Taa,

ero yinhîrî Paskwa pahnoke xa tak xakn̂e.

Ero yimaw takî tî Xesus totopo me xakn̂e roowo poi Tîîm yaka.

Ero ke tîtotopo ponaro xakn̂e.

Tîpîn̂e ro makî tî n̂een̂akn̂e takrono komo,

roowo po tînînomrî komo.

Yiixe xa ehtopo mîkyam xatken̂e.

Pahxa rma yiixe so xakn̂e.

Ero wara rma yiixe so xakn̂e miya roro twaihtopo pona roro.

2 Ero yimaw Noro yakro n̂eseresmetken̂e yînpanatanmekrî komo,

kokmamrî me.

Yîtîhkache tak on wara tî xakn̂e Xutas Iskar̂otes,

Simaw mumuru,

Xesus yekantopo takî tî nîhtînoyakn̂e.

Ciabu rma tî ero wa yîhtînotopo n̂iir̂akn̂e yîropotaka.

3 On wara tî Xesus kekn̂e tîropotaw hara,

Miyan komo yosom me rma oriyakn̂e Apapa.

Kaan yai mohxapu rma Ow,

Noro yaka kîwces hara amn̂e,

kekn̂e tî.

Ero wa tî kekn̂e Xesus tîropotaw.

4 Ero ke tak nawomyakn̂e piiri.

Tawrutarî tak mohkekn̂e,

ketamocickacho ke n̂etawrutamiyakn̂e hara.

5 Ero yinhîrî tak tuuna narkekn̂e basia yaka,

xoo.

Tînpanatanmekrî komo tak nîhtakorokekn̂e,

anarî hara,

anarî hara,

ero wara.

Nîhtacickekn̂e tak tawrutawno ke rma.

Ero wa n̂examro nîhtakorokekn̂e.

6 Simaw Petru pona tak xakn̂e hara yîhtarî korokacho.

N̂esewyomekn̂e tak noro.

On wara kekn̂e,

Amoro xa ma ohtarî mîkoroke Apa okyo?

kekn̂e Xesus ya.

7 On wara Xesus n̂eyukyakn̂e,

Camkî ka masî on wara awitopo poko owya.

Amn̂e tak,

Ai ha,

mîîkesî,

ero wa oritome xa ma ohtakorokekn̂e,

mîîkesî tak ha,

kekn̂e yîwya.

8 Pîra ha men,

kekn̂e tak Petru yîwya.

Ohtarî korokapora ro mak was awya,

kekn̂e.

Ahce okwe,

kekn̂e hara Xesus yîwya.

Ahtarî korokara oyexitaw oyakrono mera ro mak mas okwe,

kekn̂e.

9 Ai ha Apa,

kekn̂e hara Petru yîwya.

Taa,

kasko rma ha ke,

ohtakorokakî rma.

Xiya meero kasko oyamorî meero,

ohtîpîrî meero,

kekn̂e Petru yîwya.

10 Pîra,

kekn̂e hara Xesus yîwya,

ahtarî mak tan korokesî.

Yusmumra rma tasî keyepuche.

Ero ke kîhtarî mak tîtkorokesî yusmuntache.

Yusmumra maxe amyamro.

Anarînhîrî mak nasî korokan me rma okwe awakrono kom ha,

kekn̂e Xesus Petru ya.

11 Cekanîn̂e ponaro cexirî ke tî ero wa kekn̂e,

Anarînhîrî nasî korokan me rma okwe,

kekn̂e.

Ero wa kekn̂e Xesus tînpanatanmekrî komo ya.

12 Ero yinhîrî tak tawrutarî namruyakn̂e hara Xesus,

n̂eremekn̂e tak hara.

On wara kekn̂e yîwya so,

Ahce wa awehtome so kîhtakorokacow so awya so?

13 Kpanatanmekn̂e,

mîîkexe opoko.

Apa,

mîîkexe marha owya.

Yaaro rma wa ero wa mîîkexe ero warai me oyexirî ke.

14 Noro yipu rma kîhtakorokacow so,

Apa,

kacho awya so,

kpanatanmekn̂e,

kacho marha awya so.

Ero ke ero wa xa marha ehcoko amyamro hara awakno komo poko,

yîhtarî komo marha korokacoko.

15 Ankukmarî komo me ero wa weexi apoko so.

Ero ke ero wa xa marha ehcoko amyamro hara etpoko hara.

16 Yaaro tan wîîkes awya so,

tantoman̂e komo yopono mera ro mak naxe antomaxapu komo.

Cen̂epen̂enhîrî komo yopono mera marha naxe yîn̂en̂epethîrî kom hara.

17 Sara wara na mentacow ero wa kacho owya?

Ero ke tawake xa maxe ero yipu yaw roro rma awexitaw so.

18 Ero warahra nasî anarînhîrî awakrono komo okwe.

Ero ke kir̂wan me maxe ahnoro,

kahra wasî.

Esewkukmara rma wasî onmen̂ekatho komo poko.

Anarme tko nasî anarînhîrî Kaan Karitan yaw roro rma cehtome.

On wara kesî Kaan Karitan,

Oyuru poi tuuru nokyasî,

noro rma oyar̂ma xe nas okwe,

kesî.

19 Oyekantopo rma tan wekatîmyas awya so.

Oroto rma ka wekatîmyasî oyekanpîra rma ka exitaw.

Ero wa wekatîmyasî on wara kachome awya so amn̂e opoko,

Ai ha,

Kristu rma Mîk xakn̂e ham,

kachome tak awya so opoko.

Ero wa mîîkexe amn̂e omtapotachonho yaw roro rma oyekanpuche tak ha,

kekn̂e Xesus.

20 On wara marha kekn̂e,

Yaaro xa tan wîîkes awya so,

mîk hakî cheka on̂en̂epetho me awexitaw so amn̂e amtapotarî komo n̂ewehcaxe anarî komo,

anwekîra.

Oponarono komo rma mîkyam amtapotarî yentan̂e komo.

Oyen̂epen̂enho ponarono me meero wa naxe noro yipu komo hara,

kekn̂e.

Ero wa kekn̂e Xesus tînpanatanmekrî komo ya.

21 Ero wa kache tak Xesus nahwokekn̂e.

On wara kekn̂e,

Yaaro tan wîîkes awya so,

awakrono komo rma oyekanîyasî amn̂e oyahsîpotome ooxatî pîn komo ya,

kekn̂e.

22 Ero wa kacho yentarî ke tak etwece tak n̂entîketken̂e yînpanatanmekrî komo.

Onoke ha?

onoke ha?

ketken̂e tîhnaw so.

23 Xesus yawxari xa xakn̂e anarî,

n̂examro yakrono rma.

Yiixe xa Xesus yehtopo tî mîk xakn̂e.

24 Noro ya tak kekn̂e Simaw Petru,

Onoke poko xa ero wa mîîke ha?

kasko ika yîwya,

kekn̂e.

Ehtura mak kekn̂e,

tamorî ke mak pokupoku kekn̂e.

25 Ero ke meyehra n̂he tak ero wa kekn̂e,

Xesus yawxarino.

Apa,

kekn̂e,

onoke poko ero wa mîîke ha?

kekn̂e.

26 On wara Xesus n̂eyukyakn̂e,

On tak wukpesî cuure,

yîwya tak wîmyasî,

noro xa mîk oyekanîn̂e,

kekn̂e Xesus yîwya.

Ero wa kache tak cuure nukpekn̂e.

Nîmyakn̂e tak Xutas Iskar̂otes ya,

Simaw mumuru ya ha.

27 Ero ke cuure nahsîyakn̂e Xutas.

Ero yinhîrî rma tak Satanas n̂ewomyakn̂e yîropotaka.

Ero yimaw tak Xutas ya tak kekn̂e hara Xesus,

Ahce na ponaro mai,

ero rma cirko yohno,

kekn̂e.

28 Ero wa kacho camkî n̂encetken̂e ceseresmaxmu komo.

29 On wara tî ketken̂e anarî komo,

Puranta yenîn̂e me exirî ke na nîîka yîwya.

Erewsî aponta Paskwa yimaw yiixe kehtopo komo,

nîîka na,

ketken̂e tî.

Yupurantamnî komo ya n̂he tîmta puranta,

nîîka kyam ha na,

ketken̂e tî anarî kom hara.

Ero wa ketken̂e,

Yohno rma kasko,

kacho poko.

Ero wa mak nîhtînoyatken̂e anarî komo.

30 Ero ke tuuru yahsîche rma tak n̂epatakekn̂e Xutas.

Kosope tak xakn̂e.

Ero wa xakn̂e.

31 Xutas toche on wara tak kekn̂e Xesus,

Oroto tak kir̂wanî ro me n̂esenpesî Tooto me Ewruxapu.

Ero wa Noro yesenporî ke Kaan marha kir̂wan me n̂esenpes hara.

32 Ero ke ero wa cesenporî ke ero warai me xa marha Tooto me Ewruxapu n̂enpes hara.

Yohno rma ero wa n̂enpes ha.

33 Okopuci komo,

yohno mak tan was ahyaw so.

Owtoche tak Ow mepor̂axe ha re.

Xutew komo ya wîîkai,

ero wa xa marha wîîkes awya so hara,

owtotopo pona mokuhra thakwa maxe okwe,

wîîkes awya so.

34 Ero ke anarî men poko tak kpanatanmekyaxe so.

On wara tak wîîkes awya so,

Etîxe ehcoko,

aaxe so wasî ero wa xa marha etîxe ehcoko amyamro hara.

35 Ero wa etîxatî me awexitaw so Xesusu npanatanmekrî komo xa mîkyam ham,

kexe tak apoko so miyan komo rma,

kekn̂e.

Ero wa kekn̂e Xesus tînpanatanmekrî komo ya.

36 Ero ke on wara kekn̂e Simaw Petru yîwya,

Ai Apa,

ahna wa mîîce okwe?

kekn̂e.

On wara Xesus n̂eyukyakn̂e,

Owtotopo pona ka mokuhra masî.

Amn̂e mak iina mîmokyasî,

kekn̂e.

37 Apa,

kekn̂e hara Petru yîwya,

ahce kacho oroto rma mokuhra wai okwe awakro?

Enko,

aaxatî ro mak ow ha.

Owaitopo meero wînîmyasî apînînke,

kekn̂e yîwya.

38 Ai ha,

kekn̂e Xesus yîwya,

Awaitopo ma re mînîya opînînke awya?

Yaaro xa tan wîîkes awya,

on wara mas amn̂e,

Noro yakrono pîn ow ha,

mîîkes opoko okwe.

Kohtîmra ka exitaw kapikara ero wa mîîkesî osorwaw ro okwe,

kekn̂e Xesus Petru ya.

Ero wa kekn̂e.