Taa,

ero yimaw tak on wara xatken̂e hara Xesus ponarono komo,

mer̂pora ro mak takî tî xatken̂e.

Ero yimaw tak kicicme takî tî nîmtapowatken̂e kica etpoko.

Kreku yaro tîmtapotaxmu komo takî tî nîmtapowatken̂e Ebrew yaro tîmtapotaxmu komo poko.

On wara tî ketken̂e,

Amna yaknonho pen komo cinho yerewusmara naxe kica.

Ebrew yaro tîmtapotaxmu pen komo cinho makî reha n̂erewusmexe kica,

ketken̂e okwe.

Ero wa tî nîmtapowatken̂e okwe etpoko.

Ero wa tî xatken̂e.

2 Ero wa kacho yentache 12 komo ya enmekno takî tî n̂iir̂atken̂e.

Ahnoro tî n̂enmekyatken̂e Xesus ponarono komo.

Esenmekîche so tak on wara tî ketken̂e 12 komo,

Ai oyakno komo,

cemyarkem thakwa amna Kaanî mtapotarî yekatîmrî poko.

Ero yahsîpînkara ro mak cexpore nasî erewusmano ritopo poko amna yehtome hara.

3 Ero ke oyakno komo,

kîrkomo men̂ekacoko awakno komo rma,

7 mak.

Kir̂wan komo moxam,

kacho komo mak men̂ekacoko.

Kir̂wanî ro Yekatî ken̂arî komo xa,

takîhso cesehtînosom komo,

noro yipu komo mak men̂ekacoko.

Men̂ekache awya so erewsî yekamn̂e me tak n̂examro n̂iir̂as amna,

ketken̂e tî.

4 Kaan yakro tîmtapotaxmu me roro mak nas amna reha,

Kaanî mtapotarî yekatîmn̂e me roro marha.

Ero yipu poko mak nas amna,

ketken̂e tî 12 komo.

Ero wa tî ketken̂e.

5 Taa,

ero wa ham,

ketken̂e esenmexapu komo.

Ero ke kîrkomo takî tî men̂eketken̂e.

Estepan tî men̂eketken̂e.

Kir̂wan tî mîk xakn̂e Estepan.

Kaan pona enîn̂e xa tî mîk xakn̂e.

Kir̂wanî ro Yekatî kenarî marha tî mîk xakn̂e.

Taa,

Piripe marha tî men̂eketken̂e,

Pîrokoru,

Nikano,

Cimaw,

Pamenas,

Nikoraw,

ero wa tî men̂eketken̂e.

Anciokia pono tî mîk xakn̂e Nikoraw.

Xenciunhîrî rma tî mîk xakn̂e,

Xutew me ciiso takî tî xakn̂e.

Ero wa tî men̂ekano n̂iir̂atken̂e erewsî yekamn̂e me cehsom komo.

6 Men̂ekache taki tî n̂examro naar̂atken̂e 12 komo yaka.

N̂examro takî tî Kaan yakro nîmtapowatken̂e men̂ekaxapu komo poko.

Meretîyasîyatken̂e tî Kaan yakro tîmtapotarî me so.

Ero wa tî erewsî yekamn̂e komo n̂iir̂atken̂e 12 komo.

7 Ero yimaw tak miyan komo rma takî tî n̂encetken̂e Kaanî mtapotarî.

Ero ke takî tî n̂epamtîketken̂e Xesus ponarono komo,

Xerusaren pono kom ha.

Tîmsom pokono komo marha tî xatken̂e Xesus ponaro mer̂pono pîn.

Ero wa tî xatken̂e.

8 Taa,

ero yimaw takî tî Kaan pona enîn̂e me xa takî tî xakn̂e Estepan.

Kar̂pe Kaan yehtopo ken̂e xa marha tî xakn̂e.

Cirihnî mko marha tî n̂iir̂akn̂e tooto komo wero ro eserepokachome so.

9 Ero yimaw tak Estepanî mtapotarî takî tî nanwekyatken̂e anarî komo.

Xutew komo wara xa marha cesenmesom komo cma tî re mîkyam xatken̂e.

Tanme Ro Cesehtînosom Komo,

kacho tko tî mîkyam xatken̂e.

Sirene pono komo tî mîkyam xatken̂e,

Arexancia pono komo marha,

Sirisia pono komo marha,

Asia pono komo marha,

ero warai pono komo tî mîkyam xatken̂e Estepan yanwekn̂e komo.

Okre,

tohnaw ro mak mekatîmyasî Xesus yehtopo,

kekn̂e tî n̂examro kica Estepan ya.

10 Yîmtapotarî komo yentache n̂examro takî tî n̂eyukyakn̂e hara Estepan.

Iyopo so ro makî tî nîmtapowakn̂e.

Takîhso xa tî nîmtapowakn̂e.

Kaan Yekatî yanme xa tî nîmtapowakn̂e.

Ero wa tî nîmtapowakn̂e Estepan.

11 Ero ke on wara takî tî xatken̂e Estepan yanwekn̂e komo,

tooto komo yakro takî tî nîmtapowatken̂e noro poko cewyaro so.

On wara tî ketken̂e yîwya so,

On wara kacoko amyamro tooto komo n̂entarî me,

Kicicitho me tîmtapotaxmu mîkro Estepan.

Moises pen nîwîrîyakesî kica,

Kaan marha nîwîrîyakesî kopi.

Amna n̂entarî me rma ero wa nîmtapowasî,

ketken̂e tî.

Ero wa tî kamexpetken̂e kica noro yipu komo ya tooto komo n̂entarî me.

12 Ero ke n̂examro yanme takî tî Estepan poko nîrwonatken̂e iitono komo.

Xutew poritomon komo tî nîrwonatken̂e,

Xutew panatanmetopo mewren̂e komo marha tî.

Ero ke Estepan pen takî tî nahsîyatken̂e.

Xutew yenîn̂e komo yaka tî naar̂atken̂e.

13 Yîhyaka so aar̂ataw Estepanî mtayakîton̂e komo marha tî naar̂atken̂e kayaritomo komo yaka.

On wara tî ketken̂e n̂examro kayaritomo komo ya,

Kicicitho moso kica.

Kicicitho me ro mak nîmtapowasî kica Kaan mîn poko.

Ero wa xa marha nîmtapowasî kpanatanmetopo komo poko hara.

Yîtîhkara ro mak ero wa nîmtapowasî kica,

ketken̂e tî.

Ero wara tî Estepan poko nîmtapowatken̂e kica.

14 On wara marha tî ketken̂e noro poko,

Xesus poko ekatîmn̂e marha moso,

Nasare pononho poko.

On wara kesî kopi,

Kaan mîn pen tî n̂ixke Xesus amn̂e.

Moises pen ya kapanatanmetopo komo marha tî nowya anarî pona hara.

Ero wa tî nai Xesus amn̂e,

kan̂e moso kica amna n̂entarî me rma,

ketken̂e tî Estepan poko kica.

15 Ero yipu yentache takî tî Estepan n̂entîketken̂e enîno rin̂e komo.

Ancu yewken wara ro mak takî tî n̂een̂atken̂e noro yewru.

Ero wa tî n̂een̂atken̂e.