Taa,

ero yinhîrî tak Atenas poi takî tî cekn̂e Pawru Korintu pona hara.

2 Iito takî tî Xutew n̂een̂akn̂e hara.

Akwira tî mîk xakn̂e noro yosotî.

Pontu po ewruxapu tî mîk xakn̂e.

Itar̂a pononho mohxan tî mîk xakn̂e Korintu po hara.

Cipici yakro rma tî mokyatken̂e.

Prisira mîk xakn̂e yipici yosoti.

Xutew komo tî n̂en̂epekn̂e kayaritomo Homa poi.

Krawcu tî mîk xakn̂e kayaritomo yosotî.

Noro mtapotachonho yanme tî Akwira komo mokyatken̂e Korintu pona.

Ero ke n̂examro yenso tî cekn̂e Pawru.

3 Ero yinhîrî tak Akwira yaw n̂enmayakn̂e Pawru ero re poko cetapickaxmu me exirî ke so.

Mîîmo yatpon̂e re tî mîkyam xatken̂e,

roona yatpon̂e re.

Ero ke n̂examro yaw n̂enmayakn̂e Pawru.

4 Sabatu po roro tî Pawru cekn̂e Xutew komo yesenmetopo yaka.

Iito tî Kaan karitan poko nîmtapowakn̂e akro so.

Xesus pokono mîn ha,

Noro pokono marha mîn hara,

kekn̂e Kaan Karitan yawno mko poko.

Kreku komo yakro marha nîmtapowakn̂e.

Yaaro xa tan wîîkes awya so,

kekn̂e yîwya so cewetîtome tak ha.

5 Ero yinhîrî takî Siras takî tî mokyakn̂e iina Maseton̂a poi.

Cimocu yakro tî mokyatken̂e.

N̂examro mokuche tak Kaanî mtapotarî yekatîm xe ro mak takî tî xakn̂e Pawru Ekatî Kir̂wanî ro yanme.

Kristu xa Mîk Xesus,

kekn̂e Xutew komo ya.

6 Pahkî ekatîmîche takî anarî me takî tî ketken̂e Xutew komo Pawru ya.

Pîra ro mak,

Kristu pîn Mîk kica Xesus,

ketken̂e tî yîmtaka.

Kicicme so tî nîmtapowatken̂e Xesus poko ero yimaw.

Ero ke tak tponon nupupunkekn̂e Pawru,

Kicicme mat ham okwe,

kacho me.

On wara takî tî kekn̂e yîwya so.

Awehtoponhîrî komo yaw rma awaiyataw so opona exihra tak nasî ero wa awaitopo komo.

N̂eexi tak ero yipu yekatîmrî awya so.

Xenciu komo ya makîrha tak wekatîmyas hara,

kekn̂e tî Pawru yîwya so.

7 Ero ke tak Xutew komo yesenmetopo yai tak cekn̂e Pawru.

Anarî mîn yaka tak n̂ewomyakn̂e hara,

Cisiu Xustu mîn yaka ha.

Kaan ponarono tî mîk xakn̂e Cisiu Xustu.

Xutew komo yesenmetopo mîtwono rma xakn̂e yîmîn.

8 Iito marha tî xakn̂e Krispu,

Xutew komo yenmekn̂e ro tî mîk xakn̂e.

Noro takî tî n̂een̂akn̂e Kporin komo pona,

yîhyawno komo marha ahnoro.

Ero yimaw takî tî mer̂pono pîn komo n̂encetken̂e Pawru mtapotarî Korintu pono komo.

Entache tak Xesus pona tak n̂een̂atken̂e,

n̂emihcatken̂e marha tî.

Ero wa tî xatken̂e iitono komo.

9 Ero yinhîrî tak Kporin komo takî tî n̂esenpekn̂e Pawru ya.

Kosope tî n̂esenpekn̂e wosoto.

On wara tî kekn̂e yîwya,

Erasîra ro mak esko Pawru.

Xesus yehtopo ekatîmko rma.

Yîtîtmamra ro mak esko.

10 Awakro rma wasî.

Ero ke awetapara ro mak naxe tantono komo.

Mer̂pora naxe on ewto pono komo,

oyanan me cehsom komo.

Ero ke ekatîmko rma yîwya so,

kekn̂e tî yîwya.

Ero wa tî Kporin komo kekn̂e Pawru ya.

11 Ero ke iito rma ka xakn̂e Pawru Korintu po rma kapu.

Cewn̂e cimn̂ipu tî xakn̂e iito,

6 nuun̂i xa hara.

Ero wicakî tî xakn̂e iito Kaanî mtapotarî yekatîmrî poko.

Ero wa tî xakn̂e.

12 Ero yimaw tak iito xakn̂e kayaritomo,

Kariw tî mîk xakn̂e noro yosotî.

Akaia pono komo kayaritomon tî mîk xakn̂e noro.

Ero yimaw tak Pawru yahsîso mokyatken̂e Xutew komo,

mer̂pono pîn komo.

Iito re tî nîhtînoyatken̂e,

Pawru yahsîtopo.

Ahsîche kayaritomo yaka takî tî naar̂atken̂e,

Kariw yaka ha tî.

13 Noro ya takî tî Pawru n̂en̂ekapetken̂e.

On wara tî ketken̂e yîwya,

Anarme panatanmekno n̂iir̂asî moso Kaan poko.

Moso mtapotarî yewehcataw amna ya kayaritomo mtapotarî yewetîn̂e pîn me nas amna kica,

ketken̂e tî Pawru poko.

Ero wa tî ketken̂e kayaritomo ya.

14 Ero yipu yentache eyukno ri xe tî re xakn̂e Pawru.

Eyukporo xa exitaw Kariw xa matko tî n̂eyukyakn̂e.

On wara tî kekn̂e Xutew komo ya,

Ai,

Xutew komo,

on wara wîîkes awya so.

Kicicme xa exitaw moso,

waihkano rin̂enho me exitaw,

cen̂epan̂em me exitaw anarimaw,

amtapotarî komo takî re wencesî.

15-16 Ero warai pîn ro mak moso.

Tapota poko mak mîîkexe,

apanatanmetopo ro komo yanwetopo poko.

Ayanan komo yosotî yîwîrîyakan̂e me marha nai ham.

Ero wa kacho poko awentara so was okwe,

kekn̂e tî Kariw Xutew komo ya.

Ero wa kache tak Xutew komo takî tî n̂en̂epekn̂e en̂ekano ritopo yai kar̂pe.

17 Ero yimaw takî Sostenes pen takî tî nahsîyatken̂e Kreku kom hara.

Xutew komo yenmekn̂e tî mîk xakn̂e.

Noro takî tî nîhyokyatken̂e oco en̂ekano rin̂e roron po rma.

Kacowpe kyam,

kan̂e wa mak xakn̂e Kariw.

Ero wa tî xakn̂e noro.

18 Taa,

iito rma ka xakn̂e Pawru pahkî n̂he Korintu po rma ka.

Ero yinhîrî cekn̂e hara kanawa yaw.

Siria pona tîto xe xakn̂e hara.

Kaan xîkrî komo ya takî tî n̂esekatîmyakn̂e tîtorî me.

Akwira komo marha cetken̂e noro yakro Prisira kom ha.

Iito rma ka cexitaw Pawru,

Senkreia po,

n̂ekanamurinkekn̂e,

Ero wa men was amn̂e Kaan yanme,

kan̂e me cexirî ke.

Ero wa tî xakn̂e Pawru.

19 Ero yinhîrî tak Epesu pona takî tî nawomyatken̂e.

Iina tî porohyatken̂e Akwira komo Prisira yakro.

Iito ka cexitaw Pawru tî cekn̂e Xutew komo yesenmetopo yaka.

Kaanî mtapotarî tî n̂ekatîmyakn̂e yîwya so.

Ero wa xakn̂e Pawru Epesu po.

20-21 On wara tak ketken̂e Epesu pono komo Pawru ya,

Tanî n̂he cma re ka menmayas amna yaw n̂he kapu,

ketken̂e tî yîwya.

Apohana,

owto xe cma re wasî.

Pahnoke tak nai Xutew yeseresmacho Xerusaren po.

Ero yimaw iito oyexi xe ro mak wasî,

kekn̂e tî Pawru yîwya so.

On wara tko kekn̂e hara tîtorî me,

Amn̂e xa tko kmokyas hara oyekî xe exitaw Kaan.

Ero yinhîrî takî tî Pawru cekn̂e hara Epesu poi.

Kanawa yaw tî cekn̂e.

22 Amn̂e Sesareia pona takî tî nawomyakn̂e Pawru.

En̂exa takî tî cekn̂e Xerusaren pona hara.

Iitono komo yenso tî cekn̂e Kaan xîkrî komo yenso.

En̂exa takî tî mokyakn̂e hara Anciokia pona hara.

Ero wa tî cekn̂e Pawru.

23 Taa,

iito ka n̂enmayakn̂e Pawru Anciokia po kapu.

Pahkî exiche en̂exa takî tî cekn̂e xa hara.

Cesamathîrî yaw rma tî n̂etîramekn̂e hara.

Karasia pore tî cekn̂e.

Prixia pore marha tî cekn̂e.

Iitono komo yewton pona so tî cekn̂e.

Xesus ponarono komo tî nahworekn̂e ahnoro ewto pono kom ha.

24 Taa,

ero yimaw tak Epesu pona cekn̂e anarî hara Xutew.

Aporu tî mîk xakn̂e noro yosotî.

Arexancia pononho tî mîk xakn̂e.

Centapore xa ekatîmn̂e tî mîk xakn̂e.

Takîhsom marha mîk xakn̂e Kaan Karitan poko.

25 Kporin komo yehtopo poko ehcamhokaxapu tî mîk xakn̂e.

Tahworem xa tî mîk xakn̂e okre.

Kporin komo yehtopo poko panatanmekno tî n̂iir̂akn̂e takîhso.

Xuaw pen wara makî tko tî emicinono n̂iir̂akn̂e.

26 Noro takî tî n̂ekatîmyakn̂e Kaan Karitan Xutew komo yesenmetopo yaw.

Yîhyapamra ro makî tî n̂ekatîmyakn̂e.

Noro mtapotarî takî tî n̂encetken̂e Akwira,

Prisira kom ha.

Ero ke tak Aporu nan̂ikyatken̂e n̂examro tîmîn komo yaka.

Kaan yehtopo poko takî tî noro nîhcamhoketken̂e miya xe n̂he tak.

Ero wa tî Aporu nîhcamhoketken̂e.

27 Ero yinhîrî tak Akaia pona tîtotopo takî tî nîhtînoyakn̂e hara Aporu.

Ero ke iina cetaw karita tî mewretken̂e Epesu pono komo.

On wara kacho tî mewretken̂e,

Akaia pono komo amyamro.

On wara amna kes awya so,

kir̂wan moso Aporu Kaan xîkrî.

Kir̂wan̂he Kaanî mtapotarî yekatîmn̂e marha moso,

kacho tî mîn mewretken̂e Aporu narîrî.

Taa,

iina takî tî cekn̂e noro,

Akaia pona.

Iito cexitaw tak Kporin komo pona enîn̂e komo nakronomekn̂e ro mak,

Kaan nakir̂wamatho kom ha.

N̂examro takî tî nahworekn̂e Aporu.

28 Xutew komo yopo marha tî nîmtapowakn̂e Aporu yakentaw,

tahwore xa nîmtapowakn̂e.

On wara kekn̂e yîwya so,

Kristu xa Mîk Xesus ha.

Enko xe,

ero wara rma kesî Kaan Karitan Noro poko,

kekn̂e tî yîwya so.

Ero wa tî Aporu n̂ekatîmyakn̂e Xesus pokono Xutew komo ya.

Ero wa tî xakn̂e.