1-2 Taa,

ero yimaw takî tî iito xakn̂e anarî hara Xesus ponarono.

Ananiasî tî mîk xakn̂e noro yosotî.

Yipici marha tî xakn̂e,

Sapira tî mîk xakn̂e noro yosotî.

N̂examro marha tî nîmyatken̂e tmararînthîrî komo puranta pona.

Ero yepetho takî tî nîmyakn̂e Ananias 12 komo ya hara.

Poi makî tko tî nîmyakn̂e.

Nîmcekn̂e rma tî epethîrî raconho.

Cipici wero ro rma tî nîmcekn̂e.

Ero wa tî xakn̂e Ananias.

3 Ero ke on wara takî tî kekn̂e Petru yîwya,

Oyakno Ananias,

ahce kacho Satanasî mtapotarî ponaro xa mai okwe?

Noro yanme mak mîcemaronta kica.

Kir̂wanî ro Yekatî n̂entarî me mîcemaronta okwe.

Apurantan komo mîmtocow rma amararînthîrî komo yepetho yakwenho ha.

4 Awyanî ro mak mîn xakn̂e mararî tîmîhra ka awexitaw.

Tîmîche awya awarawan ya awyanî ro marha mîn xakn̂e epethîrî hara.

Ero ke ahce kacho acemaron mîhtînopu hara kica?

Tooto n̂entarî me mak cemarontara meexi.

Kaan ya xa matko mîcemaronta okwe,

kekn̂e tî Petru.

Ero wa tî kekn̂e Ananias ya.

5 Ero yipu yentache tak Ananias pen takî tî n̂epîrkekn̂e,

pum know.

Waihyakn̂e thakwa tî okwe.

Ero wa tî xakn̂e noro pen okwe.

Ero ke n̂eraswatken̂e ro makî tî noro pen waihtoponho yentan̂e komo.

6 Iito tî xatken̂e kar̂pamxan komo.

N̂examro tak tî mokyatken̂e okoputhîrî yaaso.

Womcetken̂e ka poono ke.

Womtoche takî tî naar̂atken̂e ahruso.

Ero wa tî xakn̂e Ananias pen okwe.

7 Ero yinhîrî tak osorwaw oora yenatîche yihcinhîrî takî tî mokyakn̂e hara iina xa marha.

Ciin̂onhîrî pen waihtoponho tî entara xakn̂e.

Ero wa tî noro mokyakn̂e.

8 Ero ke noro ya makîrha takî tî kekn̂e hara Petru,

Aaci,

awarawantachonhîrî komo ekatîmko owya.

On wicakî xa mahsîyatken̂e amararînthîrî komo yepetho ha?

kekn̂e tî yîwya.

Nhnk,

ero wicakî mak amna nahsîyakn̂e,

kekn̂e hara tî Sapira.

9 Ero ke yîmtaka takî tî n̂eyukyakn̂e hara Petru.

Ahce kacho Kporin komo Yekatî mukukmacow yîrwonmetopo poko okwe?

Aan̂onhîrî pen yahrun̂enho komo mohcow hara oroto.

Iito tak naxe metataw.

Amoro pen tak awar̂a hara n̂examro awahrutome hara okwe,

kekn̂e tî Petru yîwya.

Ero wa tî kekn̂e Petru Ananias pen cinho ya.

10 Ero yipu yentache rma tak noro pen makîrha takî tî n̂epîrkekn̂e hara,

pum know.

Waihyakn̂e xa marha tî noro pen hara okwe.

Ero yimaw rma tî n̂ewomyatken̂e hara kar̂pamxan komo.

Yihcinhîrî pen yokoputho pona makî tî n̂ewomyatken̂e hara okwe.

Ero ke noro pen yokoputho xa hara tî naar̂atken̂e.

Iin̂onhîrî pen yawxari rma tî nahruyatken̂e.

Ero wa tî xatken̂e Anan̂ias pen okwe,

Sapira pen marha okwe.

11 Ero ke n̂eraswatken̂e ro makî tî Kaan xîkrî komo ahnoro.

Kaan xîkrî pîn komo meero tî n̂eraswatken̂e n̂examro pen waihtoponho yentan̂e komo.

Ahnoro tî n̂eraswatken̂e okwe.

12 Taa,

on wara tî xatken̂e 12 komo,

cirihnî tî n̂iir̂atken̂e emapona roro.

Iitono komo wero ro rma tî n̂iir̂atken̂e Kaan yanmen komo xa mîkyam,

kachome yîwya so.

Anarî kaamo po tak wacamnî yaw xatken̂e,

Kaan mîn mahrimacho yaw.

Saromaw mîn xakn̂e ero yosotî.

Xesus ponarono komo yakro tî xatken̂e iito mer̂pono pîn komo.

13 12 komo yakrono ro me tko tî cexi xera xatken̂e iitono komo.

N̂eraswatken̂e ha tî.

Tîyopono komo me rma tî 12 komo n̂een̂atken̂e.

14 N̂epamyatken̂e rma tko Xesus pona enîn̂e komo.

Mer̂pora ro mak takî tî xatken̂e.

Kîrkomo xatken̂e,

wooxam komo marha.

Kporin komo yakrono ro me tak xatken̂e noro yipu komo.

15 Ero yimaw marha tî okoh komo n̂ekyatken̂e Petru yaka ha tî re.

Cecehkem po so tî n̂ekyatken̂e anarî komo,

ecepumnî po so marha tî n̂ekyatken̂e anarî kom hara,

aam po so makî tî.

Esama yaka makî tî n̂ir̂mikyatken̂e,

Petru yesamarî yaka rma.

Noro yekatî naperî me mak na re iina so n̂ir̂mikyatken̂e.

16 Mer̂pono pîn komo tî mokyatken̂e,

mîn hak pono komo,

Xerusaren mkaino pono kom ha.

Tamotosom komo tî n̂ekyatken̂e mer̂pono pînî ro mak.

Worokyam nîwîrîmatho komo marha tî n̂ekyatken̂e.

Noro yipu komo takî tî nakir̂wametken̂e ahnoro.

Ero wa tî xatken̂e 12 komo.

17-18 Taa,

ero wa exirî ke so takî tî Kaan yaka cewomsom nîrwonakn̂e okwe.

Noro yakrono komo marha tî nîrwonatken̂e,

Satusew kom ha.

Nîrwonatken̂e ro makî tî kica.

Ero ke 12 komo takî tî nahsîyatken̂e.

Nahruyatken̂e marha tî kicicitho komo yahrutopo yaka rma okwe.

19-20 Ero yinhîrî takî tî Kporin komo yancun mokyakn̂e kosope.

Kahrutopo metatan takî tî nahrunkekn̂e.

12 komo tî n̂en̂emhatakekn̂e hara.

On wara tî kekn̂e yîwya so,

Taa,

etocoko xa hara iina xa marha Kaan mîn yaka.

Iina mohxapu komo ya ekatîmcoko xa hara waipînî ro me awehtopo komo,

kekn̂e tî.

Ero wa tî kekn̂e ancu 12 komo ya.

21 Ero ke ancu mtapotarî yentache tak Kaan mîn yaka takî tî cetken̂e hara Petru komo.

Saa ketaw rma tî n̂ewomyatken̂e Kaan mîn yaka.

Panatanmekno takî tî n̂iir̂atken̂e xa hara iito.

Ero wa tî xatken̂e 12 komo.

Ero yimaw marha tî Kaan yaka cewomsom tî cekn̂e anarî mîîmo yaka.

Akrono komo marha tî cetken̂e iina.

Anarî komo nan̂ikyatken̂e hara poritomo kom hara.

Ixaw Yana yenîn̂e komo mîkyam nan̂ikyatken̂e ahnoro mak.

Ero ke mohtîketken̂e takî tî noro yipu komo.

Mohtîkache so takî tî tmaywen komo n̂en̂epetken̂e kahrutopo yaka Petru komo yehso.

22 Ero ke kahrutopo yaka tî cetken̂e yînantomathîrî komo.

Iito tî Petru komo n̂epor̂atken̂e.

Exihra ro makî tî n̂een̂atken̂e.

Ero ke enîno rin̂e komo yaka takî tî n̂etîrametken̂e hara.

23 Kahrutopo yaw exihra naxe okwe,

ketken̂e tî yîwya so.

Cewkaxi rma cma re amna n̂enwo kahrutopo.

Iito marha cma re n̂ehcow enîn̂e komo metataw.

Amna tak nahrunka metata.

Okwe,

yarîhra ro mak n̂eexi kahrutopo,

ketken̂e tî.

Ero wa tî ketken̂e antomaxapu komo cenîn̂e komo ya.

24 Ero yipu yentache tak n̂eserepokekn̂e ro mak takî tî Kaan yaka cewomsom,

tîmsom pokono yenîn̂e komo marha.

Kopi,

ketken̂e tî,

kopi,

ahce wa tak n̂ehtîketu n̂examro kopi?

ketken̂e tî.

25 Ero yinhîrî anarî komo takî tî mokyatken̂e hara enîno rin̂e komo yaka hara.

Mînto natu anahruthîrî komo,

ketken̂e tî.

Kaan mîn yaw nat hara.

Iito panatanmekno n̂iir̂axe xa hara,

ketken̂e tî yîwya so.

26 Ero ke tak porisia yenîn̂e rma takî tî cekn̂e tmaywen komo yakro.

12 komo takî tî n̂ekyatken̂e cenîn̂e komo yaka.

Tawakem wara tko tî n̂ekyatken̂e tooto komo pona cerahtîmrî ke so.

On wara tî ketken̂e,

Kîrwon me so aar̂ataw n̂epanîyatu men tooto komo.

Toh ke men ketapetu so oko,

ketken̂e tî.

Ero ke tî tawakem wa mak n̂ekyatken̂e.

27-28 Ekno riche tak poritomo komo yeepatai takî tî n̂iir̂atken̂e.

Ero ke Kaan yaka cewomsom tî n̂examro n̂encekn̂e.

Ai,

Petru komo,

kekn̂e tî,

ahce kacho panatanmekno rma miir̂atu kica Xesus poko?

Xesus poko panatanmekno cirihra ro makî tak men ehcoko,

kekn̂e amna awya so.

Miya xe xa panatanmekno miitîkexe kica.

Xerusaren pono komo mîpanatanmetîkexe kica.

Noro pen waihkachonho ciri xe mat ham kica amna pona,

kekn̂e tî.

29 Ero yentache tak tî Petru n̂eyukyakn̂e,

ahnoro rma tî n̂eyukyatken̂e 12 kom ha.

On wara tî ketken̂e,

Kaan mak xa cewetpore nasî,

tooto yewetîra cexpore nasî anarme ketaw Kaan warahra.

30-31 Xesus waihkan̂enho xa amyamro,

tpanaxkem pona mamowopetken̂e oko.

Ero wa mîwaiketken̂e okwe.

Noro yipunhîrî rma tko Kaan n̂enpakekn̂e hara.

Ponaro kporin pen komo yehtopo rma Mîk n̂enpakekn̂e.

Enpakache tak nanîmyakn̂e xa hara tî kah yaka.

Iito tak n̂eremanmekyakn̂e tîmîtkoso kaari n̂ixa.

On warai me Xesus n̂iir̂akn̂e Kaan,

kantoman̂e me n̂iir̂akn̂e,

kukurunpen̂e me marha.

Iito cexirî ke marha Xesus Ixaw Yana komo ropotarî tak naknamesî.

Poxumra tak n̂enpesî yîwya so ehtoponhîrî komo,

kicicme ehtoponhîrî komo marha nîhcamnoyasî.

Ero wa Ixaw Yana komo tak wakresî Xesus Kaan mîtwo cexirî ke tak.

32 Ero wa xakn̂e Xesus amna wero ro.

Ero ke ero wa Noro yehtoponho yekatîmn̂e me nas amna.

Kir̂wanî ro Yekatî rma n̂ekatîmyasî.

Kaan nîmîtho Mîk Kir̂wanî ro Yekatî cewetîn̂enhîrî komo ya.

Noro yanme mak amna n̂ekatîmyasî,

ketken̂e tî.

Ero wa tî ketken̂e Petru komo kayaritomo komo ya.

33 Taa,

yîmtapotarî komo yentache nîrwonatken̂e xa takî tî kayaritomo komo Petru komo poko.

Waihkacho komo poko takî tî n̂esencetken̂e okwe.

34 Taa,

ero yipu poko esencetaw so anarî takî tî nawomyakn̂e hara piiri.

Kamariew tî mîk xakn̂e noro yosotî.

Panatanmekno rin̂e tî mîk xakn̂e Moisesî mtapotacho poko.

Takîhsom me tî noro n̂een̂atken̂e Xutew komo.

Ero warai tî mîk xakn̂e noro Kamariew ha.

On wara tî kekn̂e noro,

N̂examro ka aacoko anana,

12 komo.

Awakro so mak omtapota xe ka wasî,

kekn̂e tî.

35 Toche so enîno rin̂e komo ya takî tî kekn̂e,

Ai,

Ixaw Yana komo,

awakro so kîmtapowasî.

Takîhso men ehcoko n̂examro poko.

36 Pahxa tî xakn̂e anarî hara.

Tewtas pen tî mîk xakn̂e noro yosotî.

Kayaritomo warai me tî re n̂esenpekn̂e noro pen.

Noro pen yaka takî tî n̂esenmekyatken̂e kîrkomo 400.

Ero yinhîrî noro pen takî tî waihketken̂e.

Akrononhîrî komo takî tî n̂etakpayatken̂e.

Exihra mak naxe.

37 Ero yinhîrî takî tî anarî xakn̂e hara,

Xutas pen tî mîk xakn̂e noro yosotî.

Karireia pononho tî mîk xakn̂e.

Kayaritomo purantan tîmtopo yimawnonho tî mîk xakn̂e noro pen.

Kayaritomo ow ha,

kan̂e marha tî mîk xakn̂e.

Yaake marha tî xatken̂e noro pen yakrononho kom hara.

Noro yipunhîrî tko waihyakn̂e hara.

Noro yakrononho komo takî tî n̂etakpayatken̂e hara tî.

Ero wa tî xatken̂e n̂examro pen hara.

38 Ero ke on wara wîîkes awya so,

n̂ehcowpe mak mîkyam,

wîîkesî.

Ahce wa na cirihra ro mak cexpore nasî.

Tooto yanme kyam mak exitaw so n̂ehcamnoyaxe mak n̂examro hara amn̂e.

39 Kaan yanme exitaw so tko mehn̂exe thakwa moxam waihkacho poko.

Kaan poko cetar̂maxmu me marha maxe kopi.

Ero ke n̂ehcowpe,

kekn̂e tî.

Ero wa tî kekn̂e Kamariew takrono komo ya.

40 Ero ke,

Taa,

ero wa ham,

ketken̂e takî tî.

12 komo takî tî nan̂ikyatken̂e xa hara.

Mokuche so tak hara tî nîhyokyatken̂e oco.

Yîhyokuche so on wara tî ketken̂e xa hara yîwya so,

Xesus poko panatanmekno cirihra ro mak tak men ehcoko,

ketken̂e tî.

Ero wa kache yîwya so n̂en̂epetken̂e hara.

Ero wa tî 12 pen komo n̂iir̂atken̂e enîno rin̂e komo.

41 Ero ke takî tî cetken̂e hara Petru komo poritomo komo yawnonho.

Nahwowatken̂e rma tko tî tîcetaw so.

On wara tî ketken̂e,

Kir̂wan̂he keen̂atu so Kaan ham okre.

Ero ke tîhyosom me kiir̂axe so,

ceisom me marha,

ketken̂e makî tî.

Ero wa tî ketken̂e Petru komo.

42 Ero yinhîrî yîtîhkara rma tî xatken̂e.

Xesus poko panatanmekno n̂iir̂atken̂e rma,

Kristu xa Mîk Xesus ha,

ketken̂e rma.

Ero wa ketken̂e Kaan mîn yaw,

tîmîn komo yaw so marha.

Enmar̂atîxera tî ero wa ketken̂e.

Ero wa tî xatken̂e.