Taa,

on wara tî xatken̂e Pawru komo tîcetaw so,

Tehbe pona tî cetken̂e xa hara,

Rista pona marha tî.

Rista po cexitaw so tî Xesus ponarono n̂een̂atken̂e iitono.

Cimocu tî mîk xakn̂e noro yosotî.

Xutew tî mîk xakn̂e yîson,

Xesus pona enîn̂e.

Kreku tî mîk xakn̂e yîîm hara.

2 Kir̂wan mîkro ketken̂e tî iitono komo Cimocu poko.

Ero wa tî ketken̂e Rista pono komo Kaan xîkrî komo.

Ikon̂u pono komo marha tî ero wa ketken̂e.

Ero wa tî ketken̂e Cimocu poko.

3 Ero ke noro yarî xe takî tî xakn̂e Pawru takrono komo me marha.

Ero ke takî tî noro nanpikekn̂e Pawru.

Xutew komo yanme rma tî ero wa nîhtînoyakn̂e,

iitono komo yanme.

Kreku tî mîk xakn̂e Cimocu yîîm,

kacho tî n̂encetken̂e Xutew komo.

Ero ke nanpikekn̂e.

4 Ero yinhîrî tak ewto mko pore takî tî cetken̂e Pawru komo.

Kaan xîkrî komo yakro tî n̂esenmekyatken̂e roro.

Yîwya so tî n̂ekatîmyatken̂e yîtwermano ritoponho,

Xerusaren pono komo mtapotarî ha.

12 komo mtapotarî mîn n̂ekatîmyatken̂e yîwya so,

Kaan mîn yenîn̂e komo mtapotarî ha.

5 Ero yimaw Kaan pona enîn̂e me takî tî n̂ehtîketken̂e okre Kaan xîkrî komo miyan komo rma.

N̂epamtîketken̂e marha tî enmar̂atîxera.

Ero wa tî xatken̂e.

6 Ero yimaw takî Prixia pore tî cetken̂e hara Pawru komo.

Karasia pore marha tî cetken̂e.

Asia pore marha tîto xe so tî xatken̂e.

Pîra,

kekn̂e tko tî Kir̂wanî ro Yekatî yîwya so,

iina tohra ehcoko Kaanî mtapotarî yekatîmso,

kekn̂e tî yîwya so.

Ero ke tî Asia pona tohra xatken̂e.

7 Ero ke Misia panaka takî tî cetken̂e.

En̂exa Bicinia pona tîto xe so tî xatken̂e hara.

Pîra,

iina tohra marha ehcoko,

kekn̂e hara tî Kaan Yekatî yîwya so.

8 Ero wa karî ke Misia wokpan poko rma tî cetken̂e Troace pona.

Ero wa tî cetken̂e Pawru komo.

9 Taa,

iito cexitaw amna Pawru takî tî wosowakn̂e kosope.

Tan̂ikn̂e tî n̂een̂akn̂e twosoto,

Maseton̂a pono tî.

On wara tî kekn̂e noro Pawru ya,

Amna yakronomaxi amohcoko oona Maseton̂a pona,

kekn̂e tî yîwya.

Ero wa tî kekn̂e Pawru ya wosoto.

10 Ero wa tî n̂een̂akn̂e Pawru.

Ero ke,

Iina xa tîhcet ham.

Iina xa karî xe so nai ham Xesus ya kakir̂wamacho yekatîmso iitono komo ya,

kekn̂e amna.

Ero wa kekn̂e amna.

11-12 Ero ke Troace poi tak amna cekn̂e kanawa yaw.

Pataw roro mak amna toye Samorasia pona hara.

Enmapuche xa hara amna cekn̂e hara Neaporis pona hara.

En̂exa amna cekn̂e xa hara Piripos pona hara.

Homanu komo yewton tî mîn xakn̂e Piripos.

Iina tî mokyatken̂e Homa pono komo esewtomaxi.

Maseton̂a pono komo kayaritomon yewton mîn Piripos.

Ero warai tî mîn Piripos.

Ero po tak amna n̂enmayakn̂e yaake ro.

13 Amn̂e tak sabatu po amna cekn̂e ewto poi eepu yecihtaka.

Iina roro cexe iitono komo sabatu po roro Kaan yakro tîmtapotachome so,

kacho amna n̂encekn̂e.

Ero ke iina amna cekn̂e.

Iina tak amna n̂eremekn̂e.

Wooxam komo re mak n̂esenmekyatken̂e iina.

Ero ke n̂examro yakro amna nîmtapowakn̂e.

14 On wara xakn̂e anarî wooxam hara amna mtapotarî yentan̂e,

Rica tî mîk xakn̂e noro yosotî.

Ciacira pono tî mîk xakn̂e.

Tîswayem poko twarawantaxmu tî mîk xakn̂e poono poko.

Kaan poko tahwotaxmu tî mîk xakn̂e.

Noro ropotarî tî nakir̂wamekn̂e Kporin komo.

Tîmtapotarî yentan̂e me tî n̂iir̂akn̂e.

Ero ke tî Pawru mtapotarî n̂ewehcakn̂e.

Ero wa tî xakn̂e noro.

15 Ero yinhîrî tak Rica n̂emihcakn̂e.

Yîhyawno komo marha n̂emihcatken̂e.

Emicixapunhîrî tak on wara kekn̂e noro amna ya,

Yaarono me Kporin komo pona enîn̂e me oyen̂ataw awya so omîn yaka cma re mîmokyaxe enmaso,

kekn̂e tî.

Cerewre kekn̂e amna ya.

Ero ke yîmîn yaka amna cekn̂e.

16 Taa,

anarî kaamo po Kaan yakro yîmtapotaxi amna cekn̂e xa hara.

Amna cetaw emasî tak amna n̂epor̂akn̂e anto me cehsom.

Worokyam ke tîropotawnoyem mîk xakn̂e kopi.

Worokyam yanme tî n̂ekatîmyakn̂e tooto yehtopo.

On wara mas amn̂e,

kacho tî n̂ekatîmyakn̂e iitono komo ya.

Epethîrî pona makî tî ero wa kacho n̂ekatîmyakn̂e.

Emasî yosom komo tî nahsîyatken̂e puranta,

ekatîmtoponhîrî yepetho.

Mer̂pora tî nahsîyatken̂e tupurantan komo ero wa kachonho yepetho.

17 Noro tak mokyakn̂e Pawru wenari,

amna wenari ha.

On wara kekn̂e amna poko,

Kaan yanton komo moxam ha,

Yîtîhkarî yanton komo xa.

Kakir̂wamacho komo yekatîmn̂e komo moxam ha,

kekn̂e amna poko.

Kar̂pe xa nîmtapowakn̂e kica amna poko.

18 Ero wara roro kekn̂e yaake kaamo kica.

Ero wa kache pahkî Pawru tak n̂eserepokekn̂e noro poko.

Ero ke noro wece tak n̂etaknamekn̂e.

Worokyam ya kekn̂e,

Noro ropotai etowko.

Xesus Kristu yosotî pona ween̂asî ero wa kachome awya,

kekn̂e.

Ero wa kache rma tak worokyam n̂etowyakn̂e emasî ropotai.

Ero wa xakn̂e.

19 On wara takî tî ketken̂e emasî yosom komo,

Okwe,

puranta yahsîra tak tai ham okwe,

ketken̂e tî.

Ero ke Pawru pen tak nahsîyatken̂e,

Siras pen marha.

N̂examro pen tak n̂ihxikyatken̂e warawantacho yaka.

Ewto yenîn̂e komo yaka tî n̂ihxikyatken̂e.

20 On wara tî ketken̂e ewto yenîn̂e komo ya,

Xutew komo moxam kica.

Kenmayipu komo yerepokan̂e mak moxam kica.

21 Anarme mak panatanmekno n̂iir̂axe kica.

Ewetînî ro poko mak panatanmekno n̂iir̂axe.

Homanu komo reha kîwyam,

ero yipu yewetîn̂e pîn kom ha,

ketken̂e tî yîwya so.

Ero wa tî ketken̂e emasî yosom komo ewto yenîn̂e komo ya.

22 Ero wa ketaw iito xatken̂e tooto pen mer̂pora.

Ero yipu yentache takî tî nîrwonatken̂e n̂examro Pawru komo poko.

Ewto yenîn̂e komo marha tî nîrwonatken̂e poko so.

Pononthîrî komo takî tî mohketken̂e,

nîhyokpetken̂e marha tî.

23 Ero ke nîhyokyatken̂e pahkî oco.

Ero yinhîrî tak kahrutopo yaka takî tî nahruyatken̂e hara okwe.

Kahrutopo yenîn̂e marha tî nantometken̂e entopo poko.

Moxam en̂epera ro mak men esko,

ketken̂e tî yîwya.

24 Ero wa kacho yentarî ke tak kahrutopo rakataka takî tî Pawru komo naar̂akn̂e enîn̂e.

Yîhraknu komo tî nakîknoyakn̂e weewe yexekotoxapu yaka oko.

Ero wa thakwa tî Pawru komo n̂iir̂akn̂e okwe.

25 Taa,

ero wa cexitaw so Kaan yakro takî tî nîmtapowatken̂e Pawru komo,

Siras kom ha.

Rakatawro tî nîmtapowatken̂e Kaan yakro.

Waano marha tî naar̂atken̂e Kaan poko ahwotacho komo.

Iito tî xatken̂e anarî kom hara,

ahruxapu komo xa marha.

N̂examro tî n̂encetken̂e yîmtapotarî komo,

ewanomarî komo marha.

Ero wa tî n̂encetken̂e.

26 Ero wa ketaw yîwya so roowo takî tî n̂esewsîyakn̂e tîhra rma.

Kar̂pe ro makî tî n̂esewsîyakn̂e kopi.

Kahrutopo yapon meero tî n̂esewsîyakn̂e.

Ero yimaw ahnoro metata mko tî n̂etahrunkekn̂e,

swaa.

Ahruxapu komo yimitoponho marha tî n̂etîmhokekn̂e ahnoro okyo.

27 Taa,

roowo yesewsîrî ke takî tî pakekn̂e ahrutopo yenîn̂e.

Tahrunkaxi takî tî n̂een̂akn̂e metata yahruru mko.

Kopi,

kekn̂e takî tî,

kopi,

n̂emahcicow tak ham okwe ahruxapunhîrî komo,

kekn̂e tî.

Ero ke kacipara imo takî tî mohkekn̂e ceknutai cetwaikacho okwe.

Ero wa tî xakn̂e ahrutopo yenîn̂e.

28 On wara tko kekn̂e Pawru yîwya,

Ai,

etwaikara esko.

Tanî rma nas amna ahnoro,

kekn̂e tî yîwya.

Kar̂pe tî kekn̂e.

29 Ero yinhîrî weeyu takî tî n̂ekpekn̂e enîn̂e.

Kahrutopo rakataka takî tî cekn̂e kar̂pe Pawru komo yaka.

Tosokmuru po takî tî n̂eremekn̂e n̂examro yeepatai.

N̂eraswakn̂e ro makî tî,

tatanakn̂e marha tî.

30 Pawru komo takî tî n̂ekyakn̂e potaka n̂he.

On wara tî kekn̂e yîwya so,

Ai,

oyakno komo,

ahce wa xa wai waipîra oyehtome kopi?

kekn̂e tî kahrutopo yenîn̂e yîwya so.

31 On wara tî Pawru komo n̂eyukyatken̂e,

Kporin komo Xesus Kristu pona enko waipîn me tak awehtome,

waipîn me xa marha ehtome so ahyawno kom hara,

ketken̂e tî yîwya.

32-33 Ero yinhîrî tak miya rma takî tî Pawru komo n̂ekatîmyatken̂e Kaanî mtapotarî yîwya.

Yîhyawno komo ya marha tî n̂ekatîmyatken̂e.

Ero yimaw rma takî tî rakatawro rma tuuna n̂ekyakn̂e kahrutopo yenîn̂e yîhyotoponhîrî komo korokachome.

Ero ke tak yîmkarî komo korokekn̂e.

Korokache noro rma takî tî n̂emihcakn̂e.

Iyanan komo marha tî n̂emihcatken̂e.

34 Ero wa exiche so takî tîmîn yaka takî tî Pawru komo naar̂akn̂e kahrutopo yenîn̂e.

Yînahrî komo tî n̂etakekn̂e.

Kaan pona tî n̂een̂akn̂e tîhyawno komo yakro rma ahnoro.

Ero ke tahwore tî xakn̂e noro.

Ero wa tî xakn̂e.

35 Enmapuche tak porisia komo takî tî n̂en̂epetken̂e ewto yenîn̂e komo kahrutopo yenîn̂e yaka.

Pawru komo tak ahsîpînkak ha,

kachome tî n̂en̂epetken̂e.

36 Ero ke kahrutopo yenîn̂e takî tî kekn̂e Pawru ya hara,

Ewto yenîn̂e komo tak n̂en̂epecow porisia komo.

Pawru komo tak tî ahsîpînkak ha,

kacow tak owya.

Ero ke tî mîîcetu oroto.

Erasîra ro mak tak etocoko,

kekn̂e tî yîwya so.

37 Anarî me tko tî Pawru n̂eyukyakn̂e yîmtaka so.

On wara tî kekn̂e,

N̂examro rma mohcowpe amna yaaso.

Homanu xa amna.

Noro yipu rma thakwa amna nîhyoce amna yen̂ekara rma cexitaw so.

Tooto komo wero ro amna nîhyoce.

Ero yinhîrî tak amna nahruce hara.

Ero ke ahce kacho en̂epa me mak amna yen̂epe xe tak nat hara.

Ero wa owto xera wasî.

Ewto yenîn̂e komo xa matko mohcowpe amna yaaso ewto poi,

kekn̂e tî Pawru porisia komo ya.

38 Ero ke Pawru mtapotarî tî n̂ekatîmyatken̂e porisia komo ewto yenîn̂e komo ya hara.

Ero ke n̂eraswatken̂e ro makî tî kayaritomo komo.

Homanu xa ma mîkyam kopi Pawru komo?

ketken̂e tî.

39 Ero ke mokyatken̂e takî tî ewto yenîn̂e komo rma Pawru komo yaaso.

Tawakem wara takî tî Pawru komo naar̂atken̂e.

Anarî ewto pona cma re mîîcexe,

ketken̂e tî yîwya so.

40 Ero tak kahrutopo yai takî tî cetken̂e Pawru komo,

Rica mîn yaka tî cetken̂e.

Iito tî ka n̂esenmekyatken̂e Kaan xîkrî komo yakro.

Ahworeno tî n̂iir̂atken̂e.

Ero yinhîrî takî tî cetken̂e esama yaw hara.

Ero wa tî cetken̂e.