Yîhrepun Karihcesî Petru Komo
3
Taa,
anarî kaamo po takî tî Kaan mîn yaka cetken̂e Petru komo,
Xuaw yakro.
Wow kache tî cetken̂e,
Kaan yakro kîmtapotacho komo ro to,
3 to ha tî.
2 Ero yimaw tî yîhrepun xakn̂e Kaan mîn potaw.
Tooto komo tî noro pen naar̂atken̂e roro iina Kaan mîn potaka.
Cenporem,
kacho mîn Kaan mîn metatan,
iina roro tî naar̂atken̂e.
Mehxa ro tî noro xakn̂e yîhrepun me cewrutoponhîrî n̂ixa ro thakwa okwe.
Opurantan,
opurantan,
kekn̂e roro tî Kaan mîn yaka tîtosom komo ya.
Iito tî xakn̂e noro Petru komo cetaw Kaan mîn yaka.
3 Ero ke Petru komo tî n̂een̂akn̂e yîhrepun,
Xuaw kom ha.
Kaan mîn yaka cewomyataw so rma tî n̂een̂akn̂e.
Ai,
opurantanî n̂he thakwa tîmcoko,
kekn̂e tî noro Petru ya.
4 Yîmtapotarî yentache yîhrepun wece takî tî Petru komo n̂een̂atken̂e Xuaw yakro.
Amna wece enko,
ketken̂e tî yîwya.
5 Ero ke n̂examro ponaro takî tî xakn̂e yîhrepun.
Opurantan nîmyat ha na,
kekn̂e tî.
6 On wara tî kekn̂e Petru yîwya,
Yupurantamra was okwe.
Prata exihra nas ohyaw,
ooru marha exihra.
Anarî tko nasî ohyaw.
Ero xa wîmyas awya.
Xesus Kristu yanme mak wîîkes awya,
Nasare pononho yanme,
awomko tak ha,
etar̂ko marha,
wîîkesî,
kekn̂e tî Petru yîhrepun ya.
7 Ero yinhîrî noro yamorî poko takî tî nahsîyakn̂e Petru kaari n̂ixan poko.
Ero poko tî nanîmyakn̂e,
sai.
Ero yimaw rma takî tî kar̂pe xakn̂e yîhtarî,
yîhtakmarun yocho marha.
8 Ero ke nahronakn̂e tak.
Piiri takî tî n̂ecececekn̂e marha okre.
N̂etar̂akn̂e marha tî.
Petru komo yakro takî tî n̂ewomyakn̂e Kaan mîn yaka.
Iito takî tî n̂etar̂akn̂e.
Nahronakn̂e tî emapona,
pom cucuk,
pom cucuk,
kekn̂e tî.
Kir̂wan̂he Kaan ya ciitoponhîrî n̂ekatîmyakn̂e.
Ero wa tî xakn̂e yîhrepunînhîrî.
9 Ero ke noro takî tî n̂een̂atken̂e ahnoro Kaan mîn yawno komo,
etarirî tî n̂een̂atken̂e.
Yîmtapotarî marha tî n̂encetken̂e,
Kir̂wan̂he Kaan nai ham okre,
kacho.
10 Ero ke takî tî n̂eserepoketken̂e ro mak noro yenîrî ke.
On wara tî ketken̂e,
Mîkro okyo,
Kaan mîn potaw eremaxapunhîrî,
Cenporem kacho mîtwo eremaxapunhîrî.
Opurantan xe was okwe,
kan̂enho rma mîkro.
Ahce wa kir̂wan̂he tak n̂ex hara okyo?
ketken̂e tî.
N̂eserepoketken̂e ro mak noro poko.
Xesus Yehtopo N̂ekatîmyasî Xa Hara Petru
11 Taa,
Petru komo yakro rma tî xakn̂e yîhrepunînhîrî.
N̂examro yahsîpînka xera tî xakn̂e.
Kaan mîn mahrimacho yaw tî xatken̂e wacamnî yaw.
Saromaw Mîn,
kacho tî mîn xakn̂e Kaan mîn mahrimacho.
Iina cetken̂e kar̂pe Kaan mîn yawno komo.
Yîhrepunînhîrî yakir̂wamacho poko tî n̂eserepoketken̂e ro mak.
12 Taa,
esenmekrî komo takî tî n̂een̂akn̂e Petru.
Ero ke tî n̂examro yakro nîmtapowakn̂e.
On wara tî kekn̂e yîwya so,
Ai oyakno komo,
Ixaw Yana komo amyamro.
Ahce kacho meserepoketu moso yakir̂wamacho poko?
Amna mak mentîkexe.
Yîhrepunînhîrî yakir̂waman̂e komo moxam okyo,
kan̂e wara maxe.
Karitî komo mîkyam ham kopi.
Kir̂wanî ro komo marha mîkyam ham,
kan̂e wara maxe amna poko okwe.
13 On wara Kaan xakn̂e kokon̂oro mak.
Ponaro Abraaw pen yehtopo rma Mîk Kaan,
ponaro Isake pen yehtopo marha Mîk,
ponaro Xako pen yehtopo marha.
Noro yipu Mîk xakn̂e on wara,
Tumumuru rma tak n̂iir̂akn̂e kayaritomo me.
Xesus Mîk Yumumuru.
Noro rma mekanîyatken̂e Piratus ya.
Yiixera ro mak mîxatken̂e ahsîpînka xe exitaw Piratus.
14 Kir̂wanî ro mak Mîk Kaan Mumuru,
takîhsom ro mak.
Noro yipu xera rma mîxatken̂e okwe.
Tooto waihkan̂enho xe xa matko mîxatken̂e.
Noro yipu rma mahrunkapetken̂e Piratus ya.
15 Kayaritomo Mumuru reha mîwaikapetken̂e hara yîwya okwe.
Karihtono rin̂e rma Mîk mîwaikapetken̂e okwe.
Noro rma tko n̂enpakekn̂e hara Kaan.
Enpakaxapu yenîn̂enho rma amna.
16 Noro yosotî mak amna n̂etaci,
ero pona xa amna n̂enwo kar̂pe tak moso ciitome.
Moso meen̂axe.
Pahxa rma meen̂atken̂e.
Kir̂wan̂he tak nasî,
encoko xe.
Xesus pona enîn̂e me amna n̂iire Kaan.
Ero ke Noro pona enîrî ke mak amna ya kir̂wan̂he tak nasî moso.
17 On wara tko wîîkesî awya so oyakno komo,
camkî awexirî ke so thakwa Xesus mîwaikapetken̂e.
Ero wa xa marha xatken̂e akayaritomon kom hara.
18 Kaanî rma tko waihkapekn̂e awya so tîmtapotachonhîrî yaw roro rma.
Pahxa rma Kaan nîhtînomexpekn̂e weronomano rin̂e pen komo ya,
kîwya so ekatîmtome hara.
Kristu men n̂esemetanmekyas amn̂e,
kacho nîhtînomexpekn̂e.
Ero ke ero wa kachonho yaw roro rma Noro waihkapekn̂e awya so.
19 Ero ke kicicme awehtoponhîrî komo tak men poxunkacoko ha.
Noro pona enîn̂e tak ehcoko hara.
Ero wa awexitaw so Kaan tak nîhcamnoyasî kicicme awehtoponhîrî komo kakronomachome so tak Kporin komo ya.
20 Xesus Kristu marha tak n̂en̂epesî xa hara oona.
Awakir̂waman̂e komo tak mokyas amn̂e,
kacho mencetken̂e kweronoman̂e komo mtapotachonho,
Noro rma Kaan n̂en̂epes hara amn̂e.
21 Kah yaw makî ka nasî Noro.
Amn̂e mak miyan komo yakir̂wamatopo me rma exitaw tak Xesus n̂en̂epes hara Kaan oona hara.
Ero wa akir̂wamano ritopo n̂ekatîmyatken̂e kweronoman̂enhîrî pen komo kir̂wanî ro pen kom ha.
Mehxa rono pen komo rma n̂ekatîmyatken̂e,
yihcitoponho n̂ixa rono pen komo rma.
22 Moises pen marha tî n̂ekatîmyakn̂e Xesus mohtopo kporin pen komo ya.
On wara tî kekn̂e noro pen,
Pahxaro awya so weronomano rin̂e tak n̂enpesî Kporin komo Kaan awya so.
Anarî Mîk n̂enpesî owarai rma.
Apoyino komo me cehsomu rma Mîk n̂enpes ha.
Noro mtapotarî tak mencexe ahce wa na ketaw awya so.
23 Noro yenta xatî pîn komo tak waihkesî Kaan amn̂e.
Ero wa yîcherenonkano n̂iir̂asî Kaan,
kekn̂e tî Moises pen yîwya so.
24 On yimawno poko marha n̂ekatîmyatken̂e anarî kom hara weronomano rin̂enho pen kom ha.
Samuew pen n̂ekatîmyakn̂e,
yîhretawno komo marha.
Ahnoro rma weronomano rin̂enho pen komo n̂ekatîmyatken̂e on yimawno poko.
25 Weronomano rin̂enho pen yepamtho rma amyamro.
Apoko so marha nîmtapowakn̂e Kaan Abraaw pen yakro.
On wara kekn̂e yîwya,
Akir̂wamano n̂iir̂asî Kaan amn̂e awepamthîrî ke.
Anarî yana komo meero nakir̂wamesî,
ahnoro roowo poko hakno kom ha,
kekn̂e tî Kaan yîwya.
Ero ke ero wa kachonho yaw roro rma tak akronomano n̂iir̂asî Kaan oroto.
26 Taa,
tanton tak n̂enpakekn̂e hara Kaan,
Xesus ha.
Enpakaxapunhîrî ahyaka so tak n̂en̂epekn̂e yihcirî me ha kapu.
Awakir̂waman̂e komo me n̂en̂epekn̂e,
kicicme awehtoponhîrî komo poxunkan̂e me awin̂e komo me ha,
kekn̂e hara tî Petru yîwya so.
Ero wa tî kekn̂e.