Taa,

ero yinhîrî tak Ikon̂u pona takî tî n̂epataketken̂e Pawru komo,

Banabe yakro.

Iito cexitaw so tak Xutew komo yakro takî tî n̂esenmekyatken̂e xa hara esenmetopo komo yaka.

Iitono komo ya tî n̂ekatîmyatken̂e xa hara Kaanî mtapotarî.

Kir̂wan̂he xa tî n̂ekatîmyatken̂e yîwya so.

Ero ke Xesus pona takî tî n̂een̂atken̂e mer̂pono pîn komo.

Xutew komo,

Kreku komo marha,

ero wa tî xatken̂e.

2 Anarî komo reha tko tî Kaanî mtapotarî yewetîra rma xatken̂e okwe,

Xutew kom ha.

N̂examro tî nîmtapowatken̂e Xenciu komo yakro Kaan xîkrî komo poko okwe.

Kicicme naxe kica Xesus ponarono komo,

ketken̂e tî.

Ero ke Xesus ponarono komo xera takî tî xatken̂e Xenciu kom hara okwe.

3 Pahkî n̂he rma tko tî n̂enmayatken̂e Pawru komo iito Ikon̂u po.

Kporin komo pokono tî n̂ekatîmyatken̂e iitono komo ya erasîra.

Yaarono mîn,

Kaan ya awakir̂wamacho komo pokono n̂ekatîmyaxe n̂examro,

kan̂e wara xakn̂e Kporin komo.

Cirihnî mko tî n̂irpekn̂e yîwya so yîmtapotarî komo yewetîtome entan̂e komo ya.

4 Anarmerpa so tko tî n̂esehtînoyatken̂e iitono komo Xesus nantomatho komo poko.

Xutew komo wa xa marha tî n̂esehtînoyatken̂e anarî komo reha.

Ero ke Pawru komo xera tî xatken̂e.

Pawru komo xatî me tî xatken̂e reha anarî kom hara.

Ero wa tî xatken̂e iitono komo.

5 Ero yinhîrî takî Xenciu komo takî tî n̂esenmekyatken̂e Xutew komo yakro.

Antomano rin̂e komo yakro rma tî n̂esenmekyatken̂e.

Pawru komo yahsî xe tî xatken̂e okwe.

N̂examro pen yemetanmekî xe tî xatken̂e,

waihka xe marha tî xatken̂e toh ke oko.

Ero wa tî Pawru komo poko xatken̂e okwe.

6-7 Tahsî xe ehtopo komo rma tko tî n̂encetken̂e Pawru komo.

Ero ke takî tî n̂emahciyatken̂e anarî ewto pona hara,

Rista pona tî.

Tehbe pona marha tî cetken̂e.

Yîmkaino komo yaka marha tî cetken̂e.

Rikaonia tî mîn roowo yosotî,

iitono ha.

Iitono komo ya tî n̂ekatîmyatken̂e Kaan ya kakir̂wamacho komo.

Ero wa tî xatken̂e.

8 Taa,

Rista pona tîtoche so tak yîhrepun takî tî n̂een̂atken̂e.

Ero wara ewruxapu tî mîk xakn̂e etarinî ro mak okwe.

9 Noro takî tî n̂encekn̂e Pawru mtapotarî.

Noro yewru marha tî n̂een̂akn̂e Pawru hara.

Kaan pona enîn̂e me tî n̂een̂akn̂e tkarihtosom me ehtome.

10 Ero ke Pawru takî tî kekn̂e yîwya,

Ai oyakno,

piiri tak awomko.

Ahtarî po tak ececetoko,

kekn̂e tî yîwya.

Kar̂pe tî kekn̂e.

Ero wa kache takî tî nawomyakn̂e okre.

Nahronakn̂e takî tî,

n̂etar̂akn̂e marha tî.

Ero wa tî xakn̂e yîhrepunînhîrî.

11 Taa,

Pawru nkarihtotho takî tî n̂een̂atken̂e iitono komo.

Ero ke tî n̂eserepoketken̂e ro mak.

Kar̂pe takî tî nîmtapowatken̂e.

Rikaonia pono komo mtapotarî yaro tî nîmtapowatken̂e.

Kopi,

ketken̂e tî,

kopi.

Kaan moxam ham.

Tooto me nîhtocow ham kopi kah yai kîhyaka so,

ketken̂e.

Ero wa tî ketken̂e.

12 Ero ke ponaro cehtopo komo poko takî tî osohtono n̂iir̂atken̂e.

Xupite moso ham,

ketken̂e tî Banabe poko.

Mehkur̂u mîkro haram,

ketken̂e tak Pawru poko hara.

Ero wa tî Pawru nosohcetken̂e ekatîmn̂e me exirî ke.

13 Iito tî xakn̂e Xupite mîn ewto wacanî mkai.

Iito marha tî xakn̂e Xupite mîn yenîn̂e.

Noro takî tî n̂ekyakn̂e paaka yaake.

Epemrutun marha tî n̂ekyakn̂e aroko me ciixapu.

Ewto metataka tî n̂ekyakn̂e.

Ekîche on wara tî kekn̂e esenmexapu komo ya,

Moso men paaka takn̂isom yîwya so tîmsom me,

kekn̂e tî iitono komo ya.

14 Ero wa kacho tko tî n̂encetken̂e Pawru komo.

Anarme ro mak tî n̂encetken̂e okwe.

Ero ke tpononthîrî komo takî tî nahxaiketken̂e kicicme xa entarî ke.

Esenmexapu komo cheka takî tî cetken̂e kar̂pe,

mer̂pono pîn komo cheka rma.

15 Ai,

oyakno komo,

ketken̂e takî tî,

ahce kacho ero wa ciri xe mat ha?

Ero wa cirihra ro mak cexpore nasî.

Tooto mak amna awarai komo rma.

Kaan yehtopo yekatîmn̂e mak amna awya so.

On wara kan̂e amna,

Ero pîntho mak mîkyam ponaro awehtopo komo.

N̂expe kr̂a ero yipu komo.

Waipînî ro poko xa ehcoko Kaan poko ha.

Noro xa Mîk kakîhton̂enhîrî komo,

kaapu yakîhton̂enho,

roowo marha,

tuuna imo marha,

ero kwawno komo marha,

kah yawno komo marha,

roowo pono komo marha,

ero warai komo yakîhton̂enho Mîk Kaan,

kan̂e mak amna awya so.

16 Pahxa ka yîtwermano cirihra ka xakn̂e Kaan.

Tanme ro so mak n̂ehcowpe,

kekn̂e makî tî ka.

17 Cehtopo rma tko tî n̂enpekn̂e yîwya so wakrecho komo ke.

Enko xe,

tuuna n̂ekmexpekn̂e roro kah yai yînatîrî komo yatîkrechome.

Atîhtache Noro xa marha n̂epetanmekyakn̂e epetacho me exitaw.

Ero wa yînahmano n̂iir̂akn̂e okre.

Ero wara rma kahworexe so kîwyam hara oroto,

ketken̂e tî yîwya so.

Ero wa tî ketken̂e Pawru komo iitono komo ya.

18 Cehn̂axi makî tko n̂examro panatanmekyatken̂e.

Paaka paraxka xe rma tî re xatken̂e Pawru komo ya tîmsom me.

19 Ero yinhîrî Xutew komo takî tî mokyatken̂e iina hara okwe.

Anciokia pono komo,

Ikon̂u pono komo,

en̂exan komo tî mokyatken̂e.

Rista pono komo yakro tî nîmtapowatken̂e Pawru komo poko.

Kicicme tî nîmtapowatken̂e.

Yîmtapotarî komo takî tî n̂ewehcatken̂e iitono komo.

Ero ke Pawru pen takî tî nahsîyatken̂e.

N̂etapetken̂e marha tî toh ke oko.

Etapache tak ewto poi takî tî n̂ihxîkyatken̂e.

Waipo tak ha,

ketken̂e Pawru poko.

20 Ero yinhîrî takî tî okoputhîrî mamhoko xatken̂e Xesus ponarono komo.

Een̂ataw rma yîwya so nawomyakn̂e hara Pawru.

Tawomuche takî tî cekn̂e hara ewto pona.

Ero wa tî xakn̂e Pawru.

Enmapuche tak Tehbe pona takî tî cetken̂e hara Pawru komo,

Banabe yakro.

Ero wa tî cetken̂e.

21 Ero yinhîrî iito rma ka xatken̂e Pawru komo Tehbe po.

Kakir̂wamacho takî tî n̂ekatîmyatken̂e iitono komo ya.

Ero ke Xesus pona takî tî n̂een̂atken̂e mer̂pono pîn komo.

Ero yinhîrî tak Pawru komo takî tî n̂etîrametken̂e hara Rista pona hara.

En̂exa takî tî cetken̂e xa hara Ikon̂u pona.

En̂exa takî tî cetken̂e Anciokia pona xa hara.

22 Xesus ponarono komo tî panatanmekyatken̂e tîtorî me so,

nahworetken̂e marha tî.

On wara tî ketken̂e yîwya so,

Xesus pona enîn̂e me roro men ehcoko etowîn me ro mak.

Emapona thakwa mesemetanmekyaxe okwe.

Ero wara rma thakwa cesemetanmexe Kaan maywen me xa kehtîketaw so,

ketken̂e tî yîwya so.

23 Mîn hak ewto po cexitaw so Kaan mîn yenîn̂e komo n̂iir̂atken̂e Pawru komo.

Kaan yakro marha tî nîmtapowatken̂e.

Eseresmara xatken̂e pahkî tîmtapowataw so.

Apa kah yawno,

ketken̂e tî,

moxam tak amxîkrî komo.

Ero ke moxamu cma re makronomesî apona enîn̂e me exirî ke so,

ketken̂e roro Kaan xîkrî komo poko.

Ero wa tî ketken̂e mîn hak pono komo ya.

24-25 Ero yinhîrî takî tî Pisicia rowon pore cetken̂e hara.

Panpir̂a rowon pona roro tî cetken̂e.

Ero poi xa hara tî cetken̂e Pehxe pona hara.

Iitono komo ya takî tî Kaanî mtapotarî n̂ekatîmyatken̂e hara.

Ero yinhîrî takî tî Atar̂a pona cetken̂e hara.

26 En̂exa takî tî cetken̂e kanawa yaw.

Anciokia pona tî cetken̂e cen̂epen̂enhîrî komo yaka hara.

Pahxa tî iitono komo nîmtapowatken̂e Kaan yakro Pawru komo yen̂eperî me.

On wara tî ketken̂e,

Apa kah yawno,

moxamu cma re makronomesî cetaw so amtapotarî yekatîmn̂e komo,

ketken̂e tî Pawru komo poko.

Yîmtapotarî komo yaw roro cehtîkache so tak cen̂epen̂enhîrî komo yaka takî tî n̂etîrametken̂e hara.

27 Ero ke iina cepatakache so Kaan xîkrî komo takî tî n̂enmekyatken̂e.

N̂esekatîmyatken̂e yîwya so.

Ero wa ciino n̂iir̂akn̂e Kaan amna ke,

ketken̂e tî.

Xesus pona enîn̂e me tak Kaan n̂iir̂a ham Xenciu komo,

kacho tî n̂ekatîmyatken̂e.

Ero wa tî n̂esekatîmyatken̂e cen̂epen̂enhîrî komo n̂entarî me.

28 Ero yinhîrî iitono ro me takî tî xatken̂e Pawru komo pahkî Anciokia po rma.

Xesus ponarono komo yakro tî n̂enmayatken̂e.

Ero wa tî xatken̂e iito.