Taa,

ero yinhîrî tak Betania pono takî tî namotoyakn̂e.

Raasaru tî mîk xakn̂e noro yosotî.

Epeka komo marha tî xatken̂e iito,

Maria,

noro yakno hara Mahta.

2 Kotoporem ke Kporin komo kapen̂enho tî mîk xakn̂e Maria,

tîhpoci ke yîhtarî n̂ickekn̂e,

noro rma.

Noro yepeka tî mîk xakn̂e okoh me,

Raasaru.

3 Ero ke takî tî ekatîmn̂e n̂en̂epetken̂e epeka komo Xesus yaka.

Apa,

yiixe awehtopo namotoyasî okwe,

kan̂e tî.

4 Yîmtapotarî yentache tak on wara kekn̂e Xesus,

Waihtopo pînî rma mîn okoh me ehtopo.

Kaan poko aweserepokacho me so mak ero wa nasî okoh me.

Karitî ro xa Mîk ham Noro mumuru okre,

kachome awya so ero wa nasî.

5-6 Yiixe Xesus yehtopo komo tî mîkyam xatken̂e,

Mahta,

akno marha,

Raasaru marha.

Yohno rma tko tohra xakn̂e Raasaru yamototopo yentache.

Iito rma ka n̂enmayakn̂e asakî ro rma ka.

7 Ero yinhîrî tak on wara kekn̂e Xesus tînpanatanmekrî komo ya.

Kaikatko tak hara Xuteia pona hara,

kekn̂e.

8 On wara tko tî ketken̂e hara n̂examro Xesus ya.

Ahce kacho iina awto xe mai hara Apa?

Kokon̂oro mak toh ke awaika xe xatken̂e iitono komo Xutew kom ha,

ketken̂e.

9 On wara kekn̂e Xesus yîwya so hara,

pahkî n̂he nas ha re katpan 12 oora rma.

Katpanaw ketar̂ataw reha ehrokara reha tasî kaamo ke katpape exirî ke kesamarî.

10 Kosope ketar̂ataw reha cehrokesî tak oko katparen̂e exihtorî ke thakwa,

kekn̂e yîwya so.

11 Ero wa kache on wara tak kekn̂e hara Xesus yîwya so,

Nîwînîkyasî kakno komo Raasaru.

Ero ke enpakaxi tak kîwces ha,

kekn̂e.

12 Apa,

kekn̂e hara yînpantanmekrî komo,

kir̂wan̂he nasî yîwînîkyataw.

Wara n̂he tak nasî tpakache hara,

kekn̂e n̂examro.

13 Waihtopo poko rma tko tî kekn̂e Xesus,

Nîwînîkyasî,

kacho.

Camkî thakwa n̂encetken̂e,

kîwîntopo poko ketawno wara mak.

14 Ero ke kir̂wantawno me xa tak kekn̂e Xesus yîwya so.

Waihye thakwa ha Raasaru,

kekn̂e tak ha.

15 Yaaro tohra wehxe yîhyaka.

Awanme so mak ero wa wehxe opona entome xa tak awya so.

Kaikatko tak ha yîhyaka,

kekn̂e Xesus yîwya so.

16 Ero yinhîrî tak on wara kekn̂e Tome takrono komo ya,

Kaikatko rma kr̂a akro kwaihtome so,

kekn̂e.

Xesusu npanatanmekrî marha mîk xakn̂e Tome.

Asakno kacho mîk xakn̂e noro.

Ero wa kekn̂e.

17 Ero yinhîrî tak iina cekn̂e Xesus.

Iitono komo mtapotarî n̂encekn̂e,

4 kaamo tak nasî Raasaru pen okopu yahrutopo yaw okwe,

kacho.

18 On wara xakn̂e Betania Xerusaren mîtwo rma xakn̂e.

Meyehra xakn̂e 3 kilometru moxenon makî tî.

19 Ero ke tî Xutew komo cetken̂e Maria komo yaka,

Mahta komo yaka ha.

Ahworen̂e me tî cetken̂e epeka waihîrî ke.

Mer̂pono pîn tî mîkyam xatken̂e.

Ero wa tî cetken̂e Betania pona.

20 Iito exitaw so tî,

on wara kacho n̂encekn̂e Mahta,

mînto nasî Xesus,

xiya tak mokyasî,

kacho tî n̂encekn̂e.

Ero ke yohno takî tî cekn̂e Noro yakro takî tî n̂esepor̂akn̂e.

Iito rma tî ka xakn̂e Maria mîîmo yaw rma ka.

21 Xesus yenîche tak on wara kekn̂e Mahta yîwya,

Apa,

tan awexitaw ketaw ha re,

waipîra re n̂eexirî oyepeka.

22 On wara tko wîîkesî,

ahce na poko amtapowataw Kaan yakro yiixe awehtopo rma nîmyas awya,

kekn̂e.

23 Pakesî rma amn̂e awepeka,

kekn̂e tak Xesus yîwya.

24 Nhnk,

kekn̂e Mahta yîwya,

Enpakano ritopo po pakes amn̂e eromanhîrî kaamo po,

wîîkesî rma,

kekn̂e.

25 On wara kekn̂e hara Xesus yîwya,

Awenpakacho komo rma Ow ha.

Karitî me roro awehtopo komo Ow ha.

Ero ke opona een̂ataw awya so waipîn me tak maxe.

Awaipuche so rma amn̂e,

waipîn me rma maxe.

26 Awaipîrarî rma ka opona eenataw awya so waipînî ro me kiir̂axe so miya roro.

Ero warai me na Ow mîhtînoya,

waipîn me awin̂e komo me ha?

kekn̂e Xesus yîwya.

27 Ero warai me rma kîhtînoyas Apa,

kekn̂e Mahta yîwya.

Kristu xa Mîk ham Kaan Mumuru xa tak ha,

wîîkes apoko.

Roowo pona mokyasî amn̂e,

kachonho rma Mîk ham,

wîîkesî marha apoko,

kekn̂e yîwya.

Ero wa kekn̂e Mahta Xesus ya.

28 Taa,

ero wa kache takî tî takno yan̂ihso cekn̂e hara,

Maria yan̂ihso ha.

Ai,

kekn̂e tî yîwya,

moko tak ha kpanatanmekn̂e.

Etoko tî yîhyaka,

kekn̂e tî yîwya.

Anarî komo n̂entarî mera makî tî kekn̂e.

29 Ero wa kacho yentache takî tî yohno rma tî nawomyakn̂e Maria.

Xesus yaka takî tî cekn̂e.

30 Iito rma ka xakn̂e Xesus,

Mahta yakro cesepotoponhîrî to rma.

Ewto pona xa ka epatakara rma xakn̂e.

31 Xutew komo rma tî ka xatken̂e mîîmo yaw rma,

Maria komo yahworen̂e me mohxapu komo.

Maria torî yenîche tak tî on wara ketken̂e,

Ahna totohme kyam yohno nawom hara?

Cepeka pen yocho yepona yîwrataxi cee ham,

ketken̂e tî.

Ero ke takî tî wenari cetken̂e.

32 On wara takî tî xakn̂e Maria Xesus yenîche,

tosokmuru po n̂eremekn̂e Noro yamrinaka.

Apa,

kekn̂e tak yîwya,

tan awexitaw ketaw ha re oyepekanho waipîra re n̂eexirî,

kekn̂e Xesus ya.

33 Nîwracekn̂e thakwa Maria,

wenari mohxapu komo marha nîwracetken̂e,

Xutew kom ha.

Yîwratarî komo yenîche,

n̂eserepokekn̂e ro makî tî Xesus.

Okwe,

kaye ro makî tî Noro tîropotaw.

34 Ahna wa mahruce ha?

kekn̂e tak yîwya so.

Amok ha ka Apa,

enso,

ketken̂e yîwya.

35 Ero yimaw Noro marha tak nîwracekn̂e,

Xesus ha.

36 Enko ka,

ketken̂e tak Xutew komo,

yîpînîn yaw xa nai ham,

ketken̂e.

37 On wara ketken̂e anarî komo,

Ewuhnî komo yewtanîren̂enho cma re Moso.

Ahce kacho moxam yepekanho akir̂wamara xakn̂e hara waipîra ehtome?

ketken̂e.

Ero wa ketken̂e.

38 Ero ke tak okopu yahrutoponho yepona tak cekn̂e Xesus.

Tîcetaw rma tak,

Okwe,

kekn̂e xa hara tî tîropotaw.

Îîpî yexenaka ahtoxapu tî mîn xakn̂e okkopu yahrutopo.

Potarî tî tahruso xakn̂e toh ke.

39 Iina cepatakache on wara Xesus kekn̂e yîwya so,

Yarî ka ahruthîrî yîhmamacoko ha,

kekn̂e.

On wara tko kekn̂e Mahta,

waixa pen yepekanho ha,

koowa xa thakwa noro kica.

4 kaamo thakwa tan n̂enmapu waihtoponhîrî,

kekn̂e yîwya.

40 On wara kekn̂e Xesus yîwya,

Ahce wa tko wîîka awya?

Opona een̂ataw awya kir̂wan̂he xa Kaan yehtopo tak meen̂asî,

wîîka hara re awya,

kekn̂e Xesus yîwya.

41 Ero yinhîrî tak ahruthîrî nîhmametken̂e ewtarî potawnonho.

Ero yimaw kahsî tak n̂een̂akn̂e Xesus.

Kaan yakro tak nîmtapowakn̂e.

On wara kekn̂e,

Apa,

kir̂wan̂he xa mai ham,

wîîkes awya omtapotarî yentarî ke awya.

42 Mencesî roro rma tko omtapotarî.

Moxam n̂entarî me mak tan wîîkes awya,

Kaan n̂en̂epetho xa Moso ham,

kachome mak yîwya so opoko,

kekn̂e Xesus Kaan ya.

43 Ero wa kache kar̂pe ro mak on wara kekn̂e Raasaru ya rma hara,

Raasaru,

epatakak ha xiya,

kekn̂e yîwya.

44 Ero wa kache n̂epatakekn̂e tak waixapunhîrî rma.

Tkaramxe rma thakwa xakn̂e poono ke,

tahrutoponhîrî ke rma.

Amorî pen tkaramxe xakn̂e,

yîhtarî pen marha.

Cewkaramxe marha xakn̂e poono ke hara.

Ero wa n̂epatakekn̂e tkarmxe rma.

Ero ke on wara tak Xesus kekn̂e iitono komo ya,

Karamhokacoko tak ha totohme thakwa,

kekn̂e.

45 Ero yimaw tak Xesus pona n̂een̂atken̂e Xutew komo mer̂pono pîn komo,

Maria yaka mohxapunhîrî kom ha.

Xesus ya waihxapu yenpakachonho yenîrî ke tî ero wa xatken̂e.

46 Anarî komo tko tî cetken̂e Raasaru pen yenpakachonho yekatîmso Parisew komo ya.

47 Ero ke takî tî tîmsom pokono yenîn̂e komo nan̂ikyatken̂e Parisew komo cesentachome so akro so.

On wara takî tî ketken̂e,

Ahce wa tatu Noro poko?

Emapona roro cirihnî n̂iir̂asî kica.

48 Ero wara rma kyam kape ha,

ketaw kîwya so Noro pona mak men n̂een̂atu okwe miyan komo rma.

Ero wa exitaw so Homa pono komo tak men mokyatu kopi kewtonthîrî komo yar̂maxi.

Anarî komo makîrha tak men n̂iir̂atu kayaritomo me kekenhîrî yakan me,

ketken̂e tî.

49 Ero yinhîrî tak n̂examro yakrono takî tî nîmtapowakn̂e hara.

Kaipasî tî mîk xakn̂e noro yosotî.

Kaan yaka cewomsom tî mîk xakn̂e ero cimn̂ipu po.

On wara tî kekn̂e noro yîwya so,

Camkîno mak amyamro ke kica.

50 Cewn̂e mak twaihkapore nasî waipîra kehtome so Ixaw komo ahnoro,

kahra ma matu ke,

kekn̂e tî yîwya so.

51 Tanme ro mak ero wa kahra xakn̂e.

Ero wa kekn̂e Kaan yaka cewomsom me cexirî ke ero cimn̂ipu po.

Ero ke Kaanî mtapotarî rma n̂ekatîmyakn̂e on wara kacho,

Xesus tak waihyas amn̂e kir̂wan̂he Ixaw komo ciin̂e me.

52 Miya so cetakpaxi naxe Kaan xîkrî komo.

N̂examro meero wa kir̂wan̂he n̂iir̂asî twaihîrî ke.

Iina re tak n̂enmekyasî,

cewn̂an me tak n̂iir̂asî,

kacho.

Ero wa kacho n̂ekatîmyakn̂e Kaipasî.

53 Ero yinhîrî Xesus waihkacho poko takî tî n̂esencetken̂e roro okwe.

Ero wa tî xatken̂e Parisew kom okwe.

54 Ero ke Xutew komo chere ro tak etarira xakn̂e Xesus.

Eprain pona takî tî cekn̂e.

Ewtoci mîn Eprain axawa imo yemyatwono.

Iito mak tak xakn̂e tînpanatanmekrî komo yakro mak ha.

55 Ero yinhîrî Xutew komo yahwotacho pahnoke tak xakn̂e hara,

paskwa yimawno ha.

Ero ke tak Xerusaren pona cetken̂e Xutew komo mer̂pono pîn komo,

ewtoci pono komo meero.

Etakir̂wamaxi tî ka cetken̂e Paskwa me enmapîra rma ka exitaw.

Ero wa tî cetken̂e Xutew komo Xerusaren pona.

56 Iito exitaw so takî tî Xesus n̂epor̂atken̂e hara.

Kaan mîn yaw cexitaw so rma n̂esencetken̂e,

Ahto nai Noro?

ketken̂e.

Ahce wa katî nai awya?

Mokuhra katî nai oona eseresmaxi kakro so?

ketken̂e tî.

Ero wa tî ketken̂e Xerusaren pona toxapu komo.

57 On wara marha tî ketken̂e tîmsom pokono yenîn̂e komo,

Parisew komo yakro rma,

Xesus yenîche na awya so ekatîmtamcoko men amna ya Noro yahsîtome tak amna ya,

ketken̂e tî.

Ero wa tî Xesus yahsîtopo ponaro xatken̂e.