Taa,

3 kaamo exiche tak on wara xatken̂e Kana pono komo.

Karireia pono rma mîn Kana.

Iitono komo n̂eseresmetken̂e tpoyino komo pitacho me.

Xesus yon marha n̂eseresmekn̂e akro so.

2 Xesus marha nan̂ikyatken̂e,

yînpanatanmekrî komo marha.

Ero ke n̂examro cetken̂e iina eseresmaxi.

3 Iito exitaw so ceseresmaxmu komo wokru takî tî n̂enahcakn̂e,

uupa yukun.

Ero ke Xesus ya yîson n̂ekatîmyakn̂e,

Kwokru komo n̂enat okwe,

kekn̂e yîwya.

4 Ahce kacho owya mîîke hara yeme?

kekn̂e hara Xesus.

Cirihnî ciin̂e me oyesenpotopo mera ka nai,

kekn̂e mak yîwya.

5 On wara tak kekn̂e Xesus yon wok yetakan̂e komo ya,

Noro men ewetîcoko ahce na poko awantometaw so,

kekn̂e.

Ero wa kekn̂e yîson.

6 Taa,

iito xakn̂e 6 tuuna yen,

toopu yahtoxapu.

Xutew komo tunarî yen mîn xakn̂e ero yipu,

esemokacho komo yen ha.

Porin me so xakn̂e 75 ritru wicakî so,

115 ritru anarimaw.

7 Ero ke on wara tak Xesus kekn̂e wok mîtîn yanton komo ya,

Tuuna tak arkacoko wok yenho yaka so,

copoyinkacoko rma,

kekn̂e yîwya so.

Ero ke narketken̂e tak enhîrî yaka so,

xoo xoo xoo powa,

copoyi so tak xakn̂e wok yenho mko.

Ero wa narîhcetken̂e tuuna ke.

8 Taa,

ero poi tak anîmcoko wok mîtîn wokru ha,

kekn̂e tak Xesus arîhton̂enhîrî komo ya.

Ero ke tak wok mîtîn wokru naar̂atken̂e.

9 Noro takî tî nukukmekn̂e tuunanhîrî wok me ciixapu.

Oroto ciixapu tan ha,

kahra tko tî xakn̂e.

Anton komo reha tuunanhîrî me nîhtînoyatken̂e,

anîmn̂enhîri kom ha.

Taa,

wooku yukukmache yîwya n̂eserepokekn̂e.

Ero ke cipitaxmu ya tak kekn̂e on wara,

10 Anarme reha kwokru yetakan̂e ham amoro.

On wara naxe anarî komo reha,

yihcirî me ka tpoxwem n̂etakexe wooku.

Erîche n̂he tak poxumnî n̂he n̂etakexe hara.

Amoro reha oroto mak metake ham tpoxwem xa okre,

kekn̂e yîwya.

Ero wa kekn̂e wok mîtîn.

11 Ero wa cirihnî n̂iir̂akn̂e Xesus iito cexitaw Kana po,

Karireia po ha.

Kar̂pe cehtopo tak n̂enpekn̂e ero yipu cirirî ke.

Kaan mumuru me cehtopo marha n̂enpekn̂e.

Ero warai me cesenpotopo n̂ihciyakn̂e mak ha ka ero yimaw.

Ero yipu yenîrî ke Xesus pona xa tak n̂een̂atken̂e yînpanatanmekrî komo.

12 Taa,

ero yinhîrî tak Xesus cekn̂e Kapanaun pona hara.

Yîson marha cekn̂e akro,

akno komo marha,

yînpanatanmekrî komo marha.

Ero wa cetken̂e Kapanaun pona.

Yohno mak iito xatken̂e,

asakî ro mak n̂enmayatken̂e.

13 Ero yimaw Xutew komo yeseresmacho pahnoke tak xakn̂e,

paskwa ha.

Ero ke Xerusaren pona tak cekn̂e hara Xesus.

14 Iito cexitaw Kaan mîn yaka takî cekn̂e.

Iito n̂een̂akn̂e twarawantaxmu komo Kaan mîn mahrimacho yaw.

Paaka komo poko warawanwatken̂e,

oper̂a komo poko marha,

potkuku komo poko marha.

Noro yipu komo nîmyatken̂e puranta pona.

Puranta yosom komo marha xatken̂e iito ceremaxi.

15 Ero ke ososwa tak n̂ekposakn̂e Xesus yîhyotopo komo oco.

Kaan mîn yai kr̂a tak n̂examro n̂en̂epekn̂e,

oper̂a pen marha,

paaka pen marha.

N̂en̂epetîkekn̂e ahnoro.

Puranta yosom komo purantan pen tak pahyakn̂e kr̂a,

puh sarararara.

Yupurantan komo yaponho tak mahrankekn̂e.

16 On wara kekn̂e potkuku yosom komo ya hara,

Miya on aacoko.

Kwarawantatopo me cirihra ro mak ehcoko kica on Apapa mîn,

kekn̂e.

Ero wa Kaan mîn yai en̂epeno n̂iir̂akn̂e Xesus.

17 Ero ke tak on wara kacho nîhtînoyatken̂e yînpanatanmekrî komo,

mewrexapu.

Kir̂wan̂he ro mak exi xe wasî amîn Apa.

Cerewre ro mak ero wa exi xe wasî oyopo ro mak,

kacho.

Ero wa kacho nîhtînoyatken̂e ero yimaw,

Kaan Karitan ha.

18 Ero ka tak on wara ketken̂e Xutew komo Xesus ya ero yimaw,

Cirihnî ika cirko amna wero ro ha,

Kaan yanme rma en̂epeno n̂irî ham Moso,

kachome tak amna ya apoko,

ketken̂e yîwya.

19 Taa,

on warai wiir̂a ham cirihnî,

kekn̂e Xesus yîwya so.

Onî ika yixkacoko Kaan mîn pen.

Ero yinhîrî tak wiir̂as hara.

Osorwaw kaamo mak nasî ciitopo hara owya,

kekn̂e yîwya so.

20 Okre,

ketken̂e Xutew komo.

46 cimn̂ipu xakn̂e on Kaan mîn ciitoponho okyo.

Ero yipu yixkache ma re 3 kaamo mak nai ciitopo hara awya?

ketken̂e yîwya.

21 Tupun ya makî tî wa kekn̂e Xesus,

Kaan mîn,

kacho ha.

Mîîmo me tî n̂etahcakn̂e tupunu rma.

22 Amn̂e tak Xesusu mtapotachonho nîhtînoyatken̂e yînpanatanmekrî komo.

Noro pakache mak waixapunhîrî,

On yipu poko xa ma wa Xesus kai ke?

ketken̂e.

Yaaro kai ham.

Yaaro marha nîîke Kaan Karitan ham,

ketken̂e ero yimaw.

23 Taa,

paskwa yimawno me tak nahwowatken̂e Xerusaren pono komo.

Ero ke iito rma ka xakn̂e Xesus Xerusaren po rma.

Iito cexitaw yaake ro cirihnî n̂iir̂akn̂e.

Ero yipu yenîrî ke tak Xesus yosotî ponaro tak xatken̂e mer̂pono pîn komo.

24 Esekatîmtîkara rma tko xakn̂e Xesus yîwya so yîropotarî komo yenîn̂e me cexirî ke.

Ero warai Mîk Xesus,

kropotarî yenîn̂e ro ha.

25 Ero ke ahce warai xa noro?

kahra ro mak xakn̂e Xesus tooto komo poko.

N̂een̂akn̂e rma wa yîropotarî komo.

Ero wa xakn̂e Xesus.