Taa,

ero yimaw tak 5 ro mak enmapuche tak Kaan yaka cewomsom takî tî cekn̂e Sesareia pona.

Ananias mîk cekn̂e.

Poritomo komo marha tî cetken̂e noro yakro.

N̂examro yakro tî cekn̂e anarî hara.

Yaana me tîmtapotaxmu tî mîk xakn̂e.

Teturu tî mîk xakn̂e noro yosotî.

Ero wa tî cetken̂e Sesareia pona.

Pawru yen̂ekaposo tî cetken̂e kopenato yaka.

2-3 Iito exitaw so tak Pawru takî tî nan̂ikpekn̂e kopenato.

Pawru yekîche tak Teturu cokorî tî ka nîmtapowakn̂e.

Kicicme Pawru yehtopo tî n̂ekatîmyakn̂e Perixi n̂entarî me.

On wara tî kekn̂e yîwya,

Ai apa,

Perixi amoro,

on wara wîîkes awya,

Kir̂wanî ro xa amoro ham okre kopenato.

Amna yukurunpen̂e xa amoro okre.

Amna mtapotarî yentan̂e marha okre,

ehn̂an me marha amna ciin̂e amoro takîhso awexirî ke okre.

Ero ke tawake nas amna apoko.

4 Taa,

yohno mak tan kîmtapowas awakro.

Apokare xera wasî.

Kicicme Pawru yehtopo tan wekatîmyasî.

Ero ke omtapotarî cma re ka mencesî tawakem me awexirî ke.

5 Amna yerepokan̂e ro mak moso kica.

Ceseseyusom me n̂iir̂asî Xutew komo roowo poko hakno kom ha.

Nasare pononho ponarono komo panatanmekn̂e marha moso kica.

6 Kaan mîn yîwîrîma xe marha xakn̂e kica.

Ero poyero amna nahsîyakn̂e.

En̂eka xe amna xakn̂e tpanatanmetopo komo yaw roro rma.

7 Ero yimaw tak sowtatu yantoman̂e mokye,

Risias.

Amna n̂emyarkekn̂e.

Amna n̂etapetken̂e ro mak oko noro sowtatun komo tamorî ke so amna yemyar̂ketaw.

Ero wa Pawru naar̂atken̂e kica.

8 Pawru yarîche on wara tak kekn̂e antoman̂e amna ya,

Pawru yen̂eka xe awexitaw so Perixi yaka tak etocoko amn̂e,

kekn̂e amna ya.

Ero ke amna mokye ekatîmso awya.

Ero warai moso Pawru kica.

Entakî xe yîmtapotarî amoro ha,

kekn̂e tî yîwya.

Ero wa tî Pawru yen̂ekacho n̂ekatîmyakn̂e Teturu Perixi ya.

9 Yaaro,

ero wa xa nasî moso,

ketken̂e tî Xutew kom hara,

Teturu wa xa marha tî ketken̂e.

10 Taa,

Teturu yîtîtmamche takî Pawru wece takî tî n̂ekanîyakn̂e kopenato noro makîrha yîmtapotachome hara.

Ero ke Pawru takî tî n̂esekatîmyakn̂e yîwya on wara,

Ai kopenato,

mehxa ro Xutew komo yehtopo yentan̂e ro amoro.

Ero ke tahwore kesekatîmyasî an̂entarî me amna ponarono me awexirî ke.

11 Kokon̂oro mak kîwcekn̂e Xerusaren pona.

12 kaamo mak nasî iina owtotoponho.

Kasko xe moxam ya.

Kaan poko ahwotaxi mak kîwcekn̂e iina.

12 Xutew yesenmetopo yaw so rma re wîxakn̂e tîtken̂e mak.

Iitono komo yakro eseseikura ro mak wîxakn̂e.

Yîrwonmekno cirihra marha wîxakn̂e.

Xutew komo yesenmetopo yaw oyexitaw hara erepokano rin̂e pîn me marha wîxakn̂e.

Ewto pore owcetaw marha erepokano cirihra wîxakn̂e.

13 Tohnaw mak n̂ekatîmyaxe oyehtoponho.

Kicicme oyehtoponho yenîn̂e exihra ro mak nasî.

14 On warai xa tko ow,

ponaro amna porin pen yehtopo pokono ro rma ow.

Anarme ro mak nasî noro Kaan poko,

kexe rma re opoko.

Kpanatanmetopo rma tko wewetîtîkesî,

kweronoman̂enhîrî pen komo nmewretho wewetîtîkesî marha.

15 Waixapunhîrî komo pakacho ponaro marha wasî.

Amn̂e kenpakexe so Kaan.

Kir̂wan komo n̂enpakesî,

kicicitho komo marha,

wîîkesî mak.

Ero wa kan̂e komo xa marha cma re moxam hara oyen̂ekan̂e komo rma.

16 Kicicme oyexi xera ro mak wasî Kaan poko,

tooto komo poko marha.

Pahxanînhîrî rma ero wa wasî.

17 Taa,

on wara wîxakn̂e,

Xerusaren pona tohra ka wîxakn̂e yaake cimn̂ipu.

Kokon̂oro mak tak kîwcekn̂e hara iina.

Yupurantamnî komo purantan yaaso kîwcekn̂e,

opoyino komo ya tîmsom ha.

18 Ketakir̂wamekn̂e ka Kaan mîn yaka owtotome.

Erepokano cirihra marha wîxakn̂e iito.

Mer̂pono pîn komo exihra ro mak xatken̂e iito oyakro.

Iito oyexitaw oyepor̂atken̂e tak Xutew komo,

Asia pono kom ha.

19 N̂examro xa re mohcerî oona oyen̂ekaposo kicicme oyehtoponho yeen̂ataw ketaw ha re tîwya so.

20 On wara marha wîxakn̂e ha re,

Xutew yenîn̂e komo ya tak kesekatîmyakn̂e anarî kaamo po hara.

Moxamu rma xatken̂e iito.

Ero ke moxam ka n̂etacicowpe kicicme oyehtoponho ero yipu yentan̂e me exitaw so.

21 Kicicme na n̂encetken̂e on wara kachonho mak owya.

Kar̂pe wîîkekn̂e ha re on wara,

Waixapunhîrî tîtpakexe hara amn̂e,

kan̂e ow ha,

wîîkekn̂e.

Ero wa kacho poyero ow men̂ekexe,

wîîkekn̂e mak yîwya so,

kekn̂e tî.

Ero wa tî kekn̂e Pawru Perixi ya.

22 Taa,

ero wa tî Pawru yesekatîmtopo n̂encekn̂e Perixi.

Xesus ponarono komo yehtopo yentan̂e rma tî mîk xakn̂e.

Ero ke on wara tî kekn̂e Pawru ya,

Amn̂e awehtoponhîrî tak wencetîkesî sowtatu yantoman̂e mokuche,

Risias ha.

Ero wa tî kekn̂e Perixi Pawru ya.

23 Ero wa kache tak on wara tî kekn̂e Perixi iitono ya sowtatu yantomman̂e ya,

Moso arko hara.

Encoko men iito,

yimihra ha tko.

Akrono komo mohcowpe rma enso.

Wakre xe cexitaw so wakrecowpe rma,

kekn̂e tî yîwya.

Ero wa tî kekn̂e Perixi senturiaw ya.

24 Ero yinhîrî,

yaake ro enmapuche takî Perixi takî tî mokyakn̂e iina hara.

Cihye tî mokyakn̂e.

Trusira tî mîk xakn̂e yipici yosotî.

Xutew wosîn tî mîk xakn̂e.

Ero yimaw tak Pawru nan̂ikpekn̂e hara yîmtapotarî yentachome xa hara.

On warai poko tî nîmtapowakn̂e Pawru noro yakro,

Xesus Kristu mak nasî ponaro kehtopo me,

kacho poko.

25 Kir̂wan̂he kehtopo poko marha tî nîmtapowakn̂e,

Kupun yewetîn̂e pîn me kehtopo poko marha.

Ken̂ekan̂e me mokyasî Kaan amn̂e,

kekn̂e marha tî yîwya.

Ero yipu tî n̂ekatîmyakn̂e yîwya.

Ero wa ketaw yîwya Perixi tî n̂eraswakn̂e.

On wara tko tî kekn̂e,

N̂ex ha kapu,

amn̂e kan̂ikpes hara emyarîra oyexitaw,

kekn̂e tî yîwya.

Ero wa tî kekn̂e Perixi Pawru ya.

26 On wara tko kekn̂e Perixi tîhnaw,

Puranta na nîmya Pawru owya tahsîpînkachome owya,

kekn̂e.

Ero ke tî emapona roro noro nan̂ikpekn̂e yîmtapotarî yentachome tîwya.

Ero wa tî xakn̂e Perixi.

27 Taa,

2 cimn̂ipu tî xakn̂e Pawru tahruso rma thakwa okwe.

Ero yinhîrî tak n̂etowyakn̂e takî tî Perixi kopenato me cehtoponhîrî.

Anarî takî tî xakn̂e hara kopenato me yîhretawno hara.

Pohsiu Pestu tî mîk xakn̂e yîhretawno yosotî ha.

Pawru pen yahsîpînkara rma tî xakn̂e okwe Perixi Xutew komo tawakeretome.

Ero wa tî xakn̂e Perixi.