5.000 Komo N̂erewusmesî Xesus
6
Ero yinhîrî tak miya cekn̂e Xesus tuuna yeco pona.
Karireia tî mîn tuuna yosotî.
Ciber̂iates marha tî mîn ero yosotî rma hara.
2 Iito exitaw takî noro yaka mokyatken̂e tooto komo mer̂pono pîn komo.
Tamotosom komo karihtorî ke karitî me xa Xesus n̂esenpekn̂e.
Ero ke ero yipu yenîn̂enho komo tî mokyatken̂e Noro yenso.
Ero wa mokyatken̂e.
Jesus alimenta uma multidão (João 6:1-15)
3 Xesus ka îîpî nawnukyakn̂e,
n̂eremekn̂e tak iina.
Yînpanatanmekrî komo marha n̂eremetken̂e akro.
4 Paskwa pahnoke tak xakn̂e ero yimaw,
Xutew komo yahwotacho.
Ero wa xakn̂e.
5 On wara tak xakn̂e Xesus,
n̂esewyar̂akn̂e takî.
Tooto pen n̂een̂akn̂e tîhyaka tmohsom komo.
Ero ke tak on wara kekn̂e Piripe ya,
Piripe,
ahna tîhcetu moxam yuru yaponso,
kekn̂e.
6 Piripe yukukma xe makî tî xakn̂e Xesus ero wa karî ke.
Iyurmacho komo rma tî nîhtînoyakn̂e Noro reha.
7 Okyo,
kekn̂e Piripe.
Iyurmarî yopo xa thakwa ween̂asî.
200 tenariu exitaw puranta,
ero wicakno pona rma re moxam yuru taponukyasî.
Oona rma thakwa n̂enahcas okwe wahra so mak ekamyataw,
kekn̂e Piripe Xesus ya.
8-9 On wara tak kekn̂e Antre yîwya yînpanatanmekrî hara.
Simaw Petru yakno mîk xakn̂e Antre ha.
Tan nasî rikomo,
kekn̂e.
Cuure warai me so aixapu cik nasî yîhyaw,
sepata.
5 mak nasî yîhyaw ha re.
Ootî cik marha nasî yîhyaw,
2 mak wahrai komo cik mak.
Moxam yecenarîra thakwa nas okwe,
kekn̂e.
10 Taa,
kekn̂e Xesus,
eremanmekno ciicoko ha,
kekn̂e.
Iito xakn̂e cuupu miya so rma.
Ero ke ero pona n̂eremetken̂e mohxapu komo.
Mer̂pono pîn komo ro mak mîkyam xatken̂e 5.000 ha.
Ero wicakî xatken̂e kîrkomo mak.
Ero wa xatken̂e.
11 Eremache so cuure tak nanîmyakn̂e Xesus.
Kaan yakro ka nîmtapowakn̂e cokorî.
Kir̂wan on okre Apa anmîthîrî amna yuru,
kekn̂e,
Ero wa kache eremaxapu komo yuru tak n̂ekampekn̂e tînpanatanmekrî komo ya.
Ootî marha n̂ekampekn̂e.
Ero yipu poko tak n̂eseresmetken̂e tooto komo tmaxmitaxi ro so okre.
12 Ero wa exiche so on wara tak kekn̂e hara Xesus tînpanatanmekrî komo ya,
Moro rma etîmtoxapu cuure mtîtho,
iyotîthîrî komo marha.
Amehcoko etkurera ehtome ha,
kekn̂e yîwya so.
13 Ero ke tak etîmtoxapu namekyatken̂e n̂examro een yaka so,
12 yaka.
Copoyi cehso ro n̂enkayatken̂e okyo.
5 maknonho mîn xakn̂e cuure yakwenho.
14 Ero wa cirihnî n̂iir̂akn̂e Xesus tooto komo wero ro.
Ero ke on wara ketken̂e n̂examro Xesus poko,
Amn̂e tak anarî mokyas hara kweronoman̂e xa tak,
kachonho Moso ham,
ketken̂e.
15 Ero yinhîrî tak yîhyai so cekn̂e Xesus îh pona xa hara.
Cewn̂e tî cekn̂e,
Noro mak ha.
On wara tî kekn̂e tîropotaw,
Owece men mokyatu.
Oyanmenkera rma kayaritomo me ori xe nat ham okwe,
kekn̂e tî.
Ero ke tî miya cekn̂e.
Ero wa xakn̂e Xesus.
Tuuna Ratari Xesus Cesî
16 Taa,
kokmamyataw tak ecihtaka cetken̂e hara Xesusu npanatanmekrî komo.
Jesus anda na água (João 6:16-22)
17 Kanawa yaka tak n̂esenkayatken̂e eeco pona tîtotome so hara,
Kapanaun pona ha.
Awarpape tak xakn̂e okwe.
Mokuhra rma ka xakn̂e Xesus ero yimaw.
18 Tuuna rakataw rma ka exitaw so nocowonakn̂e xa tak okwe.
Ero ke n̂ekahximekn̂e ro mak tuuna okwe.
19 Kweikwei ketken̂e rma ha re.
Moro na n̂he mak cetken̂e,
5 kirometru mak ha na,
6 ha na anarimaw.
Ero yimaw tak kanawa wece mokyakn̂e Xesus tuuna ratari kopi.
Noro yenîche tak n̂eraswatken̂e ro mak kopi.
20 Erasîra ehcoko kekn̂e tko Xesus yîwya so.
Owî rma Ow hara,
kekn̂e.
21 Ero ke tak tawake xa xatken̂e Xesus yenîrî ke.
Amna yaka esenkak ha,
ketken̂e tak yîwya.
Taa,
esenkache rma tak,
poku saa,
kan̂e wara mak xakn̂e kanawa.
Ecitaw tak xakn̂e Kapanaun yawomrî to rma.
Ero wa xakn̂e.
Kuuru Me Nasî Xesus Waipîn Me Kiin̂e Me Ha, Kacho
22 Taa,
enmapuche tak tuuna imo yeco pono mokyatken̂e xa hara ecihtaka.
Xesus yenso tî re mokyatken̂e.
On wara ketken̂e,
Ahna ya toye hara Xesus?
Kanawa yaw katî toye hara?
Cewn̂e makî cma re xakn̂e kanawa tanî.
Xesus npanatanmekrî komo makî cma re cetken̂e ero yaw.
Esenkapîra xakn̂e Xesus ha ta,
ketken̂e tî.
O pão da vida (João 6:22-71)
23 Ero wa ketaw rma tko yîwya so mokyatken̂e hara anarî komo tak,
kanawa yaw so hara.
Ceseresmatoponhîrî komo yecen̂e tak nawomyatken̂e,
Kir̂wan on okre anmîthîrî Apa,
kekn̂e Kporin komo,
iina nawomyatken̂e.
Ewto pono komo tî mîkyam xatken̂e mohxapu komo,
Ciberiaces pono komo.
24 Tawomuche so tak,
Exihra nai ham Xesus okwe,
ketken̂e tî.
Yînpanatanmekrî komo meero marha exihra nat ham.
Ero ke kaikatko eposo eeco pona hara Kapanaun pona hara,
ketken̂e tî.
Ero ke kanawa yaka takî tî n̂esenkayatken̂e xa hara.
25 Ero yinhîrî tuuna watoche so Xesus tak n̂een̂atken̂e hara.
On wara ketken̂e yîwya,
Apa,
ahcemaw xa wa mîmokye xiya hara?
ketken̂e yîwya.
26 On wara mak n̂eyukyakn̂e Xesus,
Yaaro tan wîîkes awya so,
Cirihnî ciitopo yenîrî yanmera mak mîmohcow oyenso.
Aweseresmarî ke so mak Ow mepocow,
tmaxmitaxi ro cuure tokrî ke mak awya so.
27 Awru komo poko mak ekaritora tak ehcoko ha ke.
Cehcamnosom makî reha mîn awru komo.
Anarî reha nas awru komo hara,
ehcamnopînî reha.
Waipîn me awin̂e komo mîn okre.
Ero yipu reha nîmyasî awya so Tooto me Ewruxapu.
Apapa rma kes awya so,
Mîkro omumuru ha awruman̂e komo rma,
kesî,
kekn̂e Xesus yîwya so.
28 Ai ha,
Apa,
ketken̂e tak mohxapu komo yîwya.
Ahce poko amna nai ha ke Kaan yanmen poko xa cehtome ha?
ketken̂e Xesus ya.
29 On wara xa ehcoko Kaan yanmen poko awehtome so ha,
kekn̂e tak Xesus yîwya so.
Noro yanme mohxapu pona xa encoko.
Ero warai poko xa awexi xe nai Kaan,
kekn̂e yîwya so.
30-31 Ai ha Apa,
ketken̂e hara yîwya.
Ahce wai xa miir̂a ha ke cirihnî,
apona entome tak amna ya?
Maana cma re nokyatken̂e kporin pen komo pahxa pohnîntari cetar̂ataw so.
Ero poko rma kesî Kaan Karitan,
Kah yaino ke iyurmano n̂iir̂akn̂e,
kesî,
ketken̂e yîwya.
32 On wara Xesus n̂eyukyakn̂e,
Yaaro tan wîîkes awya so,
Moises penî reha kah yaino ke awrumara so rma xakn̂e.
Apapa xa awru ro xa nîmyasî,
kah yaino ha.
33 Kah yai mokyasî,
Noro rma awru komo,
Kaan nîmrî ha.
Noro rma waipîn me tak awir̂axe so.
Roowo poko hakno komo rma ero wa n̂iir̂asî waipîn me ha,
kekn̂e hara Xesus yîwya so.
34 On wara tak ketken̂e n̂examro,
Ero yipu ke cma re amna murmes Apa,
miya roro ha,
ketken̂e yîwya.
35 Owî rma Ow ha awru kom ha,
kekn̂e hara Xesus yîwya so.
Akariton̂e komo rma Ow ha.
Awakrono me oyexi xe wasî,
ketaw amyamro owya yîromamnî me ro mak maxe miya roro.
Opona enîche awya so awokru komo xera marha tak maxe miya roro marha.
36 On wara wîîkai awya so,
Owî rma re meen̂axe.
Kah yai mohxapu Mîk ham,
kahra rma maxe opoko okwe,
wîîkai awya so.
37 Opona enîn̂e komo Apapa nîmyasî owya.
On wara naxe yînmîthîrî komo,
Awakrono me oyexi xe wasî,
kexe ahnoro.
Ero wara ketaw owya en̂epera ro mak was hara.
Etocoko,
oyakrono mexera maxe,
kahra ro mak wasî yîwya so.
38 Oyanme ro mak ciino riso mokuhra ro mak wîxakn̂e kah yai.
Oyen̂epen̂enho yanme ciino riso mak kmokyakn̂e.
39 On wara oyexi xe tî nai Apapa,
oyen̂epen̂enho ha,
eroromerono me tî yînmîthîrî komo wahsîya oyakrono komo me.
Ehcamnopîn me ro makî tî wahsîya noro yipu komo ahnoro rma.
Enpakano marha tî wiir̂a amn̂e eromanhîrî kaamo po.
Ahnoro rma tî wenpake oyakrono me tîmxapu kom ha.
Ero wa tî oyexi xe nai oyen̂epen̂enho.
40 On wara naxe anarî komo,
Kaan Mumuru yenîn̂e me rma naxe,
Oyakir̂aman̂e Mîk ham,
kexe Noro poko.
Waipîn me noro yipu komo ciri xe tî nai Noro,
oyen̂epen̂enho.
Ow tak wenpakesî eromanhîrî kaamo po,
kekn̂e.
Ero wa kekn̂e Xesus Xutew komo ya.
41 Taa,
ero yipu yentache Xesus tak nîwîrîyaketken̂e Xutew komo.
Ahce kacho ero wa nîîke ke,
Awru kom Ow ha,
kah yai mohxapu,
nîîke kica?
ketken̂e.
42 Xesus mak mexe Mîk ha,
Xose mumuru mak.
Yîîmî re ceen̂axe.
Nasî marha yîson hara.
Ero ke ahce kacho ero wa nîîke kica,
Kah yai mohxapu Ow,
nîîke kopi?
ketken̂e.
43 Yîmtaka so tko n̂eyukyakn̂e hara Xesus on wara,
Ero wa kahra ro mak ehcoko kica.
44 Opoko ceserepokaxmu me tooto komo n̂iir̂asî Apapa,
oyen̂epen̂enho.
Ero ke ero wa ciriche mak oyakrono me so tak naxe tooto komo.
Noro yipu komo tak wenpakesî eromanhîrî kaamo po.
45 Pahxa rma ero yipu poko mewretken̂e aweronoman̂enhîrî pen komo.
Kaanî npanatanmekrî me tak naxe amn̂e n̂examro ahnoro,
kacho mewretken̂e.
Ero ke on wara wîîkes awya so,
Apapa mtapotarî yentan̂enho komo naxe oyakrono me ahnoro,
yînpanatanmekîthîrî kom ha.
46 Enîhnî Mak Mîk Apapa.
Noro yenîn̂enho exihra ro mak nasî.
Owî tko ween̂asî yîhyai mohxapu me oyexirî ke,
kekn̂e Xesus.
Ero wa kekn̂e.
47 On wara marha kekn̂e yîwya so,
Yaaro tan wîîkes awya so,
opona een̂ataw awya so waipîn me tak maxe miya roro.
48 Ow xa Ow ha awru kom ha,
waipîn me awin̂e kom ha.
49 Maana rma re nokyatken̂e aporin pen komo pohnîntari cetar̂ataw so.
Ero yipu yokn̂enho komo waihyatken̂e rma okwe.
50 Onî reha tak awru komo,
waipîn me awitopo komo reha tak.
Kah yai mohxapu on awru komo,
onîmrî ha.
On tokuche awya so waipîn me maxe okre.
51 Noro rma Ow ha awru kom ha,
waipînî ro ha.
Kah yai kmokyakn̂e awru komo me.
Oyokn̂e me awexitaw so waipîn me tak maxe miya roro.
Opunu rma on ha awru komo.
Ero rma wîmyasî tooto komo ya waipîn me tak ehtome so miyan komo rma,
kekn̂e Xesus yîwya so.
52 Ero wa kacho yentache tak Xutew komo ya n̂eseseyukyatken̂e mak cerewre.
Ahce wa Moso nîmya hara kopi tupunthîrî kuuru komo me hara?
ketken̂e.
53 On wara Xesus n̂eyukyakn̂e hara,
Yaaro tan wîîkes awya so,
Tooto me Ewruxapu puntho tokuhra awexitaw so twaihso thakwa maxe okwe.
Noro kamxukutho yerîhra marha awexitaw so ero wa thakwa maxe okwe.
54 Ero ke opuntho tohcoko.
Okamxukutho eecoko marha.
Ero wa awexitaw so waipîn me tak maxe miya roro.
Kenpakexe so marha amn̂e eromanhîrî kaamo po.
55-56 Awru ro komo me rma nasî opuntho.
Awokru ro komo me marha nas okamxukutho hara.
Ero ke ero yipu ponaro tohcoko,
eecoko marha.
Ero wa awexitaw so tak ohyawno me tak maxe okre,
ahyawno komo me marha was Ow hara.
57 Waipînî ro mak Mîk Apapa oyen̂en̂epen̂enho oona.
Ero ke Noro yanme waipînî ro me marha was Ow hara.
Ero ke oyanme rma waipîn me maxe amyamro hara opuntho yokyataw awya so.
58 Kah yai mohxapu tan ha awru kom ha.
Maana reha nokyatken̂e aporin pen komo reha.
Twaihsom me rma thakwa xatken̂e ero yiipu yokn̂enho okwe.
Opuntho yokyataw reha awya so,
waipînî ro me reha maxe miya roro okre,
kekn̂e hara Xesus yîwya so.
59 Ero wa kekn̂e Xesus Kapanaun po cexitaw.
Xutew komo yesenmetopo yaw cexitaw ero warai poko panatanmekno n̂iir̂akn̂e.
Ero wa xakn̂e.
Xesus Mtapotarî Yentan̂enho Komo N̂etowyaxe
60 Taa,
ero wa kacho yentache on wara ketken̂e yînpanatanmekîthîrî komo mer̂pono pîn,
Ahce wa nîîke hara kopi?
Entan me ro mak kesî kopi,
ketken̂e.
61-62 Yîmtapotarî komo rma tko n̂encekn̂e Xesus.
Ero ke on wara kekn̂e yîwya so,
Meserepoketu ma ero wa kacho poko owya?
Ahce wa tak na mîîket hara amn̂e Tooto me Ewruxapu poko?
Cekenhîrî pona tak men Noro ces hara amn̂e.
Ahce wa tak na mîîketu iina Noro yawomtopo yeenataw awya so?
Meserepoketu xa tak na ero yimaw.
63 On wara men wîîkes awya so,
ero pîntho mak reha on kupunthîrî reha,
karitî me kiin̂e pîn mak ha.
Kekatî reha mîn karitî me kiin̂e ha.
Omtapotarî mencexe roro.
Ekatî me cehsomu rma mîn omtapotarî,
waipîn me awin̂e kom ha.
64-65 Owî tko manwekyaxe okwe,
anarî komo mak ha.
Ero ke wîîka hara awya so,
oyakrono mera ro mak wa maxe awan̂ikîra exitaw Apapa,
wîîka,
kekn̂e Xesus.
Ero wa kekn̂e yîwya so.
Mehxa ro rma tanwekn̂e me nîhtînoyakn̂e anarî komo.
Cekanîn̂e me meero anarînhîrî nîhtînoyakn̂e.
Ero ke ero wa kekn̂e.
66 Ero yimaw tak mer̂pono pîn komo n̂etowyatken̂e yînpanatanmekîthîrî komo rma.
Noro wenari tohra tak xatken̂e.
67 Ero ke 12 komo ya tak on wara kekn̂e hara Xesus,
Ahce wa matu amyamro hara.
Amyamro meero awetow xe mat hara?
kekn̂e yîwya so.
68 Simaw Petru tak n̂eyukyakn̂e,
Apa,
kekn̂e yîwya,
onok yaka ma re amna cee ha ke cetowche?
Amtapotarî mak nasî waipîn me kiin̂e.
69 Kristu xa Noro ham,
kes amna apoko.
Kaan Mumuru ro xa Mîk ham,
waipînî ro Mumuru ha,
kesî marha amna apoko.
Ero warai me xa ahtînoyas amna,
kekn̂e.
Ero wa kekn̂e Simaw Petru Xesus ya.
70 On wara kekn̂e Xesus yîwya so,
Kmen̂eketken̂e so ahnoro rma,
12 komo rma.
Ciabu me rma tko nasî anarînhîrî awakrono komo rma okwe,
kekn̂e yîwya so.
71 Xutas poko tî kekn̂e,
Ciabu kacho ha,
Simaw Iskar̂otes mumuru poko ha.
12 komo poyino rma mîk xakn̂e Xutas,
Xesus yekanîn̂e me cehsom.
Ero wa xakn̂e.