Kir̂wanî Ro Yekatî Mokyasî
2
Taa,
ero yinhîrî takî iito re rma tî ka xatken̂e Xesus ponarono komo.
Kaan yakro rma tî nîmtapowatken̂e.
Iito re tî nîhtînoyatken̂e Noro yakro tîmtapotacho komo.
Ero yimaw tak Pentekostes me xa tak n̂enmayakn̂e hara.
2 Ero po takî tî kah yawno wara ka n̂ewtunakn̂e ponan̂e.
Ocowo wara tî kekn̂e,
karitî wara xa kopi.
Amn̂e takî tî mîîmo yaw tî n̂ewtunakn̂e hara.
Kar̂pe ro makî tî kekn̂e ero yaw ceremaxmu komo n̂entarî me.
3 Ero yimaw takî tî n̂esenpekn̂e wehto warai hara oco.
Tun̂ke tî xakn̂e.
N̂etakpayakn̂e tak,
iitono komo meretkoso so tî cekn̂e,
potow.
Ero wa tî n̂esenpekn̂e wehto warai.
Ahnoro tî xatken̂e tmeretpoture so.
4 Kir̂wanî ro Yekatî ken̂e marha takî tî xatken̂e ahnoro.
Noro yanme takî tî anarî komo mtapotarî yaro tî nîmtapowatken̂e.
Ero wa tî xatken̂e.
5 Ero yimaw tî iito n̂enmayatken̂e Xutew komo Xerusaren po.
Kaan ponarono komo tî mîkyam xatken̂e.
Mîk hak rowon pono komo tî mîkyam xatken̂e,
roowo poko hakno komo.
6 Ero ke ewtunîmtopo yentache noro yipu komo takî tî mokyatken̂e Xesus ponarono komo yenso.
Mer̂pono pîn tî mokyatken̂e.
Tmokuche so tak n̂eserepoketken̂e xa takî tî.
Tîmtapotarî ro komo yaro so tî n̂encetken̂e yîmtapotarî komo okre.
Ero wa tî n̂encetken̂e.
7 Ero ke n̂eserepoketken̂e ro makî tî entan̂e komo.
On wara tî ketken̂e tîmtapotaxmu komo poko,
Karireia pono komo cma re mîkyam.
8 Ahce wa nîmtapowatu kîmtapotarî ro komo yaro hara kopi?
Anarmerpa so tîmtapotaxmu thakwa reha kîwyam mehxa ro kîmrenai ro so,
ketken̂e tî.
9-11 Pahtu komo tan naxe.
Metu komo marha tan naxe,
Eraw pono komo,
Mesopotamia pono komo,
Xuteia pono komo,
Kapatoxa pono komo,
Pontu pono komo,
Asia pono komo,
Prixia pono komo,
Panpir̂a pono komo,
Exitu pono komo,
Ribya pono komo,
Sirene mîtwono komo mak ha,
Homa pono komo pawana me mohxapu,
ero warai komo tan naxe.
Xutew ro komo tan naxe,
Xutew me ecixapu komo marha.
Xipre pono komo marha tan naxe,
Arabia pono komo,
ero warai kîwyam tan taxe mîn hak poi mohxapu komo.
Noro yipu komo rma cencexe kîmtapotarî ro komo yaro yîmtapotarî komo kopi.
Keserepokacho komo ciitopo Kaan ya n̂ekatîmyaxe okre,
ketken̂e tî entan̂e komo.
12 Ahce wa hara kopi?
ketken̂e tî,
n̂eserepoketken̂e ro makî tî.
Ahce yîhtînomexpo xe nai Kaan,
kîmtapotarî ro yaro so yîmtapotarî komo ke kopi?
ketken̂e tî.
13 Anarî komo reha tî n̂etaporetken̂e mak kica.
Wenatu mak wa ham kica uupa yukun ke ciixan ke ha,
ketken̂e reha kica.
Ero wa tî ketken̂e.
Xesus Pokono N̂ekatîmyasî Petru
14 Taa,
ero yimaw takî Petru takî tî nawomyakn̂e piiri.
11 komo marha tî nawomyatken̂e.
Esenmexapu komo ya tî kekn̂e Petru kar̂pe,
on wara tî kekn̂e,
Ai oyakno komo,
on wara wîîkes awya so,
Xuteia pono komo amyamro,
Xerusaren pono komo marha amyamro.
Awya so wekatîmyasî moxam yehtopo.
Ero ke omtapotarî men ka entacoko.
15 Wenmîra ro mak naxe moxam.
9 to makî ka nasî kaamo.
16 Kweronoman̂e penî mtapotachonho yaw rorono mak moxam.
Pahxa rma tî Xoew pen n̂ekatîmyakn̂e on wara rma kehtopo komo.
17 On wara tî kekn̂e,
On wara kesî Kporin komo awya so,
Anarî me tak kiir̂axe so amn̂e.
Eromanhîrî kaamo pahnoke exitaw amn̂e on wara tak kiir̂axe so,
Oyekatî tak wiir̂asî aropotaka so miyan komo ropotaka rma.
Xoo kan̂e wara rma wasî apona so.
Ero wa Oyekatî wiir̂asî aropotaka so.
Noro yanme omtapotarî yekatîmn̂e me tak naxe amxîkrî komo kîrkomo,
wooxam komo marha.
Ero wa n̂ekatîmyaxe amn̂e.
Enîhnî marha n̂een̂axe kar̂pamxan komo.
Twosotîmsom me marha naxe poritomo kom hara.
18 Ero wa Oyekatî wiir̂asî oyanton komo ropotaka.
Kîrkomo ropotaka wiir̂asî,
wooxam komo ropotaka marha.
Xoo kan̂e wara wasî pona so.
Oyekatî yanme weronomano rin̂e me tak naxe ero yimaw.
19-21 Aweserepokacho komo marha wenpesî ero yimaw awya so.
Kah yawno wenpesî,
roowo pono marha.
Kamxuku wenpesî awya so,
wehto marha,
yîsîn marha.
Ero warai wenpes awya so mer̂pono pînî ro mak.
Kaamo pen marha nawarpanwasî okwe.
Kamxuku wara marha n̂esenpesî nuun̂i hara awya so.
Ero wa men wiir̂as amn̂e Kporin komo kamon pahnoke exitaw.
Ero yimaw tak mîk hak mak nîmtapowaxe Kporin komo yakro tukurunpetopo poko.
Ero wa tîmtapotaxmu komo tak naxe tukurui so ahnoro,
kesî Kaan,
kekn̂e Xoew pen,
kekn̂e tî Petru.
22 On wara marha kekn̂e noro yîwya so,
Ixaw Yana komo amyamro,
omtapotarî rma ka entacoko.
Xesus yehtoponho tan wekatîmyas awya so,
Nasare pononho yehtoponho.
Cirihnî ciin̂enho Mîk xakn̂e,
aweserepokacho komo ciin̂enho xa.
Awero ro so rma ero yipu n̂iir̂akn̂e.
Ero yipu Kaan n̂irpekn̂e yîwya,
Kaan n̂en̂epetho xa Moso ham,
kachome awya so.
23 Kaanî rma tko Noro pen waihkapekn̂e okwe awya so.
Pahxa rma Xesus waihtopo nîhtînoyakn̂e Noro.
Ero wa Xesus waihyas amn̂e,
kekn̂e.
Noro pen tak mahsîpetken̂e kpanatanmetopo komo yewetîn̂e pîn komo ya.
Yîwya so marha mamowopetken̂e okwe.
Ero wa Xesus pen mîwaikapetken̂e okwe.
24 Noro rma tko Kaan n̂enpakekn̂e hara cerewrem ke waihkaxapunhîrî.
Eroromero waypînî ro mak Mîk Xesus.
Ero wa exirî ke Kaan n̂enpakekn̂e.
25-28 Noro poko rma kekn̂e Tapi pen hara,
On wara kekn̂e,
Kporin komo rma ween̂akn̂e oyepatawno me rma.
Omîtwo marha nasî kaari n̂ixa.
Ero ke ahwokan me ro mak wasî.
Kahwocetîkesî xa matko yîmîtwo xa oyexirî ke.
Tahwore marha kîmtapowakn̂e.
Owaiyataw tak cerepore rma kwaihyasî.
Opun menpakes hara,
wîîkesî.
Roowo yatumnaw rma oyexitaw oyahsîpînkara mas amn̂e.
En̂exa rma Ow manîmyas hara.
Aponarono ro xa Ow ha.
Ero ke opuntho meero marha matahnî me miir̂asî.
Ow mîpanatanmekyakn̂e waipîn me kehtopo poko.
Awewru yenîrî ke owya tahwore xa wasî,
kekn̂e tî Tapi pen.
29 Oyakno komo,
ahce wa nai Tapi pen awya so,
kporin pen kom ha?
Twaihso thakwa nasî noro pen.
Tahruso nasî okoputhîrî roowo chew.
Mînto nasî iyochîrî oroto.
30 Weronomano rin̂e rma tko mîk xakn̂e Tapi pen.
Ero ke Kaanî mtapotachonho ponaro rma tî xakn̂e.
On wara tî Kaan kekn̂e yîwya,
Awepamthîrî me nasî Kristu amn̂e.
Kayaritomo me tak noro wiir̂asî awekenhîrî yakan me ha.
Yaaro xa tan wîîkes awya.
Esemîknopîn me ro mak tan wîîkesî,
kekn̂e tî Kaan yîwya.
31 Ero ke yîmtapotachonhîrî ponaro xakn̂e Tapi pen,
Ero ke Kristu yenpakacho n̂ekatîmyakn̂e pahxa rma.
Wehto imo ywaw oyekatî tînomra masî eroromero.
Matahnî me marha miir̂asî opuntho,
kekn̂e tî.
Kristu poko tî wa ero wa kekn̂e.
32-33 Noro rma n̂enpakekn̂e Kaan,
Xesusu rma.
Noro amna n̂een̂akn̂e enpakaxapu.
Ahnoro amna n̂een̂akn̂e.
Ero yinhîrî Noro tak nanîmyakn̂e hara Kaan ceken pona hara.
Iito tak n̂eremanmekyakn̂e tîmîtkoso rma kaari n̂ixa.
Iito cexirî ke tak Kir̂wanî ro Yekatî tak n̂en̂epekn̂e oona.
Tîîmî mtapotachonho yanme rma n̂en̂epekn̂e,
Oyekatî wîmyas amn̂e omxîkrî komo ya,
kachonho yanme ha.
Ero ke Kaan Yekatî tak moko.
Noro yanme mak amna nasî on wara awero ro so.
Noro mtapotarî marha mencexe amna mtai.
34-35 Tapi penî reha tohra xakn̂e kah yaka.
Kristu poko mak kekn̂e noro pen Kaanî mtapotarî yekatîmyataw.
On wara tî kekn̂e,
On wara kekn̂e Kporin komo Oporin ya,
Opanaka erematamko kaari n̂ixa.
Aaxatî pîn komo kr̂a ka war̂mesî.
Anapikrî me ka wiir̂asî,
kekn̂e Kaan Oporin ya,
kekn̂e tî Tapi pen.
Xesus pokono rma mîn n̂ekatîmyakn̂e Kaanî mtapotacho.
36 Ero ke on wara wîîkes awya so Ixaw Yana komo ya,
yaaro tan wîîkes awya so,
Xesus tak men nasî Kporin komo me kopi.
Kristu me marha nasî.
Ero warai me tak Kaan n̂iir̂akn̂e anamowopothîrî komo rma,
kekn̂e tî Petru.
Ero wa tî kekn̂e enso mohxapu komo ya.
37 Taa,
yîmtapotarî yentache tak n̂eserepoketken̂e xa tak entan̂e komo.
Ero ke on wara tî ketken̂e Petru ya,
Xesus nantomatho komo ya ahnoro,
Ai okwe,
ketken̂e,
amna yakno komo,
ahce wa amna nai okwe?
ketken̂e tî.
38 On wara takî tî Petru n̂eyukyakn̂e hara,
On wara xa ehcoko,
Kicicme awehtoponhîrî komo tak men poxunkacoko.
Ero yinhîrî emicicoko tak ahnoro.
Xesus Kristu yakrono me emicicoko.
Ero wa awexitaw so tak Kaan nîhcamnoyasî kicicme awehtoponhîrî komo.
Kir̂wanî ro Yekatî marha nîmyas awya so.
39 Awya so wa kekn̂e Kaan,
Kakronomexe so men amn̂e,
kekn̂e.
Amxîkrî komo ya marha ero wa kekn̂e.
Meyeno komo ya marha ero wa kekn̂e.
Ahnoro Kporin komo Kaan nan̂ikîtho komo ya kes hara amn̂e.
Noro yipu komo ya ero wa kesî Kaan,
kekn̂e tî.
Ero wa tî kekn̂e Petru yîwya so.
40 Miyan poko rma tî iitono komo weronomekn̂e Petru.
Panatanmekno marha n̂iir̂akn̂e.
Kicicme men naxe kica apoyino komo.
Ero ke n̂examro warahra ro mak ehcoko,
kekn̂e tî.
Ero wa tî kekn̂e Petru yîwya so.
41 Taa,
kir̂wan̂he tî n̂encetken̂e Petru mtapotarî anarî komo,
mer̂pono pîn komo.
Yîmtapotarî tî n̂ewehcatken̂e.
N̂emihcatken̂e marha tî.
Mer̂pono pîn komo tî n̂emihcatken̂e,
3.000 ha tî.
Ero wa tî Kporin komo n̂epamnoyakn̂e tîmxîkrî komo.
Ero wa n̂iir̂akn̂e Kporin komo.
Tahwore Naxe Kaan Xîkrî Komo
42 Taa,
ero yimaw Xesus yahsîn̂enho komo tî n̂esenmekyatken̂e roro 12 komo yaka.
Panatanmekno riyataw yîwya so entaxi mokyatken̂e roro.
Kaan ya takronomacho komo poko marha tî n̂esekatîmyatken̂e.
Xesus waihtoponho kuknon me marha tî n̂eseresmetken̂e.
Kaan yakro marha tî nîmtapowatken̂e.
Ero wara roro tî xatken̂e Xesus pona enîn̂e komo ero yimaw.
43 On wara marha tî xatken̂e 12 komo,
cirihnî mko tî n̂iir̂atken̂e emapona roro.
Xesus yakrono kom ham mîkyam,
kachome n̂iir̂atken̂e.
Ero ke n̂eraswatken̂e takî tî tooto komo ahnoro.
44-45 N̂esenmekyatken̂e roro tko Xesus pona enîn̂e komo ahnoro.
Cemyawno komo amenmekîra marha tî xatken̂e.
Kemyawno komo tan ha,
ketken̂e mak cemyawno komo poko rma.
Knahrî komo tan ha,
ketken̂e marha tî tînahrî komo poko hara.
Cemyawnonhîrî komo marha tî nîmyatken̂e puranta pona,
tîrowonthîrî komo marha tî.
Ero yepetho takî tî n̂ekamyatken̂e yupurantamnî komo ya.
46 Kaan mîn yaka marha tî n̂esenmekyatken̂e enmar̂atîxera.
Xesus waihtoponho kuknon me marha tî n̂eseresmetken̂e tîmîn komo yaw so,
anarî yaw,
anarî yaw,
ero wa tî.
Tahwore tî n̂eseresmetken̂e.
Kaan ponaro makî tî xatken̂e mîk hak ponarora.
47 Kaan poko marha tî nahwowatken̂e roro Kaan xîkrî komo.
Kir̂wan̂he Kaan nai ham okre,
ketken̂e roro.
Tawake marha tî xatken̂e iitono komo n̂examro poko.
N̂epamyatken̂e marha tî Kaan xîkrî komo enmar̂atîxera.
Kporin komo rma tî epamnono n̂iir̂akn̂e tînakir̂wamarî me ciixapu komo.
Ero wa xakn̂e Kporin komo.