Ero yinhîrî tak Xutew komo yahwotacho me xakn̂e xa hara.

Xerusaren pona tî cetken̂e eseresmaxi ero yimaw.

Ero ke Xesus marha cekn̂e iina.

2 Taa,

Xerusaren po nai n̂ikitho cik wahrai.

Waaca mîtwo nai,

oper̂a yewomtopo to.

Betesta tî mîn tuuna yosotî Ebrew mtapotarî yaro.

Ero yecihtaw xakn̂e 5 mîîmo,

wacamnî komo mak.

3 Ero yaw so tîrapo so xatken̂e okoh komo mer̂pono pîn.

Ewuhnî komo,

yîhrepun komo marha,

apohnî komo marha,

ero warai komo xatken̂e iito.

Tuuna yewcokocokomacho tî momokyatken̂e.

4 Amn̂e xa so tî nîhcekn̂e ancu tuuna yewcokocokoman̂e.

Ewcokocokomaxapu kwaka takî tî n̂emihcatken̂e okoh komo.

Yihcirî me emicixapu takî tî xakn̂e kir̂wan̂he hara okopunhîrî.

Ero wa ehxapu mak xakn̂e kir̂wan̂he,

cewn̂e mak.

Ero wa tî xakn̂e.

5 Taa,

iito xakn̂e kar̂pen,

kîîrî ha.

Pahkî ro makî tî xakn̂e noro yamototoponho,

38 cimn̂ipu tî okwe.

6 Noro tak n̂een̂akn̂e Xesus,

tîrapo thakwa.

Pahkî pokumnî me ehtopo ponaro rma tî xakn̂e.

Ero ke on wara tak kekn̂e yîwya,

Ahce wa awexi xe mai?

Kir̂wan̂he tak awexi xe mai?

kekn̂e.

7 Apa,

kekn̂e noro,

ewcokocokomaxapu kwaka oyan̂e thakwa exihra nas okwe.

Kîwcesî rma ha re.

Oyoponkexe mak okwe anarî komo,

kekn̂e Xesus ya.

8 On wara xa tak kekn̂e Xesus yîwya,

Sai kasko,

awomko ha.

Awamhîrî arko ha,

kekn̂e yîwya.

9 Ero wa kache rma kir̂wan̂he tak xakn̂e okre.

Nawomyakn̂e takî,

taamhîrî marha naar̂akn̂e.

Kepokaretopo po xakn̂e ero wa.

10 Ero ke on wara tî ketken̂e Xutew komo karihtoxapu ya.

Kepokaretopo komo tan hara kaamo.

Ero yipu men arîhra ehcoko,

kacho re tan hara,

ketken̂e tî yîwya.

11 Owya nîîka oyakir̂waman̂enho rma,

kekn̂e tko tî yîwya so.

Awamhîrî arko ha,

nîîka thakwa owya,

kekn̂e tî.

12 Onoke ma n̂e wa ero wa nîîka hara awya,

Awamhîrî arko,

nîîka onoke?

ketken̂e hara yîwya.

13 Apohana ke.

Onoke na Mîk n̂ex ha,

kekn̂e makî tî yîwya so karihtoxapu.

Yîhtînopîra tî xakn̂e tooto pen exirî ke iito.

Yîchew so n̂esen̂epanmekyakn̂e mak Xesus.

Ero ke,

Noro Mîk oyakir̂waman̂e,

kahra thakwa tî xakn̂e.

Ero wa xakn̂e.

14 Ero yinhîrî noro tak n̂een̂akn̂e xa hara Xesus tînakir̂wamathîrî rma.

Kar̂pe tak mas okre,

kekn̂e yîwya.

Ero ke kicicme exihra tak men esko.

Kicicme awexiche xa hara metwîrîme xa tak na okwe,

kekn̂e Xesus yîwya.

15 Ero ke tak cekn̂e hara karihtoxapu.

Xutew kommo ya takî tî n̂esekatîmyakn̂e.

Xesus xa Mîk okarito,

kekn̂e tî yîwya so.

16 Ero wa kacho yentache tak Xesus n̂emetanmekyatken̂e Xutew komo.

Etapacho marha tî nîhtînoyatken̂e.

Ero wa tî xatken̂e kepokaretopo po karihtono rirî ke yîwya.

Ero wa xatken̂e Xutew komo.

17 Taa,

ero wa exiche so on wara kekn̂e Xesus Xutew komo ya,

Mehxa ro rma kir̂wanhe ciino rirî poko nasî Apapa.

Ero wa xa marha was Ow hara.

18 Ero wa kacho yentache Xesus yetapa xe xa takî tî n̂ehtîketken̂e Xutew komo.

On wara ketken̂e Xesus poko,

Kica,

kepokaretopo po tîtken̂e mak ehcoko,

kachonho yewetîra n̂eexi kica.

Apapa Mîkî Kaan ha,

kesî marha kica,

Kaan warai me rma n̂esetacas hara kica.

Ero ke cetapapore kr̂a nasî,

ketken̂e.

Ero wa ketken̂e Xutew komo Xesus poko.

19 Ero wa exiche so on wara kekn̂e hara Xesus yîwya so,

Yaaro tan wîîkes awya so,

tanme ro mak ahce wa so na ciino cirihra ro mak nasî Kaan mumuru.

Tîîm mak n̂een̂asî.

Ahce wa so na ciino riyataw yîwya ero wa xa marha ciino n̂iir̂asî Yumumuru hara.

20 Tumumuru xatî Mîk Apapa.

Ero ke poko cehtopo n̂enpetîkesî yîwya.

Ero ke n̂enpo oroto okopu yakir̂wamacho.

Ero poko meserepokacow ha re oroto.

Amn̂e tak n̂enpesî xa hara yîwya,

cirihnî ciitopo xa takî.

Aweserepokachome xa tak ero yipu n̂enpesi Tumumuru ya.

21 Waixapunhîrî komo meero n̂enpakes Apapa waipîn me tak ehtome so hara.

Ero wa xa marha nasî Yumumuru hara,

waipîn me ciino n̂iir̂as hara.

Tînmen̂ekathîrî komo mak ero wa n̂iir̂asî.

22 En̂ekano cirihra rma nas Apapa.

Omumuru mak wiir̂asî en̂ekano rin̂e me,

kesî Apapa.

23 Ero ke ero warai me Tumumuru n̂iir̂akn̂e cewetîsom me Noro yîhtînotome tooto komo ya ahnoro.

Cewetîsom me Apapa n̂een̂axe,

ero wa xa marha Tumumuru yenî xe so nasî yîwya so hara.

Ero ke cewetîsom me Noro yenîhra exitaw so ero wa xa marha naxe Apapa poko hara,

Noro yen̂epen̂enho poko ha,

kekn̂e Xesus.

Ero wa kekn̂e Xutew komo ya.

24 On wara marha kekn̂e Xesus yîwya so,

Yaaro tan wîîkes awya so,

omtapotarî entacoko,

oyen̂epen̂enho pona encoko marha.

Ero wa awexitaw so waipîn me ro mak tak maxe.

Twaihkaxmu moso ha,

kahra ro mak tak nasî Apapa apoko so.

Waipîn me xa matko maxe twaihsomunhîrî rma.

25 Yaaro tan wîîkes awya so,

Kaan Mumuru mtapotarî tak n̂encexe amn̂e waixapu pen komo.

Oroto rma tko n̂encexe.

Ero ke tak entan̂e komo xa tak pakexe hara.

26 Apapa nasî waipîn me tanme ro mak,

Ero warai me xa marha Tumumuru n̂iir̂akn̂e hara,

tanme ro rma waipîn me xa marha.

Ero wa n̂iir̂akn̂e.

27 En̂ekano rin̂e me marha n̂iir̂akn̂e.

Tooto me Ewruxapu me exirî ke ero wa n̂iir̂akn̂e.

28-29 Eserepokara ehcoko omtapotarî poko.

On wara tak naxe amn̂e roowo cheka ahruxa pen komo,

Kaan Mumuru mtapotarî n̂encexe.

Entarî ke tak pakexe hara.

Kir̂wan̂he ehxapu komo reha pakexe waipîn me ro makî tak.

Kicicme ehxapunhîrî komo reha pakexe twaihkaxmu me hara okwe.

Ero wa naxe ahruxa pen komo amn̂e.

30 On wara wasî,

Ero warai mîk ham,

kahra ro mak wasî oyanme ro tooto komo poko.

Kaan mak ero yipu n̂ekatîmyasî owya.

Noro mtapotarî yencetaw owya,

ero yaw roro mak wîhtînoyasî.

Yaarono me mak en̂ekano wiir̂asî oyanme rono pîn me oyexirî ke.

Apapa yanme mak wasî,

oona oyen̂epekn̂e,

Noro yanme mak ha,

kekn̂e.

Ero wa kekn̂e Xesus Xutew komo ya.

31-32 On wara marha kekn̂e Xesus yîwya so,

Ow mak oyesekatîmyataw,

omtapotarî ponarora rma na matu.

Ero ke on wara wîîkes awya so,

Anarî xa tko nasî oyekatîmn̂e,

yaaro ekatîmn̂e xa tak ha.

33 Xuaw yakro rma re mesencetken̂e opoko.

Yaaro xa kekn̂e noro opoko.

34 Tooto ya oyekatîmtopo ponarora mak wasî.

Yaaro oyekatîmn̂enho mîk Xuaw,

wîîkesî rma tko awya so Kaan nakir̂wamarî me tak awehtome so.

35 Ramha wara cehsom mîk xakn̂e Xuaw.

Aweipon̂e komo me ka xakn̂e,

potuhtoxapu me okre.

Tahwore rma re ka mîxatken̂e noro mtapotarî poko,

weeyu pono wara rma.

Ero wa xakn̂e Xuaw oyekatîmn̂e me.

36 Kir̂wan̂he ciino ritopo poko oyehtopo rma nas oyekatîmn̂e me Xuaw mtapotarî yopono me.

Ero yipu poko oyantomai Apapa.

Kir̂wan̂he ciino cirko omtapotachonho yaw roro ciitîkaxi ro,

kekn̂e owya.

Ero ke,

Kporin komo yanme mohxapu Mîk ham,

kan̂e me rma nasî ero yipu poko oyehtopo.

37 Taa,

Apapa oyekatîmyakn̂e awya so,

oyantomekn̂e,

Noro rma.

Noro mtapotarî yentan̂enho pîn komo mak amyamro,

Noro yenîn̂enho pîn komo marha.

38 Yîmtapotarî ponarora ro mak mat ham.

Enko,

Noro yanme mohxapu rma Ow ha.

Wara rma opona enîhra maxe okwe.

39 Kaan Karitanî rma re meen̂axe.

Waipîn me tak taxe okre Kaan Karitan poko kexitaw so,

mîîkexe ha re.

Yaaro,

oyekatîmtopo rma mîn Kaan Karitan.

40 Wara rma,

Waipîn me cma re ow miir̂asî,

kahra ro mak maxe okwe owya.

41 Kir̂wan Amoro ham okre,

kacho ponarora rma wasî tooto mtapotarî ponarora.

42 Kaan xera awehtopo komo rma ween̂asî.

Noro xe awehtopo komo exihra ro mak wa nas aropotaw so okwe.

43 Apapa yanme mohxapu Ow ha,

wîîkes ha re awya so.

Wara rma Ow manwekyaxe kica.

Tanme ro mak anarî mokyataw apanatanmekn̂e komo noro mtapotarî tak mewehcaxe.

44 On wara mak maxe ha ke,

Kir̂wan amoro ham okre,

kacho yenta xe maxe tooto komo mtapotarî mak.

Kaanî mtapotarî ponaro xa cexpore nasî,

Kir̂wan̂he mai ham okre,

kacho ponaro xa,

kahra maxe okwe.

Ero ke ahce wa ma re opona meen̂at ha?

Pîra thakwa maxe okwe,

kekn̂e Xesus yîwya so.

45 Taa,

on wara wîîkes hara awya so,

kekn̂e xa hara Xesus yîwya so,

Ahce warai me xa katî Ow mîhtînoyat ha?

Apapa ya kicicme awehtopo komo yekatîmn̂e me katî Ow mîhtînoyat ha?

Pîra,

Ow pînî rma wekatîmyasî.

Moises pen pona meen̂axe,

noro penî rma nasî kicicme awehtopo komo yekatîmn̂e me.

46-47 Noro penî mtapotarî yewetîra rma maxe okwe.

Ewehcataw ketaw ha re Ow meero marha mewehcaxe ha re.

Oyekatîmn̂enho rma mîk xakn̂e Moises pen.

Manwekyaxe makî tko yînmewrethîrî.

Ero ke ahce wa thakwa re omtapotarî mewehcat hara?

kekn̂e.

Ero wa kekn̂e Xesus Xutew komo ya.