Taa,

iito takî tî Pawru n̂ecececekn̂e Xutew poritomon komo yeepatai.

N̂examro wece takî tî n̂een̂akn̂e.

On wara tî kekn̂e yîwya so,

Oyakno komo,

Kaan yanmera oyehtoponho yîhtînopîra ro mak wasî.

Mehxa ro rma ero wara wasî,

kekn̂e tî yîwya so.

2 Iito tko tî xakn̂e Ananias,

Kaan yaka cewomsom.

Pawru mtapotarî yentache on wara tî kekn̂e noro Pawru mîtwono komo ya,

Noro kr̂a yîmtakatapacoko,

kekn̂e tî.

3 Ero wa kache tak Pawru tî n̂eyukyakn̂e hara,

Kica,

ero wa xa marha awetape hara Kaan amn̂e.

Waaca yumuturexapu warai mak amoro kica.

Kpanatanmetopo yaw rorono wara cma re tan masî oyen̂ekan̂e me.

Ero ke ahce kacho ero yaw rorohra ow mîmtakatapape hara?

kekn̂e tî Pawru Ananias ya.

4 On wara tko tî ketken̂e Pawru mîtwono komo yîwya hara,

Kica,

Ahce kacho kicicme ro mak mîmtapowa Kaan yaka cewomsom poko hara?

ketken̂e tî yîwya.

5 Ero wa kache on wara tî Pawru n̂eyukyakn̂e hara,

Atara weexi.

Camkî weexi kica oyakno komo.

Kaan yaka cewomsom me noro yenîhra weexi.

Ero poko rma tko kesî Kaan karitan,

Kicicme yîmtapotara ro mak ehcoko awenîn̂e komo poko,

kesî,

kekn̂e tî Pawru.

6 Ero wa kache on wara takî tî enîno rin̂e komo yehtopo n̂een̂akn̂e Pawru,

Satusew me tî anarî komo n̂een̂akn̂e,

Parisew me tî anarî komo n̂een̂akn̂e hara.

Ero wa tî tîracoi ehtopo komo n̂een̂akn̂e.

Ero wa enîrî ke on wara tî kekn̂e yîwya so,

Oyakno komo,

Parisew ow ha.

Parisew me marha xakn̂e apapa pen.

On wara kacho poyero mak ow men̂ekexe,

Amn̂e pahxaro tîtpakexe hara waixapunhîrî,

kacho poyero mak,

kekn̂e tî.

Ero wa tî kekn̂e Pawru enîn̂e komo ya.

7 Ero yipu yentache tak enîno rin̂e komo takî tî n̂eseseyukyatken̂e n̂examro re mak.

Parisew komo tî n̂eseseyukyatken̂e Satusew komo yakro.

Ero wa tî xatken̂e okwe.

8 On wara kan̂e reha mîkyam Satusew komo,

Pakahnî me thakwa taxe okwe waixapunhîrî,

kan̂e reha.

Ancu exihra nasî,

ekatî exihra marha nasî,

kan̂e marha mîkyam.

Ero warahra nîhtînoyaxe Parisew komo reha.

Waixapunhîrî tîtpakexe hara,

kan̂e reha mîkyam.

Ancu komo naxe,

ekatî komo marha naxe,

kan̂e mîkyam Parisew komo.

Ero wa kan̂e mîkyam.

9 Ero yimaw tak kar̂pe ro mak takî tî n̂eseseyutîketken̂e okwe.

Wara ro makî tî ketîketken̂e.

Iito tî xatken̂e Xutew komo panatanmekn̂e komo.

Parisew komo tî mîkyam xatken̂e.

N̂examro takî tî nawomyatken̂e piiri.

Kar̂pe tî nîmtapowatken̂e Satusew komo yopo.

On wara tî ketken̂e,

Kicicme moso yehtopo yîhtînopîra ro mak nas amna.

Ekatî rma tko na nîmtapowakn̂e moso yakro,

ancu na mîk nîmtapowakn̂e akro.

Ero ke n̂expe mak,

pokohra ro mak cexpore nasî.

Kaan poko cetar̂maxmu me exihra ro mak cehcerî,

ketken̂e tî takrono komo ya.

10 Ero yinhîrî miya xe ro makî takî tî n̂eseiyatken̂e kopi.

Ero ke n̂eserepokekn̂e takî tî sowtatu yantoman̂e.

Pawru pen napoket ha men okwe,

kekn̂e tî.

Ero ke sowtatu komo takî tî n̂en̂epekn̂e hara Pawru ka.

Pawru tak aacoko hara yîhyai so,

kekn̂e tî yîwya so.

Emyacokacoko tak ha kar̂pe.

Aacoko tak sowtatu mîn yaka,

kekn̂e tî yîwya so.

Ero ke ero wa takî tî Pawru naar̂atken̂e sowtatu komo.

Ero wa naar̂atken̂e.

11 Taa,

amn̂e kosope tak Kporin komo takî tî mokyakn̂e Pawru yaka.

Yîmîtwo rma tî n̂ecececekn̂e.

On wara tî kekn̂e yîwya,

Tahwore rma esko Pawru,

Xerusaren pono komo ya oyehtopo mekatîmye.

Ero wa xa marha mekatîmyas hara amn̂e Homa pono komo ya hara,

kekn̂e tî Kporin komo Pawru ya.

12-13 Taa,

enmapuche tak anarî komo takî tî n̂esencetken̂e hara Pawru waihkacho poko.

Xutew komo xa marha tî mîkyam xatken̂e.

On wara tî ketken̂e,

Pawru penî kr̂a cetapacerî oroto rma.

Eseresmara ro makî ka cehcerî,

kwokru komo yerîhra marha ka cehcerî Pawru yetapara ka kexitaw so.

Etapara rma ka keseresmetaw so Kaanî rma kwaihkacowpe kîwyam pen hara,

ketken̂e marha tî kopi.

40 yopono tî mîkyam xatken̂e ero wa kan̂e komo.

14 Ero ke n̂examro takî tî cetken̂e tîmsom pokono yenîn̂e komo yaka.

Iito marha tî xatken̂e poritomo kom hara.

On wara tî ketken̂e yîwya so,

Apa komo,

amna n̂esehtînopu Pawru waihkacho poko.

Etapa xe xa nas amna.

Eseresmara ka nas amna noro yetapara ka amna exitaw.

Etapara rma amna yeseresmetaw cetwaikapo xe rma nas amna Kaan ya,

ketken̂e tî yîwya so.

15 Ero ke on wara cma re mîîkexe sowtatu yantoman̂e ya,

Pawru cma re men̂epesî xa hara amna yaka.

Noro yehtopo yenta xe cma re nas amna takîhso xa tak,

mîîkexe cma re yîwya.

Enîno rin̂e komo yanme rma ero wa mîîkexe yîwya.

Taa,

esama yakumyaw rma nas amna ero yimaw ceseyamso.

Pawru penî kr̂a tak amna n̂etapesî ekyataw rma,

ketken̂e tî yîwya so.

Ero wa tî ketken̂e tîmsom pokono yenîn̂e komo ya,

poritomo komo ya marha.

16 Taa,

ero wa esencetaw so iito rma cma tî xakn̂e Pawru parî.

Noro yepeka mrerî tî mîk xakn̂e.

Noro tî n̂encekn̂e yîmtapotarî komo.

Ero ke sowtatu mîn yaka takî tî cekn̂e ekatîmso Pawru ya.

Awetapexe men taam okwe,

kekn̂e tî yîwya.

17 Ero ke takî tî sowtatu yantoman̂e maywen nan̂ikyakn̂e Pawru.

On wara tî kekn̂e yîwya,

Moso cma re maar̂asî kar̂pamxan awantoman̂e komo yaka.

Tîmtapotarî yekatîm xe tî nai yîwya,

kekn̂e tî Pawru yîwya.

18 Ero ke Pawru parî takî tî naar̂akn̂e sowtatu yantoman̂e yaka.

On wara tî kekn̂e yîwya,

Oyan̂ikî Pawru,

ahruxapu rma.

Moso kar̂pamxanî cma re maar̂asî sowtatu yantoman̂e yaka.

Noro yakro tîmtapota xe tî nai,

nîîka owya.

Ero ke ahyaka weekî,

kekn̂e tî antoman̂e ya.

19 Ai ha,

kekn̂e takî tî antoman̂e.

Ero ke kar̂pamxan takî tî nahsîyakn̂e amorî poko aatome tootonaka.

Arîche on wara takî tî kekn̂e yîywa,

Ahce wa ka xe mai owya?

kekn̂e tî yîwya.

20 On wara tî kekn̂e kar̂pamxan,

Pawru yetapacho poko tî n̂esentacow Xutew komo.

On wara kacow,

Pahxaxa cesenmecerî enîno rin̂e komo meero.

Ero yimaw sowtatu yantoman̂e yaka cen̂epecerî porisia.

On wara kan̂e cen̂epecerî,

Ai apa,

Pawru cma re men̂epesî xa hara amna yaka.

Noro yehtopo yenta xe nas amna takîhso xa tak,

kan̂e cen̂epecerî,

kacho poko tî n̂esentacow oroto.

21 N̂examro yewetîra ro mak men esko.

Mînto tî natu Pawru waparî komo ceseyamso.

40 yopono tî mîkyam,

noro waparî me cehsom komo.

Eseresmara tî ka natu Pawru yetapara ka cexitaw so.

Pawru yetapara rma ka ceseresmache so rma Kaan ya cetwaikapo xe so tî natu kopi.

Ero ke ahyaka takî tî mokyatu oroto amtapotarî yentaxi.

Taa,

ahyaka so warpe hamî,

kacho yenta xe so tî natu amtapotarî ha,

kekn̂e tî yîwya.

Ero wa tî kekn̂e Pawru parî antoman̂e ya.

22 Ero wa kache Pawru parî takî tî n̂en̂epekn̂e hara.

Taa,

etok hara.

Owya mekatmo ero yekatîmra ro mak men esko anarî ya,

kekn̂e tî antoman̂e yîwya.

Ero wa tî kekn̂e.

23 Ero yinhîrî takî tî sowtatu yantoman̂e komo nan̂ikyakn̂e n̂examro yantoman̂e.

2 mak nan̂ikyakn̂e.

Mokuche so tak on wara tî kekn̂e yîwya so,

Sowtatu komo antomacoko tîhtarî po tîtosom komo,

200.

Kawaru mkaw tîtosom komo marha antomacoko hara,

70.

Tîrahnuyem komo marha antomacoko,

200 hara.

On wara kacoko yîwya so,

Sesareia pona tî tîhcetu oroto kosope 9 to,

kacoko yîwya so.

24 Kawaru marha aacoko,

yîmkaw Pawru totopo.

Ero wa tak Pawru aacoko kopenato yaka,

Perixi yaka,

kekn̂e tî antoman̂e sowtatu komo yaan̂e ya.

25-26 Ero wa kache tak karita takî tî mewrekn̂e antoman̂e.

On wara kacho tî mîn mewrekn̂e,

Kopenato amoro Perixi.

On okaritan an̂enîrî.

Krawciu Rixas ow ha.

Ahce wa mai iito,

kir̂wan̂he mai?

27 Moso nahsîyatken̂e Xutew komo.

N̂etapetken̂e marha waihkachome ha tî re tîwya so.

Ero yimaw tak ow kîwtoi ewyomaxi.

Sowtatu komo marha waar̂akn̂e oyakro.

Homanu mîkro,

kacho wencekn̂e.

Ero ke wewyomekn̂e.

28-29 Kicicme ehtopo yenta xe wîxakn̂e.

Ero ke n̂examro yenîn̂e komo wan̂ikyakn̂e moso yehtopo yentachome owya.

On wara makî tko wencekn̂e yîmtapotarî komo noro pokono,

tpanatanmetopo komo yewetîra exirî poyero makî tî waihka xe nat ham.

Twaihkaxmu me ehtopo yekatîmra rma xatken̂e,

tahrusom me ehtopo yekatîmra marha xatken̂e.

30 Ero yinhîrî anarme tak wencekn̂e hara,

Moso waparî komo tî natu ceseyamso esama yakumyaw,

kacho wencekn̂e.

Ero ke yohno rma wen̂epew moso ahyaka.

En̂ekapon̂e komo ya marha wîîka,

Perixi yaka mak etocoko Pawru yehtopo yekatîmso yîwya,

wîîka yîwya so.

Ero ke moso men Pawru wen̂epesî ahyaka.

Ero wa mak wîîkes awya,

kacho tî mîn mewrekn̂e.

Ero wa tî karita mewrekn̂e sowtatu yantoman̂e Perixi yakan.

31-32 Ero ke tantoman̂e komo mtapotachonho yaw roro takî tî sowtatu komo naar̂atken̂e Pawru pen.

Kosope rma tî naar̂atken̂e Ancipatrice pona mak ha ka.

Enmapuche hara anarî komo takî tî n̂etîrametken̂e Xerusaren pona hara,

tîhtarî po tîtosom kom ha.

Kawaru mkawno komo mak takî tî Pawru naar̂atken̂e miya roro.

33 Ero yinhîrî Sesareia pona cepatakache so tak kopenato yaka takî tî naar̂atken̂e Pawru.

Sowtatu yantoman̂e karitan marha takî tî nîmyatken̂e yîwya.

Moso ha Pawru,

amna n̂ek ahyaka,

ketken̂e tî yîwya.

34-35 Ero ke antoman̂e karitan takî tî n̂een̂akn̂e kopenato.

Enîche Pawru ya takî tî kekn̂e hara,

Ahtono xa amoro?

kekn̂e tî yîwya.

Sirisia pono ow ha,

kekn̂e tî Pawru.

Taa,

awehtopo tak wences amn̂e awen̂ekapon̂e komo mokuche mak,

kekn̂e tî yîwya.

Ero wa kache tmaywen komo ya takî tî narpekn̂e hara.

Moso aacoko Eroces mîn yaka kopenato mîn yaka ha.

Iito tak encoko,

kekn̂e tî yîwya so.

Ero wa tî kekn̂e kopenato Pawru poko.