Epesu Po Xa Hara Nasî Pawru
19
Taa,
iito rma exitaw Aporu Korintu po rma Pawru tak cekn̂e Epesu pona.
Îh pore tî cekn̂e.
Iito takî tî Xuaw pen npanatanmekîtho komo n̂een̂akn̂e hara.
2 On wara tî kekn̂e Pawru yîwya so,
Ahce wa matu?
Kir̂wanî ro Yekatî mokye ha aropotaka so Xesus pona een̂ataw awya so?
kekn̂e tî yîwya so.
On wara makî tî n̂eyukyatken̂e,
Nai ha ma Kir̂wanî ro Yekatî?
Entara ro mak nas amna,
ketken̂e yîwya.
3 Ai ha,
kekn̂e tak Pawru yîwya so hara.
Ahce wa awehtome so memihcatken̂e hara?
kekn̂e tî yîwya so.
Xuaw penî mtapotarî yanme mak amna n̂emihcakn̂e,
ketken̂e yîwya.
4 Ai ha,
kekn̂e Pawru.
On wara tî xakn̂e Xuaw pen,
emicinono n̂iir̂akn̂e cehtoponhîrî poxunkan̂e komo.
On wara marha tko tî kekn̂e noro pen,
Mokyas amn̂e ohretawno hara.
Kristu Xesus Mîk ha.
Noro pona xa encoko,
kan̂enho tî mîk xakn̂e Xuaw pen,
kekn̂e tî Pawru yîwya so.
5 Ero wa kacho yentache Kporin komo Xesus yosotî pona enîn̂e me takî tî n̂emihcatken̂e hara.
6-7 Ero yinhîrî takî tî n̂examro meretîyasîyakn̂e hara Pawru.
Ero wa ciino riche yîwya Kir̂wanî ro Yekatî takî tî mokyakn̂e pona so.
Ero ke tak anarî yana komo mtapotarî yaro takî tî nîmtapowatken̂e.
Weronomano marha tî n̂iir̂atken̂e.
12 tî mîkyam xatken̂e kîrkomo ha.
Ero wa tî xatken̂e n̂examro.
8 Ero yinhirî tak Xutew komo yesenmetopo yaka takî tî cekn̂e Pawru.
Kepokaretopo po roro tî cekn̂e.
3 nuun̂i tî cekn̂e roro.
Kaan maywen me kehtopo komo poko tî yîhcamhokano n̂iir̂akn̂e.
Erasîra ro makî tî panatanmekno n̂iir̂akn̂e.
Yaaro xa tan wekatîmyas awya so,
kekn̂e tî yîwya so.
9 Yîmtapotarî tko tî poxunketken̂e anarî komo.
Ewetî xera ro makî tî xatken̂e.
Pawru mtapotarî takî tî nanwekyatken̂e yakentaw kica.
Ero wa karî ke yîhyaka so tak tohra xakn̂e Pawru.
Anarî komo yesenmetopo yaka tak cekn̂e hara.
Yaake naar̂akn̂e takro Xesus ponarono komo.
Ciranu yaka tî cetken̂e.
Panatanmekno rin̂e tî mîk xakn̂e Ciranu.
Noro mîn yaw takî tî Pawru yîhcamhokano n̂iir̂akn̂e Xesus poko.
Enmar̂atîxera tî xakn̂e ero poko.
10 Iito rma Pawru n̂ekatîmyakn̂e 2 cimn̂ipu.
Ero ke ahnoro Asia pono komo tak n̂encetken̂e Kporin komo Xesus pokono Xutew komo,
Kreku komo,
Ahnoro ero pono komo tî n̂encetken̂e.
11-12 Ero yimaw tak cirihnî n̂iir̂akn̂e Kaan Pawru yamorî ke.
On wara xatken̂e iitono komo,
Pawru yaka n̂ekyatken̂e poono yaake.
Kesewnacickacho n̂ekyatken̂e,
keweyu marha tî.
Yîn̂ekîthîrî komo takî tî nahsîyakn̂e Pawru.
Ahsîche yîwya ero takî tî naar̂atken̂e hara tamotosom komo yehcemacho me.
Ero yipu yanme mak kir̂wan̂he tak xatken̂e amotoxapunhîrî komo.
Worokyam tak n̂etowyatken̂e marha yîken̂arînhîrî komo ropotawnonho.
Ero wa tî Kaan n̂irpekn̂e Pawru nahsîtho ke rma,
poono ke.
13 Ero yimaw on wara takî tî xatken̂e anarî kom hara Xutew kom ha,
Worokyam ken̂arî komo yaka tî cetken̂e worokyam yen̂epeso.
Kporin komo Xesus yanme xa marha en̂epe xe xatken̂e.
On wara tî ketken̂e worokyam ken̂arî yepoi,
Yîropotai kr̂a etok ha.
Xesus yanme mak tan amna kes awya,
Pawru n̂ekatîmyasî Noro yanme ha,
ketken̂e tî yîwya so.
14 Ero yimaw iito xakn̂e tîmsom pokono komo yenîn̂e,
Sepa tî mîk xakn̂e noro yosotî.
Xutew tî mîk xakn̂e.
7 tî xatken̂e yumumuru komo.
N̂examro tî worokyam yen̂epe xe xatken̂e.
15 Ero poko yîmtapotache so worokyam ken̂arî yepoi yîmtaka so takî tî n̂eyukyakn̂e worokyam kopi.
On wara tî kekn̂e,
Xesus rma ween̂asî,
Pawru marha ween̂asî.
Onok na amyamro,
ahtînopîra so wasî,
kekn̂e tî worokyam yîwya so.
16 Ero wa kache tak worokyam ken̂arî takî tî nahronakn̂e n̂examro pona,
pom,
chow,
knu knu knu.
N̂examro takî tî n̂etapekn̂e oko tamorî ke rma.
Kar̂pe tî n̂etapekn̂e.
En̂epe xatînhîrî komo yopo ro makî tî xakn̂e worokyam ken̂arî.
N̂examro pen xa matko tî n̂emahciyatken̂e mîîmo yai.
Ponomra so thakwa tî n̂emahciyatken̂e,
tkamxukre so marha tî.
Ero wa tî xatken̂e n̂examro kopi.
17 Ero wara worokyam yehtoponho n̂encetken̂e Epesu pono komo ahnoro.
Xutew komo tî n̂encetken̂e,
Kreku komo marha tî.
Ero ke n̂eraswatken̂e takî tî.
Kar̂pe ma nai ke Kporin komo Xesus,
ketken̂e tî.
Xesus yosotî poko tî n̂eserepoketken̂e.
18 On wara marha tî xatken̂e anarî komo Xesus pona enîn̂e kom ha,
mokyatken̂e takî tî kicicme cehtoponhîrî komo yekatîmso.
Mer̂pono pîn tî n̂esekatîmyatken̂e.
19 Erem pokononho komo marha tî mokyatken̂e yaake.
Tîkaritan komo tî n̂ekyatken̂e eremkano ritopo pokono ha.
Eronhîrî tak nakn̂iyatken̂e kr̂a iitono komo n̂enîrî me.
Ero yimaw takî tî karita yepetho nukuknometken̂e akn̂ixapu yepetho.
Puranta pona tîmyataw ketaw ha re 50.000 exepeyu tî nahsîcerî ha re ero yipu yepetho.
Ero wicakî cepethîkem tî mîn nakn̂iyatken̂e karita.
20 Ero ke takî Kaanî mtapotarî ponaro tak n̂ehtîketken̂e iitono komo mer̂pono pîn komo okre.
Kicicitho yopono me xakn̂e okre.
Ero wa xakn̂e.
21 Taa,
ero yimaw tak Pawru takî tî nîhtînoyakn̂e tîtotopo hara Xerusaren pona hara.
On wara tî kekn̂e,
Maseton̂a pona ka kîwcesî,
Akaia pona marha.
En̂exa tak Xerusaren pona kîwces hara.
Xerusaren poi owto xe tak wasî Homa pona hara,
kekn̂e.
Ero wa kekn̂e Pawru,
tîtotopo nîhtînoyakn̂e.
22 Ero ke Maseton̂a pona takî tî n̂en̂epekn̂e takrononhîrî komo,
Cimocu,
Erastu ha.
Iito rma ka xakn̂e Pawru,
Asia po rma ka.
Ero wa xakn̂e Pawru.
Wara Ro Mak Kexe Epesu Pono Komo
23 Taa,
ero yimaw tak anarî me ro mak takî tî n̂ehtîketken̂e iitono komo Epesu pono komo.
Wara ro mak takî tî ketken̂e.
Xesus ponaro cehsom komo poko takî tî n̂eserepoketken̂e.
24 On wara tî xatken̂e.
Iito tî xakn̂e prata pokono,
Ciana kuknon ciin̂e ro.
Temetriw tî mîk xakn̂e noro yosotî.
Ponaro iitono komo yehtopo mîk xakn̂e Ciana.
Yaake marha tî xatken̂e Temetriw yakronoman̂e komo ero yipu ciin̂e komo.
Mer̂pora tî nahsîyatken̂e puranta n̂examro tîn̂irithîrî komo pona.
25 Ero yimaw tak ero re pokono komo takî tî nan̂ikyakn̂e Temetriw.
Esenmekîche so tak on wara kekn̂e yîwya so,
Ai oyakno komo,
on wara wîîkes awya so,
Ciana kuknon ciin̂e re kîwyam.
Ero pona xa tahsîyaxe kupurantan komo.
Mer̂pora tahsîyaxe okre.
26 Taa,
anarme panatanmekno n̂iir̂asî Pawru kica.
Mer̂pono pîn komo panatanmekyasî noro anarî poko mak kica,
Ciana pîn poko.
Noro tak n̂ewehcaxe mer̂pono pîn komo okwe.
Epesu pono komo,
Asia rowon pono komo ahnoro mak noro n̂ewehcaxe okwe.
Ero wa exirî komo rma meen̂axe,
mencexe marha yîmtapotarî kom ha.
On wara kan̂e mîk Pawru kica,
Kaan pînî ro mak mîn,
poko awehtopo komo.
Tooto yamorî ke ciixapu kyam mak mîn okwe,
kan̂e mîk kica.
27 Ero ke yîwîrîyakarî yaro mak nasî kica kn̂irithîrî kom okwe.
Ciana mîn meero nasî yîwîrîyakarî yaro okwe.
Ponaro kehtopo xa mîk Ciana,
kyopono ro xa.
Kir̂wanî ro me noro yehtopo tak na n̂ehcamnoya okwe.
Noro pokono me tko naxe Asia pono komo ahnoro.
Ahnoro roowo poko hakno komo naxe noro pokono me.
Ero warahra tak men naxe amn̂e panatanmekno ciir̂ataw rma Pawru ya,
kekn̂e tî yîwya so.
Ero wa tî kekn̂e Temetriw esenmexapu komo ya.
28 Ero yipu yentache tak nîrwonatken̂e ro mak takî tî esenmexapu komo.
Ero ke kar̂pe ro makî tî n̂emtaraketken̂e.
Kyopono ro mak mîk Ciana,
ponaro Epesu pono komo yehtopo ha,
ketken̂e takî tî.
29 Yîmtapotarî komo takî tî n̂encetken̂e ewto pono komo.
Ero ke n̂eserepoketken̂e ro makî tî.
Camkî tko tî n̂encetken̂e wara hakî kano.
Pawru yakrono komo takî tî nahsîyatken̂e Maseton̂a pono pen komo.
Kaiu,
Aristaku,
n̂examro pen tî nahsîyatken̂e.
Ahsîche tak n̂emahcîyatken̂e cesenmetopo komo yaka.
Rurpe ro makî tî n̂emahciyatken̂e kopi.
Ero wara re makî tî n̂esehtînoyatken̂e iina tîtotopo komo poko.
30 Ero yimaw tak Pawru takî tî tîto xe xakn̂e hara iina xa marha esenmexapu komo yaka.
Pîra ro mak kopi,
ketken̂e tko tî Xesus ponarono komo.
Iina men tohra ro mak esko,
ketken̂e tî Pawru ya.
31 Ero wa xa marha tî ketken̂e anarî kom hara,
Asia pono komo kayaritomo maywen kom ha.
Pawru xatî komo tî mîkyam xatken̂e asakî mak.
Tohra ro mak awexi xe nas amna iina kesenmetopo komo yaka,
kacho tî mewretken̂e yîhyakan karita.
32 Iito rma tî xatken̂e mer̂pono pîn komo cesenmetopo komo yaw.
Wara ro makî tî ketken̂e yîtîtmamra ro mak okyo.
Anarmerpa so tko tî ketken̂e.
Kar̂pe ro makî tî ketken̂e.
Camkî makî tko tî xatken̂e mer̂pono pîn komo.
Ahce kacho mak na tan cesenmecow?
ketken̂e tî kopi.
Ero wa tî ketken̂e.
33 Ero yimaw takî tî iito xakn̂e Arexante.
Noro takî tî n̂etahcatken̂e Xutew komo yîrwoxinkano rin̂e me.
Ero ke noro takî tî n̂ecececekn̂e tooto komo yeepatai.
Iito cexiche pokupoku kekn̂e cma tî re wece so yîtîtmamnotome so.
Cesekatîm xe tî xakn̂e iitono komo n̂entarî me.
34 Xutew mîkro,
kacho tko tî n̂encetken̂e iitono komo.
Ero ke yîtîtmamra ro makî tî xatken̂e.
N̂emtaraketken̂e ro makî tî.
Kyopono ro xa mîk Ciana,
ponaro Epesu pono komo yehtopo ha,
ketken̂e makî tî.
Cerewre ro makî tî ketken̂e.
Pahkî ro makî tî ketken̂e 2 oora ha tî.
Ero wa tî xatken̂e kopi.
35 Taa,
pahkî emtarakache so takî ewto yenîn̂e takî tî mokyakn̂e iina yîhyaka so.
Noro takî tî yîtîtmamnono n̂iir̂akn̂e tîmtapotachome.
Yîtîtmamche so tak on wara tî kekn̂e noro esenmexapu komo ya,
Ai Epesu pono komo,
omtapotarî men ka entacoko.
Ciana mîn yosom xa kîwyam Epesu pono komo.
Noro kuknon yosom marha kîwyam Xupite yai epîrkaxapu yosom.
Ero wa kehtopo komo n̂encexe miyan komo rma ahnoro.
Kyopono xa mîk Ciana,
ponaro kehtopo komo.
36 Onoke ma re ero wa kacho nanwekya?
Pîra ro mak.
Ero wa kacho yanwekn̂e exihra ro mak nasî.
Ero ke tîtken̂e mak cexpore nasî.
Wara ro mak kan̂e me exihra ro mak cexpore nasî.
37 Ahce kacho moxam mehcow xiya?
Ponaro awehtopo komo mîn yawno en̂epanmekîra cma re naxe.
Kicicitho me yîmtapotara marha cma re naxe ponaro awehtopo komo poko.
38 Ero ke on wara wîîkes awya so,
Temetriw ya,
noro yakrono komo ya marha,
kicicme moxam yeen̂ataw awya so naxe en̂ekano rin̂e ro komo.
Yîwya so xa matko cen̂ekapopore nasî.
39 Ahce na poko awesenta xe awexitaw so amna ya xa matko katamcoko.
Takîhso tak enmekno n̂iir̂as amna kpoyino komo ero yipu poko kesentachome.
40-41 Wara ro mak mîîkacow kopi oroto.
Ero wa awesenmetopo komo yentache na Homanu komo ya keiyatu so men kica.
Ahce poyero ero wa mesenmece hara kopi?
ketu men kîwya so.
Ero wa ketaw kîwya so ahce wa thakwa re amna n̂eyukya okwe?
Pîra ro mak okwe.
Tohnaw mak mesenmecow.
Ero ke etocoko hara,
kekn̂e tî yîwya so.
Ero wa tî kekn̂e ewto yenîn̂e esenmexapu komo ya.
Ero ke takî tî cetken̂e hara esenmexapunhîrî komo.
Ero wa tî cetken̂e.