Taa,

Pawru takî tî nîmtapowakn̂e yîn̂entarî komo me,

n̂esekatîmyakn̂e mak.

On wara tî kekn̂e.

Oyakno komo,

apa komo,

oyesekatîmtopo cma re mencexe,

kekn̂e tî.

2 Ebrew mtapotarî yaro yîmtapotarî yentarî ke tak tîtken̂e xa takî tî n̂ehtîketken̂e entan̂e komo.

3 On wara takî tî kekn̂e Pawru yîwya so.

On wara wîîkes awya so,

Xutew rma ow ha.

Sirisia po ewruxapu ow Tahsu po.

On po por̂mamxapu tko ow,

Xerusaren po rma.

Kamariew npanatanmekîtho ow.

Kaanî mtapotarî poko n̂epanatanmekyatken̂e kporin pen komo ero poko xa marha panatanmexapu ow hara.

Kaan xatî me xa kpor̂mamyakn̂e.

Enko,

Kaan xatî me maxe amyamro ero wa xa marha wîxakn̂e ow hara.

4 Xesus ponarono komo yemetanmekn̂enho owî,

waihkan̂enhîrî marha.

Kîrkomo wahsîyakn̂e,

wahruyakn̂e marha.

Ero wara xa marha wooxam komo wiir̂akn̂e hara.

5 Ero wa oyehtoponho rma nîhtînoyasî Kaan yaka cewomsomu rma.

Poritomo komo marha ero wa oyehtoponho nîhtînoyaxe,

poritomo kom ha.

N̂examro rma karita nîmyatken̂e owya onarîrî.

Kakno komo yakanî rma mîn nîmyatken̂e owya Tamasku pono komo yakan ha.

Xesus ponarono komo yahsîtopo pokono rma mîn karita nîmyatken̂e owya.

Ero ke Tamasku pono komo yahsîso tak kîwcekn̂e.

Oona ekî xe so wîxakn̂e cemeknumiso so kr̂a kuripara ke.

Emetanmetome so kr̂a ekî xe wîxakn̂e oona.

6 Ero ke esama yaw tak kîwcekn̂e.

Amn̂e kamarakataw Tamasku pahnoke tak wîxakn̂e kamarakataw.

Ero yimaw tak weeyu imo n̂epotucekn̂e kopi.

Kah yawno mîn oweipekn̂e ro mak oco.

7 Ero yanme kepîrkekn̂e thakwa roowo pona.

Tooto mtapotarî warai tak wencekn̂e.

Sawru,

Sawru,

ahce poyero Ow memetanmekya okwe?

kekn̂e owya.

8 Onoke Amoro hara Apa kopi?

wîîkekn̂e yîwya.

Xesus xa Ow ha Nasare pononho.

An̂emetanmekrî rma Ow ha,

kekn̂e owya.

9 Iito rma re xatken̂e oyakrono komo.

Weeyu tî n̂een̂atken̂e.

Oyakro tîmtapotaxmu tko tî entara xatken̂e.

10 Ahce poko oyexi xe mai ha Apa?

wîîkekn̂e yîwya.

Awomko,

kekn̂e tak Kporin komo owya.

Ewto pona rma etok ha Tamasku pona.

Iito awexitaw poko awehtopo tak n̂ekatîmya awya iitono,

kekn̂e owya.

Ero wa Kporin komo kekn̂e owya.

11 Ero ke kîwcekn̂e rma.

Ewuhra thakwa tak kîwcekn̂e.

Oyewkanoyakn̂e thakwa weeyu imo cerewre exirî ke.

Ero ke oyamorî poko mak oyar̂atken̂e oyakrono komo.

Ero wa oyar̂atken̂e Tamasku pona.

12 Ero yimaw tak iitono mokyakn̂e oyenso.

Ananias tî mîk xakn̂e noro yosotî.

Kaan xatî xa mîk xakn̂e.

Moises pen nmewretho yewetîn̂e ro makî tî mîk xakn̂e.

Kir̂wan mîkro okre,

kacho marha tî mîk xakn̂e Xutew komo ya iitono komo ya.

13 Noro tak mokyakn̂e ohyaka.

Omîtwo tak n̂ecececekn̂e.

On wara kekn̂e owya,

Oyakno Sawru,

cewke tak esko hara,

kekn̂e owya.

Ero ke ero yimaw rma tak keewakn̂e.

Noro tak ween̂akn̂e.

14 On wara marha kekn̂e noro owya,

Kaan nmen̂ekatho tî amoro oyakno,

ponaro kporin pen komo yehtopo nmen̂ekatho rma.

Tîmtapotarî yentan̂e me tî amen̂ekekn̂e.

Kir̂wanî ro yenîn̂e me marha tî amen̂ekekn̂e,

tîmtapotarî yentan̂e me marha tî.

Ero warai me tî wa amen̂ekekn̂e.

15 Noro yehtoponho yekatîmn̂e me takî tî mai amn̂e miyan komo ya rma.

An̂enîthîrî tî mekatîmya,

an̂entathîrî marha.

16 Ero ke ahce kacho mecmamya tan.

Emicita,

ekorokapota Kaan ya.

Apa kah yawno,

kasko,

awosotî pona tak ween̂asî.

Ero ke ow korokakî kicicme oyehtoponho yîhcamnotome,

kasko.

Ero wa kasko Kporin komo ya,

kekn̂e owya Ananias,

kekn̂e tî Pawru yîwya so.

17 On wara marha tî kekn̂e noro yîwya so,

Ero yinhîrî tak Xerusaren pona tak kmokyakn̂e hara.

Oona omokuche hara Kaan mîn yaka tak kîwcekn̂e yîmtapotaxi Kaan yakro.

Iito omtapowataw tak owosotono wara wîxakn̂e.

18 Kporin komo xa hara ween̂e.

On wara kekn̂e Noro owya,

Ai Pawru,

etoko yohno Xerusaren poi.

Amtapotarî yewetîra ro mak naxe okwe tantono komo,

opoko ekatîmtopo yewetîra,

kekn̂e owya Kporin komo.

19 On wara tko wîîkekn̂e yîwya,

Ahce kacho oyentara nat Apa?

Oyehtoponho werono mîkyam.

Apona enîn̂e komo yahrun̂enho mîkro,

yîhyokn̂enhîrî marha mîkro,

kexe opoko.

Kesenmetopo komo yaw so rma yîhyokn̂enhîrî komo mîkro,

kexe marha opoko Apa,

wîîkekn̂e yîwya.

20 Aponarono pen waihketaw yîwya so,

Estepan pen,

iito rma wîxakn̂e ow yîmîtwo so.

Twaihkapore nasî,

wîîkekn̂e ow hara etapan̂e komo ya.

Etapan̂e komo ponon wahsîyakn̂e marha noro pen yetapachome yîwya so.

Ero wa oyehtoponho nîhtînoyaxe Apa,

wîîkekn̂e Kporin komo ya.

21 Pîra,

etoko rma.

Meyeno komo cheka tak ken̂epesî Xenciu komo cheka ha,

kekn̂e Kaan owya,

kekn̂e tî Pawru.

Ero wa tî n̂esekatîmyakn̂e tîîxatî pîn komo n̂entarî me.

22 Taa,

ero wicakî makî tî Pawru mtapotarî n̂encetken̂e.

Xenciu,

kacho yentache tak yîwya so nîrwonatken̂e xa hara okwe.

Wara ro mak takî tî ketken̂e ero yimaw.

Moso kr̂a etapacoko roowo po exihra tak ehtome.

N̂expe rma waihkara,

kacho pînî ro mak moso kica,

ketken̂e tî.

23 Ero wa tî ketken̂e Pawru pen poko okwe.

Cewrewre ro makî tî ketken̂e.

Tponon komo takî tî mohketken̂e tîrwon komo ke.

Roowo marha tî nar̂metken̂e kahsî.

Ero wa tî xatken̂e n̂examro okwe.

24 Ero wa yîrwonîmrî yenîche sowtatu yantoman̂e takî tî n̂eserepokekn̂e.

Ahce kacho wara ro mak ket okwe moso poko ha?

kekn̂e tî.

Ero ke sowtatu komo takî tî nantomekn̂e hara.

On wara tî kekn̂e yîwya so,

Moso aacoko mîîmo yaka yîhyotome awya so.

Ero yimaw xa na cehtoponhîrî n̂ekatîmya.

Kicicitho xa tko na moso.

Enko xe,

yîrwonîmrî kom ha,

kekn̂e tî yîwya so.

25 Ero ke tak Pawru takî tî naar̂atken̂e mîîmo yaka.

N̂emeknumiyatken̂e marha tî yîhyotome.

Iito tko tî xakn̂e anarî hara sowtatu yantoman̂e hara.

Noro yakro takî tî Pawru nîmtapowakn̂e.

Ai,

kekn̂e tî,

on wara wîîkes awya,

Kayaritomo mtapotacho yanme ma re nai awya so Homanu yîhyotopo,

en̂ekanî ro yîhyotopo ha?

kekn̂e tî Pawru yîwya.

26 Ero yipu yentache sowtatu yantoman̂e takî tî cekn̂e ekatîmso tantoman̂e ya.

On wara tî kekn̂e yîwya,

Twerî men esko mîkro poko.

Homanu tî mîkro kopi,

kekn̂e tî yîwya.

27 Ero wa kacho yentache antoman̂e takî tî cekn̂e Pawru yaka.

On wara tî kekn̂e yîwya.

Yaaro xa awehtopo ekatîmko owya.

Homanu xa ma amoro kopi?

kekn̂e tî yîwya.

Nhnk,

Homanu rma ow ha,

kekn̂e tî Pawru yîwya.

28 Ahce kopi.

Noro yipu xa marha ow hara.

Mer̂pora wîmyakn̂e puranta Homanu me oyehtome tak ha,

kekn̂e tî sowtatu yantoman̂e yîwya.

On wara tî Pawru n̂eyukyakn̂e,

Owî xa kewruyakn̂e Homanu me,

kekn̂e tî Pawru yîwya.

29 Ero wa Pawru yehtopo yentache tak nîmhoketken̂e hara tî yîhyotopo poko antomaxapunhîrî komo.

Yîhyai takî tî cetken̂e hara.

Antoman̂e marha tî n̂eraswakn̂e.

Homanu xa moso wemeknumipo kopi,

kekn̂e tî.

Ero wa tî kekn̂e.

30 Taa,

enmapuche hara Pawru takî tî nîmhokekn̂e antoman̂e.

Noro yehtoponho yenta xe rma tî xakn̂e,

takîhso enta xe.

Ero poyero xa moso xera tî natu Xutew komo,

kacho yenta xe rma tî xakn̂e.

Ero ke tak tîmsom pokono yenîn̂e komo takî tî nan̂ikyakn̂e antoman̂e.

Xutew poritomon komo marha tî nan̂ikyakn̂e.

Esenmekîche so Pawru takî tî naar̂akn̂e yîhyaka so,

esenmexapu komo yeepatai.

Ero wa tî noro n̂iir̂akn̂e antoman̂e kir̂wantaw tak entachome Pawru yen̂ekacho yîwya so.

Ero wa tî xakn̂e.