Taa,

Parisew xakn̂e iito,

Nikonemu tî osotî.

Xutew komo yenîn̂e tî mîk xakn̂e.

2 Noro tak mokyakn̂e kosope Xesus yaka.

On wara kekn̂e yîwya,

Apa,

on wara kes amna apoko,

Kaan yanme kpanatanmekn̂e xa Mîk ham okre,

kes amna apoko.

Enko xe,

cirihnî mko miir̂asî emapona.

Ero wa so ciino cirihra ro mak wa tasî kakronomara exitaw Kaan,

kekn̂e yîwya.

3 On wara tko Xesus n̂eyukyakn̂e,

Yaaro tan wîîkes awya,

cewrupore xa hara men nasî.

Ero wa ewrura xa hara exitaw so tooto komo Kaan maywen me cehtopo komo poko camkî ro mak naxe okwe,

kekn̂e yîwya.

4 Okyo,

kekn̂e Nikonemu.

Ahce wa thakwa ma re cewruya hara kopi rikomo wa hara?

Poritomo rma ma cewomya knocwan ropotaka kewrutome xa hara kopi?

kekn̂e yîwya.

5 On wara Xesus n̂eyukyakn̂e,

Yaaro tan wîîkes awya,

tuuna yanme cewrupore nas hara.

Kir̂wanî ro Yekatî yanme marha cewrupore nasî.

Ero wa ewrura awexitaw so Kaan maywen mera thakwa maxe okwe.

6 On wara nasî kewrutopo,

tuhn̂em yanme kewruche so tuhn̂em me xa marha tasî.

Kir̂wanî ro Yekatî yanme kewruche tak ekatî me marha tak tas hara.

7 Eserepokara cexpore nasî omtapotarî poko,

Cewrupore xa hara men nasî,

kacho poko.

8 Ocowo wara rma naxe Kir̂wanî ro Yekatî yanme ewruxapu komo.

Tanme ro mak cesî ocowo.

Apepenîmrî rma re mencexe.

Mîntononhîrî xa tan ocowo,

kahra thakwa maxe.

Iina xa cesî ocowo tantononho,

kahra marha maxe.

Ero wa xa marha naxe Kir̂wanî ro Yekatî yanme ewruxapu komo,

kekn̂e Xesus.

9 Ahce warai ya wa mîîke hara kopi?

kekn̂e tak Nikonemu yîwya.

10 On wara Xesus n̂eyukyakn̂e,

Ixaw Yana komo panatanmekn̂e amoro ha ta.

Ero yipu poko camkî ma mai ke.

11 On wara men wîîkes awya,

tohnawno poko yîmtapotara nas amna,

tîn̂enîthîrî mak amna n̂ekatîmyas awya so.

Amna yentan̂e mera makî tko maxe okwe.

12 Roowo po awehtopo komo poko makî ka kpanatanmecow so.

Ero yipu poko Ow manwekyaxe.

Soroso Ow manwekyaxe kah yawno poko tak apanatanmekyataw so hara owya,

kekn̂e Xesus.

13 On wara marha kekn̂e,

Kah yaka toxapunhîrî exihra ro mak nasî tooto reha.

Tooto me Ewruxapu makî reha nîhcekn̂e iitonhîrî rma.

14-15 On wara xakn̂e Moises pen,

okoyi me ciixapu nanîmyakn̂e weewe pona.

Ero wa xa marha tak roowo pono komo nanîmyaxe Tooto me Ewruxapu hara amn̂e.

Ero wa Noro n̂iir̂axe waipîn me ro mak tak ehtome so Noro pona enîn̂e kom ha.

16 Twaihsom me thakwa xatken̂e roowo pono komo ahnoro.

Yîpînîn yaw so tko xakn̂e Kaan.

Ero ke Tumumuru tak nîmyakn̂e cewn̂anînhîrî rma okwe twaihsom mera tak ehtome so.

Waipînî ro me xa matko naxe Noro pona enîn̂e komo.

17 Ero wa ehtome so tumumuru n̂en̂epekn̂e Kaan oona.

Twaihkaporemu kr̂a amyamro,

kan̂e mera ro mak n̂en̂epekn̂e.

Yukurunpeno rin̂e me mak n̂en̂epekn̂e oona.

18 Twaihkaporem moso okwe,

kahra ro mak nasî Kaan Tumumuru pona enîn̂e komo poko.

Noro pona enîn̂e pîn komo poko reha,

Twaihkaxmu moso okwe,

kesî Kaan oroto rma.

Cewn̂an Yumumuru yosotî ponarora exirî ke ero wa kesî.

19 On wara xatken̂e roowo pono komo,

n̂examro weyuru cma re Kaan n̂en̂epekn̂e yîcheka so.

Yiixera mak xatken̂e okwe.

Awarpan xe mak xatken̂e kicicitho pokono me cexirî ke so.

Ero ke,

Twaihkaxmu me maxe okwe,

kesî Kaan noro yipu komo ya.

20 Ero wa thakwa naxe kicicitho pokono komo,

weeyu xera ro mak naxe okwe.

Ero ke ero pona mokuhra ro mak naxe okwe.

Kicicme oyehtopo n̂een̂axe kopi weeyu pona owcetaw,

kexe mak okwe noro yipu komo reha.

21 Yaarono komo reha mokyaxe weeyu pona esenposo rma.

Ero ke Kaan yewtîn̂e xa mîk ham okre,

kexe tak n̂examro yenîn̂e komo,

kekn̂e.

Ero wa kekn̂e Xesus Nikonemu ya.

22 Taa,

ero yinhîrî miya tak cekn̂e Xesus Xuteia rowon pona.

Yînpanatanmekrî komo marha cetken̂e akro.

Yaake kaamo xatken̂e iito Xesus yakro.

Ero yimaw emicinono n̂iir̂akn̂e Xesus.

23 Ero yimaw Enon po tî xakn̂e Xuaw Sarin pahnoke.

Iito emicinono n̂iir̂akn̂e porin me exirî ke tuuna iito.

Iina mokyatken̂e roro tooto komo emiciso.

24 Xuaw pen tî ka ahrura xatken̂e ero yimaw.

Ero wa tî xakn̂e.

25 Ero yinhîrî tak Xuaw npanatanmekrî komo n̂esencetken̂e Xutew komo yakro.

Cekorokapore nai Kaan mîn yaka kîwtotome so,

kacho poko tî n̂esencetken̂e.

N̂eseseyukyatken̂e makî tî okwe ero poko.

26 Ero yinhîrî Xuaw yaka takî tî cetken̂e hara noro npanatanmekrî komo.

Apa,

ketken̂e tî yîwya,

Pahxa Xotaw yeco po ka kexitaw so anarî mokyakn̂e kîhyaka so.

Kakir̂waman̂e Mîkro ha,

mîîkekn̂e Noro poko.

Noro marha emicinono rirî poko nas okwe.

Ero ke tak yîhyaka cetîkexe tooto pen ahnoro okwe,

ketken̂e Xuaw ya.

27-28 On wara tî kekn̂e Xuaw yîwya so,

Kir̂wan̂he rma nasî ero wara.

Kanme ro so esemyarîtora tasî.

Kaan mak kemyarîcesî tanme ro mak.

28 Amyamro rma mencetken̂e omtapotarî.

Kristu pîn ow ha.

Noro ywapu en̂epexapu mak ow ha,

wîîkekn̂e awya so.

Ero wa kachonho mencetken̂e.

29 Ahce wa cipitaxmu nai awya so?

Tawake xa nasî cipici yahsîtopo poko.

Ahce wa nai cipitaxmu maywen hara awya so?

Iito rma re nasî,

n̂een̂asî makî tko yipitacho.

Nahwowasî rma cipitaxmu mtapotarî yentarî ke.

Ero ponaro mak nasî.

Ero ke tawake xa nasî entache.

Ero wa xa marha kahwowas ow Xesus poko.

30 Oyopono me cehtîkaxmu Noro.

Yîxawyakan me cehtîkaxmu mak ow hara.

31 Taa,

on wara nasî kah yai mohxapu,

kyopono me xa nasî miyan komo yopono me rma.

Roowo pono ro komo naxe roowo pono ponaro mak.

Roowo pono poko mak thakwa nîmtapowaxe.

Ero warai pîn mîk kah yai mohxapu.

Kyopono ro xa tak Mîk Noro.

32 Tîn̂enîthîrî mak n̂ekatîmyasî Noro,

tîn̂entathîrî marha n̂ekatîmyasî.

Entan̂e pîn me makî tko naxe tooto komo okwe.

33 Anarî komo rma tko naxe yîmtapotarî yentan̂e me.

On wara naxe noro yipu komo,

Yaaro tîmtapotaxmu mak Mîk ham Kaan,

kan̂e me rma naxe.

34 On wara nasî Kaan n̂en̂epetho oona roowo pona,

Kaanî mtapotarî mak n̂ekatîmyasî kîwya so.

Yîwya marha Kaan nîmyasî Cekatî.

Nîmyasî ro mak yîwya yîmton me ro mak,

On wicakî mak wîmyasî,

kahnî me mak.

35 Taa,

on wara nasî Kîîm komo Tumumuru poko,

Yiixe xa nasî.

Miyan komo yosom me marha n̂iir̂akn̂e.

Ero wa Tumumuru n̂iir̂akn̂e Yîîm.

36 Noro Mumuru pona enîn̂e komo waipînî ro me tak naxe miya roro.

Noro pona enîn̂e pîn komo reha waipîn me exihra thakwa naxe okwe.

Noro yipu komo poko reha nîrwonasî Kaan okwe etîrwoxinkan me ro mak.

Ero wa nasî.