Xerusaren Pona Cesî Pawru
21
Taa,
Epesu pono komo tak amna nahsîpînkekn̂e.
Kanawa yaka amna n̂esenkayakn̂e.
Amna tak cekn̂e.
Pataw roro mak amna cekn̂e Kos pona.
Enmapuche hara amna cekn̂e hara Hoces pona hara.
Ero yinhîrî tak amna cekn̂e xa hara Patara pona hara.
2 Iito tak xakn̂e anarî hara kanawa,
Penisia pona tîtosom.
Ero ke ero yaka tak amna n̂esenkayakn̂e hara.
3 Amna tak cekn̂e mooxe n̂he Xipre censo ro.
Ero tak amna mamrikyakn̂e poowa n̂ixa.
Ero yinhîrî iina roro tak amna cekn̂e Siria pona roro.
Iina tak amna nawomyakn̂e Ciru pona.
Iito kanawa yaan̂e komo nîhtînoyatken̂e kanawa yawnonho yanîmtopo me iitono komo ya tîmtome tak ha.
4 Iito Xesus ponarono komo amna n̂een̂akn̂e.
Ero ke n̂examro yakro amna n̂enmayakn̂e 7 kaamo.
Iito amna exitaw Pawru weronometken̂e xa hara n̂examro.
Kaan Yekatî yanme rma ketken̂e yîwya.
Tohra ro mak esko Xerusaren pona,
ketken̂e yîwya.
5 Ero yinhîrî tak amna totopo me n̂enmayakn̂e hara.
Ero ke amna cekn̂e hara.
Amna yakro rma mokyatken̂e iitono komo ecihtaka mak.
Yipici komo marha mokyatken̂e,
yîmxîkrî komo marha.
Ecihtaw tak amna n̂eremekn̂e tosokmuru po.
Kaan yakro amna nîmtapowakn̂e iito.
6 Ero yinhîrî amna n̂esekatîmyakn̂e cesenkachome kanawa yaka xa hara.
N̂examro tak cetken̂e hara tîmîn komo yaka hara.
7 Ero ke amna cekn̂e Ciru poi.
Toremaita pona amna cekn̂e.
Iito tak amna nawomyakn̂e hara.
Kaan xîkrî komo amna nîmtapotarekn̂e iitono kom hara.
Yîhyaw so amna xakn̂e cewn̂e kaamo mak.
8 Taa,
enmapuche hara amna cekn̂e Sesareia pona hara Pawru yakro.
Iito xakn̂e Piripe,
epanxerista.
7 komo yakrononho rma mîk xakn̂e.
Noro yaka amna cekn̂e.
Iito tak xakn̂e amna noro yaw.
9 Noro yemsîrî komo marha xatken̂e,
4 ha.
Iin̂omnî ro makî tî mîkyam xatken̂e.
Kweronoman̂e ro komo tî mîkyam xatken̂e.
10 Taa,
pahkî n̂he amna xakn̂e Piripe yaw.
Iito amna exitaw kweronoman̂e ro mokyakn̂e Xuteia poi.
Akabu tî mîk xakn̂e noro yosotî.
11 Tmokuche tak Pawru yaan̂apotun tak nîmhokekn̂e.
Yîmhokache tîhtarî rma tak n̂imiyakn̂e iike.
Taporî marha n̂imiyakn̂e.
On wara kekn̂e,
On wara kesî Kir̂wanî ro Yekatî,
On wara xa marha Xutew komo n̂imiyaxe amn̂e on yosom.
Xerusaren pono komo mîkyam n̂imiyaxe.
Yimixapunhîrî tak Xenciu komo yaka tak naar̂axe yînahsîrî me hara okwe,
kesî,
kekn̂e Akabu.
12 Ero yipu yentache on wara tak amna kekn̂e Pawru ya,
Ahce wece awto xe mai okwe Xerusaren pona?
Iina tohra ro mak awexi xe nas amna,
kekn̂e amna yîwya.
Ero wa xa marha ketken̂e iitono kom hara yîwya.
13 Anarî me tko Pawru n̂eyukyakn̂e hara amna mtaka.
Ahce kacho mîwracetu opînîn yaw?
Ow mak mîspexe.
Omitopo pona erasîra ro mak wa wasî.
Xerusaren po rma na kwaihya meero Xesus yakrono me oyexirî ke.
Ero yanme owaitopo wukurunkesî rma,
kekn̂e amna ya.
Ero wa kekn̂e Pawru amna mtaka.
14 Ero wa karî ke amna tak nîtîtmamyakn̂e,
amna yewetîra exirî ke.
On wara mak kekn̂e amna yîwya,
Kporin Kom ha tko.
Noro mak awir̂pe tanme ro,
kekn̂e mak amna yîwya.
15-16 Ero yinhîrî tak cemyawno tak n̂enkayakn̂e hara amna Xerusaren pona tîtotome.
Amna yakro mokyatken̂e Sesareia pono komo Xesus ponarono komo yaake.
Taa,
Xerusaren pona amna yepatakache amna tak naar̂atken̂e n̂examro iitono mîn yaka.
Nason tî mîk xakn̂e tîmîyem yosotî.
Pahxa Xesus yahsîn̂enho tî mîk xakn̂e.
Xipre pononho tî mîk xakn̂e.
Noro yaw tak amna n̂enmayakn̂e.
Kaan Mîn Yenîn̂e Komo Yakro N̂esencesî Pawru
17 Ero ke Xerusaren pona amna yepatakache tawake tak amna nîmtapotaretken̂e iitono komo Kaan xîkrî komo.
18 Enmapuche hara Pawru tak cekn̂e Ciaku yenso.
Amna marha cekn̂e Pawru yakro.
Iito marha xatken̂e Kaan mîn yenîn̂e komo ahnoro Ciaku yakro.
19 N̂examro yîmtapotareche Pawru tak n̂esekatîmyakn̂e yîn̂entari komo me Xenciu komo chere tîtotoponhîrî poko.
Mer̂pono pîn komo tak Kaan nahsîyasî tîmxîkrî me Xenciu kom ha.
Omtapotarî yanme rma ero wa naxe,
kekn̂e.
Kir̂wantaw n̂esekatîmyakn̂e yîn̂entarî komo me.
20 Ero yipu yentache tak Kaan mîn yenîn̂e komo tak nahwowatken̂e Kporin komo poko.
Ero wa kache on wara ketken̂e hara Pawru ya,
Oyakno,
Xutew komo meen̂asî tan Xesus pona enîn̂e komo.
Mer̂pora naxe noro yipu komo,
yaake miw.
Kpanatanmetopo komo ponaro rma tko naxe ahnoro.
21 On wara kacho tko tî n̂encetu apokono tapota,
Anarî me mak Xutew komo panatanmekya Pawru kica.
Ero wa tî meyeno komo panatanmekya Xenciu chewno komo kica,
kacho tî n̂encetu apokono.
On wara tî mîîke yîwya so,
Moises pen nmewretho ponarora mak ehcoko.
Amxîkrî komo anpikara ro mak ehcoko.
Kporin pen komo yehtoponho marha ahsîpînkacoko,
nîîke tî Pawru okwe Xutew komo ya,
kacho tî n̂encetu apoko.
22 Ero ke ahce wa cexpore nai?
Ahnoro rma wa n̂encexe amohtopo.
Ero ke n̂esenmekyaxe.
23 Ero ke amna mtapotarî ewetko.
Tan naxe 4 kîrkomo amna yaw.
Kaan n̂entarî me yîmtapotaxapu mîkyam,
towîhnî me yîmtapotaxapu.
Ero wara men was ow ha Kaan yanme mak ha,
kan̂enho mîkyam.
24 N̂examro tak cexe Kaan mîn yaka amn̂e etakir̂wamaxi.
Ero ke n̂examro yakro etoko amoro hara.
N̂examro yetakir̂wamacho epemakî amoro n̂examro yekanamurinkachome.
Ero wa esko Moises nmewretho ponarono me rma awesenpotome,
kir̂wan̂he tak awentome Xutew komo.
On wara tak kexe,
Kir̂wan̂he rma nai ham Pawru.
Enko xe,
Moises pen nmewretho yaw roro rma nai ham.
Tohnaw mak nîmtapowat ham noro poko,
kexe tak apoko.
25 Xenciu komo ya reha ero wa kahra nas amna,
Xesus ponarono komo ya.
Pahxa rma knîhtînoputhîrî komo poko rma amna mewrekn̂e karita yîn̂enîrî komo.
On wara mak amna kekn̂e yîwya so,
On wara ehcoko amyamro Xenciu komo,
ciixaputho ya tîmxapunhîrî tonohra ehcoko wooto.
Kamxuku yemehra marha ehcoko.
Exexewnuxapu tonohra marha ehcoko.
Apici yairo exihra marha ehcoko,
kacho mak mîn amna mewrekn̂e yîn̂enîrî komo,
ketken̂e hara tî.
Ero wa tî ketken̂e Ciaku komo Pawru ya.
26 Ero ke enmapuche hara n̂ekorokekn̂e tak Pawru 4 komo yakro.
Ero yinhîrî tak Kaan mîn yaka takî tî cetken̂e n̂examro esekatîmso.
On wara kaxi tî cetken̂e,
Amna tak nîtîhka cekorokacho.
Ero ke okno cma re mîparaxkexe amna yetakir̂wamatopo yimawno,
kaxî tî cetken̂e.
Pawru Pen Nahsîyaxe
27 Ero ke 7 kaamo po roro Pawru cekn̂e Kaan mîn yaka.
Taa,
iina noro totopo yenatporo exitaw Pawru takî tî n̂een̂atken̂e Xutew komo Kaan mîn yaw.
Asia pono komo tî mîkyam noro n̂een̂atken̂e.
Enîche tak Kaan mîn yawno komo takî tî n̂erepoketken̂e.
Pawru takî tî nahsîyatken̂e.
28 An̂ikno takî tî n̂iir̂atken̂e.
Eeei,
Ixaw Yana komo,
amna akronomatamcoko ha,
ketken̂e tî.
Kar̂pe tî ketken̂e.
On wara marha tî ketken̂e,
Moso xa moso anato panatanmekno rin̂e kica.
Miyan komo rma panatanmekyasî kica.
Kicicme naxe Xutew komo,
kan̂e moso kica.
Moises pen nmewretho ewetîra ro mak ehcoko.
Kaan mîn ponarora marha ehcoko,
kan̂e marha moso kica.
Kreku komo marha n̂ekye oona Kaan mîn yaka,
kir̂wanî ro yaka yîwîrîmachome tak kica,
ketken̂e tî Pawru poko okwe.
29 Pahxa rma tî Pawru n̂een̂atken̂e n̂examro,
ewto po makî tî n̂een̂atken̂e Tropimu yakro.
Epesu pono mîk Tropimu.
Noro na Pawru n̂ekye oona Kaan mîn yaka,
ketken̂e makî tî.
30 Ero yimaw tak iitono komo n̂eserepoketken̂e ahnoro.
Kaan mîn yaka takî tî cetken̂e kar̂pe.
Pawru pen takî tî nahsîyatken̂e,
n̂ihxikyatken̂e katpanaka.
Ero yinhîrî Kaan mîn metatan tî nahruyatken̂e.
31 Taa,
Pawru pen takî tî waihka xe xatken̂e ahsîn̂enhîrî komo.
Ero yimaw rma tko tî sowtatu yantoman̂e n̂encekn̂e.
Wara ro mak tak kexe kopi Xerusaren pono komo ahnoro,
kacho tî n̂encekn̂e.
32 Ero ke tî yohno noro cekn̂e enso.
Sowtatu yantoman̂e komo tî naar̂akn̂e,
sowtatu komo marha.
Sowtatu komo yenîche tak nîtîtmamyatken̂e takî tî tooto komo.
Pawru yetapara takî tî xatken̂e.
33 Tmokuche tak Pawru pen takî tî nahsîyakn̂e sowtatu yantoman̂e hara.
Ahsîche n̂imipekn̂e takî tî sowtatu komo ya.
Kuripara ke tî n̂imipekn̂e ececoka.
Onoke moso ha?
kekn̂e tî ahsîn̂enhîrî komo ya.
Ahce poyero wa metapet ha?
kekn̂e marha tî yîwya so.
Ero wa tî kekn̂e sowtatu yantoman̂e Pawru yahsîn̂enho komo ya.
34 N̂eyukyatken̂e rma ha re.
Mer̂pora tko tî xatken̂e ahsîn̂enhîrî komo.
Anarmerpa so makî tî ketken̂e.
Wara hak makî tî ketken̂e takîhso entarî yarohra thakwa.
Ero ke sowtatu yaka takî tî Pawru narpekn̂e antoman̂e sowtatu mîn yaka.
35 Mîîmo yehyun yaka arîche tak nîrwonîmtîketken̂e takî tî Xutew komo.
Pawru pen yetapa xe ro makî tî xatken̂e.
Ero ke Pawru takî tî nanîmyatken̂e sowtatu komo tmotaka so ewyomachome.
Ero wa tî naar̂atken̂e.
36 Pawru wenari tî mokyatken̂e Xutew komo.
Waihkacoko kr̂a,
waihkacoko kr̂a,
ketken̂e tî okwe cerewre ro mak.
Ero ke tî nanîmyatken̂e sowtatu komo tmotaka so.
37 Ero yimaw tak sowtatu mîn yaka Pawru naar̂atken̂e sowtatu komo.
Taar̂ataw rma Pawru takî tî nîmtapowakn̂e sowtatu yantoman̂e yakro.
Kîmtapowasî cma re awakro,
kekn̂e tî yîwya.
Ai ha,
kekn̂e tî antoman̂e.
Kreku mtapotarî ma mukukme?
kekn̂e tî Pawru ya.
38 Exipsiu me cma re kîhtînopu.
Pahxa kayaritomo yar̂ma xe tî xakn̂e Exipsiu.
Waapa komo tî n̂enmekyakn̂e 4.000.
N̂examro takî tî naar̂akn̂e pohnîntaka.
Noro rma na mîkro,
wîîka cma re apoko,
kekn̂e tî Pawru ya.
39 Pîra,
noro pîn ow,
kekn̂e tî Pawru yîwya hara.
Xutew rma ow ha.
Tahsu po ewruxapu ow Sirisia po ha.
Wahrai pîn mîn ewto,
Tahsu ha.
Ero ke moxam n̂entarî me oyesekatîm xe wasî,
kekn̂e takî tî Pawru yîwya.
40 Taa,
kasko rma yiixe awexitaw,
kekn̂e tî antoman̂e yîwya.
Ero ke Pawru takî tî n̂ecececekn̂e mîîmo yehyun po.
Pokupoku kekn̂e takî tî cemtarakaxmu komo wece.
Ero wa tî yîtîtmamno n̂iir̂akn̂e.
Tîî,
ketken̂e.
Ero wa exiche so tak Pawru takî tî nîmtapowakn̂e yîn̂entarî komo me.
Ebrew mtapotarî yaro rma tî nîmtapowakn̂e.
Ero wa tî nîmtapowakn̂e.