Taa,

wara ro mak kano yîtîtmamîche tak tîto xe takî tî xakn̂e Pawru Maseton̂a pona.

Ero ke tî Xesus ponarono komo nan̂ikyakn̂e cesekatîmtome tak.

Mokuche so n̂esekatîmyakn̂e tak,

n̂etahsîyatken̂e marha.

Ero yinhîrî tak tî cekn̂e Pawru Maseton̂a yesamarî yaw.

2 Mîn hak ewto pore tî cekn̂e Pawru iitono pore.

Kaan xîkrî komo tî nahworekn̂e Kaanî mtapotari ke.

Ero wa tî ahworeno n̂iir̂akn̂e,

anarî pono komo,

anarî pono komo xa hara miya roro.

Krexa pona roro tî cekn̂e.

3 Iito takî tî xakn̂e Pawru 3 nuun̂i.

Ero yinhîrî en̂exa takî tî tîto xe xakn̂e hara kanawa yaw Siria pona hara.

Noro totopo pahnoke exitaw twaihka xe Xutew komo yehtopo tak n̂encekn̂e okwe.

Ero ke cesamathîrî yaw tak cetîramacho nîhtînoyakn̂e hara Maseton̂a pore xa hara.

4-5 Takronoi tko tî cekn̂e Pawru.

Taixa tî cetken̂e noro yakro,

Sopato,

Bereia pono.

Aristaku marha tî cekn̂e,

Sekuntu marha tî.

Tesaronika pono komo mîkyam xatken̂e n̂examro.

Kaiu marha tî cekn̂e Tehbe pono.

Cimocu marha tî cekn̂e,

Cikiku marha tî,

Toropimu marha tî.

Asia pono komo re tî mîkyam.

Ero warai komo tî cetken̂e Pawru yakro.

Amna ywapu cetken̂e n̂examro Troace pona makî ka.

Iito takî tî amna momokyatken̂e.

6 Ero yinhîrî takî Wahrututpamnî Tohtopo yenatîche tak amna tak cekn̂e hara Piripos poi.

Kanawa yaw amna cekn̂e.

5 kaamo amna cekn̂e ero yaw Troace pona tak.

Ero yinhîrî iito xakn̂e amna Troace po 7 kaamo hara.

7-8 Ero yimaw takî tî yihcirî kaamo po tak amna n̂esenmekyakn̂e iito Xesus ponarono komo yakro.

Amna tak n̂eseresmekn̂e Xesus waihtoponho yukukmacho me.

Pawru cokorî ka n̂ekatîmyakn̂e Kaanî mtapotarî amna ya.

Enmapuche tîtotopo ponaro xakn̂e Pawru.

Ero ke pahkî Kaanî mtapotarî n̂ekatîmyakn̂e rakatawro cehso ro.

Eporino yaw amna xakn̂e mîîmo yaw.

Iito xakn̂e weeyu yaake mîîmo maxixin yaw.

9 Iito xakn̂e kar̂pamxan hara.

Ewciku tî mîk xakn̂e noro yosotî.

Noro n̂eremekn̂e mîîmo yewkanapan yecepu po.

Iito takî tî nîwînîkyakn̂e pahkî ekatîmrî ke Pawru ya.

Yuhnari nîwînîkyakn̂e ham.

Ero ke n̂epîrkekn̂e roowo pona.

Kai ro n̂epîrkekn̂e eporino yewkanapan poi.

Ero ke anîmso tak cetken̂e akrononhîrî komo.

Twaihso thakwa tî xakn̂e okwe.

10 Ero yinhîrî tak Pawru takî tî nîhcekn̂e enso.

Katuhwakn̂e okoputhîrî yepoi.

Nawrutamiyakn̂e marha.

Yîwratara ehcoko,

kekn̂e Pawru iitono komo ya,

kar̂pe rma nasî.

11 Ero yinhîrî yaw xa marha tak kainakn̂e hara Pawru.

Xesus waihtoponho yukukmacho me amna n̂eseresmetken̂e.

Amna yeseresmache n̂ekatîmyakn̂e xa hara Pawru cenmakaxi ro.

Ero yinhîrî tak cekn̂e hara.

12 Kar̂pamxan tî n̂ekyatken̂e poyino komo mîîmo yaka.

Tawake xa tî xatken̂e kar̂pe exirî ke hara.

Ero wa tî xatken̂e.

13 Taa,

ero yinhîrî tak amna cekn̂e kanawa yaka esenkaxi.

Amna mak n̂esenkayakn̂e Asos pona tîtotome hara.

Kanawa yaw tohra ka xakn̂e Pawru.

Îh pore mak kîwcesî ow Asos pona.

Iito tak kesenkayasî amn̂e,

kekn̂e amna ya.

Ero ke Asos pona amna cekn̂e.

14 Ero yinhîrî tak amna n̂esepor̂akn̂e hara Pawru yakro.

Iito tak noro n̂esenkayakn̂e amna yaka.

Ero yinhîrî amna cekn̂e hara Micirene pona hara.

15 En̂exa tak amna cekn̂e hara kanawa yaw rma ha ka.

Kios yecento tak amna n̂ecececekn̂e hara.

Enmapuche hara amna cekn̂e hara Samos pona tak.

Troxiriu po amna n̂enmayakn̂e.

Enmapuche xa hara amna cekn̂e Miretu pona tak.

Ero wa amna cekn̂e.

16 On wara xakn̂e Pawru,

Epesu pona tawom xera tî xakn̂e.

Cecmam xera ti xakn̂e Asia po.

N̂erekanakn̂e Xerusaren pona tîto xe kar̂pe.

Pentekostes yimaw cexi xe cma re xakn̂e Xerusaren po.

17 Ero ke Epesu pono komo nan̂ikpekn̂e mak Pawru Miretu pona.

Kaan mîn yenîn̂e komo mîkyam nan̂ikpekn̂e.

18 N̂examro mokuche tak on wara kekn̂e Pawru yîwya so,

Ai oyakno komo,

kesekatîmyasî cma re tan.

Pahxa achew so oyexitaw ahce wa na oyehtopo meen̂atken̂e.

Asia pona omokuche kenmayakn̂e achew so.

Ero ke on wara oyehtopo meen̂atken̂e,

19 Kporin komo ya ketantomapekn̂e awero ro so.

Ayopono komo me esenpora ro mak wîxakn̂e.

Kesemetanmekyakn̂e emapona.

Kîwracekn̂e marha emapona.

Ero wa wîxakn̂e oyemetanmetopo poko esentarî ke Xutew komo.

20 Ero yipu chew rma thakwa wekatîmtîkekn̂e awya so awakîretopo komo,

awahworetopo komo marha.

Kaanî mtapotarî wekatîmtîkekn̂e awya so,

watohra ro mak wîxakn̂e.

Awesenmekyataw so wekatîmyakn̂e awya so.

Amîn komo yaw so marha wekatîmyakn̂e awya so.

21 Xutew komo ya wekatîmyakn̂e Kaanî mtapotarî,

Kreku komo ya marha.

On wara wîîkekn̂e yîwya so,

Kicicme awehtoponhîrî komo tak poxunkacoko Kaan yanme.

Kporin komo Xesus Kristu pona marha encoko,

wîîkekn̂e roro awya so.

22 Taa,

xehxa tak owto xe wasî Xerusaren pona hara.

Iina xa nas onîhtînoputho,

anana owtotopo yîhtînopîra ro mak wasî.

Ahce na oyepor̂a iina owtoche,

yîhtînopîra wasî.

23 On wara mak wencesî ewto mko pona oyepatakache roro,

Kir̂wanî ro Yekatî oweronomesî roro oyemetanmecho poko.

Awahruyaxe men amn̂e Xerusaren pono komo,

awemetanmekyaxe okwe,

kesî roro owya.

24 Ero yipu pona tko erasîra ro mak wasî.

Owaipu xera ro mak wasî,

kahra ro mak wasî.

On ponaro mak wasî,

Kaan ya oyantomacho ponaro mak.

Kaan ya kakronomacho komo yekatîmrî poko oyantomekn̂e Kporin komo Xesus.

Ero ke ero yekatîmrî ponaro xa wasî miya roro,

poko oyantomacho ciitîkaxi ro.

25 Pahxa ka achere so ketar̂akn̂e Kaan maywen me kehtopo komo yekatîmrî poko.

Ero warahra tak oyehtopo wîhtînoyasî amn̂e.

Oyenîra ro mak tak maxe amn̂e okwe.

26-27 Ero ke on wara wîîkes awya so,

cehcamnosom me rma exitaw so apoyino komo opona cirihra ro mak naxe amn̂e cehcamnotopo komo.

Opanatanmekîra thakwa xakn̂e Pawru okwe apoko,

kahra ro mak naxe amn̂e Kaan ya.

Kaan ya kpanatanmetopo komo wekatîmtîkekn̂e awya so watohra ro mak.

28 Ero ke kir̂wan̂he awehtopo komo ponaro xa ehcoko.

Kaan xîkrî komo ponaro marha ehcoko.

Kaan xîkrî komo yenîn̂e me awir̂atken̂e so Kir̂wanî ro Yekatî.

Xesus n̂epematho mîkyam Kaan xîkrî komo,

tkamxukuthîrî ke rma n̂epemekn̂e.

Ero ke n̂examro ponaro men ehcoko,

kir̂wan̂he ehtome so,

Kaan ponaro xa ehtome so.

29 Owtoche tak kamara warai komo men mokyaxe acheka so.

Kaan yoku warai pînîn yaw exihnî ro mak mîkyam okwe.

30 Awakrononhîrî komo meero rma apanatanmekyaxe so anato okwe.

Tanme ro so mak nîhtînoyaxe apanatanmetopo komo tîwya so.

Ero yipu poko panatanmekno niir̂axe amn̂e anpanatanmekîthîrî komo towtome so okwe,

cewetîn̂e me so tak ehtome so okwe.

31 Ero ke noro yipu komo ewetîra ro mak men ehcoko.

Owya aweronomachonhîrî komo ponaro men ehcoko.

3 cimn̂ipu kweronometken̂e so.

Kosope wîîkekn̂e,

katpanaw marha wîîkekn̂e.

Owratarî me rma kweronometken̂e so.

Ero poko wîxakn̂e.

32 Oroto Kaan pona mak ween̂asî awakîretîkacho komo.

Noro mtapotarî pona marha ween̂asî awakîretîkacho komo.

Kaan ya kakronomacho pokono mîn yîmtapotarî ha.

Awakîretopo komo xa mîn Kaanî mtapotarî.

Tînakir̂wamathîrî komo yakrono me tak awir̂axe so Kaan tîmtapotarî ponaro awexitaw so.

Awakrexe so marha n̂examro yakro rma.

Ero ke Kaanî mtapotarî ponaro awexi xe so wasî.

33-34 On wara marha wîîkes awya so,

kir̂wan̂he mak kesenpekn̂e awya so.

Awemyawno komo yahsîra ro mak wîxakn̂e prata yahsîra,

ooru marha.

Aponon komo yahsî xera marha wîxakn̂e.

Ketapickekn̂e thakwa awero ro so.

Onahrî wahsîyakn̂e ero yipu yepetho pona.

Oyakrono komo nahrî marha wahsîyakn̂e ero pona.

35 Mîn hak poko mak wîxakn̂e awero ro so owara xa marha tak awehtome so hara.

Kekaricekn̂e ro mak kar̂pen komo yakronomarî poko.

Apanatanmetopo komo me rma mîn ketapickekn̂e owara xa marha awetapickachome so hara.

On wara tko kekn̂e Kporin komo Xesus,

Tawake rma re maxe awemyawno komo yahsîyataw awya so.

Tawake xa tak maxe wakreno riche awya so,

kekn̂e tî.

Ero wa kacho ponaro awexi xe so wasî,

kekn̂e tî Pawru yîwya so.

Ero wa kekn̂e Epesu pono komo ya,

Kaan mîn yenîn̂e komo ya.

36-38 Ero wa kache tosokmuru po tak n̂eremekn̂e Pawru.

Kaan yakro nîmtapowakn̂e n̂examro n̂entarî me.

Ero wa kache nîwracetken̂e ahnoro.

Pawru nîpîmîmiyatken̂e,

n̂ewcoketken̂e marha yîpînîn yaw so.

Ahwora xa xatken̂e yîmtapotarî yentarî ke,

Oyenîra ro mak tak maxe amn̂e okwe,

kacho yentarî ke.

Ero yinhîrî Pawru yakro tak cetken̂e kanawa yaka.

Ero wa cetken̂e.