Taa,

ero yinhîrî on wara kekn̂e hara Xesus,

Yaaro tan wîîkes awya so,

oper̂a mîn yaka anarî komo n̂ewomyaxe anan̂i xa mak,

metata yarohra.

Mehxa mak kainaxe waaca pore mak.

Cen̂epan̂em mak mîkyam ero wa cewomsom komo reha,

kohkan̂e kom ha okwe.

2 Anarî n̂ewomyasî metata yaro.

Noro reha Mîk oper̂a yosom xa tak ha.

3 Noro yaka tak nahrunkesî potarî yenîn̂e,

ewomtome tak ha.

Ero ke n̂ewomyasî.

Osotî poko so cik tooku n̂etahcasî.

Tosomu mtapotarî n̂encexe oper̂a komo,

Oyosomu rma Mîkî,

kan̂e wara cik naxe.

Ero ke tak nan̂ikyasî osom.

Cuh ken̂arî pona tak naar̂asî.

4 Ero wa aar̂ataw poturme tak cesî Noro,

osom ha.

Noro wenari cik tak cexe oper̂a komo tosomu me entarî ke.

5 Anarî ro wenari tohra ro mak naxe oper̂a,

tosom pîn wenari.

N̂eraswaxe thakwa mak tosom mera entarî ke.

Ero ke n̂emahciyaxe mak.

6 Ero wa kekn̂e Xesus,

anarî pokono wara mak n̂ekatîmyakn̂e.

Camkî tko tî yîmmtapotarî n̂encetken̂e iitono komo.

Ahce warai ya wa nîîke kopi,

ketken̂e mak.

Ero wa ketken̂e.

7 Taa,

ero yipu poko kekn̂e xa hara Xesus yîwya so.

Yaaro tan wîîkes awya so,

oper̂a wacan metatan Ow ha.

8 Anarî komo rma re mokyatken̂e pahxa omokunaw ka.

Cen̂epan̂em komo mîkyam xatken̂e,

oper̂a pen yaan̂e komo mak okwe.

Ero ke yîmtapotarî yentara mak xatken̂e oper̂a komo.

9 Metata Ow ha.

Ero yaro awewomyataw so waaca yawno wara rma tak maxe tukurui tak ha.

Ero yinhîrî oper̂a wa xa marha mepatakexe anahrî komo wece.

Kir̂wan meen̂axe roro anahrî komo warai.

Amn̂e tak mewomyaxe waaca yaka hara.

Ero wara roro tak maxe okre.

10 Owarahra reha nasî cen̂epan̂emu reha.

En̂epanîmso makî reha wa mokyasî kica cen̂epan̂em.

Oper̂a yetapaxi marha wa mokyasî,

waihkaxi mak okwe.

Ero wa ciino riso mokyasî cen̂epan̂emu reha.

Owî reha kmokyakn̂e oyoh komo karihton̂e me.

Miya xe xa tak karitî me n̂examro wiir̂asî.

11 Kir̂wanî reha Ow oper̂a yosom.

Ero ke ketwaikapesî oyoh komo pînîn ke.

12 Anarimaw oper̂a yenîn̂e me nasî anarî mak,

osom pîn mak ha.

Epethîrî pona mak n̂etapickesî enîrî poko.

Anarî komo yoku yenîn̂e me mak nasî tok pîn yenîn̂e me mak.

Ero ke kamara mokuche oper̂a yeskan̂e,

n̂emahciyasî mak.

Oper̂a pen thakwa nînomyasî okwe kamara yotî me.

Ero ke tak kamara n̂eskesî,

anarî pen komo tak nakpayasî miya so thakwa.

13 Ero yimaw n̂emahciyasî mak epethîrî pona enîn̂e,

opera pen nînomyasî.

Yîpînîmra mak n̂een̂asî okwe epethîrî pona enîrî ke mak.

14 Kir̂wanî reha Ow oper̂a yosom.

Oyoku poko esewkukmara wasî.

Opoko marha esewkukmara naxe oyoh kom hara.

15 Omumuru Mîk ha,

kesî Apapa opoko.

Apapa Mîk ha,

wîîkesî Noro poko hara.

On wara marha wasî,

ketwaikapesî marha oyoh komo pînîn ke.

16 Naxe hara anarî komo oyoh komo,

apoyino pîn komo tak ha.

On̂ekrî komo marha mîkyam n̂examro hara omtapotarî yentan̂e me ehtome so hara.

Ero yimaw tak oyok me naxe n̂examro hara awara so marha.

Noro re me tak maxe.

Cewn̂e mak tak nasî awosom komo.

17 On wara nasî Apapa opoko,

ooxe xa nasî.

Ketwaikapes amn̂e okwe.

Oyanme ro rma ketwaikapesî.

Oyanme ro marha tpakaxmu me was hara.

Ero wa oyexirî ke ooxe xa nasî Apapa.

18 Tanme ro so mak owaikara naxe tooto komo.

Ow xa matko ketwaikapesî yîwya so.

Ero wara wasî Apapa mtapotarî yanme rma.

Awanme ro mak awaiko.

Awanme ro marha tak apakak hara,

kekn̂e Noro owya.

Ero ke ketwaikapesî yîwya so,

kekn̂e Xesus iitono komo ya.

Ero wa kekn̂e.

19 Taa,

ero wa kacho yentache Xutew komo takî tî n̂eseseyukyatken̂e Xesus mtapotarî poko,

iito re kahra xatken̂e.

20 Worokyam xa nai yîropotaw,

ketken̂e anarî komo,.

Nîmtawaimamtîkesî mak kica.

Ero ke ahce kacho Noro yipu mencet hara kica?

ketken̂e.

21 Pîra tko na owya,

ketken̂e anarî kom hara.

Ero wa so yîmtapotara mexe nasî worokyam ken̂arî.

Worokyam ma re kewtanîre awya so,

ketken̂e anarî kom hara.

Ero wa tî ketken̂e.

22 Ero yimaw Xutew komo tak nahwowatken̂e xa hara Xerusaren po.

Kaan mîn yakir̂wamachonho yimawno tî mîn xakn̂e ahwotacho kom ha.

Twotme xakn̂e ero yimaw.

23 Iito rma xakn̂e Xesus Kaan mîn mahrimacho yaw mak ha,

wacamnî yaw mak.

Saromaw mîn,

kacho mîn xakn̂e mahrimacho ha.

Ero yaw mak n̂etar̂akn̂e Xesus.

24 Iina tak n̂esenmekyatken̂e Xutew komo yîhyaka.

On wara ketken̂e yîwya,

Ahcemaw mesekatîmya xa tak amna ya kir̂wantaw xa tak?

Amna mak mewkukmesî kica.

Kristu na Mîkro,

kesî mak amna apoko,

ero ke Kristu xa Ow ha,

kasko tak kir̂wantaw xa,

ketken̂e yîwya.

25 On wara n̂eyukyakn̂e Xesus,

Kesekatîmyakn̂e hara re an̂entarî komo me,

Ow mak manwekyatken̂e okwe.

Cirihnî wiir̂asî roro Apapa yanme.

Ero yipu ciitopo rma thakwa nasî oyekatîmn̂e me.

26 Opona enîhra rma maxe okwe amyamro oyok pîn me awexirî ke so thakwa.

Ero wara rma wîîka awya so.

27 On wara naxe oyoh komo oper̂a,

omtapotarî n̂encexe esewkukmara.

Esewkukmara marha wasî n̂examro poko.

Ero ke owenari roro mokyaxe.

28 Waipînî ro me n̂examro wiir̂asî miya roro.

Ero ke ehcamnopîn me ro mak naxe.

Oyemyaw xa naxe n̂examro,

ero ke anarî komo ya etowpon me ro mak naxe.

Ero wa naxe oyoh komo.

29 Kyopono ro xa Mîk Apapa oyokman̂enho ha.

Ero ke Noro yemyai town̂e exihra ro mak nasî.

30 Cewn̂an mak amna Apapa yakro,

ero wa nas amna,

kekn̂e Xesus yîwya so.

Ero wa kekn̂e.

31 Ero wa kacho yentache tak toopu tak namekyatken̂e hara Xutew komo,

Xesus yetapacho ha tî re tîwya so.

32 Ero ke on wara kekn̂e Xesus yîwya so,

Emapona cirihnî wiir̂akn̂e awero ro so.

Apapa yanme ero yipu wiir̂akn̂e kir̂wan̂he mak.

Ahce warai poyero katî oyetapa xe tak mat hara ke?

kekn̂e yîwya so.

33 Pîra,

ketken̂e Xutew komo Xesusu mtaka,

kir̂wan̂he ciino rirî poyero awetapara nas amna.

Kicicitho me amtapotarî ke xa matko awetapa xe nas amna.

Kaanî rma Ow ha,

mîîkesî kica,

toototho rma.

Ero ke wa awetapa xe nas amna,

ketken̂e.

34 On wara tko n̂eyukyakn̂e Xesus,

On wara kacho nasî tmewreso apanatanmetopo komo rma,

Kaan warai me rma maxe ha,

wîîkekn̂e awya so,

kacho re nasî tmewreso.

35 Ero wa Ixaw Yana komo n̂etahcakn̂e Kaan,

tîkaritan yentan̂enho kom ha,

kesî Kaan Karitanî rma.

Yaarono xa mîn Kaan Karitan,

yaarono pîn ciki tan,

kacho mera ro mak nasî.

36 Ero ke ahce kacho Ow mîwîrîyaket hara,

Kicicme ro mak mîmtapowasî kica,

mîîkexe opoko,

Kaan mumuru Ow ha,

karî ke owya.

Takrono ro me xa oriyakn̂e Apapa pahxa rma.

Ero yinhîrî oona oyen̂epekn̂e roowo pona.

Ero ke ahce kacho ero wa mîîket opoko?

37 Apapa yanme cirihnî cirihra oyexitaw Opona enîhra rma ehcoko,

38 Anarimaw Owî rma na manwekyatu Apapa yanme ciino rin̂e rma.

Wara rma on̂iritho poko eserepokacoko.

Ero wara ehcoko Apapa yakro cewn̂an me amna yîhtînotome awya so,

kekn̂e hara Xesus yîwya so.

39 Ero wa kacho yentache takî tî Xesus yahsî xe xatken̂e xa hara Xutew komo.

Ahsîra rma tko xatken̂e.

Cekn̂e mak yîhai so,

etahsîpora rma xakn̂e.

Ero wa xakn̂e Xesus.

40 Ero yinhîrî tak Xesus cekn̂e Xotaw yeco pona hara.

Yihcirî me emicinono n̂iir̂akn̂e Xuaw,

iina.

Iito rma n̂enmayakn̂e.

41 Iina tak mokyatken̂e yîhyaka mer̂pono pîn komo.

On wara ketken̂e n̂examro,

Cirihnî cirihra rma re xakn̂e Xuaw.

Yaaro rma tko kekn̂e ham Moso poko,

ketken̂e Xesus yaka mohxapu komo.

42 Ero ke Noro pona tak n̂een̂atken̂e mer̂pono pîn komo iito.

Ero wa xatken̂e iina mohxapu kom ha.

Ero wa xatken̂e.