Taa,

ero yihîrî Karireia pore makî ka n̂etar̂akn̂e Xesus.

Cetapa xatî me tî Xuteia pono komo nîhtînoyakn̂e,

Xutew komo.

Ero ke tî iina tîto xera ka xakn̂e.

2 Ero yimaw Xutew komo yahwotacho pahnoke tak xakn̂e.

Kuum yarî ke tîmîye so enmacho me xakn̂e ero yimawno ahwotacho komo.

3 On wara tak ketken̂e Xesus ya akno komo rma,

Tîtopore rma nasî miya Xuteia pona.

Iito kyam natu apanatanmekîthîrî komo.

N̂examro wero ro n̂he ciita ha ke cirihnî mko.

4 Tanî mak masî kica,

en̂epa me ciin̂e wa mak.

Ero warahra mexe tasî kir̂wantawo me kesenpo xe kexitaw.

Cirihnî ciri xe awexitaw esenpota ha ke tooto komo ya,

ketken̂e Xesus ya.

5 Ero wa ketken̂e Xesus yakno komo rma yîwya okwe.

Noro pona enîhra rma xatken̂e n̂examro rma okwe.

Ero ke ero wa ketken̂e.

6 On wara tko Xesus n̂eyukyakn̂e yîmtaka so hara,

Pîra,

tohra ka wasî.

Iina owtotopo mera ka nasî.

Amyamro xa matko etocoko.

Iina awtotopo komo me roro reha nasî.

7 Ooxera ro mak naxe tooto komo,

Kicicitho pokono amyamro okwe,

wîîkesî yîwya so.

Ero ke ooxera naxe.

Yiixera ehtopo komo pînî rma tko amyamro.

8 Ero ke amyamro xa matko ahwotaxi etocoko.

Tohra ka was Ow.

Iina owtotopo mera ka nasî,

kekn̂e.

Ero wa kekn̂e Xesus takno komo ya.

9 Ero wa kache yîwya so iito rma ka xakn̂e Xesus Karireia po rma ka.

Ero wa xakn̂e.

10 Taa,

ero yinhîrî Xesus yakno komo takî tî cetken̂e ahwotaxi.

Toche so tak Xesus marha cekn̂e.

En̂epa me makî tko cekn̂e tooto komo n̂enîhtorî me mak.

11 Ero yimaw Xesus mokrî ponaro xatken̂e tahwotacho komo pokono,

Xutew kom ha.

Ahto nai Xesus?

ketken̂e tî.

12 Noro poko tî n̂eseseyukyatken̂e xa n̂examro.

Anarmerpa so ketken̂e.

Kir̂wan mexe Mîk Xesus,

ketken̂e anarî komo.

Pîra kica,

tooto komo yewkukman̂e mak Mîk kica,

ketken̂e anarî kom hara.

13 Ero wa so tî ketken̂e Xesus poko.

Yakentaw tko tî kahra xatken̂e Xutew komo pona cerahtîmrî ke so.

Ero wa tî xatken̂e.

14 Taa,

ero yinhîrî pahkî n̂he tahwotacho komo poko exiche so tak Kaan mîn roron pona tak cekn̂e Xesus.

Iito tak panatanmekno n̂iir̂akn̂e hara.

15 Yîmtapotarî yentache Xutew komo takî tî n̂eserepoketken̂e xa.

Ahce warai Moso hara kopi?

Ahce wa n̂ehcamhokekn̂e hara karita poko?

Eskora yaka tohnî ro mak Mîkro ha ta,

ketken̂e Xesus poko.

16 On wara Xesus n̂eyukyakn̂e yîmtaka so,

Omtapotarî pîn tan wekatîmyas awya so.

Oyen̂epen̂eho mtapotarî mak tan wekatîmyasî.

17 Kaan yewetî xe xa awexitaw so camkîra tak omtapotarî mencexe.

Kaanî mtapotarî poko xa kpanatanmekyatu so ham Noro,

tanme ro mak kahra wa nai ham,

mîîkexe tak opoko.

18 On wara naxe tanmero mak panatanmekno rin̂e komo,

Kir̂wan mîkro okre,

kacho yenta xe mak naxe tpoko so rma kica.

On wara reha naxe anarî komo.

Yaaro mak nîmtapowaxe.

Kir̂wan mîkro okre,

kacho yenta xe naxe tantoman̂e komo poko makî reha.

Kicicitho me exihnî ro me mak naxe.

19 On wara marha kekn̂e Noro yîwya so,

Moises pen mewrekn̂e apanatanmetopo komo.

Ero yewetîn̂e pîn me tko maxe amyamro ahnoro okwe.

Ahce kacho oyetapa xe mat hara?

kekn̂e Xesus yîwya so.

20 Kopi,

ketken̂e tak Xutew komo.

Worokyam nai ham aropotaw kopi.

Ahtono ma re meen̂a awetapan̂e wara?

ketken̂e Xesus ya.

Ero wa ketken̂e Xutew komo.

21 Ero yihîrî on wara kekn̂e hara Xesus yîwya so,

Cewn̂e ro makî cma re cirihnî wiire kepokaretopo po.

Ero yipu yenîrî ke awya so,

kicicme nasî kica,

mîîkexe opoko.

22 Kepokaretopo po rma amxîkrî komo manpikexe amyamro hara.

Kîîrî mren komo anpikacoko ewruxan ciki,

kekn̂e Moises pen awya so.

Noro pînî n̂he tko mîk ero wa awehtopo komo yihcin̂enhîrî.

Pahxa rma ero wa awehtopo komo n̂ihciyatken̂e kporinînhîrî pen komo.

Ero wa xa marha tak kekn̂e Moises pen hara.

23 Ero ke thakwa ero wa miir̂axe kepokaretopo po rma anarîmaw so Moisesî nmewretho yanwekîra awehtome so.

Ero ke ahce kacho opoko mîrwonat hara kepokaretopo po tooto yakirwamarî ke tak owya?

24 Ero ke on wara wîîkes hara awya so,

takîhso tak ehcoko ha ke tooto komo poko.

Poore mak enîno cirihra ehcoko.

Ero wa kekn̂e Xesus Xutew komo ya.

25 Ero wa kacho yentache tak on wara tî ketken̂e iitono komo,

Xerusaren pono komo,

Moso rma na Moso etapa xe ehtopo kom ha?

ketken̂e tî.

Noro pîn katî?

26 Enko,

erasîra rma nîmtapowasî.

Kayaritomo komo rma re n̂encexe yîmtapotarî.

Ero wa kahra esko,

kahra rma naxe hara yîwya.

Kristu rma Mîk ham,

ketu katî?

ketken̂e iitono komo.

27 Kristu pînî rma tko na Moso,

ketken̂e.

Kristu xa mokuche tak amn̂e,

Ahtono ha na Moso,

tîtkexe noro poko reha.

Moso yekenho reha ceen̂axe,

ketken̂e tî Xesus poko.

28 Ero yinhîrî tak kar̂pe ro mak tak Xesus nîmtapowakn̂e akro so.

Kaa mîn yaw rma kekn̂e panatamekno rirî me.

On wara kekn̂e yîwya so,

Owî rma re meen̂axe.

Oyekehno marha mencexe.

Oyanme ro mak mokuhnînhîrî ro mak Ow ha.

Apapa xa matko oona oyen̂epekn̂e.

Yaarono xa Mîk oyen̂epen̂enho.

Noro yenîn̂e pîn komo ro mak amyamro reha.

29 Owî reha ween̂asî yîhyai omokrî ke,

oona oyen̂eperî ke yîwya,

kekn̂e Xesus.

30 Ero wa kacho yentache tak Xesus yahsî xe takî tî xatken̂e yiixatî pîn komo.

Ahsîra rma tko xatken̂e waihtopo mera ka exirî ke.

Ero wa xatken̂e.

31 Kristu xa rma Moso ham,

ketken̂e rma tko anarî komo,

mer̂pono pîn komo.

Enko,

cirihnî n̂iir̂asî emapona roro.

Anarî mokyataw hara,

Kristu,

kacho,

Moso yopo ma re cirihnî n̂iira hara,

ketken̂e.

Ero wa ketken̂e anarî komo.

32 Xesus poko yîmtapotarî komo tî n̂encetken̂e Parisew komo,

anarmerpa so yîmtapotarî kom ha.

Ero ke takî tî n̂eserepoketken̂e.

Tîmsom pokono yenîn̂e komo marha tî n̂eserepoketken̂e.

Ero ke takî tî porisia komo n̂en̂epetken̂e Xesus yahsîn̂e komo.

33 N̂examro mokuche tak nîmtapowakn̂e rma Xesus iitono komo yakro.

On wara kekn̂e hara yîwya so,

Yohno makî ka wasî tan achew so.

Amn̂e tak kîwces hara oyen̂epen̂enho yaka hara.

34 Ero yimaw tak Ow mepor̂axe.

Oyenîra rma maxe okwe.

Ohyaka marha mokuhra thakwa maxe okwe,

kekn̂e Xesus yîwya so.

35 Ero yipu yentache Xutew komo ya,

n̂esencetken̂e tak.

Ahna ya kyam twa Moso nîîce hara kopi enîhra tak kehtome so?

Kreku chewno komo yaka katî nîîce?

Kreku komo panatanmeso katî wa nîîce hara?

36 Ahce warai ya twa kee hara kopi,

Ow mepor̂axe amn̂e.

Oyenîra tak maxe ha.

Ohyaka mokuhra ro mak tak maxe okwe ero yimaw,

kesî komo kopi,

ketken̂e.

Ero wa tî ketken̂e Xutew komo Xesus poko.

37 Taa,

ero yinhîrî tak ahwotacho komo yîtîhkacho me tak xakn̂e,

tahwore ehtopo komo me xa tak.

Ero po tak piiri nawomyakn̂e Xesus.

Kar̂pe xa takî tî nîmtapowakn̂e iitono komo n̂entarî me.

On wara kekn̂e,

Awokru komo xe awexitaw so eetamcoko ohyaka.

38 Opona een̂ataw awya so tuuna yepu wara tak nasî aropotawno komo.

Ero rma tak mokyasî aropotai so,

waipîn me kiin̂e tuuna ha.

Ero yipu poko rma kesî Kaan Karitan,

kekn̂e Xesus yîn̂entarî komo me.

39 Kaan Yekatî poko ero wa kekn̂e Xesus,

tpona enîn̂e komo ropotaka tmohsom poko ha.

Ero yimaw ka mokuhra xakn̂e Kaan Yekatî Kaan xîkrî komo ropotaka,

kah yaka tohra ka exirî ke Xesus.

Ero wa ka xakn̂e.

40 Taa,

Xesusu mtapotarî yentache tak on wara tî ketken̂e iitono komo,

Yaaro ham,

kweronoman̂e ro xa tak mokyas amn̂e ha,

kachonho xa Moso ham,

ketken̂e.

N̂er̂pono pîn komo tî ero wa ketken̂e.

41-42 Kristu xa Moso owya,

ketken̂e tî anarî kom hara.

Apohana,

ketken̂e anarî komo xa hara.

Karireia pono pînî reha tî Mîkî Kristu.

On wara kesî Kaan Karitan,

Tapi yepamtho me nasî Kristu amn̂e.

Tapi yewtontho po n̂ewruyas amn̂e Beren po,

kesî Kaan Karitan,

ketken̂e tî.

43 Ero wa tî ketken̂e.

N̂eseseyukyatken̂e mak iitono komo Noro poko.

44 Tahsîcerî kr̂a,

ketken̂e tî anarî kom hara.

Ahsîra rma tko xatken̂e.

Ero wa tî xatken̂e.

45 Ero yinhîrî porisia komo takî tî n̂etîrametken̂e cen̂epen̂enhîrî komo yaka hara.

Parisew komo tî n̂en̂epetken̂e,

tîmsom pokono yenîn̂e komo marha.

Ero ke n̂examro yaka cetken̂e hara.

Ahce kacho ekîhra mehcow hara kica?

ketken̂e tî n̂examro yîwya so.

46 On wara tî ketken̂e porisia komo,

Kirwan̂he ro mak tîmtapotaxmu Mîk Noro,

anarî exihra ro mak nasî ero wa tîmtapotaxmu,

ketken̂e tî.

47 Kica,

ketken̂e takî tî Parisew komo yîmtaka so.

Ahce kacho ero wa mîîketu kica?

Amyamro meero tak mesewkukmacow hara?

ketken̂e yîwya so.

48 Noro pona ma re n̂een̂at ha Parisew komo,

kayaritomo kom ha?

ketken̂e.

49 Cetîwîrîmaxmu me mak naxe Noro yentan̂e komo Moises pen nmewretho ponarora cexirî ke so kica.

Ero wa tî ketken̂e porisia komo ya.

50 Taa,

iito rma tî xakn̂e Nikonemu.

Parisew rma tî mîk xakn̂e,

kosope tî cekn̂e Xesusu mtapotarî yentaxi noro rma.

51 On wara tî kekn̂e noro Parisew komo ya,

Yîmtapotarî xa ka centapore nai ha ke takîhso en̂ekachome kîwya so.

Kicicme masî kica,

kahra ro mak cexpore nasî yîmtapotarî yentara ka kexitaw so.

Ero wara rma kesî kpanatametopo komo,

kekn̂e yîwya so.

52 Kica,

ketken̂e takî tî yîmtaka Parisew komo,

Noro poyino marha na amoro Karireia pono ha?

Kaan Karitanî ika enko ke.

Karireia pono komo exihra ro mak nasî kweronoman̂e komo,

kacho enko,

ketken̂e.

53 Ero wa kacho yentache tak tîmîn yaka so tî cetken̂e hara Parisew komo.

Ero wa tî cetken̂e.