Apapa Yentopo Rma Mîn Oyentopo Awya So, Kesî Xesus
14
Ero yimaw rma on wara kekn̂e hara Xesus tînpanatanmekrî komo ya,
Mahwokacow ha na owtotopo yentarî ke awya so.
Ahwokara rma ehcoko.
Kaan pona enîn̂e amyamro.
Ero wa xa marha opona encoko hara.
2 Mîîmo nai Apapa yeken po mer̂pono pîn ha.
Ero wa exihra exitaw ketaw re,
Exihnî ro mak mîn mîîmo iitono,
wîîkarî ha re awya so.
Iina tak kîwces amn̂e awekenî ro komo yakir̂wamaxi.
O único caminho para Deus (João 14:1-14)
3 Ero yipu yakir̂wamache tak kmokyas hara aaka so ohyaw tak awehtome so okre.
4 Iina kîwces amn̂e,
kacho rma mencexe,
Ahna mîîce,
kacho mera.
Esama onî iinan ha,
kacho marha mencexe,
kekn̂e.
5 Apa,
kekn̂e Tome yîwya,
ahna ma mîîce ha ke?
Yîhtînopîra thakwa nas amna.
Ero ke ahce wa thakwa re amna n̂een̂a esama hara?
kekn̂e yîwya.
6 On wara Xesus n̂eyukyakn̂e,
Owî rma Ow ha esama iinan ha.
Yaarono me kîmtapotacho marha Ow,
waipîn me roowo pono komo yehtopo komo marha Ow.
Oyanmera tîto xe naxe anarî komo Apapa yaka.
Ero wa exitaw so tohra thakwa naxe okwe.
7 Opoko camkîra awexitaw so ketaw ha re Apapa poko marha re maxe camkîra.
Oroto tak Noro yîhtînon̂e me maxe.
Noro yenîn̂e me marha maxe,
kekn̂e yîwya so.
Ero wa kekn̂e Xesus.
8 Ero yinhîrî Piripe makîrha tak on wara kekn̂e Xesus ya.
Apa,
Kîîm komo ika enpoko amna ya.
Noro yenîche tak cerepore nas amna,
kekn̂e.
9 Okwe,
kekn̂e Xesus yîwya,
pahkî re tan was awakro so,
camkî rma ma mai ke opoko okopuci okwe?
Apapa yentopo rma mîn oyentopo awya so.
Ero ke ahce kacho ero wa mîîke okwe,
Apapa ka enpoko,
mîîke?
10 On wara kahra katî mai,
Cewn̂an me rma nai ham Tîîm yakro,
kahra katî mai opoko?
Apapa yakrono ro ow ha,
oyakrono ro marha Noro hara.
Yaaro ham,
kahra katî mai ero wa kacho poko?
Oyanme ro mak yîmtapotara wasî.
Ohyaw xa nasî Apapa.
Noro xa Mîk cirihnî ciino rin̂e.
Ero wa kekn̂e Xesus Piripe ya.
11 On wara tak kekn̂e tînpanatanmekrî komo ya hara,
Anwekîra ro mak ehcoko ero wa kacho owya,
Cewn̂an me rma nas amna Apapa yakro,
kacho.
Apapa yakrono ro ow ha,
oyakrono ro marha Noro hara.
Ero wa kacho yanwekyataw rma awya so cirihnî ciitopo owya yîhtînocoko,
Yaaro rma kai ham,
kachome tak awya so opoko.
12 Yaaro tan wîîkes awya so,
cirihnî wiir̂akn̂e yaake ro.
Ero yipu xa marha miir̂axe amyamro hara amn̂e opona enîn̂e me awexitaw so.
Ero yopono xa tak miir̂axe amyamro Apapa yaka owtorî ke tak ha.
Ero wa cirihnî miir̂axe.
13 Ahce na xe awehtopo komo poko amtapowataw so Kaan yakro on wara kacoko,
Xesus yakrono me oyexirî ke mak tan wîîkes awya Apa,
kacoko.
Ero wa kache awya so yiixe awehtopo komo rma wîmyas awya so amtapotachonhîrî komo yaw roro rma.
Ero wa tîmrî ke owya kir̂wanî ro me Apapa wenpesî,
Yumumuru rma.
14 Ahce na poko amtapowataw so Apapa yakro on wara kacoko,
On wara cma re ow miirasî Apa,
Xesus yakrono me oyexirî ke mak tan wîîkes awya apa,
kacoko.
Ero wa ketaw awya so Owî rma tak ero wa kiir̂axe so amtpotachonhîrî komo yaw roro rma,
kekn̂e Xesus.
15 On wara marha kekn̂e,
Ooxe awexitaw so omtapotarî ewetîcoko.
Jesus fala sobre o Espírito Santo (João 14:15-31)
16 On wara marha wîîkes awya so,
Apapa yakro tak kîmtapowasî amn̂e apoko so.
Apa,
wîîkes,
onînomtho komo Yakronoman̂e cma re men̂epesî,
wîîkesî yîwya.
Ero ke Noro tak n̂en̂epesî ahyaka so anomn̂e pîn komo ro mak.
Ahyaw so tak nasî Noro tohnî me ro mak tak ha.
17 Kaan Yekatî rma Mîk Noro,
Yaaro kan̂e xa.
Noro yenîhra ro mak naxe roowo pono ro komo,
ponarora marha naxe okwe.
Ero ke noro yipu komo ropotaka mokuhra thakwa nasî.
Amyamro reha Noro ponaro maxe awakro so exirî ke.
Amn̂e tak aropotaw so xa tak nasî Noro rma hara.
Ero wa nasî Awakronoman̂e komo.
18 Akronomnî me ro mak anomra so wasî.
Kmokyas hara amn̂e ahyaka so,
19 Pahnoke tak nasî owtotopo okwe.
Ero yimaw tak roowo pono ro komo oyenîra ro mak tak naxe okwe.
Amyamro reha Ow meen̂axe rma.
Waipîn me oyexirî ke ero wa xa marha tak maxe amyamro hara waipîn me.
20 Ero yimaw marha cewn̂an me kehtopo komo ponaro xa tak maxe.
Apapa yakrono ro ow ha,
oyakrono ro me marha maxe amyamro hara.
Awakrono ro me marha was Ow hara.
Ero wa kehtopo komo ponaro xa tak maxe amn̂e.
21 Owya apanatanmetopo komo rma nasî ahyaw so.
Ero yewehcataw awya so,
Ooxatî n̂examro ham,
wîîkes apoko so.
Taa,
ooxatî me awexitaw so Apapa marha aaxe so nas hara.
Aaxatî me marha was ow hara.
Ero warai me tak kesenpesî awya so,
kekn̂e.
Ero wa kekn̂e Xesus tînpanatanmekrî komo ya.
22 Ero wa kache Xutas tak Noro yakro nîmtapowakn̂e,
anarî hara Xutas,
Iskar̂otes pîn.
Apa,
kekn̂e noro,
ahce kacho amna ya mak ero warai me mesenpe,
miyan komo ya rma esenpora mai?
kekn̂e Xesus ya.
23 On wara Xesus n̂eyukyakn̂e,
Omtapotari n̂ewehcaxe ooxatî komo.
Noro yipu komo xe tak nasî Apapa hara.
Ero yinhîrî tak amna rma mokyasî yîropotaka so Apapa yakro hara.
Iito tak amna n̂esekenmesî yîropotaw so ha.
24 Ooxera exitaw so anarî komo,
omtapotarî yewetîra naxe okwe.
Omtapotarî pînî rma tan wekatîmyasî,
Apapa mtapotarî xa tan wekatîmyas awya so,
oona oyen̂epekn̂e Noro mtapotarî ha,
kekn̂e.
Ero wa kekn̂e Xesus Xutas ya.
25 On wara kekn̂e hara tînpanatanmekrî komo ya,
Ero warai poko kpanatanmecow so awakro so ka oyexitaw.
26 Amn̂e tak Awakronoman̂e komo mokyasî Kir̂wanî ro Yekatî.
Ahyaka so Noro n̂en̂epes Apapa oyakrono me awexirî ke so.
Noro tak apanatanmekyaxe so miyan poko rma.
On̂ekatîmîtho poko marha ahcamhoketîkexe so.
Ero wa apanatanmekyaxe so amn̂e Apapa n̂en̂eperî.
27 Anomîche so owya cerepore rma kiir̂axe so.
Awerepotanmekn̂e ro me oyexirî ke ero wa kiir̂axe so.
Anarme mak awerepotanmekyaxe so roowo pono ro komo reha.
Ow xa kir̂wan̂he kerepotanmekyaxe so.
Ero ke ahwokara ehcoko owtorî ke.
Erasîra marha ehcoko ha.
28 Miya men kîwcesî,
kmokyas hara tko ahyaka so amn̂e,
kachonho owya mencexe.
Apapa yaka kîwcesî,
wîîkai.
Oyopono Mîk Apapa,
ero ke ooxe xa awexitaw so ketaw ha re tawake maxe ha re Noro yaka kîwcesî,
karî ke owya.
29 Ero wa kîwces amn̂e.
Oroto rma ero wa oyehtopo wekatmo awya so,
Yaaro nîîkai ham,
kachome tak awya so amn̂e ero wa oyexiche.
30 Yohno mak tan kîmtapowasî awakro so.
Mokyasî tak okwe roowo pono ro komo kayaritomon.
On̂ewetîrî pînî ro mak mîk noro.
31 Apapa mak wewehcasî,
Ero wa esko,
kacho yîwya.
Ero wa wewehcasî Tîîm xatî Mîkro ham,
kachome tak roowo pono ro komo opoko,
kekn̂e.
Ero wa kache,
Kaikatko kekn̂e tak hara.
Ero wa kekn̂e Xesus tînpanatanmekrî komo ya.