Taa,

Pestu makîrha takî tî xakn̂e kayaritomo me hara.

Ero ke Sesareia pona takî tî cekn̂e.

3 kaamo makî tî ka xakn̂e iito.

Ero yinhîrî takî tî Xerusaren pona cekn̂e hara.

2-3 Xerusaren po exitaw tak Pawru poko takî tî nîmtapowatken̂e xa hara iitono komo Pestu yakro takî.

Kicicitho mîkro kica Pawru,

ketken̂e tî yîwya.

Kaan yaka cewomsom tî ero wa kekn̂e,

Xutew poritomon komo marha tî.

On wara tî ketken̂e yîwya,

Ai Pestu,

on wara kes amna awya,

Pawru cma re men̂epes amn̂e oona Xerusaren pona,

ketken̂e tî yîwya.

Esama yakumyaw ceseyam xe so tî xatken̂e Pawru waihkachome okwe ituxari cetaw.

Ero ke tî ero wa ketken̂e Pestu ya.

4-5 Pîra,

kekn̂e tî Pestu yîwya so,

iito mak n̂expe Pawru Sesareia po rma.

Iina kîwces hara asak ro enmapuche.

Ero ke kicicitho me noro yeen̂ataw awya so apoyino komo en̂epecoko oyakro,

iina tîto xatî kom ha.

Iito mak wences amn̂e Pawru yen̂ekacho awya so,

kekn̂e tî.

Ero wa tî kekn̂e Pestu yîwya so.

6 Ero yinhîrî iito rma tî ka n̂enmayakn̂e Pestu 10 kaamo yopo rma.

Ero yinhîrî Sesareia pona takî tî n̂etîramekn̂e hara.

Enmapuche xa hara Pestu takî tî cekn̂e en̂ekano ritopo yaka mîîmo yaka.

En̂exa takî tî Pawru nan̂ikpekn̂e.

7 Ero ke Pawru mokuche Xutew komo marha xatken̂e iito,

Xerusaren poi mohxapu komo.

Kicicme xa nasî moso kica,

ketken̂e tî Pawru poko.

Ero wa xakn̂e,

ero wara,

ero wara,

ketken̂e.

Mer̂pora ro makî tî n̂ekatîmyatken̂e kicicme Pawru yehtoponho.

Kicicme enîn̂enhîrî tko exihra ro makî tî xakn̂e.

8 Ero wa kache Xutew komo ya Pawru makîrha takî tî n̂esekatîmyakn̂e hara.

Ero warai pînî ro mak ow ha,

kekn̂e tî Pestu ya.

Xutew komo panatanmetopo yanwekn̂e pînî ro mak ow.

Kaan mîn yîwîrîman̂e pîn marha ow.

Sesa yanwekn̂e pînî ro mak ow ha.

Ero warai pînî ro mak ow,

kekn̂e tî Pawru Pestu ya.

9 Taa,

Pawru yesekatîmche tak on wara tî kekn̂e hara Pestu yîwya,

Ai Pawru,

on wara wîîkes awya,

Xerusaren pona awto xera mai awen̂ekan̂e komo yakro esentax hara iito on̂entar̂i me?

kekn̂e tî Pawru ya.

Xutew komo tawakere xe xakn̂e Pestu.

Ero ke ero wa kekn̂e Pawru ya.

10 On wara tko tî kekn̂e Pawru.

Sesa yaka xa matko owto xe wasî.

Noro ya thakwa mak cesekatîmpore nasî.

Xutew komo yîwîrîman̂e pînî ro mak ow ha.

Ero wara oyehtoponho rma wa mîhtînoyasî amoro rma.

11 Emetanmekno rin̂enho me oyexitaw ketaw ha re,

kicicitho me xa oyexitaw ketaw marha re ketwaikapesî rma.

Tohnaw tko wa oyen̂ekexe kica.

Ero ke yîhyaka so oyen̂epera ro mak masî.

Sesa yaka mak ow en̂epeko,

kekn̂e tî.

Ero wa tî kekn̂e Pawru Pestu ya.

12 Ero yipu yentache tak cesentayem komo mtapotarî ka n̂encekn̂e Pestu.

N̂examro mtapotarî yentache tak on wara tî kekn̂e Pawru ya,

Taa,

Sesa ya xa matko oyesekatîm xe wasî,

mîîka owya.

Ero ke Sesa yaka rma xa ken̂epe ham,

kekn̂e tî.

Ero wa tî kekn̂e Pestu Pawru ya.

13 Taa,

ero yinhîrî tak asakî ro mak enmapuche hara anarî takî tî mokyakn̂e hara iina Sesareia pona.

Kayaritomo xa tî mîk xakn̂e.

Akripa tî mîk xakn̂e noro yosotî.

Pestu yenso tî mokyakn̂e.

Cepeka tî n̂ekyakn̂e iina.

Berenise tî mîk xakn̂e epeka yosotî.

N̂examro tî mokyatken̂e Pestu yenso.

14 Pahkî tî n̂examro n̂enmayatken̂e iito.

Ero ke Pawru yehtopo takî tî n̂ekatîmyakn̂e Pestu Akripa ya.

On wara tî kekn̂e,

Tan nasî tooto kahrutopo yaw,

Perixi nahrutho ha.

15 Kicicme noro yehtopo n̂ekatîmyatken̂e owya Xerusaren po oyexitaw.

Tîmsom pokono yenîn̂e komo mîkyam ketken̂e owya,

Xutew poritomon komo marha.

Twaihkapore kr̂a nasî kica,

ketken̂e owya noro poko.

16 On wara tko wîîkekn̂e yîwya so,

Apohana,

on wara xa tko nas amna Homanu komo,

tooto waihkapo xatî komo exitaw yîn̂en̂ekathîrî waihkara nas amna yohno.

En̂ekaxapu ka n̂ekyas amna en̂ekan̂e komo yaka yîmtapotarî komo yentachome tak yîwya,

yîmtai ro so entachome ha.

Entache tak cen̂ekan̂e komo mtapotarî takî n̂eyukya hara yiixe cexitaw.

Eikuche yîwya kicicme yîhtînoyataw rma amna ya ero yimaw noro yipu waihkes amna,

wîîkekn̂e yîwya so,

kekn̂e tî Pestu yîwya.

17 Ero ke tak noro yen̂ekan̂e komo mokyatken̂e oona.

Enmapuche rma en̂ekano ritopo yaka kîwcekn̂e.

Iito oyexitaw Xutew komo n̂en̂ekarî tak wan̂ikpekn̂e.

18 Noro mokuche tak en̂ekan̂e komo n̂ekatîmyatken̂e kicicme noro yehtoponho.

Anarî me makî tko n̂ekatîmyatken̂e kicicme ehtoponhîrî.

Waihkano rin̂enho moso kica,

ket ha na,

cen̂epan̂em moso kica,

ketu na owya,

wîîkekn̂e.

Ero yipu poko kahra ro makî tko xatken̂e.

19 On wara mak ketken̂e,

Anarî me ro mak panatanmekno n̂iir̂asî moso kica Kaan poko.

Waixapu poko marha n̂ekatîmyasî moso kica.

Xesus tî Mîk waixapu pen yosotî.

Kar̂pe nas hara Xesus,

kan̂e me nasî moso Pawru kica,

kacho mak n̂ekatîmyatken̂e owya kopi.

20 Ero wa kacho yentache owya camkî ro mak wîxakn̂e noro yehtoponho poko.

Ero ke on wara wîîkeken̂e yîwya,

Pawru,

awto xera mai Xerusaren pona moxam ya esen̂ekaposo xa hara iina?

wîîkekn̂e yîwya.

21 Apohana,

iina oyen̂epe xera ro mak was awya.

Aukustu yaka mak oyen̂epe xe was awya.

Noro n̂entarî me mak oyesekatîm xe wasî,

kekn̂e xa matko owya.

Ero wa karî ke yîwya sowtatu komo ya tak wîîkekn̂e,

Taa,

moso aacoko hara kahrutopo yaka hara.

Amn̂e wen̂epesî Sesa yaka,

wîîkekn̂e sowtatu komo ya,

kekn̂e hara tî.

Ero wa tî kekn̂e Pestu Akripa ya.

22 Ero yipu yentache tak on wara tî kekn̂e Akripa Pestu ya,

Noro mtapotarî yenta xe cma re was ow hara,

kekn̂e tî.

Taa,

pahxaxa mencesî,

kekn̂e tî Pestu yîwya.

Ero wa tî n̂esencetken̂e Pawru poko.

23 Ero ke enmapuche hara Akripa takî tî cekn̂e en̂ekano ritopo yaka.

Berenise yakro tî cetken̂e.

Raatî yecen̂e komo tî ka cetken̂e poturme.

Okomn̂i tak Akripa komo cetken̂e.

Kir̂wan ke tponoye so tî cetken̂e.

Kayaritomo me xa tî n̂esenpetken̂e Akripa komo.

Sowtatu yantoman̂e komo marha tî cetken̂e akro so.

Enîno rin̂e me cehsom komo marha tî cetken̂e iitono ro kom ha.

Ero wa tî cetken̂e en̂ekano ritopo yaka.

Mer̂pono pîn komo tî cetken̂e.

Pestu marha tî cekn̂e.

Iito cexitaw so Pawru takî tî nan̂ikpekn̂e Pestu.

24 Noro yekîche takî tî Pestu nîmtapowakn̂e.

On wara tî kekn̂e,

Kayaritomo Akripa,

on wara wîîkes awya,

amna yakro mohxapu komo awya so marha wîîkesî,

moso meen̂axe Xutew komo n̂en̂ekaporî owya.

Xerusaren po oyexitaw mer̂pono pîn komo nîmtapowatken̂e oyakro moso poko.

Kicicitho moso kica,

ketken̂e.

Oona omokuche hara n̂en̂eketken̂e tak on̂entarî me.

Twaihkapore kr̂a nas ha,

ketken̂e moso poko.

Cerewre ro makî tî ketken̂e ero wara.

25 Ero yinhîrî tak yîmtapotarî yentache owya twaihkaxmu mera ro mak wîhtînoyakn̂e.

On wara tko kekn̂e moso owya,

Aukustu yaka xa mak oyen̂epe xe was awya oyesekatîmtome yîwya,

kekn̂e.

Ero ke,

Aukustu yaka ken̂epe ham,

wîîkekn̂e yîwya.

26 Ero ke Aukustu yakan mewre xe wasî karita.

On wara tî nai kicicme moso yehtoponho kica,

kacho mewre xe wasî yîn̂enîrî.

On̂ekatîmrî tko exihra nasî.

Ero ke yîn̂en̂ekathîrî komo tak wekpo oona yîmtapotarî yentachome awya so hara.

Kayaritomo Akripa,

an̂entarî me xa moso wekpo oona.

Yîmtapotarî yentache awya,

Ero wa kacho mewreko karita Aukustu yakan,

mîîkesî cma re owya.

27 Ahsîxapu yen̂epe xera wasî Aukustu yaka kicicme ehtoponhîrî yekatîmra oyexitaw karita yaka.

Ero ke onmewrerî cma re mîhtînomexpesî owya,

kekn̂e hara tî.

Ero wa tî kekn̂e Pestu Akripa ya.