî roro.
Ero ke,
Ooxatî me Noro wîhtînoyasî roro.
11 Ero warai poko wîîkes awya so tahwore roro awehtome so oyanme mak.
Tahwore xa awexi xe so wasî ahwokan me ro mak.
Ero ke ero wa wîîkes awya so.
12 An̂ewetîrî komo me nasî on wara kacho owya,
Etîxe ehcoko,
aaxe so xa wasî ero wa xa marha etîxe ehcoko,
kacho ha.
13 On wara wîîkesî etîxe kehtopo poko,
kakrono pînînke tîtwaiya na anarimaw.
Ero wa kehtopo xa mîn etîxe xa kehtopo.
Ero yopono exihra ro mak nasî etîxe xa kehtopo.
14 On wara marha wîîkes awya so,
mîn hak pokono me nasî omtapotarî an̂ewetîrî komo.
Ero yipu yewehcataw awya so oyakrono me xa kîhtînoyaxe so okre.
15 Oyanton komo mak moxam,
kahra tak wasî apoko so.
Kanton komo ya reha ekatîmra taxe kesehtînotopo komo,
Ero poko was amn̂e,
kacho.
Oyakrono me roro cehsom komo moxam,
wîîkesî tak apoko so.
Ero ke on̂entatho rma wekatîmyasî awya so.
Owya kekn̂e apapa,
ero wa kacho wekatîmtîkes awya so ahnoro rma.
16 Oyakrono me onmen̂ekatho komo amyamro.
Ow men̂ekara rma mîxatken̂e amyamro.
Owî xa matko kmen̂eketken̂e so.
Ero ke miya so tak ken̂epexe so cepetaxmu me.
Ehcamnopîn me exi xe wasî aweperîrî komo.
Ero wa aweperwataw so ahce na xe awehtopo komo tak Apapa nîmyas awya so.
Xesus yakrono me oyexirî ke mak on wara wîîkes awya Apa,
kacoko mak yîwya,
tîmtome tak awya so.
17 Ero ke etîxe ehcoko,
wîîkesî xa hara awya so,
kekn̂e Xesus tînpanatanmekrî komo ya.
Aaxera So Naxe Tooto Komo, Kacho
18 On wara marha kekn̂e Xesus yîwya so,
Aaxera so na natu roowo pono ro komo.
Ero wa exitaw so apoko so on wara mak kacoko,
Pahxa rma Xesus xera xatken̂e,
ero wa xa marha kîîxera so naxe hara,
kacoko.
Jesus adverte sobre a perseguição (João 15:18-16:4)
19 N̂examro yanan me awexitaw so ketaw ha re aaxe so re naxe.
Iyananînhîrî rma re amyamro.
Kmen̂eketken̂e so tko oyanan me hara.
Ero ke aaxera so naxe tîyanan mera awexirî ke so.
Ero wa naxe roowo pono ro komo.
20 Omtapotachonho rma yîhtînocoko,
Kyopono me exihra ro mak naxe kanton komo,
kachonho owya.
Ero ke ooxera exitaw so tooto komo aaxera so marha naxe hara.
Ero wa xa marha naxe kîmtapotarî komo poko hara,
omtapotarî yewetîn̂e me exitaw so amtapotarî komo marha n̂ewehcaxe hara,
kachonho.
21 Ero ke kicicme awir̂axe so amn̂e oyakrono me awexirî ke so mak.
Ero wa naxe okwe apoko so camkî exirî ke so oona oyen̂epen̂enho poko.
22 Noro yipu komo panatanmeso mokuhra oyexitaw ketaw ha re,
kicicme maxe kica,
kacho mera naxe ha re.
Kmokye rma tko n̂examro panatanmeso.
Ero ke,
Entara thakwa xakn̂e amna,
kacho pona cetkurunpesom mera naxe okwe.
23 On wara naxe ooxera cehsom komo.
Apapa xera marha thakwa naxe okwe.
24 Noro yipu komo wero ro rma cirihnî wiir̂akn̂e.
Anarî komo ero yipu cirihra ro mak naxe.
Ero wa oyehtopo enîhra exitaw so ketaw re kicicme ehtopo komo exihra re nasî.
Oyen̂atken̂e rma tko,
wara rma ooxera naxe okwe.
Apapa xera marha naxe okwe.
Ero ke kicicitho mîkyam kica,
kacho me naxe.
25 On wara kesî mewrexapu,
n̂examro panatanmetopo komo,
Kicicme exihnî ro mak Ow.
Noro yipu rma ooxera naxe okwe,
kacho.
Opokono rma mîn mewrexapu.
Ero ke ero wa kacho yaw roro rma cehtome so ooxatî pîn me naxe.
26 Awakronoman̂e komo tak mokyas amn̂e ahyaka so,
Apapa yawnonho.
Owî rma Noro wen̂epesî.
Kaan Yekatî Mîk,
yaaro tîmtapotaxmu xa.
Apapa yai tmohsom Mîk ha.
Noro mokuche tak oyekatîmn̂e me nasî.
27 Amyamro marha maxe oyekatîmn̂e me hara oyakro awexirî ke so mehxa ro yihcitopo n̂ixa ro,
kekn̂e Xesus.
Ero wa kekn̂e tînpanatanmekrî komo ya.