Ero yimaw Anciokia po tî xatken̂e Kaanî xîkrî komo yaake.

Weronomano rin̂e komo marha tî xatken̂e iito,

panatanmekn̂e komo marha.

Taixa tî xatken̂e,

Banabe,

Simeaw.

Nixe kacho rma tî mîk xakn̂e,

Ruxu,

Sirene pononho tî mîk xakn̂e.

Manaen tî xakn̂e hara.

Eroces yakro por̂mamnoxapu tî mîk xakn̂e Manaen,

kayaritomo yakro ha.

Sawru marha tî xakn̂e.

Ero wa tî xatken̂e iito weronomano rin̂e komo,

panatanmekn̂e komo marha.

2 On wara takî tî xatken̂e iitono komo,

Kaan xîkrî komo,

Kaan yakro tî nîmtapowatken̂e.

Eseresmara marha tî xatken̂e pahkî n̂he tîmtapowataw so.

Ero wa exitaw so tak Kir̂wanî ro Yekatî takî tî nîmtapowakn̂e n̂examro yakro.

On wara tî kekn̂e yîwya so,

Awakrono komo tak ciicoko onantomarî me mak.

Banabe,

Sawru,

n̂examro ciicoko ero pokono me,

kekn̂e tî Kir̂wanî ro Yekatî.

3 Ero ke Banabe komo,

Sawru yakro takî tî n̂en̂epetken̂e Kaan yanme.

Kaan yakro cokorî tî ka nîmtapowatken̂e poko so.

Pahki eseresmara marha tî xatken̂e tîmtapowataw so,

Sawru komo marha tî meretîyasîyatken̂e.

Ero yinhîrî takî tî n̂examro n̂en̂epetken̂e.

4 Ero ke cetken̂e takî tî Sawru komo.

Serusia pona tî ka cetken̂e.

En̂exa takî tî cetken̂e kanawa yaw hara Xipre pona tak.

5 Ero po nai ewto,

Saramina tî osotî.

Ero pona takî tî cetken̂e.

Iito cexitaw so tak Kaanî mtapotarî takî tî n̂ekatîmyatken̂e Xutew komo ya.

N̂examro yesenmetopo yaka tî cetken̂e ekatîmso.

Xuaw marha tî xakn̂e Banabe komo yakronoman̂e me.

Ero wa tî xatken̂e.

6 Ero yinhîrî takî tî cetken̂e xa hara anarî pona hara,

anarî pona xa hara,

anarî pona xa hara,

ero wa tî cetken̂e ewto pona so ciwya mapitaka roro.

Papos pona takî tî n̂epataketken̂e ciwya mapitawno pona.

Iito takî tî yaskomo n̂een̂atken̂e hara Xutew.

Tohnawno poko weronomano rin̂e tî mîk xakn̂e okwe.

Baxesus tî mîk xakn̂e noro yosotî.

7 Kopenato yawno tî mîk xakn̂e Baxesus.

Sexiu Pawru tî mîk xakn̂e kopenato yosot hara.

Takîhso cesehtînosom tî mîk xakn̂e kopenato.

Noro takî tî nan̂ikpekn̂e Banabe komo,

Sawru yakro.

N̂examro mokuche on wara tî kekn̂e yîwya so,

Kaanî mtapotarî cma re mekatîmyaxe owya,

kekn̂e tî.

8 Ero ke Kaanî mtapotarî tî n̂ekatîmyatken̂e yîwya.

Ekatîmyataw iito rma tî xakn̂e yaskomo,

Er̂mas.

Yaskomo kacho rma tî mîk noro yosotî.

Noro takî tî Pawru komo mtapotarî nîwîrîyakekn̂e kica kayaritomo n̂entarî me Xesus pona enîhra ehtome.

9 Yîwîrîyakacho yentache Sawru takî tî n̂eyukyakn̂e hara.

(Pawru rma tî mîk xakn̂e noro yosot hara.)

Kir̂wanî ro Yekatî ken̂e xa tî xakn̂e.

Ero ke Er̂mas wece takî tî n̂entîkekn̂e.

10 On wara tî kekn̂e yîwya,

Ciabu xîkrî mak amoro ham okwe.

Cemarontaxmu ro mak amoro ham.

Tohnaw cesenposom marha amoro ham.

Kir̂wan komo xatî pînî ro mak amoro.

Yîtîhkara ma mai ke Kporin komo ya kpanatanmetopo komo yîwîrîyakacho,

kir̂wan̂he kehtopo komo yîwîrîyakacho ha?

11 Ero ke awemetanmekyasî tak Kporin komo.

Awewkanoyasî oroto.

Pahkî n̂he men ka ewuhra masî.

Kaamo yenîhra mas okwe,

kekn̂e tî Pawru yîwya.

Ero wa tî kekn̂e yîwya.

Ero ke ero wa kache rma takî tî n̂esewkekn̂e okwe.

Taporî poko taan̂e xe tî xakn̂e.

Ero wa tî xakn̂e Er̂mas pen.

12 Ero wa noro pen ciitopo yenîche tak kayaritomo takî tî n̂eserepokekn̂e xa Kporin komo ya kpanatanmetopo poko.

Ero ke Xesus pona takî tî n̂een̂akn̂e.

Ero wa tî xakn̂e kayaritomo.

13 Ero yimaw Paposu poi takî tî cetken̂e hara Pawru komo.

Kanawa yaw tî cetken̂e anarî roowo pona hara.

Iito tî xakn̂e Panpir̂a,

roowo ha.

Ero po tî xakn̂e ewto hara.

Pehxe tî mîn xakn̂e ewto yosotî.

Ero pona tî nawomyatken̂e.

Iina epatakache so tak Pawru komo yai takî tî n̂etowyakn̂e Xuaw okwe.

Xerusaren pona tî n̂etîramekn̂e hara okwe.

14 Pawru komo tko tî cetken̂e rma Pehxe poi Anciokia pona hara.

Pisicia pono reha mîn Anciokia.

Kepokaretopo po takî tî n̂esenmekyatken̂e Xutew komo yakro.

Esenmetopo komo yaw cexitaw so tî n̂eremetken̂e.

15 Ero yimaw tak Kaan Karitan tî nîmtapotaretken̂e iitono komo Moises pen nmewretho.

Weronomano rin̂e komo mtapotarî marha tî nîmtapotaretken̂e.

Ero yinhîrî tak tîmtapotarî komo takî tî n̂entamexpetken̂e enmekno rin̂e komo Pawru komo ya.

On wara tî ketken̂e,

Oyakno komo,

kakîhretopo komo yîhtînoyataw awya so mekatîmyaxe cma re amna ya,

ketken̂e tî.

16 Ero ke piiri takî tî nawomyakn̂e Pawru.

Poku poku kekn̂e tî tamorî ke tîtken̂e ehtome so.

Tîtken̂e exiche so tak on wara tî kekn̂e,

Oyakno komo,

Ixaw Yana komo amyamro,

awakro so kîmtapowasî.

Anarî komo marha amyamro Kaan ponarono komo,

awakro so marha kîmtapowasî.

Ero ke omtapotarî cma re ka mencexe.

17 On wara wîîkes awya so,

pahxa tî kporin pen komo nahsîyakn̂e Kaan tîyanan me.

Ponaro Ixaw Yana komo yehtopo tî Mîk n̂examro pen nahsîyakn̂e.

Ero yinhîrî takî tî Exitu pono komo chew xatken̂e kporin pen komo,

tpoyino pîn komo chew.

En̂exa takî tî n̂examro naar̂akn̂e hara.

Kar̂pe xa cehtopo n̂enpekn̂e aatopo komo poko.

18 Ero yinhîrî tak n̂examro xatken̂e pohnîntaw.

Pahkî tî xatken̂e iito,

40 cimn̂ipu tî.

Kicicme tî xatken̂e ero yimaw okwe.

Nînîmyakn̂e makî tko tî Kaan kicicme ehtopo komo.

19 Ero yinhîrî tak Kanan pono pen komo nar̂mapekn̂e tak yîwya so.

Mîk hak rowon pono komo tî waihkapekn̂e yîwya so,

7 rowon pono pen kom ha.

Waihkapotîkache ewtonthîrî komo takî tî nîmyakn̂e Kaan Ixaw Yana tribun komo ya hara.

Tînahsîrî ro komo nukuknomekn̂e men̂ekacho ke ahsîtome tak.

20 Ero yinhîrî tak tîyanan kurunpen̂e komo men̂ekekn̂e Kaan.

450 cimn̂ipu tî ero warai komo men̂ekekn̂e.

Okomn̂i takî tî Samuew pen xakn̂e Ixaw Yana komo yukurunpen̂e me hara.

Weronomano rin̂e marha tî mîk xakn̂e noro pen.

21 Ero yinhîrî tak tîkayaritomon komo xe takî tî xatken̂e Ixaw Yana komo,

kayaritomo xa tak ha.

Ero ke tak Sawru takî tî n̂iir̂akn̂e Kaan n̂examro kayaritomon me,

Kiisi mumuru ha.

Benxamin yepamtho tî mîk xakn̂e.

Noro takî tî xakn̂e kayaritomo me 40 cimn̂ipu.

22 Ero yinhîrî tak Sawru pen takî tî nowyakn̂e hara Kaan.

Tapi takî tî n̂iir̂akn̂e hara yîhretawno me.

Xese mumuru tî mîk xakn̂e Tapi.

On wara tî Kaan kekn̂e noro poko,

Owara xa marha cesehtînosom me ween̂asî Tapi,

Xese mumuru.

Oyanme xa ciino riitîkan̂e me nai ham okre,

kekn̂e tî.

23-24 Ero yinhîrî tak Tapi pen yepamtho Kaan n̂enpekn̂e Ixaw Yana komo yakir̂waman̂e xa tak.

Tîmtapotachonhîrî yaw rorono rma Mîk n̂enpekn̂e,

Xesus ha.

Yihcirî me ka Xuaw xakn̂e Ixaw Yana komo panatanmekn̂e me.

Kicicme awehtoponhîrî komo tak poxunkacoko awemicitome so,

kan̂e tî mîk xakn̂e Xuaw yîwya so.

25 Ero yinhîrî tak panatanmekno riitîkacho pahnoke tak exitaw Xuaw on wara tî kekn̂e hara noro,

Onoke warai me ow mîhtînoyat ha?

Kristu me katî ow mîhtînoyatu?

Noro pîn ow ha.

Mokyasî xa matko Noro xa amn̂e ohretawno me hara.

Karitî ro xa tak Mîk.

Noro tarî mici meero yîmhokan̂e pîn me wasî yîxawyakanî me ro mak oyexirî ke,

kekn̂e tî Xuaw.

Ero wa tî Xuaw kekn̂e Xesus poko.

26 Ero ke on wara wîîkesî awya so oyakno komo,

Abraaw yepamtho komo amyamro.

Anarî komo marha amyamro Kaan ponarono komo xa ha.

Awya so rma wa kesî Kaan Noro poko,

kakir̂waman̂e komo poko ha.

27 Camkî makî tko xatken̂e Xerusaren pono komo reha Noro poko.

Kristu xa Mîkro ham,

kahra ro makî tî xatken̂e Xesus poko.

Camkî xatken̂e weronomano rin̂enho pen komo nmewretho poko okwe.

Sabatu po roro n̂examro penî nmewretho nîmtapotarexe rma re ero poko rma xatken̂e camkî.

Ero ke Xesus pen takî tî n̂en̂ekapetken̂e okwe kayaritomo ya.

Weronomano rin̂enho pen komo mtapotachonho yaw roro rma n̂en̂ekapetken̂e.

28 Kicicme Xesus yehtopo yenîhra ro makî tko tî xatken̂e,

twaihkaxmu me ehtopo yenîhra.

Wara rma,

Waihkakî kr̂a,

ketken̂e rma tî Piratus ya.

29-30 Ero yinhîrî tak Kaan Karitan yaw roro Xesus pen ciitîkache tak yîwya so Noro yokoputho takî tî n̂enîhcetken̂e hara tpanaxkem poi.

Ewtarî yaka takî tî nahruyatken̂e.

Noronhîrî rma tko Kaan n̂enpakekn̂e hara waixa pen komo chewnonho.

31 Ero yinhîrî tak Xesus takî tî n̂esenpekn̂e takrono komo ya.

Pahxa tî Karireia pono komo mokyatken̂e Xesus yakro Xerusaren pona.

N̂examro ya tî n̂esenpekn̂e.

Yaake kaamo n̂he n̂esenpekn̂e yîwya so.

Ero ke Noro yehtoponho yekatîmn̂e me tak naxe akrononhîrî komo.

Mîk hak ya n̂ekatîmyaxe.

32 Awahworetopo komo xa tan amna n̂ekatîmyas awya so.

Pahxa rma tî Kaan n̂ekatîmyakn̂e kakir̂waman̂e komo mohtopo kporin pen komo ya,

ero wa kacho rma amna n̂ekatîmyas hara awya so.

33 Kporin pen komo yepamtho kîwyam.

Kn̂enîrî komo me rma Xesus n̂enpakekn̂e,

tîmtapotachonhîrî yaw roro.

Ero poko rma kesî Waano hara,

2 kacho.

Omumuru xa Amoro.

Oroto xa ero wa kiirî ha,

kesî ero Waano ha.

34 Xesus yenpakacho poko kekn̂e xa hara Kaan,

waipîn me ro mak tak enpakacho poko ha.

On wara kekn̂e,

Towîhnî me xa wa kîmtapowakn̂e Tapi yakronomacho poko.

Towîhnî me xa marha kîmtapowasî awakronomacho poko hara,

kekn̂e Kaan.

Xesus yenpakacho poko rma ero wa kekn̂e.

35 On wara marha kekn̂e Kaan Noro poko,

Omumuru ro xa Mîkro.

Ero ke Noro waipuche kohra ro mak miir̂asî yupunthîrî,

kekn̂e hara.

36-37 On wara xakn̂e Tapi pen,

tpoyino komo ka panatanmekyakn̂e pahkî.

Ero yinhîrî nîwînîkyakn̂e takî tî.

Noro pen yokoputho nahruyatken̂e porin pen komo yocho mîtkoso rma.

Ero ke kowakn̂e reha Tapi pen yokoputho.

Kohnî me reha tî xakn̂e Kaan n̂enpakatho,

kohnî me ro makî tî xakn̂e.

38 Ero ke omtapotarî men entacoko oyakno komo.

On wara kesî Kaan awya so,

Xesus yanme tak nasî kicicme awehtoponhîrî komo yîhcamnotopo,

kesî Kaan awya so.

39 Ero ke kir̂wan me tak Kaan keen̂axe so Noro pona een̂ataw kîwya so.

Ero warahra ro mak keen̂axe so Moises ya kpanatanmetopo ponaro mak kexitaw so.

Pîra ro thakwa mak okwe.

40 Ero ke on wara men esehtînocoko,

anarimaw na weronomano rin̂enho penî mtapotarî yaw roro rma men wa maxe amn̂e okwe.

41 On wara tî ketken̂e n̂examro pen,

Kîwîrîyakan̂e komo mak amyamro okwe.

Meserepokexe men wa amn̂e.

Ero yinhîrî tak mîwaiyaxe okwe.

Aweserepokacho komo me xa tak ciino wiir̂as amn̂e awaipînaw so rma ka.

Ero wa ciino ritopo manwekyaxe thakwa okwe.

Awya so ekatîmyataw rma manwekyaxe okwe,

ketken̂e.

N̂examro penî mtapotarî yaw roro rma men wa maxe amn̂e amyamro okwe,

kekn̂e tî Pawru yîwya so.

Ero wa tî kekn̂e iitono komo ya.

42 Ero yihnîrî tak Xutew komo takî tî cetken̂e hara esenmetopo komo yai.

Toche so tak on wara tî ketken̂e Xenciu kom hara Pawru komo ya,

Ai oyakno,

anarî sabatu po cma re amna ya mekatîmyaxe hara,

Xutew komo ya mekatîmcow ero wa kacho xa marha,

ketken̂e tî yîwya so.

43 Ero yinhîrî takî tî esenmexapunhîrî komo yepatakatîkache tak anarî komo makî tî cetken̂e Pawru yakro rma,

Banabe komo yakro.

Xutew Yana komo tî mîkyam cetken̂e mer̂pono pîn.

Xutew me ciixapu komo marha tî cetken̂e akro so,

Kaan ponarono komo.

N̂examro takî tî nahworetken̂e Pawru komo Kaan poko.

Kaan ya awakronomacho komo ponaro men ehcoko miya roro ha,

ketken̂e tî yîwya so.

Ero wa tî ketken̂e.

44 Taa,

ero yinhîrî tak mokyatken̂e xa hara iitono komo sabatu me enmapuche hara.

Ahnoro tî mokyatken̂e ha re ewto pono komo,

asakî makî tî mokuhra xatken̂e.

45 Ero ke cewresawra so tî Pawru komo n̂een̂atken̂e Xutew komo mer̂pono pîn komo mokrî ke n̂examro yentan̂e komo.

Ero ke kicicme so tî nîmtapowatken̂e poko so.

Yaarono pîn poko apanatanmekyaxe so kica,

ketken̂e tî Pawru poko.

Kaan poko marha tî nîmtapowatken̂e kicicme kica.

Ero wa tî xatken̂e okwe.

46 Ero ke Xutew komo ya takî tî ketken̂e Pawru,

Banabe kom ha,

camra ro mak takî tî ketken̂e yîwya so on wara,

Amna mokuche rma ka amna n̂ekatîmyakn̂e cma re awya so Kaanî mtapotarî.

Ero yenta xera ro mak mat ham okwe.

Waipînî ro me Kaan n̂irirî pîn me mesehtînoyat ham okwe.

Ero ke Xenciu komo ya makîrha tak amna n̂ekatîmyas hara.

47 Ero wara rma kesî Kporin komo amna ya.

On wara kesî,

Xenciu komo weyuru me tak kiice so.

Akir̂wamano ritopo mekatîmyaxe miyan komo ya rma,

roowo mapitawno komo ya meero,

kesî Kaan Karitan,

ketken̂e tî Pawru komo.

Ero wa tî ketken̂e Xutew komo ya.

48-49 Ero wa kacho yentache tawake takî tî xatken̂e Xenciu komo.

Centapore amna n̂encesî Kaanî mtapotarî okre,

ketken̂e tî.

Ero yimaw takî tî Xesus pona n̂een̂atken̂e Kaan nmen̂ekatho komo ahnoro,

waipin me ciisom me yînmen̂ekathîrî kom ha.

Ero yinhîrî takî tî Kporin komo mtapotarî n̂ekaiwakn̂e ero roowo pono komo ya miyan komo ya rma.

50 Ero yinhîrî on wara tak xatken̂e Xutew komo,

kicicme tî nîmtapowatken̂e wooxam komo yakro Pawru komo poko.

Kaan ponarono komo cma ha tî re mîkyam xatken̂e wooxam komo.

Antomano rin̂e pici komo tî mîkyam xatken̂e.

Antomano rin̂e komo ya marha tî ero wa ketken̂e.

Pawru,

Banabe komo,

n̂examro yemetanmetopo poko tî noro yipu komo panatanmekyatken̂e,

en̂epetome so.

Ero ke takî tî Pawru pen komo n̂en̂epetken̂e cewton komo poi okwe.

51 Tîtorî me tak Pawru komo takî tî n̂ehtapupunketken̂e,

Kicicme xa maxe okwe,

kacho tî.

Ero yinhîrî tak cetken̂e takî tî Ikon̂u pona hara.

52 Tahwore rma tko tî xatken̂e Xesus ponarono komo iitono komo,

Anciokia pono kom ha.

Kir̂wanî ro Yekatî ken̂e xa tî xatken̂e okre.

Ero wa tî xatken̂e.