Ero yimaw tak Xuteia pono komo takî tî mokyatken̂e iina Anciokia pona.

Kaan xîkrî komo tî panatanmekyatken̂e iitono komo.

On wara tî ketken̂e yîwya so,

Cetanpikapore men nasî amyamro Moises pen nmewretho yaw roro rma.

Ero wa exihra awexitaw so etakir̂waman me ro mak maxe okwe,

ketken̂e tî yîwya so.

2 Pîra ro mak okwe,

ketken̂e tko tî Pawru komo Banabe yakro.

Ero poko takî tî n̂eseseyukyatken̂e pahkî n̂he.

Iito re tî yîhtînopîra xatken̂e okwe.

Ero ke Pawru takî tî men̂eketken̂e Xerusaren pona cen̂epesom me,

Banabe marha.

Anarî komo marha tî men̂eketken̂e akrono komo me hara.

On wara tî ketken̂e men̂ekaxapu komo ya,

Amyamro cma re mîîcexe Xerusaren pona ero poko esentaxi.

12 komo yakro esentacoko,

poritomo komo yakro marha,

ketken̂e tî yîwya so en̂eperî me.

3 Ero ke Anciokia poi takî tî cetken̂e.

Miya tî cetken̂e Xerusaren yesamarî yaw.

Penicia pore tî cetken̂e,

Samaria pore marha tî.

Cesekatîmro tî cetken̂e.

On wara tî ketken̂e mîn hak ewto pono komo ya,

Xesus tak nahsîyaxe Xenciu komo,

ketken̂e tî yîwya so.

Ero wa kacho yentarî ke takî tî nahwowatken̂e Kaan xîkrî komo ahnoro.

4 Ero yinhîrî tak Xerusaren pona epatakache so Pawru komo tawake tî xatken̂e Kaan xîkrî komo n̂examro poko,

12 komo marha,

Kaan mîn yenîn̂e komo marha.

Ero wa tî xatken̂e Pawru komo poko.

Ero ke tak n̂examro ya takî tî n̂esekatîmyatken̂e Pawru komo.

Ero wa ciino n̂iir̂akn̂e Kaan amna ke,

ketken̂e tî yîwya so.

5 Ero yinhîrî tak anarî komo makîrha takî tî nîmtapowatken̂e hara,

parisew kom ha.

Xesus ponarono komo rma tî mîkyam xatken̂e.

On wara tî ketken̂e,

Xenciunhîrî komo men anpikacoko.

Ahnoro Moises pen ya kpanatanmetopo men ewetîcoko,

kapore marha nasî yîwya so,

ketken̂e tî.

Ero wa tî ketken̂e Parisew komo.

6 Ero ke 12 komo takî tî n̂esenmekyatken̂e hara,

Kaan mîn yenîn̂e komo marha tî n̂esenmekyatken̂e.

Ero wa tî n̂esenmekyatken̂e ero poko cesentachome so.

7 Cesenmekîche so ero poko takî tî n̂esencetken̂e,

n̂eseseyukyatken̂e marha okwe.

Pahkî eseseikuche so Petru takî tî nawomyakn̂e piiri.

On wara kekn̂e yîwya so,

Oyakno komo,

kîmtapowasî ka an̂entarî komo me.

Pahxa omen̂ekekn̂e Kaan tîmtapotarî yekatîmn̂e me Xenciu komo ya.

Ero ke kakir̂wamacho wekatîmyakn̂e yîwya so.

Xesus pona tak n̂een̂atken̂e.

8 Ero yinhîrî tak on wara xakn̂e Kaan,

kropotarî yenîn̂e ro,

Kir̂wanî ro Yekatî n̂iir̂akn̂e yîropotaka so,

Kaan xîkrî komo moxam ha,

kacho me tak ehtome so.

Pahxa kropotaka so n̂iir̂akn̂e Noro xa marha n̂iir̂akn̂e n̂examro ropotaka hara.

9 Yîropotarî komo nakir̂wamekn̂e tpona enîrî ke mak yîwya so.

Etîme re rma ero wa kiir̂atken̂e so Xenciu komo,

Xutew komo marha.

10 Ero ke Kaan men tukukmexe yîrwonmetopo poko okwe anarme kan̂e me awexitaw so Xenciu komo ya.

Ewetîtîkarî yopono thakwa mîn Moises pen ya kpanatametopo.

Ewetîtîkara xatken̂e Kporin pen komo.

Kîwyam marha ewetîtîkara tîxatken̂e hara okwe.

11 Kporin komo Xesus Kristu yanme makî reha kakir̂wamexe so Kaan kwakrecho komo me mak.

Ero wa kakir̂wamexe so.

Ero wa xa marha Xenciu komo nakir̂wames hara,

kekn̂e tî.

Ero wa tî kekn̂e Petru yîwya so.

12 Ero yinhîrî tak Banabe makîrha takî tî n̂esekatîmyakn̂e,

Pawru marha.

Ero ke tîtken̂e tî xatken̂e esenmexapu komo n̂examro mtapotarî yentachome.

On wara tî ketken̂e n̂examro,

Xenciu komo chere amna cekn̂e.

Yîchew so amna yexitaw cirihnî mko Kaan n̂irpekn̂e amna ya emapona yîn̂enîrî komo me,

ketken̂e tî cesekatîmyataw so.

13 Ero yimaw tak Pawru komo yesekatîmtîkache Ciaku makîrha takî tî nîmtapowakn̂e hara.

On wara tî kekn̂e,

Oyakno komo,

omtapotarî cma re mencexe hara.

14 Simaw n̂ekatmo kîwya so Xenciu komo yakir̂wamachonho Kaan ya.

Kohn̂er̂u poko tî ka Kaan n̂ihciyakn̂e Xenciu komo yakir̂wamacho.

Tîyanan me tak Kaan nahsîya ham Xenciu poyino komo.

15-17 Ero poko xa marha mewretken̂e weronomano rin̂enho pen komo pahxa,

On wara kacho mewretken̂e,

On wara kesî Kaan kîwya so,

Pahxaro tak Tapi pen mîntho wiir̂as hara amn̂e emacakaxapunhîrî,

kir̂wan̂he tak wiir̂asî etwîrîmaxapunhîrî.

Anarî yana komo cokorî ka Kporin komo n̂epocowpe Noro ponaro cehtome so.

Ahnoro Xenciu komo yahsî xe cma re wasî oyanan me cehsom komo,

kesî Kporin komo,

ero wa ciino rin̂e ha,

kacho mewretken̂e weronomano rin̂enho pen komo.

18 Pahxa rma ero wa ciino ritopo nîhtînoyakn̂e Kaan ahce na exihra ro mak exitaw.

Ero wa ciino wiir̂as amn̂e,

kan̂e rma Mîkî pahxanînhîri rma.

19 Ero ke on wara wîhtînoyas ow,

Kaan pona tak n̂een̂at ham Xenciu komo.

Ero ke n̂examro yewrucpera ro mak cexpore nasî.

20 On wara mak tmewrepore nasî yîn̂enîrî komo me,

On wara kes amna awya so,

On wara mak ehcoko,

ciixaputho ya tîmxapunhîrî tonohra ro mak ehcoko wooto,

apici komo yai ro mak exihra marha ehcoko,

exexewnuxapu tonohra marha ehcoko wooto,

kamxuku emehra marha ehcoko,

kacho mak tmewrepore nasî kîkaritan komo,

yîhyakan komo.

21 Mehxa ro rma n̂epanatanmekyaxe ahnoro ewto pono komo Moises pen nmewretho poko.

Xutew komo yesenmetopo yaw so nîmtapotarexe ahnoro sabatu po roro,

kekn̂e tî.

Ero wa tî kekn̂e Ciaku esenmexapu komo ya.

22 Taa,

Ciaku mtapotarî yentache tak on wara takî tî ketken̂e esenmexapu komo,

Ero wa ham,

ketken̂e tî.

12 komo tî ero wa ketken̂e,

Kaan mîn yenîn̂e komo marha tî,

Kaan xîkrî komo marha tî ahnoro.

Ero wa tî ketken̂e.

On wara marha tî ketken̂e,

Pawru komo n̂etîramexe amn̂e Anciokia pona,

Banabe kom ha.

Ero ke n̂examro yakro tîtosom komo tîtmen̂ekacerî,

ketken̂e tî.

Ero ke tpoyino komo rma n̂etahcatken̂e,

Xutas tî n̂etahcatken̂e.

Bahsabasî rma mîk Xutas.

Siras marha tî n̂etahcatken̂e.

Kaan xîkrî komo panatanmekn̂e tî mîkyam xatken̂e n̂examro.

23 Taa,

yînarîrî komo takî tî mewretken̂e karita.

On wara kacho tî mewretken̂e,

Amna yakno amyamro Xenciu komo.

Anciokia pono komo amyamro,

Siria pono amyamro,

Sirisia pono marha amyamro.

On men amna karitan an̂enîrî komo.

12 komo amna,

poritomo komo marha amna.

Awakno komo rma amna.

Ero warai amna on mewren̂e.

Ahce wa matu iito?

Kir̂wan̂he mat ha?

24 On wara kes amna awya so,

ahyaka so tî cetken̂e amna yakrononho komo.

Awahwoketken̂e so tî n̂examro tîmtapotarî komo ke,

awewkukmetken̂e so marha okwe.

On wara tî ketken̂e awya so,

Etanpikacoko men.

Ahnoro Moises pen nmewretho ewetîcoko,

ketken̂e tî n̂examro ahyaka so toxapu komo.

Ero wara kahra ro mak xakn̂e amna yîwya so.

25-26 Ero ke tak amna n̂esenmekye ero poko cesentachome.

Cesentache tak iito re amna nîhtînoye ahyaka so cen̂epesom komo,

takîhso apanatanmekn̂e komo tak.

Ero ke Banabe komo yakrono amna n̂en̂epesî,

Pawru komo yakrono ha.

Yîpînîn yaw amna yehtopo mîkyam Banabe komo,

Pawru kom ha.

Xesus Kristu yehtopo yekatîmrî poyero twaihtopo yukurunkan̂enho mîkyam.

27 Xutas,

Siras marha,

ero wa n̂en̂epes amna yarî ahyaka so Banabe komo yakro.

Amna karitan wara xa marha kexe n̂examro amn̂e awya so.

28-29 On wara mak amna kes awya so atwermacho kom ha,

ciixaputho ya tîmxapunhîrî tonohra ro mak ehcoko wooto.

Kamxuku yemehra marha ehcoko.

Exexewnuxapu tonohra marha ehcoko wooto.

Apici komo yai ro marha exihra ehcoko.

Ero wa mak amna kesî atwermacho komo.

Ero yipu pokohra ro mak awexitaw so kir̂wan̂he maxe.

Ero wa mak amna nîhtînoi.

Ero wa xa marha Kir̂wanî ro Yekatî nîhtînoi hara.

Miyan poko rma atwerma xera so nas amna.

Ero wa mak kes amna awya so,

kacho tî mewretken̂e karita.

Ero wa kacho tî mewretken̂e Anciokia pono komo yakan.

30-31 Ero yinhîrî Banabe komo takî tî n̂en̂epetken̂e,

Xutas komo marha.

Ero ke Anciokia pona tî cetken̂e.

Iina cepatakache so takî tî Kaan xîkrî komo nan̂ikyatken̂e.

Mohtîkache so tak Xerusaren pono komo nmewretho takî tî nîmyatken̂e yîwya so karita.

Ero ke iitono komo takî tî nîmtapotaretken̂e esenmexapu komo n̂entarî me.

Ero yentache nahwowatken̂e tak okre.

Tahworetopo komo me tî n̂encetken̂e okre.

32 Ero yimaw tak Xutas komo takî tî iitono komo panatanmekyakn̂e Kaan xîkrî komo.

Siras yakro rma tî panatanmekyakn̂e.

Weronomano rin̂e komo tî mîkyam xatken̂e.

Ero wa tî Kaan xîkrî komo nahworetken̂e Kaan poko.

Pahkî tî iitono komo panatanmekyatken̂e.

33 Pahkî cexiche so iito Xutas komo takî tî cetken̂e hara.

Taa,

etocoko tak hara.

Aponaro so naxe Anciokia pono komo,

kasko 12 komo ya,

ketken̂e tî.

Ero wa tî ketken̂e yîwya so.

34-35 Iito rma tî ka xakn̂e Sirasî reha.

Iito marha tî ka xakn̂e Pawru,

Banabe komo.

Anciokia po rma tî xatken̂e.

Kporin komo mtapotarî tî n̂ekatîmyatken̂e rma iito.

Panatanmekno marha tî n̂iir̂atken̂e.

Ero poko marha tî xatken̂e anarî kom hara.

Yaake rma tî xatken̂e ero pokono komo.

Ero wa tî xatken̂e.

36 Ero yinhîrî tak tîtotopo takî tî nîhtînoyakn̂e hara Pawru.

Ero ke Banabe ya tî kekn̂e,

Kaika xa hara mîn hak ewto pona hara.

Kporin komo mtapotarî cekatîmyatken̂e iina xa marha kaika hara kakno komo yenso.

Ahce wa xa mat ha,

kaxi kaika yîwya so.

37 Taa,

ero wa ham,

kekn̂e tî Banabe Pawru ya.

Kakro so tarpore xa hara nasî Xuaw,

Mahkus,

kacho mîk ha,

kekn̂e tî.

Ero wa tî kekn̂e Banabe Pawru ya.

38 Apohana,

arî xera ro makî wasî,

kekn̂e tî Pawru.

Knomn̂enhîrî mîk okwe Panpir̂a po kexitaw so.

Kakronomara xakn̂e okwe Kaanî mtapotarî yekatîmso kîwcetaw so.

Ero ke arî xera wasî,

kekn̂e hara tî Pawru.

39 Ero wa tî n̂eseseyukyatken̂e Mahkus poko.

N̂etanwekyatken̂e marha tî okwe.

Ero poyero n̂etakpayatken̂e tak okwe.

Banabe reha tî cekn̂e Xipre pona.

Mahkus tî naar̂akn̂e takro.

Ero wa tî xakn̂e Banabe.

40-41 Ero ke Siras takî tî n̂een̂akn̂e Pawru takrono me hara.

Ero yimaw Kaan yakro takî tî nîmtapowatken̂e Kaan xîkrî komo Pawru komo poko.

Kir̂wan̂he cma re moxam maar̂asî miya cetaw so,

ketken̂e tî Kaan ya.

Ero wa kache Pawru komo takî tî cetken̂e Siria pore,

Sirisia pore marha.

Ero wa tî cetken̂e Kaan xîkrî komo yahworeso.

Ero wa tî cetken̂e.