Ewuhnî Me Ewruxapu N̂ewtanîresî Xesus
9
Taa,
ero yinhîrî esama yaw tak cekn̂e Xesus.
Ero yimaw tak ewuhnî n̂een̂akn̂e esama yakumyaw,
kîîrî.
Ero wara ro ewruxapu thakwa tî mîk xakn̂e okwe.
2 On wara ketken̂e yînpanatanmekrî komo noro yenîche,
Apa,
onoke kicicime xakn̂e ewuhnî me ewrutome moso okwe?
Noro rma katî kicicme xakn̂e,
yîîm katî,
yînocwan katî?
ketken̂e yîwya.
Jesus cura um cego (João 9:1-41)
3 Pîra ro mak,
kekn̂e Xesus,
kicicme exihra rma xakn̂e moso,
yîîm komo marha kicicme exihra xatken̂e.
Cirihnî ciin̂e me Kaan yehtopo yenpon̂e me ehtome mak ero wa n̂ewruyakn̂e.
4 Ero ke kokmamra ka exitaw oyen̂epen̂enho yanme ciino ritopo poko ka wasî.
Nawarpanwasî men wa amn̂e.
Ero yimaw ahce na poko exihra thakwa tasî.
5 Roowo po ka oyexitaw roowo pono komo weyuru me wasî,
kekn̂e.
6 Ero wa kache,
kucpi,
kekn̂e tak Xesus,
roowo pona n̂etakwakn̂e.
Cetakuthîrî tak n̂esmekn̂e roowo yakro.
Ewuhnî yewru pore tak n̂iir̂akn̂e esmaxapu,
see see kekn̂e.
7 Ero yinhîrî tak on wara kekn̂e ewuhnî ya,
Siroe n̂ikithon kwaka esewkorokata,
kekn̂e yîwya.
En̂epexapu,
kacho tî mîn,
Siroe,
kacho.
Taa,
cekn̂e tak esewkorokaxi.
Mokyakn̂e tak hara cewke tak okre.
Ero wa xakn̂e.
8 Noro yenîche takî tî n̂eserepoketken̂e enmayipu komo,
anarî komo marha tî n̂eserepoketken̂e ewuhnî me noro yenîn̂enho komo tî.
Okyo,
ketken̂e,
mînto n̂eremekn̂e roro,
Opurantan,
opurantan,
kekn̂e,
noro rma na moso.
Noro pîn katî?
ketken̂e.
9 Noro rma moso ha ke,
ketken̂e tî anarî komo.
Pîra,
noro warai mak moso,
ketken̂e tî anarî kom hara.
Noro rma ow ha,
kekn̂e takî tî ewtanîrexapu.
10 Ahce wa mewta hara kopi?
ketken̂e tî yîwya iitono komo.
11 On wara tî kekn̂e noro,
Tooto n̂eexi,
Xesus ha tî osotî,
Cetakuthîrî n̂esma roowo yakro.
Ero yipu tak n̂iirî oyewru pona,
see see nîîka.
Ero yinhîrî tak,
Siroe kwaka esewkorokata,
nîîka owya.
Ero ke iina kîwtomo esewkorokaxi.
Oyesewkorokache tak kewta tak okre,
kekn̂e tî yîwya so.
12 Ahto nai Noro awewtanîren̂enhîrî?
ketken̂e tî yîwya.
Apohana,
ahto tak na nai ha?
kekn̂e tî yîwya so.
Ero wa tî kekn̂e.
Ewtanîretoponhîrî N̂encexe Parisew Komo
13-14 Kepokaretopo po rma ero wa roowo n̂esmekn̂e Xesus ewuhnînhîrî yewtanîrecho ha.
Ero ke tak Parisew komo yaka takî tî noro naar̂atken̂e.
15 Ero ke takî tî n̂examro marha takî tî nîmtapowakn̂e noro yakro.
Ahce wa xa mewta ha?
ketken̂e tî n̂examro hara.
Apacakrî ke oyewtawarew,
kekn̂e tî ewtanîrexapu.
Ero yinhîrî kesewkoroka mak tak.
Ero yimaw tak kewta okre,
kekn̂e tî yîwya so.
16 Kica,
ketken̂e takî tî anarî komo parisew komo,
Kaan yanmera ro mak ciino rin̂e Mîk ham kica.
Enko,
kepokaretopo po rma ciino n̂iir̂asî kica,
ketken̂e tî.
Apohana,
ketken̂e anarî kom hara,
kicicitho me cexitaw ketaw re ero yipu cirihra ro mak wa nasî cirihnî,
ketken̂e.
Ero wa n̂eseseyukyatken̂e,
iito re kahra xatken̂e.
17 Ero yinhîrî tak ketken̂e xa hara tî ewtanîrexapu ya,
Onoke warai me kyam mîhtînoya Noro awewtanîren̂enhîrî awya?
ketken̂e tî.
Nnn,
kekn̂e takî tî ewtanîrexapu,
kweronoman̂e komo Mîk owya,
kekn̂e tî yîwya so.
Ero wa tî kekn̂e ewtanîrexapu.
18 Yîmtapotarî tko tî nanwekyatken̂e rma Xutew komo.
Tohnaw mak na nîîke kica,
Noro oyewtanîrew,
nîîke,
ketken̂e tî.
Ero ke yîîm komo takî tî nan̂ikpetken̂e,
yîson kom ha.
19 On wara takî tî ketken̂e yîwya so,
Amxîkrî xa moso ha?
Ewuhra ewruxapu mîkro,
mîîket ha re moso poko ha?
Ahce wa tak nai cewke hara?
ketken̂e yîwya so.
20 Nhnk,
amna xîkrî xa moso ha,
ketken̂e yîîm komo.
Ewuhra ewruxapunhîrî thakwa moso.
21 Ahce wa kyam na n̂ewta ha?
Onoke na Mîk n̂ewtanîrew?
Yîhtînopîra thakwa nas amna.
Yîwya ro xa kacoko,
etîtîkaxapu rma mîkro,
ketken̂e tî.
22 Ero wa makî tî ketken̂e yîîm komo Xutew komo pona cerahtîmrî ke so.
On wara Xutew komo ketken̂e pahxa n̂he,
Kristu xa Mîk ham Xesus,
kan̂e komo tporohkapore men nasî,
kesenmetopo komo yaka mokuhra tak ehtome so,
ketken̂e.
23 Ero ke ero wa kacho pona cerahtîmrî ke mak ero wa ketken̂e,
Etîtîkaxapu rma mîkro,
ero ke yîwya ro xa kacoko,
ketken̂e tî.
Ero wa tî ketken̂e.
24 Ero yinhîrî takî tî ewtanîrexapu nan̂ikpetken̂e xa hara.
On wara tî ketken̂e yîwya,
On wara kes amna awya,
Kaan xa oyewtanîrew okre,
kasko ha ke.
Kicicitho mak Mîk ha kica Xesus,
ketken̂e tî yîwya.
25 On wara tî n̂eyukyakn̂e ewtanîrexapu,
Apohana,
onoke warai na Mîk oyewtanîren̂enho.
Kicicitho ha na,
kir̂wan katî,
yîhtînopîra thakwa wasî.
On wara mak wîhtînoyasî,
Cewke tak was okre ewuhnînhîrî ha,
kekn̂e tî yîwya so.
26 Ero yinhîrî tak on wara ketken̂e xa hara yîwya,
Ahce wa xa awirî ha ke?
Ahce wa kyam wa awewtanîrew kopi?
ketken̂e xa hara tî yîwya.
27 Wekatmo hara re awya so,
kekn̂e tî yîwya so.
Entara rma ma mehcow ha ke?
Ahce kacho emapona enta xe matu hara ke?
Yînpanatanmekrî me katî wa awexi xe mat amyamro hara?
kekn̂e tî.
28 Ero wa kacho yentache takî tî ewtanîrexapu nîwîrîyaketken̂e.
On wara ketken̂e yîwya,
Noro npanatanmekîtho mak amoro reha kica,
Moises pen npanatanmekîtho reha amna ha.
29 Moises pen ya xa Kaan n̂entamexpekn̂e tîmtapotarî.
Ahtono kyam na mîkîtho hara,
ketken̂e tî yîwya.
Ero wa tî ketken̂e Parisew komo ewtanîrexapu ya.
30-33 Ahce wa hara kopi,
kekn̂e takî tî noro.
Keserepokesî xa apoko so.
Ahce kacho Noro yipu poko mîîket hara,
Onoke yanme mohxapu na Mîkîtho Noro,
mîîket hara?
Kicicitho komo yentara ro mak wa nasî Kaan.
Tponarono komo mak n̂encesî Noro,
tîmtapotarî yewetîn̂e kom mak ha.
Ero ke Kaan yanme mak oyewtanîriy,
wîîkesî.
Anarî exihra ro mak nasî ewuhnî me ewruxapu yewtanîren̂e ha ke.
Pahxan pen komo meero wa ero yipu yentara xatken̂e ewtanîreno ritopo,
yihcitopo n̂ixa rono komo rma.
Kaan yanmera Noro exitaw ketaw ha re oyewtanîrera n̂exirî ha re,
kekn̂e tî parisew komo ya.
34 Ero wa kacho yentache tak noro pen takî tî nîwîrîyaketken̂e ro mak tak ha.
Kica,
ketken̂e tî,
kicicitho me ewruxapu thakwa mak amoro.
Ero ke ahce kacho amna panatanmekn̂e wa mîmtapowa hara kica?
ketken̂e tî yîwya.
Ero wa kache takî tî porohketken̂e Kaan mîn yaka mokuhnî me ro mak.
Ero wa tî ewuhnînhîrî n̂iir̂atken̂e.
35 Porohkachonho takî tî n̂encekn̂e Xesus.
Ero ke takî tî cekn̂e noro yenso.
On wara kekn̂e Xesus yîwya,
Kaan Mumuru pona enîn̂e xa amoro ha?
kekn̂e.
36 Onoke xa Mîk Apa,
Kaan Mumuru ha?
Enpoko ka owya Noro pona tak entome owya,
kekn̂e.
37 Meen̂asî rma wa ha.
Noro rma Mîk awakro nîmtapowasî,
kekn̂e hara Xesus yîwya.
38 Ai ha Apa,
kekn̂e tak ewtanîrexapu.
Apona xa tak ween̂asî.
Oporinî ro ham Amoro,
kekn̂e.
Ero wa kekn̂e ewtanîrexapu.
39 Ero yinhîrî tak on wara kekn̂e Xesus,
Yîcherenonkano riso wa kmokye oona roowo pona.
On wara yîcherenonkano wiir̂asî,
Ewuhnî me cehsom komo reha wewtanîresî tak.
Cewkem komo reha wiir̂asî ewuhnî me hara,
kekn̂e Xesus.
40 Iito xatken̂e parisew komo.
Ero ke ero wa kacho yentache on wara ketken̂e n̂examro Xesus ya,
Ahce wa amna nai hara awya?
Ewuhra ma re amna nai awya?
ketken̂e yîwya.
41 On wara Xesus n̂eyukyakn̂e,
Ewuhnîtho mak amna okwe,
ketaw ha re awya so kicicitho ken̂ehra tak maxe ha re.
Cewkemu rma amna okre,
mîîkexe tko amyamro.
Ero ke kicicitho ken̂e rma maxe okwe,
kekn̂e yîwya so.
Ero wa kekn̂e Xesus.