Taa,

Paskwa pahnoke tak xakn̂e,

6 kaamo rma ka xakn̂e.

Ero yimaw tak Xesus cekn̂e Betania pona xa hara.

Raasaru yewton mîn xakn̂e Xesus n̂enpakatho yewton.

2 Iito exitaw Xesus,

erewsî n̂iir̂atken̂e Maria komo.

Xesus tî nanîkyatken̂e eseresmachome akro so.

Mahta reha xakn̂e erewsî yetakan̂e me.

Raasaru reha n̂eremekn̂e Xesus yakro ceseresmachome.

3 Ero yimaw tak nahtu katî n̂ekyakn̂e Maria kotoporem okre.

Esmanî ro makî tî mîn xakn̂e,

cepethîkem xa.

Meia ritru wicakno mîn xakn̂e kat ha.

Ero yimaw tak tîn̂ekîthîrî Maria nukmamyakn̂e Xesus tarî pore.

Xoo pow,

kekn̂e tak,

miya ro mak kotowakn̂e okre mîîmo yaw.

Ero yinhîrî tak tîhpoci ke rma Xesus tarî n̂ickekn̂e.

Ero wa Xesus n̂iir̂akn̂e Maria.

4-5 Taa,

iito marha xakn̂e Xutas Iskar̂otes,

Simaw mumuru.

Xesus npanatanmekrî rma mîk xakn̂e,

ekanîn̂e me cehsom me tko xakn̂e okwe.

Ahce kacho hara,

kekn̂e tak noro,

cepethîkem mîn n̂eexi okwe,

300 tenariu yecenarîno okre.

Twarawantaxmu komo ya cma re tîmpore n̂eexi puranta pona.

Ero yipu yepetho tak tîmpore n̂ex hara yupurantamnî komo ya,

kekn̂e.

6 Kekn̂e ro kyam mak,

yupurantamnî komo xatî wara mak kekn̂e.

12 komo purantan yosom tî mîk xakn̂e.

N̂en̂epanakn̂e tî kica ero poko rma.

Ero wa cexirî ke mak wa ero wa kekn̂e Xutas kica.

7 N̂expe ha,

kekn̂e tak Xesus Xutas ya,

kir̂wan̂he rma nasî ero wa oritopo,

kekn̂e.

Roowo cheka oyahrutopo ponaro cexirî ke mak okapew ha.

8 Ahyaw so roro naxe yupurantamnî komo reha.

Owî reha wasî yohno mak ahyaw so,

kekn̂e Xesus yîwya.

Ero wa kekn̂e.

9 Taa,

ero yimaw takî tî Xesus yekaci n̂encetken̂e Xutew komo,

mer̂pono pîn ha tî.

Betan̂ia po tî nai Xesus,

kacho tî n̂encetken̂e.

Ero ke takî tî iina cetken̂e Xesus yenso.

Noro yenso makî tko tohra xatken̂e.

Raasaru yenî xe meero tî xatken̂e,

Xesus n̂enpakatho.

10 On wara tko tî xatken̂e Kaan ya tîmsom pokono yenîn̂e komo,

Raasaru waihkacho poko takî tî n̂esencetken̂e kica.

Xesus pen yakro rma kr̂a Raasaru pen tîtwaikacerî,

ketken̂e tî.

11 Noro yenpakarî ke tî Xesus pona n̂etowyatken̂e Xutew komo mer̂pono pîn.

Noro pona takî tî n̂een̂atken̂e.

Ero ke tî Raasaru pen meero waihka xe xatken̂e.

Ero wa tî xatken̂e okwe.

12 Taa,

ero yenmarî po tak Xesus yekaci tî n̂encetken̂e ahwotaxi mohxapu komo mer̂pono pîn.

Oona tî mokya Xerusaren pona,

kacho tî n̂encetken̂e.

13 Ero ke kuum yarî warai tak nîhkocetken̂e.

Ero yipu ke cemyarke tak cetken̂e Xesus yakro eseposo.

Enîche tak Noro yakro n̂etîrametken̂e hara ewto pona hara.

On wara ketken̂e tîcetaw so,

Osana,

Kir̂wanî ro xa Moso,

Kporin komo yanme mohxapu ha.

Ixaw Yana kayaritomon Moso ha,

ketken̂e kar̂pe ro mak.

14-15 Ero yimaw tak buhu xîkrî n̂een̂akn̂e Xesus.

Noro mkahsî tak n̂etakriyakn̂e,

pom krîkî.

Ero wa ehtopo poko rma kesî Kaan Karitan,

Erasîra tak ehcoko Siaw pono komo.

Mîkro ha akayaritomon kom ha,

buhu xîkrî mkaw mokyasî,

kesî.

16 Camkî ka ero wa kacho n̂encetken̂e yînpanatanmekrî komo.

Amn̂e n̂he mak,

Xesus poko xa wa nîîke ham,

ketken̂e,

kir̂wanî ro me Noro yesenpoche.

Ero wa kacho yaw roro rma tak Noro xakn̂e ham,

ketken̂e tak ero yimaw.

Ero wa ketken̂e yînpanatanmekrî komo.

17 On wara tî xatken̂e anarî komo,

pahxa n̂he tî ka Xesusu yakro xatken̂e Raasaru yahrutoponho mîtwo.

Nan̂ikyakn̂e Xesus epatakachome,

n̂enpakekn̂e marha,

ero yimaw tî iito xatken̂e.

Ero ke takî tî tîn̂enîthîrî komo n̂ekatîmyatken̂e.

18 Ero ke tî n̂eserepoketken̂e ero yipu yentan̂e komo.

Noro xa ham cirihnî ciin̂e,

ketken̂e tî Xesus poko.

Ero ke n̂examro meero tî cetken̂e Noro yakro eseposo.

N̂epamtîketken̂e tak Xesus yenso toxapu komo.

19 Ero wa epamrî ke so tak Parisew komo n̂eserepoketken̂e.

Pîra ham kica,

ketken̂e tî.

Noro yîtîtmamnopîra ro mak tat ham ke kica.

Wenari xa matko cetîkexe tooto komo ahnoro rma.

Enko xe kica,

ketken̂e tî.

Ero wa tî ketken̂e Parisew komo.

20 Taa,

etahworeso mohxapu komo chew rma xatken̂e anarî kom hara,

Kreku kom ha.

Xutew komo yahwotacho pona rma tî n̂examro mokyatken̂e.

Kaan poko ahwota xe tî xatken̂e n̂examro meero.

21 N̂examro takî tî cetken̂e Piripe yaka.

Becsaita pono mîk xakn̂e Piripe,

Karireia pono rma.

Noro yaka tî cetken̂e.

N̂oon̂o,

ketken̂e tî yîwya,

Xesus yenî xe cma re nas amna,

ketken̂e tî.

22 Ero ke takî tî Antre yaka cekn̂e hara Piripe.

On wara tî kekn̂e yîwya,

Xesus yenî xe tî natu Kreku komo,

kekn̂e.

Ero ke noro takî n̂ekatîmyakn̂e Xesus ya hara.

23 On wara makî tko n̂eyukyakn̂e Xesus,

Kir̂wanî ro me tak n̂esenpesî Tooto me Ewruxapu.

Ero wa esenpotopo me tak nasî oroto,

kekn̂e.

24 On wara marha kekn̂e,

Yaaro tan wîîkes awya so,

on wara nasî puruma yatho,

roowo cheka eyamnî me exitaw,

waipîra nasî,

ero ke epamra nas okwe.

Roowo cheka eyamxapu reha waihyasî.

Ero ke n̂epamyasî tak okre mer̂pora cehso ro.

25 On wara na natu anarî komo,

tan ka cexitaw so roowo po yiixe xa cehtopo komo yîpînînkara natu.

Ero wa cexitaw so n̂ehcamnoyasî rma thakwa amn̂e.

Yîpînînketaw reha yîwya so yîhyaw so rma nasî yiixe ehtopo kom okre.

Waipînî ro me marha tak maxe miya roro.

26 On wara wîîkes awya so oyanton me cehsom komo poko,

owenari roro tmohsom me cexpore nasî.

On wara tak naxe noro yipu komo,

Ahto so na oyexitaw iito marha naxe n̂examro hara,

oyanton kom ha.

Kir̂wan xa moso okre,

kesî tak Apapa amn̂e apoko so hara,

kekn̂e Xesus yîwya so.

Ero wa kekn̂e Piripe komo ya.

27 Ero yinhîrî takî tî Tîîm yakro nîmtapowakn̂e hara Xesus.

On wara kekn̂e,

Kahwokesî xa tak okwe Apa.

Ahce wa xa na wîîke awya okwe?

Waipîra Ow cirko Apa,

ka xe cma re wasî on yimawno poko.

Ero wa kahra tko wasî.

On yimaw waihso rma kmokye oona roowo pona.

28 On wara xa tko wîîkes awya Apa,

kir̂wanî ro me awehtopo enpoko miyan komo ya rma,

kekn̂e Xesus yîwya.

Ero wa kache rma tak kah yawno mtapotarî n̂esencekn̂e hara.

On wara kekn̂e,

Kir̂wanî ro me oyehtopo rma wenpekn̂e pahxa rma.

Amn̂e tak ero warai me rma kesenpesî xa hara,

kekn̂e.

29 Ero yipu yentache iitono komo ya,

Tarai kesî kopi,

ketken̂e anarî komo.

Ancu xa tko na nîmtapota Moso yakro,

ketken̂e anarî kom hara.

30 On wara kekn̂e Xesus,

On̂entarî me mak yîmtapotara n̂eexi kah yawno.

An̂entarî komo me xa nîmtapota,

kekn̂e yîwya so.

31 Oroto tak roowo pono pen komo yen̂ekacho me nasî.

Roowo pono komo kayaritomon pen marha tak Kaan nar̂mesî.

32 On wara tak was Ow hara,

roowo poi tak oyanîmyaxe tooto komo amn̂e.

Ero wa oyetanîmrî ke tak ohyaka tmoku xatî me tak wiir̂asî ahnoro tooto komo.

33 Ero wa nasî owaitopo amn̂e,

kacho rma tî mîn n̂eexi,

Oyanîmyaxe,

kacho.

Ero wa twaihtopo n̂ekatimyakn̂e Xesus .

34 Taa,

ero yinhîrî on wara tak ketken̂e iitono komo Xesus ya,

On wara kacho mexe amna n̂encesî,

Waipînî ro Mîkî Kristu,

kacho.

Kpanatanmetopo komo rma ero wa kesî.

Ero ke ahce kacho ero wa mîîke hara kopi,

Tooto me Ewruxapu nanîmyaxe amn̂e,

mîîkesî.

Onoke poko mîîke hara,

Tooto me Ewruxapu,

kacho ha?

ketken̂e yîwya.

35 On wara Xesus n̂eyukyakn̂e,

Katpape rma ka nas awesamarî komo yohno mak ha tko.

Ero ke esama yaw n̂he etocoko awarpantara ka awehtome so.

Kosope awetar̂ataw so tak awesamarî komo yenîhra thakwa maxe okwe.

36 Katpape rma ka exitaw awesamarî komo akatparen̂e komo pona encoko.

Ero wa awexitaw so katpanawno ro me tak maxe okre,

kekn̂e.

Ero wa kekn̂e Xesus tîhyaka mohxapu komo ya.

Ero wa kache n̂esen̂epanmekyakn̂e makî tak.

Ero wa xakn̂e.

37 On wara xatken̂e n̂examro okwe kah yaino me cehtopo rma n̂enpekn̂e Xesus yîwya so.

Wero ro so rma re cirihnî n̂iir̂akn̂e emapona.

Wara rma Noro pona enîhra xatken̂e okwe.

38 Ero wa xatken̂e Isaias penî mtapotachonho yaw roro rma cehtome so.

Kweronoman̂enhîrî mîk xakn̂e Isaias pen.

On wara kekn̂e noro,

Apa,

amtapotarî rma re amna n̂ekatîmyasî n̂examro ya.

Entan̂e pîn wara mak naxe okwe.

Amoro meero wa menpesî roro kar̂pe awehtopo yîwya so.

Awanwekn̂e me mak naxe Apa okwe,

kekn̂e noro.

39-40 On wara marha kekn̂e noro yipu komo poko xa hara,

Ewuhnî me mak n̂examro n̂iir̂akn̂e Kaan okwe.

Yîropotarî komo marha ceipuru wara n̂iir̂akn̂e okwe.

Ero ke ewuhnî wara rma thakwa naxe cewkemu rma ha re.

Camkîno wara ro mak naxe.

Kaan wece tak ketaknamesî oropotaw,

kan̂e pîn me ro mak naxe okwe.

Ero ke akir̂wamara nasî Kaan,

kekn̂e.

Ero wa kachonho yaw roro cexirî ke so Xesus pona enîhra naxe okwe.

41 Ero wa tî kekn̂e Isaias pen kir̂wanî ro me Xesus yeen̂ataw.

Noro poko rma nîmtapowakn̂e ero yimaw.

42 Anarî komo rma tko n̂een̂atken̂e Xesus pona,

Xutew yantoman̂e komo rma.

Esekatîmra tko xatken̂e cerahtîmrî ke so Parisew komo pona okwe.

On wara ketken̂e,

Xesus yakrono ow ha,

ketaw owya,

kesenmetopo yaka mokuhra tak esko,

kexe men owya,

ketken̂e tî.

Ero ke tîtken̂e mak xatken̂e Noro poko okwe.

43 Tpoxwe xa n̂encetken̂e tooto mtapotarî,

Kir̂wan̂he masî,

kacho ha.

Kaanî mtapotarî ponarora n̂he xatken̂e,

Kir̂wan̂he masî,

kacho ponarora.

Ero ke esekatîmra xatken̂e.

Ero wa xatken̂e.

44-45 Ero yimaw tak Xesus nîmtapowakn̂e xa hara iitono komo yakro.

Kar̂pe ro mak kekn̂e on wara,

Opona een̂ataw awya so opona mak enîhra rma maxe ha.

Oyen̂epen̂enho pona meero meen̂axe.

Ero wa xa marha wîîkesî oyentopo poko hara,

oyenîn̂e me awexitaw so oyen̂epen̂enho yenîn̂e me rma maxe hara.

46 Akatparen̂e me kmokyakn̂e oona roowo pona.

Ero ke opona een̂ataw awya so awarpanawno mera tak maxe ha.

47 En̂ekano riso mokuhra wîxakn̂e oona roowo pona.

Akir̂wamano riso xa matko kmokyakn̂e.

Ero ke omtapotarî yanwekn̂e komo yen̂ekara rma was Owî.

48 Nasî rma tko noro yipu komo yen̂ekan̂e.

Amn̂e eromanhîrî po omtapotacho rma tak en̂ekan̂e me nasî.

Ero yimaw,

Kicicitho mîk ha,

kacho me tak naxe okwe oyahsîn̂e pîn komo,

omtapotarî yewetîn̂e pîn komo marha.

49 Oyanme ro mak yîmtapotan Ow ha.

Tîmtapotarî yekatîmn̂e me mak oyen̂epekn̂e Apapa.

On wara kasko yîwya so,

kekn̂e owya.

50 Waipînî ro me awin̂e komo me wîhtînoyasî Noro mtapotarî,

an̂ewetîrî kom ha.

Ero ke on wara kasko yîwya so,

kachonho mak wekatîmyas awya so,

kekn̂e.

Ero wa kekn̂e Xesus iina mohxapu komo ya.