Taa,

ero yinhîrî takî Xesus cekn̂e Oripera Yîpîn pona.

2 Enmapuche tak Kaan mîn roron pona tak cekn̂e hara.

Ero yimaw tak mokyatken̂e yîhyaka ewto pono komo ahnoro.

Ero ke n̂eremekn̂e Xesus.

N̂examro tak panatanmekyakn̂e hara.

3-4 Ero wa panatanmekno riyataw yîhyaka tak wooxam n̂ekyatken̂e Xutew panatanmetopo mewren̂e komo,

Parisew komo yakro.

Ciin̂o yairono tî mîk xakn̂e wooxam.

Noro yipu poko exitaw rma tî n̂een̂atken̂e.

Ero ke tî n̂ekyatken̂e yîhyaka.

Iito tak xakn̂e cecetoso esenmexapu komo yepatai.

On wara ketken̂e Xesus ya,

Ai Apa,

kîîrî poko n̂eexi moso kica,

ciin̂o pîn poko.

Ero wa exirî rma amna n̂enwo.

5 On wara cma re amna panatanmekyakn̂e Moises pen,

Noro yipu etapacoko toh ke waihkachome,

kekn̂e amna ya.

Amoro hara,

ahce wa mîîke?

Ahce wa cirpore nai moso awya?

ketken̂e Xesus ya.

6 Xesus yukukmachome makî tî ero wa ketken̂e yîwya.

Kicicme nai Xesus ham,

anarme kpanatanmekyat ham kica,

kachome mak ero wa ketken̂e yîwya.

Eikura rma tko ka xakn̂e Xesus.

Yîmtapotarî komo yentache katuhwakn̂e mak.

Roowo mak mewrekn̂e tamorî ke,

see see kekn̂e entan̂e pîn wara mak.

7 Ketîketken̂e rma wooxam yekn̂enho komo.

Ero ke nîhkanwakn̂e tak Xesus.

On wara ehcoko ha ke,

kekn̂e tak,

kicicme exihnî ro exitaw tan achew so noro ka n̂ihcipe toopu yar̂macho,

kekn̂e yîwya so.

8 Ero wa kache katuhwakn̂e xa hara Xesus.

Roowo mewrekn̂e xa hara.

9 Ero wa kache tak wooxam yekn̂enho komo tak nîhyapamyatken̂e.

Kuu,

ow xa ma kicicitho hara,

ketken̂e tîhnaw so.

Ero ke tak cetîketken̂e hara.

Cewn̂e so cetken̂e.

Poturme ewruxapu cokorî ka cekn̂e.

Ero yinhîrî ponan hara cekn̂e xa hara,

ponan hara,

ponan hara,

ero wara cetîketken̂e exihra cehso ro.

Xesus mak n̂etînomyakn̂e wooxam yakro.

Iito rma xakn̂e wooxam cececetoso,

roro po rma.

10 Ero yimaw takî Xesus nîhkanwakn̂e xa hara.

On wara kekn̂e wooxam ya,

Ahto nat hara awen̂ekan̂enhîrî komo?

Kicicitho me awenîn̂e komo exihra ma nai?

kekn̂e yîwya.

11 Exihra nai Apa,

kekn̂e wooxam Xesus ya.

Taa,

Ow marha,

kicicitho amoro,

kahra was awya.

Ero ke etok hara.

Kicicme awehtoponhîrî tak ahsîpînkakî,

kekn̂e hara.

Ero wa Xesus kekn̂e wooxam ya.

12 Taa,

ero yinhîrî tak iitono komo panatanmekyakn̂e xa hara Xesus.

On wara kekn̂e yîwya so,

Aweyuru komo Ow ha,

miyan komo weyuru rma.

Oyakro amokyataw roro so awarpanawno me exihra tak maxe.

Weeyu pono me tak maxe okre.

Waipînî ro me awirmexpon̂e mîn weeyu,

kekn̂e Xesus yîwya so.

13 Okre,

ketken̂e tak Parisew komo yîmtaka,

Ero warai Ow ha,

mîîkesî apoko rma kica.

Yaaro kahra mai ham kica,

ketken̂e.

14 On wara Xesus n̂eyukyakn̂e,

Kesekatîmyasî rma re,

yaaro ha tko.

Kah yai mohxapu Ow,

wîîkesî.

Iina xa marha tîtosom hara Ow,

wîîkesî marha.

Ero wa kesekatîmyasî yaaro rma.

Amyamro reha maxe camkî kah yai omohtopo poko,

iina xa marha owtotopo poko marha.

15 On wara marha maxe amyamro reha,

apoyino komo mîwîrîyakexe poore enîrî ke mak awya so.

Kicicme maxe kica,

kahra ro mak was Owî reha poore awenîrî ke so mak.

16 En̂ekano rma wiir̂asî.

Kicicme mas okwe,

wîîkesî rma tooto komo ya.

Yaaro mak tko wîîkesî,

tohnaw kahra.

Ow mak kahra wasî ero wara.

Apapa marha kesî ero wa xa marha,

oyen̂epen̂enho ha.

17 Ero wa kacho rma wa nasî tmewreso apanatanmetopo komo.

Asakî exitaw ero wara re ekatîmn̂e komo,

n̂examro entacoko yaaro ekatîmn̂e me,

kesî.

18 Owî rma kesekatîmyasî.

Taa,

ero wa xa marha kesî opoko Apapa hara oyen̂epen̂enho ha,

kekn̂e Xesus yîwya so.

19 Ahto nai Aamo hara awya?

ketken̂e hara Parisew komo yîwya.

On wara n̂eyukyakn̂e Xesus,

Ponaro awehtopo komo me Apapa yîhtînopîra ro mak maxe okwe.

Ero wa xa marha maxe opoko hara.

Ponaro awehtopo komo me ohtînoyataw ketaw re,

ero warai me xa marha Apapa mîhtînoyaxe ha re,

kekn̂e.

Ero wa kekn̂e Xesus Parisew komo ya.

20 Ero wa kekn̂e Xesus panatanmekno riyataw.

Kaan mîn roron po rma ka exitaw panatanamekno n̂iir̂akn̂e,

puranta tîmtopo mîtwo.

Ero yimaw Noro yahsîra xatken̂e ahsîtopo mera ka exirî ke.

21 On wara marha kekn̂e Parisew komo ya,

Miya men kîwces amn̂e oyeken pona hara.

Owtoche tak Ow mepor̂axe.

Oyenîra rma maxe ero yimaw.

Kicicme awehtopo komo pokono ro me rma thakwa mîwaiyaxe okwe.

Oyakro mokuhra thakwa maxe okwe oyeken pona,

kekn̂e yîwya so.

22 Ero wa kacho yentache Xutew komo takî tî n̂eserepoketken̂e.

Ahce wa nîîke hara kopi?

ketken̂e.

N̂etwaike katî wa tanme ro rma ha?

Ero ke ma ero wa nîîke,

Oyakro mokuhra ro mak maxe oyeken pona,

nîîke ha?

ketken̂e.

23 On wara kekn̂e xa hara Xesus yîwya so,

Tantono ro mak amyamro reha,

roowo pono ro kom ha.

Roowo pono pînî reha Ow.

Kah yawno ro xa Owî reha.

24 Ero ke wîîka awya so,

Kicicme awehtopo komo pokono ro me rma wa mîwaiyaxe okwe,

wîîka ha.

Kristu xa Mîkro ham,

kahra awexitaw so opoko mîwaiyaxe thakwa okwe kicicme awehtopo komo poko no ro me rma,

kekn̂e Xesus yîwya so.

25 Onoke xa Amoro kopi?

ketken̂e hara Parisew komo yîwya.

On wara Xesus n̂eyukyakn̂e,

Kesekatîmyakn̂e hara re awya so pahxa rma,

Noro rma Ow ha,

kekn̂e.

26 On wara marha kekn̂e Xesus yîwya so,

Miya rma nasî awya so on̂ekatîmrî,

nasî marha awen̂ekacho komo owya miya rma.

Oyen̂epen̂enho mtapotarî makî tko wekatîmyasî tan,

owya kekn̂e Noro,

ero wa kacho mak wekatîmyasî.

Yaaro tîmtapotaxmu xa Mîk oyen̂epen̂enho.

Ero ke Noro mtapotarî tan wekatîmyasî roowo pono komo ya ahnoro,

kekn̂e Xesus yîwya so.

27 Camkî tî n̂encetken̂e yîmtapotarî,

oyen̂epen̂enho,

kacho.

Tîîm poko xa nîîke,

kahra tî xatken̂e.

28 Ero yinhîrî on wara kekn̂e hara Xesus yîwya so,

Amn̂e tak Tooto me Ewruxapu manîmyaxe.

Ero yimaw tak,

Noro xa Mîk ham,

tanme rono pîn ham,

mîîkexe tak opoko ha.

Yîîm panatanmekyakn̂e ero wa xa marha kpanatanmekyatu so hara mî,

mîîkexe marha opoko.

29 Oyen̂epen̂enho rma nas oyakro.

Onomra ro mak nasî.

Ero wa nasî Apapa opoko Noro yewetîn̂e me roro oyexirî ke,

kekn̂e.

Ero wa kekn̂e Xesus Parisew komo ya.

30 Ero wa ketaw rma Xesus ya,

yîmtapotarî tak n̂ewehcatken̂e Xutew komo mer̂pono pîn komo.

31 Ero ke on wara tak kekn̂e Xesus yîwya so,

Omtapotarî ponaro ro awexitaw so,

onpanatanmekrî me xa tak maxe.

32 Ero wa awexitaw so tak yaarono me xa mîhtînoyaxe omtapotarî.

Ero ke omtapotarî rma tak awowyaxe so,

yaarono ha.

Awahsîn̂enhîrî komo yanton mera tak awir̂axe so okre,

kekn̂e Xesus yîwya so.

33 Pîra,

ketken̂e hara entan̂e komo yîmtaka.

Abraaw pen yepamtho xa amna.

Tooto yantonînho pînî ro mak amna mehxa ro okwe.

Ero ke ahce warai poko kyam na mîîke hara kopi,

Awowyaxe so tak ha,

mîîke kopi?

ketken̂e yîwya.

34 On wara tko n̂examro n̂eyukyakn̂e Xesus,

Yaaro tan wîîkes awya so,

kicicme awexitaw so,

ero wa awehtoponhîrî komo yanton me thakwa wa maxe okwe,

kekn̂e yîwya so.

35 Ahce wa katî nai awanton komo awya so?

Eroromero katî nai amîn komo yaw?

Pîra ro mak.

Amumuru komo xa nasî amîn komo yawno me eroromero.

36 Ero ke ero wa xa marha was Ow hara,

Kaan Mumuru rma Ow ha.

Ero ke awowche so tak owya awehtoponhîrî komo yanton mera ro mak tak maxe okre.

37 Yaaro rma re wa mîîkexe,

Abraaw yepamtho amna ha,

mîîkexe.

Omtapotarî yenta xatî pîn tko amyamro okwe.

Ero ke owaika xe thakwa maxe okwe.

38 Pahxa Apapa yaw ka oyexitaw mîn hak n̂enpekn̂e Noro owya.

Ero mak tan wekatîmyas awya so,

yîn̂enpothîrî ha.

Aamo komo n̂enpotho poko xa marha maxe amyamro hara kica,

kekn̂e Xesus yîwya so.

39 Pîra ro mak,

Abraaw pen xa amna porinînho pen okwe,

ketken̂e yîwya.

Pîra ro mak,

kekn̂e Xesus yîwya so hara.

Abraaw pen yepamtho me awexitaw so ketaw ha re,

kir̂wan̂he xa re maxe noro pen wara xa marha.

40 Abraaw pen warahra ro makî tko maxe okwe.

Enko,

oyetapa xe maxe omtapotarî yentarî ke mak.

Yaarono rma thakwa wa wekatîmyas awya so.

Kaanî mtapotarî wencekn̂e,

ero rma tan wekatîmyas awya so.

Ero yipu poyero mak owaika xe maxe okwe.

Ero warahra ro mak xakn̂e Abraaw pen.

Ero ke noro yepamtho mera ro mak maxe okwe.

41 Anarî ro xa ham aamo komo kica.

Noro wa xa marha maxe kicicitho pokono me,

kekn̂e Xesus yîwya so.

Kica,

ketken̂e tak Parisew komo.

Anarî ro xîkîtho pînî ro mak amna.

Kaan xa Mîk amna Yîîm,

ketken̂e yîwya.

42 Pîra ro mak,

kekn̂e hara Xesus.

Kaan xîkrî me awexitaw so ketaw ha re ooxe re maxe ha Noro yawnonho me oyexirî ke.

Oyanme ro mak mokuhnînhîrî Ow.

Noro mak oyen̂epekn̂e oona.

43 Ahce wa awexirî ke so omtapotarî yentara mat hara kopi?

Oyentan̂e pînî ro me mak maxe.

Ero ke thakwa oyentara mat ham ke.

44 Ciabu xîkrî thakwa reha amyamro.

Ero ke noro yanme mak awexi xe maxe kica.

Waapa mîk ha pahxanînhîrî rma,

roowo yakîhtotoponho n̂ixa ro rma.

Yaarono xera ro mak nasî noro cemarontaxmu ro me cexirî thakwa.

Ero ke cemaro me mak nîmtapowasî kica.

Cemarontaxmu ro mak mîk Ciabu.

Acemaron komo yîîm mîk ha.

45 Yaarono mak wekatîmyas Owî reha awya so.

Ero yipu yekatîmrî ke rma Ow manwekyaxe kica.

46 Onoke xa ma re n̂een̂a ke kicicme oyehtopo?

Pîra ro mak.

Ero ke ahce kacho Ow manwekyat hara yaarono yekatîmn̂e ha?

47 Kaan xîkrî komo makî reha yîmtapotarî n̂encexe.

Amyamro reha entara maxe yîmxîkrî mera awexirî ke so okwe,

kekn̂e.

Ero wa kekn̂e Xesus yîwya so.

48 Taa,

ero yinhîrî on wara ketken̂e hara Xutew komo Xesus ya,

Kica,

ketken̂e,

kica,

Yaaro amna nîîke ham apoko.

Samaritanutho mak Mîkro kica,

worokyam nai ham yîropotaw,

nîîke amna apoko yaaro ham,

ketken̂e Xesus ya.

49 Pîra ro mak,

kekn̂e Xesus,

worokyam exihra ro mak nasî oropotaw.

Kir̂wan Mîk ha Apapa,

kan̂e Ow ha.

Kir̂wan Mîk ha,

kan̂e pîn amyamro opoko hara okwe.

50 Ow xa kir̂wan ha,

kahra was Ow.

Anarî xa nasî kir̂wanî ro me oyenpon̂e.

Ahce wa so na kehtopo yenpon̂e ro xa Mîk Apapa,

kekn̂e Xesus yîwya so.

51 Yaaro tan wîîkes awya so,

omtapotarî ponaro awexitaw so waipîn me ro mak tak maxe okre,

kekn̂e.

Ero wa kekn̂e Xesus yîwya so.

52 Kopi,

ketken̂e tak Parisew komo yîwya,

kopi,

yaaro amna nîîke ham apoko,

Worokyam nai ham yîropotaw,

kesî amna apoko.

Pahxa rma thakwa waihyakn̂e Abraaw pen.

Kweroman̂enhîrî pen komo marha waihyatken̂e.

Ero ke ahce wa mîîke hara kopi?

Omtapotarî ponaro xa awexitaw so waipîn me ro mak tak maxe,

mîîkesî kopi.

53 Onok warai me xa mesehtînoya hara kopi.

Abraaw pen waihyakn̂e,

kweronoman̂enhîrî pen komo marha waihyatken̂e,

n̂examro yopono ma re Amoro?

ketken̂e.

54 On wara n̂eyukyakn̂e hara Xesus,

Kir̂wan xa Ow ha,

kan̂e me oyexitaw tohnawno wara mak mencexe omtapotarî.

Apapa xa ero wa kesî opoko,

ponaro amna yehtopo Mîk ha,

mîîkexe,

Noro rma.

Kir̂wanî ro Mîkro,

kesî opoko.

55 Camkî mak maxe okwe Noro poko.

Onok warai na Mîkî Kaan?

kan̂e me mak maxe.

Owî reha ero wa kahra wasî.

Apohana,

onok warai na Mîk Kaan,

yîhtînopîra wasî,

ketaw owya cemarontaxmu me wasî awara so xa marha.

Wîhtînoyasî xa tko.

Yîmtapotarî marha wewehcasî.

56 On wara xakn̂e Abraaw pen,

omohtopo n̂een̂akn̂e.

Enîrî ke tak nahwowakn̂e noro pen.

Tawake xa xakn̂e ero poko.

Ero wa xakn̂e Abraaw pen.

57 Okre,

ketken̂e tak Xutew komo Xesus ya.

Poritomo me exihra ka masî.

50 cimn̂ipu ka exihra nasî awewrutoponhîrî.

Abraaw pen yenîn̂enho ma re Amoro awya?

ketken̂e Xesus ya.

58 Yaaro tan wîîkes awya so,

kekn̂e hara Xesus yîwya so,

mehxa rono Ow ha Abraaw pen yexihnawnonho rma.

Cehsom ro xa Ow ha,

kekn̂e yîwya so.

59 Ero wa kacho yentache tak toopu tak namekyatken̂e Xesus yetapacho tî re.

Poku,

n̂esen̂epanmekyakn̂e makî tko Xesus.

Kaan mîn yai tak n̂epatakekn̂e.

Yîchere so rma cekn̂e esenpora rma.

Ero wa cekn̂e Xesus.