Taa,

ero yinhîrî on wara kacho tak n̂encekn̂e Kporin komo,

On wara tî ketu Parisew komo apoko,

Yaake xa tak n̂ehtîkexe Xesus npanatanmekrî komo,

Xuaw npanatanmekrî komo yopo.

Emicinono marha tî n̂iir̂a Noro hara mer̂pora,

Xuaw yopo,

ketu tî apoko,

kacho n̂encekn̂e Xesus.

2 Emicinono cirihra rma tko xakn̂e Xesus.

Yînpanatanmekrî komo mak emicinono n̂iir̂atken̂e.

3 Wara rma ero wa kacho yentache Xuteia poi tak cekn̂e Xesus,

Karireia pona n̂etîramekn̂e hara.

4 Samaria petî pore nai Karireia yesamarî.

Ero ke ero yaw cekn̂e Xesus.

5 Ero wa tîcetaw Samaritanu yewton pona tak n̂epatakekn̂e.

Sika tî mîn xakn̂e ewto yosotî.

Ero mîtwo xakn̂e naatî yewtîtho.

Xako pen mararîntho tî mîn xakn̂e,

tumumuru ya yînmîthîrî,

Xose pen ya ha.

6 Iito xakn̂e tuuna,

Xako pen nahtotho.

Iina tak Xesus n̂epatakekn̂e kamarakataw.

Ero ke tak ahtoxapu mîtwo n̂eremekn̂e cekar̂karî ke.

Mooxe tmokrî ke thakwa tî wa n̂ekarkekn̂e.

7 Iito exitaw Xesus wooxam takî tî mokyakn̂e tuuna yanîmso.

Samaria pono tî mîk xakn̂e wooxam.

On wara tî kekn̂e Xesus yîwya,

Aaci,

owokru ek ha tuuna,

kekn̂e tî yîwya.

8 Yînpanatanmekrî komo tko cetken̂e ewto pona erewsî yaponso.

Ero ke iito exihra xatken̂e wooxam mokyataw.

Ero yimaw tî,

Owokru ek ha,

kekn̂e Xesus wooxam ya.

9 Okyo,

kekn̂e takî tî wooxam Xesus ya,

ahce kacho,

Owokru ek ha,

mîîke hara owya?

Xutew mexe re Amoro ha ta,

Samaritanu wosîn ow ha.

Samaritanu komo mtapotaren̂e pîn amyamro Xutew komo,

kekn̂e tî wooxam yîwya.

10 On wara tî kekn̂e hara Xesus yîwya,

Kir̂wanî ro tîmî xe nai Kaan awya awokru.

Camkî mai ham ero poko.

Camkî marha mai ham opoko hara,

Owokru,

kan̂e poko.

Camkîra awexitaw ketaw re,

owya xa matko,

Owokru,

mîîkarî.

Ero ke awokru wîmrî ha re awya waipîn me ciino rin̂e ha,

kekn̂e tî Xesus.

11 N̂oon̂o,

kekn̂e takî tî wooxam,

Ahn̂i xa ma re manîmya hara ero yipu tuuna,

waipîn me ciino rin̂e?

Anîmtopo exihra ween̂asî ahyaw.

Yuhnaw ween̂asî on okwe tuuna,

kekn̂e tî.

12 Kporin pen nîmîtho on ahtoxapu,

Xako pen nîmîtho.

On poi tî n̂eer̂akn̂e noro pen,

yumumuru pen komo marha.

Iyoh komo marha tî n̂eer̂atken̂e oper̂a komo,

paaka kom ha tî.

Noro pen yopono ma re Amoro awya?

kekn̂e hara tî wooxam.

13 On wara tî Xesus n̂eyukyakn̂e,

On poi een̂e komo twokru xe xara naxe amn̂e.

14 Onîmrî poi een̂e komo reha twokru komo xera ro mak tak naxe miya roro.

Eroromero tak nasî yîropotaw so tuuna pîtho wara.

Waipîn me ro mak ciin̂e komo rma mîn onîmrî ha tuuna,

kekn̂e tî Xesus wooxam ya.

15 N̂oon̂o,

kekn̂e hara tî wooxam,

owokru ek ha ke ero yipu tuuna.

Erî xe xa wasî owokru xera tak oyehtome amn̂e,

tuuna yanîmso mokuhra tak oyehtome ha,

kekn̂e tî Xesus ya.

16 Aan̂o ka an̂ihta ha ke,

kekn̂e hara tî Xesus yîwya.

Ero yinhîrî tak noro yakro amohcoko hara,

kekn̂e tî.

17 In̂omnî ow ha okwe,

kekn̂e hara tî wooxam.

Yaaro mîîkesî,

aaci,

Oyin̂o exihra nasî,

mîîkesî,

kekn̂e tî Xesus yîwya.

18 Yaake rma xatken̂e aan̂onhîrî komo,

5 rma.

Anarî yakro tak masî aan̂o pînî rma hara,

kekn̂e tî Xesus yîwya.

19 Ai ha,

weronomano rin̂e xa Amoro ham n̂oon̂o.

20 On îh po mak amna porin pen komo nahwowatken̂e ponaro cehtopo komo poko.

Anarme mîîkexe amyamro Xutew komo reha.

Xerusaren po mak Kporin komo poko tahwotapore nasî,

mîîkexe,

kekn̂e tî.

21 Aaci,

kekn̂e hara tî Xesus yîwya,

yaaro tan wîîkes awya,

amn̂e tak on po Kporin komo poko ahwotara maxe.

Xerusaren po marha Noro poko ahwotara maxe.

22 Onoke xa mîk ponaro awehtopo komo?

Camkî mak maxe noro poko.

Amna reha camkîra nasî.

Kaan xa Mîk ponaro amna yehtopo.

Xutew komo poyino rma nasî akir̂wamano rin̂e me.

23 On wara tak naxe amn̂e Apapa poko tahwotaxmu komo,

yaarono me xa tak naxe Noro poko cekatî ke so xa.

Ero wa tpoko tahwotaxmu komo Apapa n̂epor̂asî.

24 Ekatî me mak nasî Kaan.

Ero ke awekatî ke so xa marha Noro poko tahwotapore nas hara.

Yaarono me marha Noro poko tahwotapore nasî.

Ero wa mak Kaan poko tahwotapore nasî,

kekn̂e tî Xesus wooxam ya.

25 Ai ha n̂oon̂o,

kekn̂e tî wooxam.

On warai ow,

Mesias mohtopo ponarono xa ow ha.

Kristu kacho tî Mîk,

Noro mohtopo ponarono ow ha.

Noro mokuche takî tî kîhcamhoketîketu so miyan poko rma,

kekn̂e tî Xesus ya.

26 Noro rma Ow ha,

Mesias,

kekn̂e takî tî Xesus.

Awakro kîmtapowasî Noro rma Ow ha,

kekn̂e tî yîwya.

Ero wa tî kekn̂e Xesus Samaritanu komo wosîn ya.

27 Taa,

ero yinhîrî tak Xesus npanatanmekrî komo mokyatken̂e hara.

Wooxam yakro yîmtapotarî ke n̂eserepoketken̂e.

Ahce poko mîmtapowatu?

Ahce kacho noro yakro mîmtapowa ha?

kahra tko xatken̂e yîwya.

28-29 Ero yinhîrî tak ewto pona cekn̂e hara wooxam.

Iito rma nînomyakn̂e twer̂anthîrî tuuna mîtwo rma.

On wara takî tî kekn̂e ewto pono komo ya,

Oyehtoponho yekatîmtîkan̂e wenwo mînto kopi.

Kristu xa na Mîk owya.

Amohcoko xe ka enso,

kekn̂e tî wooxam yîwya so.

30 Yîmtapotarî yentache tak ewto pono komo takî tî cetken̂e Xesus yenso.

Ero wa tî cetken̂e.

31 Taa,

mokuhra ka exitaw so on wara ketken̂e Xesus npanatanmekrî komo yîwya,

Apa,

meseresmesî cma re,

ketken̂e.

32 Nasî rma wa erewsî ohyaw.

An̂entorî komo mîn onahrî,

kekn̂e yîwya so.

33 Kopi,

moko ha ma yînahrî yekn̂e kopi,

ketken̂e n̂examro.

34 On wara Xesus kekn̂e yîwya so,

Oyen̂epen̂enho yewetîtopo xa nasî onahrî me.

Yîmtapotachonhîrî yaw roro ciino wiitîkesî.

Ero wa oyehtopo rma nasî onahrî me.

35 Amyamro hara ahce wa mîîketu?

On wara mîîkexe,

4 nuun̂i exiche nucwasî tak knatîrî yeperîrî.

Ero yimaw mak mîîmo yaka tak cenmekpore nasî,

mîîkexe.

Ero wa kahra tak ehcoko.

On wara xa matko wîîkes awya so,

mararî encoko miyanî rma.

Cucure rma wa nasî naatî yeperîrî.

Ero ke cenmekpore tak nasî oroto rma.

36 Cepethîrî komo nahsîyaxe enmekn̂e komo.

Waipîn me marha naxe yîn̂enmekîthîrî komo.

Ero ke tawake naxe naatî ciin̂enho komo enmekn̂e komo yakro rma.

37 Yaaro ketken̂e poritomo pen komo on wara,

Anarî komo ka naatî n̂iir̂axe.

Amn̂e tak anarî komo xa hara epererî n̂enmekyaxe hara,

ketken̂e.

38 Ero wara rma maxe amyamro.

Anarî komo natîrî yeperîrî wece on̂en̂epetho komo amyamro.

Ciitopo poko ka n̂examro n̂ekaricetken̂e,

ekaritora rma mîxatken̂e amyamro.

Ero ke n̂examro natîtho yeperîrî rma menmekyaxe amyamro hara,

kekn̂e.

Ero wa kekn̂e Xesus tînpanatan- mekrî komo ya.

39 Taa,

ero yimaw mer̂pono pîn komo tak n̂een̂atken̂e Xesus pona iitono komo,

Samaritanu kom ha.

Wooxamu mtapotarî yanme tî Noro pona n̂een̂atken̂e.

Oyehtoponho n̂ekatîmtîka Noro kopi,

karî ke tî Noro pona n̂een̂atken̂e.

40 Ero ke Xesus yaka takî mokyatken̂e iitono komo.

On wara ketken̂e,

Tanî n̂he cma re ka menmayasî amna yaw,

ketken̂e yîwya.

Ero ke iito ka n̂enmayakn̂e Xesus yîhyaw so 2 kaamo.

41 Iito exitaw tak Noro pona tak n̂een̂atken̂e mer̂pono pîn komo xa hara,

yîmtapotarî yentarî ke tak.

42 Ero ke on wara tak ketken̂e iitono komo wooxam ya,

Amtapotarî yanmera tak amna n̂een̂asî Xesus pona.

Oroto tak yîmtapotarî xa amna n̂enta.

Ero ke,

Kristu xa Mîk ham,

ahnoro roowo pono komo yakir̂waman̂e ham,

kesî tak amna Noro poko,

ketken̂e yîwya.

Ero wa ketken̂e iitono komo wooxam ya.

43 Taa,

ero yinhîrî asakî ro enmapuche Karireia pona tak cekn̂e Xesus.

44 On wara cma re ka Xesus kekn̂e pahxa n̂he,

Kaanî mtapotarî yekatîmn̂e mtapotarî yentara naxe noro por̂mamtoponhîrî pono komo reha okwe,

kekn̂e.

Wara rma iina rma cekn̂e hara,

45 Tawake rma tko xatken̂e Karireia pono komo Noro poko iina epatakache.

Pahxa n̂he tî ka paskwa yimawno me eseresmaxi cetken̂e n̂examro Xerusaren pona.

Iito cexitaw so tî n̂een̂atken̂e cirihnî ciitopo Xesus ya.

Ero ke tawake tî xatken̂e tîhyaka so mokrî ke.

46 Amn̂e tak Kana pona cekn̂e hara.

Karireia pono rma mîn Kana.

Pahxa wooku n̂iir̂akn̂e tuunanhîrî iina xa marha cekn̂e hara.

Taa,

iito exitaw meye n̂he xakn̂e kayaritomo maywen Kapanaun po.

Yumumuru tî xakn̂e okoh me.

47 Noro takî tî n̂encekn̂e Xesus yekaci.

Karireia pona tak mokye hara Xesus Xuteia pona toxapunhîrî,

kacho tî n̂encekn̂e.

Ero ke Xesus yaka tak mokyakn̂e.

On wara kekn̂e yîwya,

Apa,

waiporo xa nasî omumuru okwe,

Ero ke cma re mîmokyasî akir̂wamaxi,

kekn̂e.

48 On wara Xesus n̂eyukyakn̂e hara,

Opona enîn̂e pîn mak amyamro okwe.

Cirihnî ciitopo yeen̂ataw mak awya so opona meen̂axe,

aweserepokacho komo yeen̂ataw mak awya so okwe,

kekn̂e yîwya.

49 Apa,

kekn̂e rma tko kayaritomo maywen,

mîmokyasî cma ha re yohno.

Waihya men omumuru okwe,

kekn̂e Xesus ya.

50 Etok hara,

kekn̂e tak Xesus yîwya.

Kir̂wan̂he tak nas amumuru,

kekn̂e.

Taa,

ero wa ham,

kekn̂e tak kayaritomo maywen,

Ero ke cekn̂e hara.

51 Tîcetaw rma tak esama yaw n̂esepor̂akn̂e tmaywen komo yakro.

Kir̂wan̂he tak nasî amumuru,

ketken̂e tî yîwya.

52 Ai ha,

kekn̂e takî tî kayaritomo maywen.

Ahto kaamo xa kir̂wan̂he tak n̂ehxe?

kekn̂e tî.

Kokon̂oro rma ero wa xakn̂e 1 oora to exitaw kaamo,

ketken̂e tî yîwya.

53 Yaaro nîîkai ham Xesus,

kekn̂e tî yîîm.

Kir̂wan̂he tak nasî amumuru,

nîîkai owya,

ero yimaw xa n̂ecocoronkai ham,

kekn̂e tî.

Ero ke Xesus pona takî tî n̂een̂akn̂e noro.

Yipici marha tî ero wa xakn̂e,

yîmxîkrî komo marha tî.

Ahnoro yîhyawno komo tî Xesus pona n̂een̂atken̂e.

Ero wa tî xatken̂e.

54 Ero yimaw 2 me tak xakn̂e cirihnî ciitoponho Xesus ya.

Ero wicakî mak ka n̂iir̂akn̂e Karireia pona tmokuche Xuteia poi.

Ero wa xakn̂e.