Taa,

ero wa panatanmekno riyataw rma Petru komo ya,

tîmsom pokono komo takî tî mokyatken̂e yîhyaka so,

Kaan mîn kurunpen̂e komo marha.

Satusew komo marha mokyatken̂e.

Ero warai komo tî mokyatken̂e Petru komo yaka.

2 Poxumra ro makî tî n̂encetken̂e panatanmekno ritopo yîwya so.

Xesus pona een̂ataw awya so mîpakexe hara amn̂e waixapunhîrî,

kacho tî n̂encetken̂e poxumra kica.

3 Petru komo takî tî nahsîyatken̂e.

Kahrutopo yaka tî nahruyatken̂e okwe enmapuche cesentachome akro so.

Ero wa tî n̂examro pen n̂iir̂atken̂e kokon̂i exirî ke.

4 Petru komo mtapotarî rma tko tî n̂ewehcatken̂e entan̂enhîrî komo.

Mer̂pono pîn tî n̂ewehcatken̂e,

5.000 me cehso ro.

5-6 Enmapuche takî tî n̂esenmekyatken̂e xa hara Xutew yenîn̂e komo.

Poritomo komo tî mîkyam n̂esenmekyatken̂e,

Xutew panatanmetopo mewren̂e komo marha tî,

Anas marha tî.

Kaan yaka cewomsom mîk xakn̂e Anas.

Kaipas marha tî mokyakn̂e,

Xuaw marha tî,

Arexante marha tî,

Anas yanan komo marha tî.

Ero wicakî tî n̂esenmekyatken̂e Xerusarem po Petru komo yen̂ekachome.

7 Ero ke Petru komo takî tî nan̂ikpetken̂e.

Tîrakataka so tî n̂iir̂atken̂e.

On wara tî ketken̂e yîwya so,

Ai,

Petru,

Xuaw,

onoke yanme xa noro makir̂wamace ha?

Onok yosotî ponan me xa ero wa mîkro miire?

ketken̂e tî yîwya so.

8-9 Ero yimaw Kir̂wanî ro Yekatî ken̂e xa takî tî xakn̂e Petru.

Ai kayaritomo komo,

poritomo komo marha,

awya so wîîkesî,

yîhrepunînhîrî karihtotopo poko na mîîket amna ya.

Ahce ke xa noro n̂etakir̂wama?

mîîketu na.

10 Ero ke kir̂wantaw wekatîmyas awya so.

Miyan komo n̂entarî me rma wekatîmyasî,

Ixaw Yana komo n̂entarî me ha.

Xesus Kristu yosotî yanme mak reha moso tak nasî kar̂pe.

Nasare pononho rma Mîk Xesus,

anamowopothîrî komo rma.

Kaanî rma tko Noro n̂enpakekn̂e hara waixapu komo chei.

Noro yanme makî reha moso tak nasî kar̂pe awero ro so.

11 Noro poko rma kesî Kaan Karitan on wara,

Toopu xakn̂e mîîmo me ciisom.

Kicicme tko tî meen̂atken̂e amyamro mîîmo ciin̂e komo.

Iito kr̂a n̂expe,

mîîketken̂e makî tî ero poko.

Eronhîrî rma tak nasî mîîmo peyecepu me tooto n̂enîrî me xa okre,

kesî Kaan Karitan Noro poko rma.

12 Anarî exihra ro mak nasî kakir̂waman̂e komo.

Anarî kakir̂waman̂e komo yetacira ro mak nasî Kaan tooto komo n̂entarî me,

kekn̂e tî.

Ero wa tî kekn̂e Petru kayaritomo komo ya.

13 Taa,

yîmtapotarî yentache tak n̂eserepoketken̂e takî tî kayaritomo komo Petru komo poko,

Xuaw komo poko.

Yîkrîpîn me ro mak nîmtapowaxe okyo,

ketken̂e tî.

Eskora yaka tohnînhîrî komo cma re mîkyam,

kpanatanmekn̂e komo yaka tohnînhîrî ha.

Ahce kacho yîkrîpîra nîmtapowat hara?

Xesus yakrononho mîkyam ham,

ketken̂e tî.

14 Iito marha tî xakn̂e yîhrepunînhîrî karihtoxapu.

Petru komo yakro rma tî n̂ecececekn̂e kayaritomo yeepatai rma.

Ero ke,

Karihtora rma mexe mehcow,

kacho mera ro makî tî xakn̂e.

15 Ero ke Petru komo takî tî n̂en̂epetken̂e anana ha kapu.

Toche so n̂esencetken̂e takî tî poritomo komo n̂examro poko.

16 On wara tî ketken̂e,

Ahce wa moxam cicir̂at ha?

ketken̂e tî.

Cirihnî ro mak n̂iice ham okyo eserepokano ritopo xa.

Xerusaren pono komo wero ro rma karihtono n̂iice ham.

Pîra,

yîhrepunînhîrî karihtora ro mak mîxatken̂e,

kacho mera thakwa nasî,

ketken̂e tî.

17 Wara rma Petru komo tîtwermacerî.

Xesus poko yîmtapotara ro mak tak men ehcoko kica,

tîtkacerî yîwya so.

Cerewre xa tîtkacerî yîwya so.

Ero wa tîtkacerî yîwya so miya so esekaiporera tak ehtome Xesus yosotî,

ketken̂e tî.

18 Ero yinhîrî takî tî Petru komo nan̂ikyatken̂e hara.

N̂examro tî nîtwermetken̂e.

On wara tî ketken̂e yîwya so,

Xesus poko panatanmekno cirihra ro mak tak men ehcoko kica.

N̂eexi tak men Noro poko amtapotacho komo,

ketken̂e tî yîwya so.

Ero wa tî ketken̂e kayaritomo komo Petru komo ya.

19 Yîmtaka so tko tî n̂eyukyatken̂e hara Petru komo,

Xuaw yakro,

Ahce wa kexitaw so takîhsom me keen̂atu so Kaan awya so?

Kaan yewetîn̂e me kexitaw so katî ero wa keen̂atu so?

Awewetîn̂e komo me kexitaw so katî ero wa keen̂atu so?

Amyamro ha tko.

20 Tîn̂enîthîrî thakwa mak amna n̂ekatîmyasî,

tîn̂entathîrî marha,

ketken̂e tî Petru komo yîwya so.

21 Ero ke takî tî nîtwermetken̂e xa hara.

Yîhyokura tko tî xatken̂e.

Nukurunanîyatken̂e tî iitono komo pona.

Yîhrepunînhîrî karihtotoponho poko tî n̂eserepoketken̂e iitono komo.

Kir̂wan̂he Kaan nai ham okre moso karihton̂enho,

ketken̂e tî.

Ero ke tî Petru komo yîhyokura xatken̂e.

Taa,

etocoko tak ha,

ketken̂e makî tî yîwya so.

Ero wa tî ketken̂e Petru komo ya.

22 40 cimn̂ipu yopo tî xakn̂e yîhrepunînhîrî yewrutoponho.

Karihtonî ro karihcekn̂e Kaan okre.

Ero ke tî tooto komo n̂eserepoketken̂e noro poko.

Ero wa tî xatken̂e.

23 Taa,

cen̂epeche so tak Petru komo takî tî cetken̂e hara takrono komo yaka hara.

Tîmsom pokono yenîn̂e komo mtapotarî takî tî n̂ekatîmyatken̂e yîwya so,

poritomo komo mtapotarî marha.

N̂ekatîmtîketken̂e tî yîwya so.

24 Ero wa yîmtapotarî komo yentache Kaan yakro takî tî nîmtapowatken̂e.

Ero wara re tî nîmtapowatken̂e.

Apa,

ketken̂e tî,

kaapu yakîhton̂enho Amoro,

roowo yakîhton̂enho marha,

tuuna imo yakîhton̂enho marha,

kah yawno komo marha,

roowo pono komo marha,

tuuna imo kwawno komo marha,

ero warai komo yakîhton̂enho Amoro,

ketken̂e tî Kaan ya.

25 Pahxa amtapotarî mîmtapowakn̂e amna porin Tapi penî mtari.

Awanton pen mîk xakn̂e noro.

On wara mîîkekn̂e yîmtari,

Ahce kacho mîk hak rowon pono komo n̂etîrwonmekyatu kica?

Ahce kacho tohnawno poko n̂esencetu tooto komo okwe?

26 Ero yipu poko cesentachome so n̂esenmekyaxe roowo pono kayaritomon komo.

Antomano rin̂e komo marha n̂esenmekyaxe Kporin komo yehn̂anmechome tî re.

Kristu me yin̂irithîri yar̂macho poko n̂esencexe okwe,

kacho mîmewrepekn̂e Tapi pen ya.

27-28 Ero ke ero wa kacho yaw roro rma n̂esenmekyatken̂e Xenciu komo,

Ixaw Yana komo,

Eroces komo,

Poncu Piratus kom ha.

Ero wa n̂esenmekyatken̂e Xesus pen waihkacho poko cesentachome so,

awantonî ro pen waihkacho poko ha.

Kayaritomo me anîhkapethîrî Mîk okwe.

Amoro rma tko Noro pen memetanmekpekn̂e yîwya so.

Pahxa anîhtînoputhîrî yaw roro rma ero wa mirpekn̂e yîwya so.

29-30 Taa,

amna yemetanmetopo poko marha nîmtapowaxe okwe.

Ero ke yîmtapotarî komo cma re mencesî.

Awanton mak amna.

Ero ke erasîn me ro mak amna cirko amtapotarî yekatîmtopo poko.

Kar̂pe ro mak awehtopo enpoko rma amna ke.

Cirihnî cirko rma amna ke ha.

Awanton Mîk Xesus kir̂wanî ro.

Noro yosotî pona enîrî ke amna ya ero wa ciino rin̂e me amna cirko,

ketken̂e tî.

Ero wa tî nîmtapowatken̂e Kaan yakro.

31 Ero wa ketaw tak yîwya so roowo takî tî n̂esewsîyakn̂e.

Mîîmo marha tî n̂esewsîyakn̂e yaw ehtopo kom ha.

Kaanî mtapotarî takî tî n̂ekatîmyatken̂e xa hara erasîra ro mak.

Kir̂wanî ro Yekatî ken̂e xa tî xatken̂e.

Ero wa tî xatken̂e.

32 Taa,

ero yimaw takî tî mer̂pora xatken̂e Xesus pona enîn̂e komo.

Iito re makî tî n̂esehtînoyatken̂e okre.

Etîxatî me marha tî xatken̂e.

Owyanî ro thakwa tan ha,

kahra ro makî tî xatken̂e cemyawno komo poko rma.

Kemyawno komo tan ha,

ketken̂e makî tî ahnoro cemyawno komo poko.

33 Kporin komo Xesus yenpakachonho marha tî n̂ekatîmyatken̂e 12 komo.

Kir̂wan̂he xa tî n̂ekatîmyatken̂e erepokano rin̂e me xa tî okre.

Tahwore xa tî xatken̂e,

tawake marha tî etpoko.

34 Cesemetanmesom komo exihra ro mak takî tî xatken̂e yîchew so.

Mararî yosom me tî xatken̂e anarî komo.

Ero ke ero yipu takî tî nîmyatken̂e puranta pona.

Yaake tîmîye tî xatken̂e anarî kom hara.

Ero ke ero yipu marha tî nîmyatken̂e puranta pona.

35 Epethîrî takî tî naar̂atken̂e 12 komo yaka.

N̂examro yamrinaka tî n̂iir̂atken̂e yîn̂ekamrî komo me.

Ero yipu takî tî n̂ekamyatken̂e cesemetanmesom komo ya.

Ero ke esemetanmekîra ro makî takî tî xatken̂e.

36 Taa,

ero yimaw takî tî anarî xakn̂e iito.

Xose tî mîk xakn̂e noro yosotî.

Banabe me tko tî noro nosohcetken̂e hara 12 komo.

Kahworen̂e,

kacho tî mîn,

Banabe,

kacho.

Repi yepamtho rma tî mîk xakn̂e,

Xipre pononho ha tî.

Noro yipu tî mîk xakn̂e Banabe.

37 Noro tî xakn̂e mararî yosom me hara.

Ero ke tmararînthîrî takî tî nîmyakn̂e puranta pona.

Ero yipu yepetho takî tî n̂iir̂akn̂e 12 komo yamrinaka yîn̂ekamrî komo me.

Ero wa tî xakn̂e noro.