Taa,

Piripos poi takî tî cetken̂e hara.

Anpiporis pore tî cetken̂e,

Aporonia pore marha.

Ero yinhîrî tak Tesaronika pona takî tî n̂epataketken̂e.

Iito tî xakn̂e hara Xutew komo yesenmetopo.

2-3 Ero yaka takî tî cekn̂e Pawru esenmeso cehtopo ro yaw roro rma.

Sabatu po roro tî n̂esenmekyakn̂e 3 ro tî.

Kaan karitan poko yîhcamhokano n̂iir̂akn̂e.

On wara kekn̂e yîwya so,

Kristu yehtopo rma wekatîmyas awya so.

Kaan Karitan yaw roro rma wa xakn̂e Kristu.

Enko xe,

Kristu yerewîmtopo n̂ekatîmyasî Kaan Karitan.

Waixapu komo chei awomtopo marha n̂ekatîmyasî.

Ero ke ero wa kacho yaw roro rma xakn̂e Xesus.

Taa,

Kristu rma Mîk Xesus,

awya so wekatîmyasî Noro xa Mîk ha,

kekn̂e marha.

Ero wa kekn̂e Pawru yîwya so.

4 Pawru yentache tak Xutew komo tak n̂een̂atken̂e Xesus pona anarî komo mak.

Kreku komo marha n̂een̂atken̂e Xesus pona mer̂pono pîn komo.

Wooxam komo meero tî Xesus pona n̂een̂atken̂e antomano rin̂e pici kom ha.

Yaake n̂een̂atken̂e Xesus pona.

Noro yipu komo takî tî mokyatken̂e Pawru komo mtapotarî yentaxi.

Ero wa tî xatken̂e iitono komo.

5 Anarî komo reha tko tî Pawru mtapotarî nanwekyatken̂e okwe.

Xutew komo mîkyam xatken̂e.

Cewresawra so tî Pawru komo n̂een̂atken̂e.

Ero ke takî tî n̂etakronometken̂e kicicitho komo yakro,

kwarawantacho roron po eremaxapu komo yakro ha.

Pawru komo yahsîso kr̂a kaikatko ha,

ketken̂e tî yîwya so.

Ero wa kacho yentache tak iitono komo tak n̂esenmekyatken̂e mer̂pono pîn.

Esenmexapu komo yenîche wara hak tak ketken̂e ewto pono komo ahnoro.

Xason mîn yaka cetken̂e Pawru komo yahsîso.

Roro po esenmexapu komo yaka arî xe tî re xatken̂e.

6 Enîhra tko tî xatken̂e Pawru komo iito.

Ero ke Xason pen mak tî nahsîyakn̂e.

Noro pen n̂ihxikyatken̂e okwe ewto yenîn̂e komo yaka.

Noro yakrono pen komo marha tî n̂ihxikyatken̂e,

Kaan xîkrî pen komo.

Iito cexitaw so ewto yenîn̂e komo ya takî tî ketken̂e on wara,

Erepokano rin̂e komo moxam kica.

Miyan komo yerepokan̂e rma moxam kica.

Roowo pono komo naknamatîkexe anarme ro mak tak ehtome so kica.

Oona tak mohcow haram kica.

7 Tîmîn yaka tak n̂examro n̂ermonoyakn̂e kica Xason.

Sesa mtapotachonho yewetîra ro makî naxe moxam okwe.

Anarî xa nasî kayaritomo,

Xesus mak ha,

kan̂e komo mak moxam kica,

ketken̂e marha tî yîwya so.

8 Ero wa tî ketken̂e Pawru komo poko.

Ero yentache n̂eserepoketken̂e enso mohxapu komo.

Ewto yenîn̂e komo marha tî n̂eserepoketken̂e.

9 Ero ke on wara takî tî ketken̂e Xason komo ya,

Amn̂e mak amna n̂encesî awehtopo komo.

Oroto awto xe awexitaw so puranta ka tîmcoko awtotome so hara,

ketken̂e tî yîwya so.

Ero ke puranta takî tî nîmyatken̂e Xason ewto yenîn̂e komo ya.

Pawru komo marha nîmyatken̂e tîtotome so tak.

Ero wa tî xatken̂e iitono komo.

10 Ero ke on wara tak xatken̂e Kaan xîkrî komo,

iitono komo,

Pawru komo tak n̂en̂epetken̂e Siras yakro.

Yohno rma n̂en̂epetken̂e kosope.

Anarî ewto pona n̂en̂epetken̂e,

Bereia pona.

Iito cexitaw so Pawru komo Xutew komo yesenmetopo yaka cetken̂e hara.

11 Wara n̂he xatken̂e Bereia pono komo Tesaronika pono komo yopo.

Kir̂wan̂he ro mak n̂encetken̂e Pawru mtapotarî.

Ahce wa na kacho yentache roro Kaan Karitan n̂een̂atken̂e hara.

Kaan Karitan yaw roro xa na n̂ekatîmya Pawru?

kachome tî n̂een̂atken̂e.

12 Ero ke Xesus pona takî tî n̂een̂atken̂e mer̂pono pîn komo,

Xutew kom ha.

Kreku wosîn komo marha tî yîmtapotarî komo n̂ewehcatken̂e,

antomano rin̂e pici komo.

Kîrkomo marha n̂ewehcatken̂e.

Ero wa xatken̂e Bereia pono komo.

13 Ero yimaw tak Pawru yehtopo takî tî n̂encetken̂e Tesaronika pono komo,

Xutew kom ha.

Kaanî mtapotarî tî n̂ekatîmya hara Pawru Bereia pono komo ya hara,

kacho tî n̂encetken̂e.

Ero ke iina takî tî cetken̂e hara Bereia pona hara.

Iitono komo tî n̂erepoketken̂e mer̂pono pîn komo Pawru komo poko.

14 Ero ke Pawru takî tî n̂en̂epetken̂e hara Kaan xîkrî komo tuuna imo yecihtaka.

Sirasî tko tî n̂etînomyakn̂e iito rma Bereia po rma,

Cimocu yakro.

15 Ero yimaw tak Pawru yakro cetken̂e Kaan xîkrî komo Atenas pona roro.

En̂exa tak n̂etîrametken̂e hara aan̂enhîrî komo.

Etahsîpînketaw so takî on wara kekn̂e Pawru yîwya so,

Sirasî cma re men̂epexe xiya Cimocu yakro.

Yohno cma re men̂epexe esemyarkache so rma,

kekn̂e tî Pawru yîwya so.

16 Ero ke n̂examro momokyakn̂e Pawru Atenas po.

Iito cexitaw takî tî n̂eserepokekn̂e Atenas pono komo poko.

Mer̂pora ro makî tî n̂een̂akn̂e iito onok na me ciixaputho mko.

Ewto poko hakî tî n̂een̂akn̂e.

Ero ke tî n̂eserepokekn̂e ro mak.

17 Ero yimaw marha tî Xutew komo yakro tî n̂esenmekyakn̂e esenmetopo komo yaka.

N̂examro yakro tî n̂esencekn̂e Xesus poko.

Kreku komo yakro marha tî n̂esencekn̂e Noro poko,

Kaan ponarono komo yakro.

Warawantacho yaka roro marha tî cekn̂e Xesus poko esentaxi hara.

Iina mohxapu komo yakro tî n̂esencekn̂e enmar̂atîxera.

Ero wa tî xakn̂e Pawru takrono komo momokrî poko kapu.

18 Iito exitaw tak anarî komo takî tî mokyatken̂e Pawru yakro esentaxi hara.

Epikurasî npanatanmekrî komo tî mîkyam mokyatken̂e.

Estoiku wa cesehtînosom komo marha tî mokyatken̂e.

N̂examro tî Pawru nanwekyatken̂e.

On wara tî ketken̂e,

Ero pîntho pokono wara ro mak moso nîmtapowasî kopi.

Ahce warai poko wa nîîke kopi?

ketken̂e tî Pawru poko.

On wara tî ketken̂e anarî kom hara,

Ponaro anarî komo yehtopo poko mak kpanatanmekyatu so ham kopi,

ketken̂e tî.

Ero wa tî ketken̂e Xesus pokono yekatîmrî ke yîwya,

kpakacho komo yekatîmrî ke marha yîwya.

19 Ero yimaw takî Pawru takî tî naar̂atken̂e Ar̂eopaku pona,

iina cesenmesom komo yaka.

Iito cexiche so Pawru ya takî tî ketken̂e on wara,

Anarî men mak mekatîmyasî kopi amna ya.

Ero ke ero cma re mekatîmyasî xa hara amna ya kir̂wantaw xa tak.

20 Amna n̂eserepokesî kopi an̂ekatîmrî poko.

Ero ke entatîka xe nas amna takîhso,

ketken̂e tî Pawru ya.

21 Ero pokono makî tî mîkyam xatken̂e Atenas pono komo,

iina mohxapu komo marha.

Tpoyino komo n̂entatorînho yekatîmrî poko makî tî xatken̂e,

tîn̂entatorînhîrî komo yentarî poko marha.

Ero poko makî tî xatken̂e roro iitono komo.

22 Ero ke iito takî tî n̂ecececekn̂e Pawru Areopaku po.

Esenmexapu komo n̂entarî me takî tî nîmtapowakn̂e.

On wara kekn̂e,

Ai,

Atenas pono komo amyamro.

On wara wîîkes awya so,

on wara keen̂axe so,

mîk hak ponaro xa mat ham.

23 Kokon̂oro awewton komo pore kyam ketar̂akn̂e.

Oyetar̂ataw ponaro awehtopo komo ween̂e.

Ero yimaw anarî ya tîmsom yakn̂itopo ween̂e hara.

Ero poko on wara kacho ween̂e,

Yîhtînopînî ro ya tîmsom yakn̂itopo on,

kaan ya tîmsom yakn̂itopo ha,

kacho mîn ween̂e iito.

Anîhtînotorî komo pokono me rma mat ham.

Ero ke Noro yehtopo rma tan wekatîmyas awya so.

24 On warai Mîk Kaan,

roowo yakîhton̂enho Mîk,

roowo pono komo yakîhton̂enho marha.

Kah yawno komo kayaritomon Mîk,

roowo pono komo kayaritomon marha.

Ero warai Mîk Kaan.

Ero ke tooto n̂iritho yawno me mak exihra ro mak nasî,

mîîmo yawno me mak exihra.

25 Kemyawnonhîrî komo tîmyataw mak Kaan ya kîwya so,

ahwotara rma nasî.

Cemyawno xatî pînî ro mak Mîk.

Noro xa matko nîmya kîwya so.

Kesehsîtopo meero nîmya kîwya so.

Waipîra marha kir̂mexpetu so.

Ahce na nîmya kîwya so ahnoro mak.

Noro yipu Mîk Kaan.

26 Cewn̂e makî ka Kaan nakîhcekn̂e tooto.

Noro pen yepamtho me xa hara kepamnoyatken̂e so mîk hak rowon pono komo,

roowo poko hakno kom ha.

Kekenman̂e marha Mîkî Kaan.

Tan ehcoko amyamro,

kesî anarî komo ya.

Mînto ehcoko amyamro hara,

kesî anarî komo ya hara.

On wicakî pahkînon mak ka masî waipîra,

kesî marha miyan komo ya rma,

kekn̂e tî Pawru.

27 Ero wa Kaan kiir̂atu so cepotome tak kîwya so,

Ahce warai xa Mîk Kaan?

kan̂e me kexi xe so nai.

Kîchewno rma tko Mîk Kaan,

mooxe exihra ro mak nasî.

28 Noro xa nasî kecehton̂e komo me,

waipîra kiin̂e komo me ha.

Noro marha nasî kewyarin̂e komo me hara.

Ero wara rma kesî apoyino kom ha,

waano ciin̂e ro.

Kaan yepamtho kîwyam,

kesî.

29 Ero ke Kaan yepamtho me kexirî ke so,

Ooru me mak nai Kaan,

kahra ro mak cexpore nasî.

Prata me na nai,

toopu me xa katî nai ha?

kahra marha cexpore nasî.

Tooto n̂iritho warai pînî ro mak Mîk Kaan.

30 Tooto n̂iritho ponaro rma xatken̂e pahxan pen komo.

Yîrwomra rma tko ka xakn̂e Kaan poko so.

Ero warahra tak reha nasî oroto kpoko so.

On wara tak kesî oroto kîwya so,

Ero yipu mko kr̂a tak poxunkacoko ahnoro,

kesî tak kîwya so.

Miyan komo ya rma ero wa kesî.

31 Ken̂ekexe so ha men amn̂e,

kesî marha Kaan kîwya so.

Tukuknomaxi wa nasî ken̂ekacho komo kaamo.

Ero po tak amn̂e yaaro xa ken̂ekexe so.

Pahxa rma ken̂ekan̂e komo nîhtînoyakn̂e.

Tooto Mîk nîhtînoyakn̂e ken̂ekan̂e komo me.

Towîhnî me ro mak Noro nîhtînoyakn̂e.

Enko xe,

Noro rma n̂enpakekn̂e waixapu komo chei,

kekn̂e tî Pawru yîwya so.

Ero wa tî kekn̂e esenmexapu komo ya.

32 Ero wa kacho yentache tak,

Waixapu pen komo chei pakekn̂e hara Noro,

kacho yentache tî n̂etaporetken̂e mak takî tî kica anarî komo.

Ewremeto makî tî n̂encetken̂e Pawru mtapotarî.

Anarî komo reha tî on wara ketken̂e Pawru ya,

Amn̂e anarimaw kyam amtapotarî yentatîka xe nas amna ero poko xa hara,

ketken̂e tî yîwya.

Ero wa tî ketken̂e Pawru ya.

33-34 Ero ke Pawru takî tî cekn̂e yîhyai so.

Yîmtapotarî tko tî n̂ewehcatken̂e anarî komo mak asakî makî,

kîrkom ha.

Xesus pona takî tî n̂een̂atken̂e Cionisiu,

Areopaku pono.

Wooxam marha tî n̂ewehcakn̂e yîmtapotarî.

Tamarisi tî mîk xakn̂e noro yosotî.

Anarî komo marha tî n̂ewehcatken̂e yîmtapotarî.

Ero wa tî xatken̂e iitono komo.